Lukasi 1
1
Tunggáiána sura deꞌe
1-3Molámbiꞌ Teopilu#1:1-3 Teopilu - Lempóna: “tauna to mampokaꞌahiꞌ Pueꞌ Ala” ba “tauna to napokaꞌahiꞌ Pueꞌ Ala.” to kubiláꞌ.
Handaꞌ tauna moita mata apa to nabábehi Pueꞌ Iesu tempóNa ara mani i duniáꞌ deꞌe, hai rapahaweꞌákeꞌ bámbári to maroꞌa mokana i Hia. Araheꞌ woꞌo to moukiꞌ tuntukáná Iesu hangko i tauna to moita mata pobágóꞌna Iesu. Noꞌonoꞌ woꞌo kódóꞌ lao mpiiꞌ kupekuneꞌ i tauna to moita mata apa to nabábehi Iesu, onoꞌ miꞌi haneꞌi kupakanótó moukiꞌ sura deꞌe, bona nuisá upu-upu to mewaliꞌ hangko i rungu-runguna Iesu mantepuꞌu mobágóꞌ i oloꞌkiꞌ, haweꞌ-haweꞌ i kahópóꞌána. 4Tunggáiángkuꞌ, bona nuisá ntepuꞌu katoꞌuna apa to rapaturoꞌákoꞌ tauna ntániꞌna.
Kaꞌina rapoánákana Iohane Toperiu rapahaweꞌ i Sakaria
5Tempóna Datu Herode Mahile#1:5 Datu Herode Mahile: Ia miꞌi umána Herode Antipa to mepárentá tempóna Iesu rapapate. mepárentá mani i tampoꞌ Iudá, ara hadua tadulako menómbá to rahangaꞌ Sakaria. Sakaria iti hangko i kolompoꞌna Abia.#1:5 Básá 1 Tuntukáná Datu 24:10. Toinána rahangaꞌ Elisabeꞌ. Ia woꞌo pemuleꞌána Haruni Tadulako Menómbá Mahile to rungu-runguna hangkoia.#1:5 Básá Pesuwuꞌá 28:1. 6Tohamboko iti manótó bábehiáraꞌ i peitána Pueꞌ Ala, láwiꞌ rapeuláꞌi ntepuꞌu upu-upu áturá hai párentána Pueꞌ Ala. 7Agáiáná, tiꞌaraheꞌ moánáꞌ láwiꞌ Elisabeꞌ lalo hai matoina miꞌi, hai Sakaria woꞌo matoama miꞌi.
8-9Hangkani tempó, tadulako-tadulako menómbá to hangko i kolompoꞌ Abia, tepasuaꞌ Sakaria, mobágóꞌ i Támbina Pueꞌ Ala.#1:8-9 Ara rompuloꞌ hai iba kolompoꞌ tadulako menómbá. Rongkani i lalu hampare hangaa-ngaa mobágóꞌheꞌ haminggu i lalu Támbina Pueꞌ Ala. Mouláꞌ ádáraꞌ, rabolobiaꞌ bona mopakanótó ba heáná to tepileꞌi mointu dupaꞌ i lalu Támbina Pueꞌ Ala.#1:8-9 Básá Pesuwuꞌá 30:34-38. Hangkani peá i lalu katueꞌna tadulako menómbá peisá mointu dupaꞌ. To kana bolobiaꞌ ia miꞌi Sakaria. 10Mewaliꞌ, tangaꞌraꞌ tauna to handaꞌ mekakae i tangabaa, mesuaꞌ miꞌi Sakaria i lalu Támbina Pueꞌ Ala lao mointu dupaꞌ.#1:10 Rongkani peá hangaloá hadua tadulako menómbá mointu dupaꞌ, ia miꞌi mepulo hai kalumbaꞌ.
11I tempó iti, hadua malaꞌekana Pueꞌ Ala mopatongawaꞌ wátána i Sakaria. Malaꞌeka iti meángkáꞌ tándáꞌ i kuánána paintuá dupaꞌ. 12Kanaitána Sakaria malaꞌeka iti, napotingkáráꞌ hai malááꞌ. 13Agáiáná nauliꞌ malaꞌeka iti, “Sakaria, ineeꞌkoꞌ malááꞌ, láwiꞌ pekakaemu nahádi miꞌi Pueꞌ Ala. Elisabeꞌ toinámu ina moánáka hadua ánángkóiꞌ tobaleilo to hangaa-ngaa nuhangaꞌ Iohane.#1:13 Iohane - Lempóna: “Pueꞌ Ala to maroꞌa.”
14Ánángkóiꞌ iti ina nupokagóeꞌ ntepuꞌu,
hai i karapoánákana, ina rapokagóeꞌ woꞌo handaꞌ tauna.
15Ia ina mewaliꞌ tauna to mahile tueꞌna i peitána Pueꞌ Ala,
hai ia tiꞌara ina mainu apa to melángui,
{tandaꞌna ia miꞌi huoꞌána Pueꞌ Ala}.#1:15 Ara tauna to rauliꞌ toNasar to mopáliáheꞌ mainu to melángui, tandaꞌ kaꞌárána dándiraꞌ i Pueꞌ Ala. Básá Poimbaꞌ 6:1-4; 1 Semueli 1:11.
Hangko tiꞌara mani rapoánáka,
ia ina nakuasaꞌi miꞌi Inao to Magasaꞌ.
16Moliu pepaturoꞌna, ia ina moteteꞌ handaꞌ toSáráeliꞌ
bona mepoináláiheꞌ huleꞌ i Pueꞌ Ala
to rapenómbái toioruraꞌ.
17Ánáꞌmu iti ina haweꞌ ioru hangko i Pueꞌ.
Kamaróhóna hai kuasaꞌna ina nodo nabiꞌ Eliá hangkoia.#1:17 Iba átuna parena lábi hangko tiꞌara mani Iohane rapoánákana, nabiꞌ Maleaki manguliꞌ nabiꞌ Eliá ina mesuleꞌ mai i duniáꞌ. Básá Maleaki 4:5-6; Matiu 11:14; 17:10-13.
Ánti kuasaꞌna hai pepaturoꞌna,
ia ina mopahintuwuꞌ ánángkóiꞌ hai umáraꞌ,
hai tauna to tiꞌaraheꞌ meuláꞌ i Pueꞌ,
ina nateteꞌheꞌ huleꞌ i rárá to manótó.
Upu-upu to nabábehi ina mopatimama laluraꞌ tauna
bona natarimaheꞌ Pueꞌ.”
18Mekuneꞌ Sakaria i malaꞌeka, “Noumbá miꞌi kakuisána katoꞌuna to nuꞌuliꞌ iti? Láwiꞌ matoamamoꞌ, hai toinángkuꞌ woꞌo matoina miꞌi.”
19Nahániki malaꞌeka, “Kódóꞌ deꞌe Gábáráeliꞌ.#1:19 Gábáráeliꞌ: Básá woꞌo Danieli 8:16; 9:21. Kódóꞌ miꞌi to meángkáꞌaꞌ i lindoꞌna Pueꞌ Ala mampegiá hawaꞌNa. Ia miꞌi to mohuoꞌaꞌ mai, mopahaweꞌákoꞌ bámbári to maroꞌa deꞌe. 20Apa to kuhángáꞌáꞌámokoꞌ ininá, bateꞌna ina mewaliꞌ ane haweꞌ miꞌi tempóna. Mewaliꞌ láwiꞌ tiꞌara nupoinálái laluitangkuꞌ, mantepuꞌu deꞌe-deꞌe, tiꞌarapokoꞌ peisá molaluita duuꞌna tebukeki apa to kuꞌuliꞌ ininá.”#1:20 Iba miꞌi átuna parena, tiꞌara ara to napahaweꞌ Pueꞌ Ala i taunáNa.
21Tangaꞌna Sakaria i lalu Támbina Pueꞌ Ala, tauna to handaꞌ makalelamoheꞌ mepegiá. Rapowuli, moapa riꞌi haneꞌi marue gaga? 22I kapesuwuꞌna Sakaria, ia tiꞌara piꞌi peisá molaluita, morao-rao perái, onoꞌ miꞌi haneꞌi tongawaꞌ i tauna to handaꞌ kamoitána hampákáꞌ pampetudeꞌá i lalu Támbina Pueꞌ Ala.
23Hópóꞌ miꞌi tempóna mobágóꞌ i Támbina Pueꞌ Ala,#1:23 Sakaria mobágóꞌ haminggu i Támbina Pueꞌ Ala. Básá to teukiꞌ i wóiꞌ Lukasi 1:8-9. pohuꞌ miꞌi Sakaria hangko i Ierusale, mesuleꞌ lao i wánuána.#1:23 wánuána: Támbina Sakaria ara i buluꞌna i tampoꞌ Iudá, i rawa hangko i kótá Ierusale. Básá Lukasi 1:39-40. 24Tiꞌara marue hangko ionoꞌ, morodua mpuꞌu miꞌi Elisabeꞌ toinána. Lima wulána kamaruena, Elisabeꞌ mengkatuhu peá i lalu támbina. Nauliꞌ, 25“To mewaliꞌ deꞌe, ánti kuasaꞌna Pueꞌ i kódóꞌ! Deꞌe-deꞌe Nawátiꞌaꞌ woꞌo bona moánáꞌaꞌ, mewaliꞌ tiꞌara piꞌi kóiꞌ inaongkuꞌ ánti kalalongkuꞌ.”
Kaꞌina rapoánákana Iesu rapahaweꞌ i Maria
26Molumao miꞌi ini wulána Elisabeꞌ morodua, Pueꞌ Ala mohuoꞌ malaꞌeka Gábáráeliꞌ lao i wánuá Nasare i tampoꞌ Galilea, 27bona mampohidupaꞌá hadua ánáꞌntawine to rahangaꞌ Maria. Ánáꞌntawine iti nakaróhói miꞌi ngkóráꞌ hai hadua ánáꞌntomoane to rahangaꞌ Iusupu, pemuleꞌána Datu Daudiꞌ.
28Kahaweꞌna malaꞌeka iti i Maria, nahángáꞌá, “Tabeá. Pueꞌ Ala to mamporángákoꞌ! Io miꞌi to nawátiꞌ Pueꞌ Ala!” 29Wuli ntepuꞌu Maria mohádi laluitana malaꞌeka iti, hai napekiri apa tunggáiána. 30Nauliꞌ wopiꞌi malaꞌeka i hia, “Ineeꞌkoꞌ malááꞌ Maria, láwiꞌ kamaꞌahiꞌna Pueꞌ Ala tongawaꞌ i hio. 31Ina moroduakoꞌ, hai ina moánákakoꞌ hadua ánángkóiꞌ tobaleilo to hangaa-ngaa nuhangaꞌ Iesu. 32Ina mahile tueꞌNa, hai Ia ina rauliꞌ Ánáꞌna Pueꞌ Ala to i Surugáꞌ. Hai Pueꞌ Ala ina moángkáꞌ Ánángkóiꞌ iti mewaliꞌ datu nodo Datu Daudiꞌ toioruNa.#1:32 Básá 2 Semueli 7:12-13,16; Iesaia 9:6-7; Ieremia 23:5-6. 33Ánáꞌmu iti ina mopárentá toSáráeliꞌ duuꞌna i rue-ruena, hai popárentáNa iti tiꞌara ina mokahópóꞌá.”
34Nauliꞌ Maria i malaꞌeka iti, “Noumbá miꞌi kaꞌina mewaliꞌna apa to nuꞌuliꞌ, láwiꞌ tiꞌara maniaꞌ motoama?”
35Nahániki malaꞌeka, “Inao to Magasaꞌ ina mendáulu i hio, hai kuasaꞌna Pueꞌ Ala to i Surugáꞌ ina mobóungángikoꞌ. Onoꞌ miꞌi haneꞌi Ánángkóiꞌ to ina nuánáka iti ina magasaꞌ hai ina rauliꞌ woꞌo Ánáꞌna Pueꞌ Ala. 36Bona nuisá katoꞌuna laluitangkuꞌ i hio: halalumu Elisabeꞌ to matoina miꞌi hai rauliꞌ lalo, deꞌe-deꞌe morodua miꞌi molumao ini wulána! 37{Ineeꞌ nupotingkáráꞌ,} láwiꞌ ane i Pueꞌ Ala, tiꞌara ara to tiꞌara Nabuku Nabábehi.”
38Nauliꞌ Maria, “Kódóꞌ deꞌe huoꞌánaꞌaꞌ Pueꞌ Ala. Mewaliꞌ apa to nuhángáꞌáꞌáꞌaꞌ, bateꞌna ina mewaliꞌ i wátángkuꞌ.” Roo onoꞌ, pohuꞌ miꞌi malaꞌeka iti mopálehi Maria.
Maria hai Elisabeꞌ
39Hangko ionoꞌ, pohuꞌ miꞌi Maria hangko i tampoꞌ Galilea, nagagu lao i tampoꞌ Iudá i hambuaꞌ wánuá to i buluꞌna.#1:39 Hangko i Galilea haweꞌ i tampoꞌ Iudá, rekeꞌ-rekeꞌna hangatu ba hangatu ini puloꞌna kiló kakaraoꞌna, ia miꞌi tálu ba iba alona i polumaona. 40Kahaweꞌna i támbina Sakaria, Maria liliu mesuaꞌ i lalu támbi haneꞌi motabe Elisabeꞌ. 41Kanahádina Elisabeꞌ petábena Maria, kásáliu rumihi pokalena ánángkóiꞌ to i lalu taꞌina Elisabeꞌ. Tempó onoꞌ, ia nakuasaꞌi Inao to Magasaꞌ, 42haneꞌi molaluita napasimbuku, nauliꞌ, “Io miꞌi to nawátiꞌ Pueꞌ Ala melumbuꞌ hangko i upu-upu towawine, hai nawátiꞌ woꞌo Pueꞌ Ala Ánángkóiꞌ to i lalu taꞌimu iti. 43Heánáꞌaꞌ paꞌi kódóꞌ deꞌe haneꞌi io, inána Pueꞌ to kupenómbái,#1:43 Pueꞌ to kupenómbái: Naisá miꞌi Elisabeꞌ, ánáꞌna Maria ia miꞌi Pueꞌ, hai ina mewaliꞌ Datu Topehómpóꞌ. maiaꞌ nupombelámbiꞌá? 44I kakuhádina petábemu, kásáliu mokale ánángkóiꞌ to i lalu taꞌingkuꞌ láwiꞌ góeꞌ. 45Ánti pepoináláimu i laluitaNa Pueꞌ, morasiꞌ ntepuꞌukoꞌ, láwiꞌ apa to Nahángáꞌákoꞌ, bateꞌna ina mewaliꞌ!”
Nani petóiána Maria i Pueꞌ Ala
46Nauliꞌ Maria:
“Hangko i lalungkuꞌ ntepuꞌu, motóiáꞌaꞌ Pueꞌ.
47Góeꞌ ntepuꞌu lalungkuꞌ
láwiꞌ Pueꞌ Ala mampelaeaꞌ.
48Nabuhinaoaꞌ, wongkódóꞌá, huoꞌáNa to mengkaiwóiꞌ.
Mantepuꞌu deꞌe-deꞌe, upu-upu tauna ina manguliꞌ
kakódóꞌna miꞌi to nawátiꞌ Pueꞌ Ala,
49láwiꞌ Pueꞌ Ala to Makuasaꞌ mopatongawaꞌ i kódóꞌ
kamaróhóna kuasaꞌNa.
Magasaꞌ ntepuꞌu hangaꞌNa!
50Napatongawaꞌ ahiꞌNa i upu-upu tauna
to mengkoruꞌ i Hia,
duuꞌna haweꞌ i pemuleꞌáraꞌ.
51Ánti kamaróhóna kuasaꞌNa,
tauna to mampepemahile,
Nagááꞌ-gááꞌheꞌ bona tunggáiáraꞌ tiꞌara mewaliꞌ.
52Tauna to makuasaꞌ,
Napopendáuluheꞌ hangko i lántiꞌraꞌ,
agáiáná tauna to mengkaiwóiꞌ, Napaiwongkoheꞌ.
53Tauna to marimi,
Napamabuhuheꞌ hai pandeꞌ to maroꞌa.#1:53 Lempóna: Tauna to moundeꞌ mampeliꞌ Pueꞌ, Nawátiꞌheꞌ. Básá woꞌo Matiu 5:6; Iohane 6:35; Pilipi 4:19; Sura Petóiá 23:1; 111:5.
Agáiáná topebuku,#1:53 topebuku - Lempóna: tauna to mampekiri tiꞌaraheꞌ moparaluu Pueꞌ Ala. Nawuraheꞌ hai tiꞌara ara to raꞌánti.
54-55Pueꞌ Ala mobukeki miꞌi dándi
to Nadándi hangkoia i toioruntaꞌ Burahima hai i pemuleꞌána.
Onoꞌ miꞌi haneꞌi kitaꞌ toSáráeliꞌ Natulungikeꞌ,
hai Napopaitaꞌákeꞌ ahiꞌNa duuꞌna i rue-ruena.”#1:54-55 Básá Sura Petóiá 98:3.
56Maria toroꞌ hingkakani hai Elisabeꞌ rekeꞌ-rekeꞌna tálu wulána kamaruena, hangko mesuleꞌ riꞌi lao i wánuána.
Karapoánákana Iohane Toperiu
57Haweꞌ miꞌi tempóna Elisabeꞌ moánáꞌ, ia moánáka hadua ánángkóiꞌ tobaleilo. 58I karahádina rángána hai halalunaheꞌ, Pueꞌ mopatongawaꞌ kamaꞌahiꞌNa i Elisabeꞌ, góeꞌheꞌ woꞌo.
59Gáná miꞌi haminggu tinuwuꞌna ánángkóiꞌ iti, haweꞌmoheꞌ upu-upu rángáraꞌ hai halaluraꞌ ina mobábehiheꞌ ádá petileꞌ mouláꞌ ádáraꞌ toIahudiꞌ,#1:59 ádá petileꞌ mouláꞌ ádáraꞌ toIahudiꞌ: Petileꞌ ia miꞌi tandaꞌ tobaleilo toIahudiꞌ mewaliꞌ miꞌi taunána Pueꞌ Ala. Básá Pewaliꞌána 17:9-14. hai ina mohangaꞌheꞌ ánángkóiꞌ iti Sakaria, mouláꞌ hangaꞌna umána, 60agáiáná nauliꞌ inána, “Ineeꞌ! Hangaa-ngaa rahangaꞌ riꞌi Iohane.”
61Mehániꞌheꞌ, rauliꞌ, “Agáiáná tiꞌara mani ara halalumi to rahangaꞌ onoꞌ!” 62Onoꞌ miꞌi haneꞌi Sakaria raporao-raoá bona rapekuneꞌ i hia ba heáná to naundeꞌ rapopohangaꞌ ánáꞌna.
63Sakaria membiáꞌ hambuaꞌ watu poukiꞌá haneꞌi naukiꞌ, “Hangaꞌna Iohane.” Tingkáráꞌheꞌ upu-upu. 64Hai i tempó iti woꞌo, Sakaria kásáliu peisá molaluita, haneꞌi ia motóiá Pueꞌ Ala. 65Upu-upu to pewaliꞌ iti rapotingkáráꞌ tauna to ara i támbina Sakaria, hai tebámbári i upu-upu wánuá to ara i buluꞌna tampoꞌ Iudá. 66Bámbári to humalele iti, rapailalu upu-upu tauna to mohádi. Onoꞌ miꞌi haneꞌi rauliꞌ, “Apa to ina mewaliꞌ i lalu katueꞌna ánángkóiꞌ iti?” Tongawaꞌ kaꞌárána miꞌi kuasaꞌna Pueꞌ Ala i hia.
Sakaria mopahaweꞌ laluitana Pueꞌ
67Sakaria umána ánángkóiꞌ iti, nakuasaꞌi miꞌi Inao to Magasaꞌ, haneꞌi mopahaweꞌ laluita deꞌe to hangko i Pueꞌ Ala, nauliꞌ:
68“Maikeꞌ motóiá Pueꞌ Ala to tapenómbái, kitaꞌ toSáráeliꞌ,
láwiꞌ Ia to maikeꞌ mampelae
hai maikeꞌ mokábáhá hangko i ewálintaꞌ!
69-70Nahuoꞌ mai hadua Datu to makuasaꞌ
to peisá mohómpókikeꞌ hangko i dósántaꞌ,
nodo to napahaweꞌ miꞌi Pueꞌ Ala
moliu nábiꞌ-nábiꞌNa to magasaꞌ.
Datu iti pemuleꞌána Datu Daudiꞌ, huoꞌáNa hangkoia.#1:69 Básá Ieremia 23:5-6; Sura Petóiá 132:17.
Pueꞌ Ala modándi
71kaꞌina Nakábáhántaꞌ hangko i ewálintaꞌ
hai hangko i kuasaꞌraꞌ tauna to mokáhihiꞌkeꞌ.
72Pueꞌ Ala mopatongawaꞌ miꞌi ahiꞌNa i toioruntaꞌ,
hai mobukeki miꞌi dándiNa to magasaꞌ.#1:72 dándiNa to magasaꞌ: Rápáꞌna, básá Pewaliꞌána 12:2-3; 22:17-18.
73-75Maróhó ntepuꞌu podándiNa i Burahima toioruntaꞌ,#1:73 Básá woꞌo Iberani 6:13-18.
bona kitaꞌ to mewaliꞌ pemuleꞌána
ina nakábáhákeꞌ Pueꞌ Ala hangko i ewálintaꞌ,
bona mengkoruꞌkeꞌ i Hia
hai tiꞌarakeꞌ paraluu malááꞌ.
Ina mewaliꞌkeꞌ taunáNa to magasaꞌ
hai manótó i peitáNa
haweꞌ i kahópóꞌána katueꞌtaꞌ.
76Hai io, ánáꞌkuꞌ, ina rauliꞌkoꞌ nábiꞌna Pueꞌ Ala to i Surugáꞌ,
láwiꞌ io to rapaioru hangko i Pueꞌ
bona mopatimama laluraꞌ tauna kaꞌina haweꞌNa.#1:76 Básá Iesaia 40:3; Lukasi 3:4.
77Ina nupahaweꞌáheꞌ woꞌo
noumbá rárána bona dósáraꞌ peisá teámpungi
bona peisáheꞌ molámbiꞌ katehómpóꞌ to hangko i Pueꞌ Ala.
78Ánti kamaꞌahiꞌna Pueꞌ Ala,
Ia mai hangko i surugáꞌ maimokeꞌ Napelae.
Nodo pembetona alo,
79to mohimbaꞌi duniáꞌ to makáindi deꞌe,
noꞌonoꞌ woꞌo Pueꞌ ina mowangkaꞌi tauna to tueꞌ i lalu kamakáindi
hai mampoáweá kapate.
Ina Nateteꞌkeꞌ bona molámbiꞌkeꞌ roꞌa ngkatueꞌ.”
{Eneꞌ miꞌi laluita to nauliꞌ Sakaria.}
80Ánáꞌna Sakaria iti, tetámbái kamahilena hai tetámbái woꞌo kamaróhóna pepoináláina. Ia lao toroꞌ i pádá loriꞌ duuꞌna haweꞌ tempóna mantepuꞌu mopahaweꞌ ngkóráꞌna Pueꞌ i toSáráeliꞌ.
Currently Selected:
Lukasi 1: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
