Lukasi 12

Ragiꞌraꞌ toParisi

(Mat. 10:26-27)

1-2I tempó iti woꞌo, i sábuna tauna to haweꞌ láwiꞌ mampoinaoheꞌ moita Iesu. Mombegihiꞌ-gihiꞌmoheꞌ álána mombekada-kadaheꞌ. I tempó iti, mantepuꞌu miꞌi Iesu mepaturoꞌ, rungu-runguna i topeguruNa, Nauliꞌ, “Maingáꞌ-ingáꞌkou i toParisi, láwiꞌ mampe to maroꞌa peheꞌ. Hira nodoheꞌ ragiꞌ. Agáiáná, upu-upu to ara i laluraꞌ ina tebungkáhi, hai upu-upu to tewuniángi ina tongawaꞌ. 3Maingáꞌ-ingáꞌkou woꞌo, láwiꞌ apa to nipolaluita i tangaꞌ káindi, bateꞌna ina rahádi mabaa. Hai apa to nikuwiá rángámi i lalu lintuꞌmi to tetuko, bateꞌna ina rabámbári i humalele wánuá.”

Hangaa-ngaa malááꞌkou i Pueꞌ Ala

(Mat. 10:28-31)

4“Halalu-halalu, nipehádingi maroꞌa laluitaNgkuꞌ: ineeꞌkou mampokalááꞌ tauna to mampoinaoheꞌ mopapatekou, láwiꞌ wátámi peá to peisá rapapate. Upu onoꞌ, tiꞌara piꞌi ara to peisá rabábehi i kómu. 5Agáiáná to hangaa-ngaa nipokalááꞌ ia miꞌi Pueꞌ Ala, láwiꞌ Ia to makuasaꞌ moala peinaomi, hai makuasaꞌ woꞌo motibekou i lalu naraka. Toꞌu ntepuꞌu to Kuhángáꞌákou deꞌe: Ia peá to hangaa-ngaa nipokalááꞌ.

6Lima báꞌána dena peisá rapobaluꞌ rompepaꞌ peá dóiꞌ see. Agáiáná kehapiꞌ noꞌonoꞌ, tiꞌara ara haweꞌ hambaꞌa to tiꞌara nakádipurá Pueꞌ Ala. 7Pelumbuꞌna mani kómu taunáNa. Mogalo riꞌi imbaꞌna weluáꞌmi, naisá Pueꞌ Ala kahandaꞌna. Mewaliꞌ ineeꞌkou malááꞌ. Melumbuꞌ pekádipurána Pueꞌ Ala i kómu haneꞌi pokádipuráNa dena to handaꞌ.”

Nipangákuꞌ Pueꞌ Iesu i lindoꞌraꞌ tauna to handaꞌ

(Mat. 10:32-33; 12:32; 10:19-20)

8“Nipehádingi maroꞌa laluitaNgkuꞌ: heáná to mopangákuꞌ i lindoꞌraꞌ tauna peuláꞌna i Kódóꞌ Ánáꞌ Mánusiá, ia woꞌo ina Kupangákuꞌ i UmáNgkuꞌ i lindoꞌraꞌ malaꞌekana Pueꞌ Ala. 9Agáiáná heáná to mosápuákaꞌAꞌ i lindoꞌraꞌ tauna, ia woꞌo ina Kusápuáka i lindoꞌraꞌ malaꞌekana Pueꞌ Ala.

10Heáná to mosápuáka kaKódóꞌna Ánáꞌ Mánusiá, salaꞌ iti peisá mani raꞌámpungi. Agáiáná heáná to mosápuáka Inao to Magasaꞌ, tiꞌara ara ámpungina.#12:10 Básá woꞌo Marakusi 3:28-29; 1 Iohane 5:16.

11Ane raꞌántikou i lindoꞌraꞌ tadulako agama ba i topopárentá wánuá ánti peuláꞌmi i Kódóꞌ, ineeꞌkou malááꞌ ba apa to ina nihángáꞌáheꞌ ba noumbá pehániꞌmi, 12láwiꞌ i tempó iti woꞌo, Inao to Magasaꞌ ina mopakanótóákou apa to ina niuliꞌ.”

Ngkóráꞌ pándiriꞌ kana i topebuku to bebe

13Ara hadua tauna hangko i oloꞌraꞌ tauna to handaꞌ to mohungkuki Iesu, nauliꞌ, “Guru, Nuhángáꞌá halalungkuꞌ to wutuꞌ, bona naweꞌiaꞌ gáláꞌkuꞌ hangko i sosorana umángkiꞌ.”

14Agáiáná nahániki Iesu, “Halalu, heáná to moángkáꞌAꞌ mewaliꞌ topotangaꞌ-tangaꞌi pogálá sosorana umámi?” 15Roo onoꞌ, nauliꞌ Iesu i tauna to handaꞌ, “Maingáꞌ-ingáꞌkou hai maroꞌa-roꞌakou, ineeꞌkou mampoinao morámpu párewá ngkáduniáꞌ, láwiꞌ kehapiꞌ handaꞌ párewámi, tiꞌara iti to mopakanótó kamaroꞌana katueꞌtaꞌ.”

16Hangko ionoꞌ, napahaweꞌ Iesu ngkóráꞌ pándiriꞌ deꞌe, Nauliꞌ, “Ara hadua topebuku, maeláꞌ tampoꞌna hai to natudaꞌ handaꞌ ntepuꞌu wuaꞌna. 17Nauliꞌ topebuku iti i laluna, ‘Apa to hangaa-ngaa kubábehi, láwiꞌ tiꞌara piꞌi gáná buhoꞌkuꞌ kupamboliꞌi parengkuꞌ?’ 18Kahópóꞌána, nauliꞌ, ‘Rángina miꞌi buhoꞌ to kókóiꞌ deꞌe kugero, haneꞌiaꞌ moaró to mahile, bona peisá kupamboliꞌi upu-upu parengkuꞌ hai párewángkuꞌ. 19Roo onoꞌ ina kuꞌuliꞌ: tiꞌarapoꞌ paraluu mobágóꞌ, láwiꞌ handaꞌ pambolingkuꞌ. Gáná miꞌi kupakeꞌ bahangapai parena. Ina mengkaroomoꞌ mobágóꞌ, ina mandeꞌ peaꞌ hai mainu i lalu kagóeꞌ-góeꞌ!’

20Agáiáná nahángáꞌá riꞌi Pueꞌ Ala, ‘Ee tobebe! Káindi deꞌe, ina matemokoꞌ, mewaliꞌ upu-upu to nurámpu iti, heáná miꞌi pueꞌna?’ ”

21KarooNa mopahaweꞌ ngkóráꞌ pándiriꞌ iti, Iesu manguliꞌ, “Noꞌonoꞌ miꞌi pewaliꞌna i tauna to mohárungá peá kapebukuraꞌ, ane tiꞌaraheꞌ mehárungá bukeꞌ-bukeꞌ i Pueꞌ Ala.”

Ineeꞌ karaoꞌ inaomi

(Mat. 6:19-21,25-34)

22Roo onoꞌ, Iesu molaluita i topeguruNaheꞌ, Nauliꞌ, “Onoꞌ miꞌi haneꞌi Kuhángáꞌákou: ineeꞌ nipokaraoꞌ inao kana i katueꞌmi ba niuliꞌ, ‘Apa miꞌi to taꞌandeꞌ?’ ba ‘Apa miꞌi to tapowaruꞌ?’ 23Láwiꞌ katueꞌmi melumbuꞌ hangko i pandeꞌ hai wátámi melumbuꞌ mani hangko i pewaruꞌ. 24Nipeita tádáhi kaaꞌ. Tiꞌaraheꞌ mowiáꞌ, tiꞌaraheꞌ mepare, tiꞌara woꞌo ara buhoꞌraꞌ, agáiáná kehapiꞌ noꞌonoꞌ, pandeꞌraꞌ bateꞌna napatimama Pueꞌ Ala. Apa mani kómu. Melumbuꞌ mani pekádipurána Pueꞌ Ala i kómu hangko i tádáhi. 25Apa miꞌi pobunduꞌána handaꞌ to nipekiri? Kehapiꞌ karaoꞌ inaomi mampekiri mampopengaa, tiꞌarakou peisá motámbái tinuwuꞌmi, kehapiꞌ hambengiá peá. 26Mewaliꞌ, ane tiꞌara nibuku mobábehi to manangkoꞌ iti, moapa riꞌi haneꞌi nipokalááꞌ mampopengaa? 27Peita bungaꞌ to tueꞌ i pádá. Tiꞌaraheꞌ mobágóꞌ, tiꞌaraheꞌ woꞌo mandau, agáiáná Kuhángáꞌákou, mogalo riꞌi Datu Salomo to pebuku ntepuꞌu, waruꞌna tiꞌara hibali hai peraeꞌna bungaꞌ iti. 28Rumpuꞌ tueꞌ deꞌe-deꞌe i pádá hai kahalona rahunu, agáiáná kehapiꞌ noꞌonoꞌ, Pueꞌ Ala mampoperaeꞌ oaꞌ rumpuꞌ iti. Apa mani kómu! Melumbuꞌ ntepuꞌu pekádipurána Pueꞌ Ala i kómu. Mewaliꞌ, moapa riꞌi haneꞌi tiꞌara nihárungá pekádipuráNa iti? 29Ineeꞌ karaoꞌ inaomi ba niuliꞌ, ‘Apa miꞌi to taꞌandeꞌ hai tainu, hai apa miꞌi woꞌo to tapowaruꞌ?’ 30Upu-upuna iti rapepekiri oaꞌ tauna to tiꞌara moisá Pueꞌ Ala. Agáiáná kómu, ineeꞌ nipokaraoꞌ inao, láwiꞌ upu-upu to niparaluu i lalu katueꞌmi, naisá miꞌi aha Umámi to i surugáꞌ. 31Mewaliꞌ, hangaa-ngaa nipaioru popárentána Pueꞌ Ala i lalu katueꞌmi, hai upu-upuna to niparaluu bateꞌna ina Naweꞌikou.”

Párewá i surugáꞌ

32Iesu mopaliliu wopiꞌi laluitaNa, Nauliꞌ, “Kómu to meuláꞌ i Kódóꞌ, kehapiꞌ tiꞌarakou handaꞌ, ineeꞌkou malááꞌ, láwiꞌ Pueꞌ Ala Umámi góeꞌ ntepuꞌu mokámpáikou hai motarimakou i lalu popárentáNa.#12:32 Peisá woꞌo ralimbá: Pueꞌ Ala Umámi góeꞌ ntepuꞌu mopileꞌikou bona mepárentákou hingkakani hai Ia. Básá Danieli 7:18; Lukasi 22:29-30; 2 Timotiu 2:11-12; Pampetudeꞌá 20:6. 33Onoꞌ miꞌi haneꞌi Kuhángáꞌákou: nipobaluꞌ miꞌi párewámi, hai hólóna niweꞌiheꞌ tauna to meahiahiꞌ tueꞌraꞌ. Láwiꞌ ane nibábehi noꞌonoꞌ, lempóna, párewámi niwoli i lalu pemboliá to tiꞌara peisá marugiꞌ, ia miꞌi, i lalu surugáꞌ. Párewámi to ionoꞌ tiꞌara ina matántá, láwiꞌ tiꞌara peisá rapanako hai tiꞌara woꞌo peisá naꞌandeꞌ bubuꞌ. 34Láwiꞌ apa to nipaioru i lalu katueꞌmi, bateꞌna iti oaꞌ to nipekiri.”#12:34 Lempóna: ane niundeꞌ molámbiꞌ háwángina hangko i Pueꞌ Ala, pehárungámi hangaa-ngaa bukeꞌ-bukeꞌ i Hia.

Hawiꞌ to timama oaꞌ

(Mat. 24:43-51)

35-36Roo onoꞌ, napahaweꞌ Iesu ngkóráꞌ pándiriꞌ deꞌe, Nauliꞌ, “Hangaa-ngaa maingáꞌ-ingáꞌkou oaꞌ hai hangaa-ngaa timama ntepuꞌukou, bona ineeꞌkou napatingkáráꞌ ba apa peá to morampekou. Kómu hangaa-ngaa nodokou hawiꞌ to mampegiáheꞌ pueꞌraꞌ mesuleꞌ hangko i posusaꞌá petauna. Hawiꞌ iti, timamaheꞌ oaꞌ ina mobágóꞌ,#12:35 timamaheꞌ oaꞌ ina mobágóꞌ - I lalu básá Iunani: pámpouraꞌ teweweha miꞌi i hopeꞌraꞌ. hai huluꞌraꞌ tueꞌ oaꞌ. Ane haweꞌ miꞌi pueꞌraꞌ mokadoꞌ babaꞌ, kásáliu lao rabungkáhi. 37Morasiꞌheꞌ hawiꞌ to timama oaꞌ mampegiá duuꞌna pueꞌraꞌ haweꞌ. Toꞌu to Kuhángáꞌáꞌákou deꞌe: pueꞌraꞌ iti ina moala waruꞌ hawiꞌ, napakeꞌ, haneꞌi hawiꞌnaheꞌ napopehoda, hai ia haduduána to ina moróráheꞌ.#12:37 Tiꞌara biásá pueꞌ mokádipurá hawiꞌna, apa mani i posusa. Agáiáná Iesu mopakeꞌ ngkóráꞌ pándiriꞌ iti mopakanótó apa to ina Nabábehi i taunáNa i surugáꞌ. (Básá Matiu 20:28; Lukasi 22:27; Iohane 13:3-17.) Básá woꞌo mokana i posusa to ina mewaliꞌ i surugáꞌ. (Lukasi 13:29; 14:15-24; 22:16.) 38Morasiꞌ ntepuꞌuheꞌ hawiꞌ to mepegiá hai timama i kaꞌina haweꞌna huleꞌ pueꞌraꞌ, kehapiꞌ i tangaꞌ káindi ba impirái kahaweꞌána.

39Hangaa-ngaa nipailalu ngkóráꞌ pándiriꞌ deꞌe: ane kenaisái ami pueꞌ támbi impirá kaꞌina haweꞌna topanako, bateꞌna ina maingáꞌ-ingáꞌ; tiꞌara ina napatodáhi mesuaꞌ i lalu támbina. 40Onoꞌ miꞌi haneꞌi kómu woꞌo hangaa-ngaa timamakou oaꞌ, láwiꞌ kaꞌina haweꞌna huleꞌ Ánáꞌ Mánusiá, tiꞌara niꞌisá impirá tempóna.”

41Napekuneꞌ Peturuꞌ i Iesu, “Pueꞌ, heáná to Nutunggái i lalu ngkóráꞌ pándiriꞌ iti, kaiꞌ peá ba upu-upu woꞌo tauna?”

42Nahániki Pueꞌ Iesu, “Nipailalu ngkóráꞌ pándiriꞌ deꞌe: ara hadua hawiꞌ to manótó laluna hai peisá napoinálái pueꞌna. Ia naꞌángkáꞌ pueꞌna bona motadulakoi hawiꞌ ntániꞌna hai mokádipurá pandeꞌraꞌ alo-alona. 43Morasiꞌ ntepuꞌu hawiꞌ iti ane i pesuleꞌna pueꞌna, ia ralámbiꞌ tangaꞌna mampopolumao bágóꞌna. 44Hai Kuhángáꞌáꞌákou: hawiꞌ iti bateꞌna ina naꞌángkáꞌ pueꞌna mewaliꞌ to mokádipurá upu-upu párewána. 45Agáiáná noumbá ane tiꞌara maroꞌa pambiárána hawiꞌ iti? Ina nauliꞌ i laluna, ‘Pueꞌkuꞌ tiꞌara ina poloꞌ mesuleꞌ.’ Mewaliꞌ hawiꞌ iti tiꞌara piꞌi ina mampopolumao bágóꞌna. Ina natepuꞌu mopapaháiheꞌ hangka hawiꞌna, maroꞌa towawine, maroꞌa tobaleilo. Ia ina mandeꞌ hai mainu oaꞌ duuꞌna malangu. 46Agáiáná hangkaꞌ-hangkaꞌ perái, ina haweꞌ pueꞌna i tempó to tiꞌara nasangka-sangka. Hawiꞌ iti ina napapahái pueꞌna duuꞌna mate hai napahibali hai tauna to tiꞌara mengkoruꞌ i pueꞌna.

47Ane hawiꞌ to moisá miꞌi peundeꞌána pueꞌna, agáiáná tiꞌara mouláꞌ peundeꞌána pueꞌna iti, hai tiꞌara matimama i kahaweꞌna, hawiꞌ iti bateꞌna ina rapapahái ntepuꞌu. 48Agáiáná ane ara hawiꞌ to tiꞌara moisá peundeꞌána pueꞌna hai mobábehi to salaꞌ, manangkoꞌ peá karapaháina. Láwiꞌ heáná to raweꞌi handaꞌ, handaꞌ woꞌo to ina rapembiáꞌ hangko i hia. Hai ane handaꞌ to rapoináláiá tauna, handaꞌ woꞌo to ina rahárungá hangko i hia.”#12:48 Básá woꞌo Lukasi 8:18; 19:26.

Ánti kaꞌIesuna, tetámbái miꞌi posisalaꞌraꞌ tauna

(Mat. 10:34-36)

49Nauliꞌ Iesu, “MaiAꞌ i duniáꞌ deꞌe bona molámbiꞌkou kapári to ina mopamagasaꞌkou nodo api mopamagasaꞌ besiꞌ. Hai Kuhárungá haweꞌ miꞌi tempóna rapamagasaꞌmokou. 50Agáiáná ara mani kapári to hangaa-ngaa morampeAꞌ. Ina masusa laluNgkuꞌ duuꞌna mewaliꞌ.#12:50 I lalu básá Iunani: Ara periu to hangaa-ngaa mewaliꞌ sieruꞌ i Kódóꞌ. To natunggái Iesu, kaꞌina rapaháiNa hai rapapateNa i kau mombehape. Básá woꞌo Marakusi 10:38. 51Ba nihárungá kamaiNgkuꞌ deꞌe bona moántiAꞌ pohintuwuꞌ i tauna. Tiꞌara! Ngkáliꞌna riꞌi kamaiNgkuꞌ deꞌe bona moántiAꞌ posisalaꞌ i oloꞌraꞌ tauna. 52Mantepuꞌu deꞌe-deꞌe, tauna hantámbi ina mosisalaꞌheꞌ. Rápáꞌna, ane araheꞌ lima i lalu hantámbi, táluheꞌ ina moewaꞌ to rodua, hai to rodua iti ina moewaꞌheꞌ to tálu. 53To rapouma ina moewaꞌ ánáꞌna tobaleilo, hai ánáꞌna tobaleilo ina moewaꞌ umána. To rapoina ina moewaꞌ ánáꞌna towawine, hai ánáꞌna towawine ina moewaꞌ inána. To rapopengantiꞌi ina moewaꞌ mániána, hai mániána ina moewaꞌ pengántiꞌina.”#12:53 Básá woꞌo Mika 7:6.

Nipetándái apa to ina mewaliꞌ

54Nauliꞌ wopiꞌi Iesu i tauna to handaꞌ, “Ane niꞌita gawu tándáꞌ i katámpuá alo, niuliꞌ ina keudá, hai iti to mewaliꞌ. 55Ane mewuiꞌi hangko tándáꞌ i wóiꞌ, niuliꞌ ina madiiꞌ, hai bateꞌna mewaliꞌ woꞌo. 56Mampe to mapándekou! Niꞌisá mampeita tandaꞌ i langiꞌ hai tandaꞌ i duniáꞌ, agáiáná tiꞌara niꞌisá mampetándái apa lempóna to nabábehi Pueꞌ Ala deꞌe-deꞌe moliu Kódóꞌ.”

Mohintuwuꞌkou hai ewálimu

57“Kómu deꞌe, moapa riꞌi haneꞌi tiꞌara niꞌisá apa to maroꞌa i peitána Pueꞌ Ala? 58Ane rápáꞌna ara tauna to moántikoꞌ i lindoꞌna tadulako wánuá ina mosalaꞌikoꞌ, hangaa-ngaa modamekou tangaꞌmi mani i tangaꞌ rárá. Láwiꞌ ane tiꞌarakou modame, ina naꞌánti mpuꞌukoꞌ i lindoꞌna topobutusi, hai topobutusi iti ina mampeweꞌikoꞌ i pulisi, hai pulisi iti ina mopasuaꞌkoꞌ i lalu petarungkuá. 59Toꞌu ntepuꞌu to Kuhángáꞌákou: tiꞌarakoꞌ ina mesuwuꞌ hangko i petarungkuá ane tiꞌara mani upu indámu nubaiari.”#12:59 Lempóna, hangaa-ngaa hawiáꞌkou modame hai Pueꞌ Ala.

Currently Selected:

Lukasi 12: NTBEP

Highlight

Copy