Lukasi 11

Iesu mopaturoꞌ topeguruNa kana i pekakae

(Mat. 6:9-13; 7:7-11)

1Hangkani tempó, Iesu lao mekakae. KarooNa mekakae, hadua hangko i oloꞌraꞌ topeguruNa membiáꞌ bona Iesu mopaturoꞌheꞌ mekakae, nodo Iohane Toperiu mopaturoꞌheꞌ woꞌo topeguruna.

2Nahángáꞌáheꞌ Iesu, “Ane mekakaekou, niuliꞌ node:

Umaꞌ, kipomahile hangaꞌMu to magasaꞌ.

Kipembiáꞌ bona Nupatongawaꞌ popárentáMu i duniáꞌ.

3Nuweꞌiangkaiꞌ pandeꞌkiꞌ i alo-alona i kagáná-gánáꞌána,

4hai Nuámpungiangkaiꞌ hangko i kamasalaꞌkiꞌ,

láwiꞌ kaiꞌ woꞌo moámpungi hángká rángángkiꞌ to masalaꞌ i kaiꞌ.

Hai ineeꞌangkaiꞌ Nupatodáhi nakeloꞌ to kadake.”

5Nahángáꞌá wopaheꞌ Iesu, “Rápáꞌna, ara hadua hangko i oloꞌmi to lao i rángána tangaꞌ káindi. Nauliꞌ, ‘Ale, nuweꞌi wongkódóꞌá tálu wuaꞌna rótiꞌ, 6láwiꞌ ara torarengkuꞌ to hangko haweꞌ, hai tiꞌara ara apa-apa i támbingkuꞌ to peisá kuweꞌi.’ 7Agáiáná ia mehániꞌ node: ‘Ineeꞌaꞌ nuganggu. Tegili miꞌi babaꞌ. Kódóꞌ hai ánáꞌkuꞌ, letaꞌmongkaiꞌ. Tiꞌaraꞌaꞌ peisá mearó ina mampoweꞌikoꞌ to nupembiáꞌ.’

8Mewaliꞌ ane noꞌonoꞌi, noumbá miꞌi? Kehapiꞌ ia rángámu, tiꞌara iti to ina mewaliꞌ álásána bona mearó mampoweꞌikoꞌ ba apa-apa. Ngkáliꞌna riꞌi, ia ina mearó ánti katiꞌárána nuisá mahili membiáꞌ oaꞌ apa to nuparaluu. 9Mewaliꞌ Kuhángáꞌákou:

hangaa-ngaa nipembiáꞌ oaꞌ i Pueꞌ Ala,

hai bateꞌna ina Naweꞌikou.

Nipeliꞌ miꞌi apa to niparaluu,

hai bateꞌna ina nilámbiꞌ.

Nikadoꞌ babaꞌ moliu pekakaemi,

hai Pueꞌ Ala ina mobungkáhiákou rárá molámbiꞌ apa to niparaluu.

10Láwiꞌ heáná to membiáꞌ ina raweꞌi.

Heáná to mampeliꞌ ina molámbiꞌ.

Heáná to mokadoꞌ babaꞌ, ina rabungkáhiá.

11Ba arakou to mampoweꞌi lelótó i ánáꞌmi ane ánáꞌmi membiáꞌ bouꞌ? 12Ba arakou to mampoweꞌi kalajengki ane membiáꞌ tulu manuꞌ? Tiꞌara! 13Kehapiꞌkou kadake, niꞌisá mani mampoweꞌi apa to maroꞌa i ánáꞌmi. Pelumbuꞌna mani Umámi to ara i surugáꞌ, bateꞌna ina mampoweꞌi Inao to Magasaꞌ i tauna to membiáꞌ i Hia.”

Iesu hai Belesebu

(Mat. 12:22-30; Mrk. 3:22-27)

14Hangkani tempó, ara hadua tauna to raꞌánti lao i Iesu. Tauna iti tiꞌara peisá molaluita láwiꞌ napesuaꞌi setáꞌ. Iesu mampopesuwuꞌ miꞌi setáꞌ iti hangko i wátána, álána peisá molaluita. Tingkáráꞌmoheꞌ tauna to handaꞌ, 15agáiáná araheꞌ woꞌo tauna to manguliꞌ, “KuasaꞌNa iti hangko i Belesebu,#11:15 Belesebu: Iti miꞌi woꞌo hangaꞌna Datu Tokadake. Básá to teukiꞌ i Kahirámpuá Laluita. daturaꞌ upu-upu setáꞌ, onoꞌ miꞌi haneꞌi Ia peisá mampopelóhóꞌ setáꞌ.”

16Araheꞌ woꞌo to mampoinao mampehukáꞌ Iesu. Membiáꞌheꞌ i Iesu bona Napopaitaꞌáheꞌ tandaꞌ kuasaꞌ bona tongawaꞌ kahangko i Pueꞌ AlaNa. 17Agáiáná naisá miꞌi Iesu apa tunggáiána laluraꞌ, onoꞌ miꞌi haneꞌi Nahángáꞌáheꞌ, “Rápáꞌna, ane arai hadua datu, hai tauna to handaꞌ i lalu kadatuána mosisalaꞌheꞌ oaꞌ hai mombeꞌewaꞌheꞌ, kadatuá iti ina magero. Ane tauna hampohalaluá pakaheꞌ mosisalaꞌ, ina magero pohalaluraꞌ iti. 18Noꞌonoꞌ woꞌo i kadatuá setáꞌ. Niuliꞌ, mampopelóhóꞌAꞌ setáꞌ hai kuasaꞌ to hangko i Belesebu, daturaꞌ upu-upu setáꞌ. Agáiáná ane Datu Tokadake moewaꞌ hangka tokadakena, bateꞌna ina magero kadatuána. 19Niuliꞌ mampopelóhóꞌAꞌ setáꞌ hai kuasaꞌ hangko i Belesebu, agáiáná ara woꞌo topeuláꞌmi to mampopelóhóꞌ setáꞌ. Kuasaꞌ apa to rapakeꞌ topeuláꞌmi iti mampopelóhóꞌ setáꞌ? Manótó kuasaꞌ to hangko i Pueꞌ Ala. Mewaliꞌ, hangko i bábehiáraꞌ topeuláꞌmi iti, tongawaꞌ miꞌi katiꞌárána toꞌu laluitami to manguliꞌ Kódóꞌ mampopelóhóꞌAꞌ setáꞌ hangko i kuasaꞌna Datu Tokadake. 20Lempóna: mampopelóhóꞌAꞌ setáꞌ hangko i kuasaꞌna Pueꞌ Ala.#11:20 I lalu básá Iunani: mampopelóhóꞌAꞌ setáꞌ hai karaweꞌna Pueꞌ Ala. Hai iti miꞌi to mopatongawaꞌ Pueꞌ Ala mepárentá miꞌi i oloꞌmi.

21Datu Tokadake peisá rapándiriꞌ nodo hadua tobaleilo to maróhó to mokámpái támbina. Handaꞌ párewá pombealana,#11:21 párewá pombealana: mopándiriꞌ setáꞌ-setáꞌ. onoꞌ miꞌi haneꞌi óntóꞌ támbina#11:21 óntóꞌna támbina: mopándiriꞌ tauna to meuláꞌ i Datu Tokadake. tiꞌara peisá raperampaꞌi. 22Agáiáná, ane haweꞌMoꞌ hai melumbuꞌ kamaróhóngkuꞌ, tauna to mokámpái támbi iti peisá Kuewaꞌ hai Kunangi. Párewá pombeala to naporóhó pueꞌ támbi iti ina Kuperampaꞌi, hai upu-upu óntóꞌ támbi iti ina Kuala hai Kupegáláꞌ-gáláꞌá.

23Heáná to tiꞌara hingkakani hai Kódóꞌ, ia miꞌi to hingkakani hai Datu Tokadake. Heáná to tiꞌaraꞌAꞌ motulungi mampeliꞌ tauna bona mewaliꞌheꞌ taunána Pueꞌ Ala, ia miꞌi to moewaꞌAꞌ.”

Hadua setáꞌ to mesuleꞌ huleꞌ

(Mat. 12:43-45)

24Iesu mopaliliu laluitaNa, Nauliꞌ, “Ane ara tokadake to rapopesuwuꞌ miꞌi hangko i tauna, tokadake iti lao i pádá loriꞌ mampeliꞌ katoroꞌána, agáiáná tiꞌara nalámbiꞌ. Nauliꞌ tokadake iti, ‘Rángina miꞌi mesuleꞌ peaꞌ lao i katoroꞌá to kupálehi iaꞌo.’ 25I pesuleꞌna, naita tauna iti nodo támbi to tehairi hai tekádipurá mpakaroꞌa.#11:25 Kamasalaꞌna tauna iti, Inao to Magasaꞌ tiꞌara mani ara i laluna. 26Onoꞌ miꞌi haneꞌi lao mokióꞌ pitu hangka tokadakena to melumbuꞌ kakadakeraꞌ hangko i hia. Lao mpuꞌumoheꞌ mesuaꞌ i tauna to napálehi miꞌi iaꞌo, hai mokuasaꞌi tauna iti, álána rumihi ntepuꞌu kamapárina hangko i rungu-runguna.”

Heáná to morasiꞌ

27Karoona Iesu molaluita noꞌonoꞌ, ara hadua towawine i oloꞌraꞌ tauna to handaꞌ to molaluita napasimbuku, nauliꞌ, “Morasiꞌ ináMu to mokádipuráKoꞌ hangko i kanapoánákaMu!”

28Agáiáná nahániki Iesu, Nauliꞌ, “Toꞌu to nuꞌuliꞌ, agáiáná morasiꞌ mani tauna to mampehádingi ngkóráꞌna Pueꞌ Ala hai mampeuláꞌi.”

Tandaꞌna nabiꞌ Iunu

(Mat. 12:38-42)

29Tangaꞌraꞌ tauna to handaꞌ motolelingi Iesu, Napaliliu miꞌi laluitaNa i hira, Nauliꞌ, “Kadake ntepuꞌukou to tueꞌ tempó deꞌe, láwiꞌ nihuoꞌAꞌ bona Kupopaitaꞌákou tandaꞌ kuasaꞌ, bona tongawaꞌ kahangko i Pueꞌ AlaNgkuꞌ. Agáiáná tiꞌara ara tandaꞌ kuasaꞌ to ina Kupopaitaꞌákou, bateꞌna peá tandaꞌ nodo to mewaliꞌ i nabiꞌ Iunu hangkoia. 30Ia mewaliꞌ tandaꞌ i toNiniwe,#11:30 Iunu tálu alona tálu wengina i lalu taꞌina bouꞌ to mahile, agáiáná tueꞌ (básá Iunu 1:10). Noꞌonoꞌ woꞌo Iesu ina mate, agáiáná i katáluna alona ina tueꞌ huleꞌ. {láwiꞌ tekábáhá hangko i kapate hai tueꞌ bona mopahaweꞌ laluitana Pueꞌ Ala i hira}. Noꞌonoꞌ woꞌo, apa to ina mewaliꞌ i Ánáꞌ Mánusiá ina mewaliꞌ tandaꞌ i tauna to tueꞌ deꞌe-deꞌe.

31Hangkoia, datu towawine haweꞌ hangko i tampoꞌna to karaoꞌ, to rahangaꞌ tampoꞌ Seba, láwiꞌ napoinao mampehádingi laluitana kamapándena Datu Salomo.#11:31 datu towawine hangko i tampoꞌ Seba: Básá 1 Datu-datu 10:1-13. Tampoꞌ iti deꞌe-deꞌe rauliꞌ Etiopia ba Yaman. Deꞌe-deꞌe ara miꞌi i oloꞌmi Hadua to melumbuꞌ kamahilena tueꞌNa hangko i Datu Salomo, agáiáná kómu to tueꞌ deꞌe-deꞌe, tiꞌara nipoinálái laluitaNa. Mewaliꞌ i alo pobutusi i kahópóꞌána duniáꞌ, datu towawine iti ina meángkáꞌ i lindoꞌmi, hai ina mosalaꞌikou. 32Noꞌonoꞌ woꞌo toNiniwe. Hangkoia, menosoꞌmoheꞌ hangko i dósáraꞌ i pampehádingiraꞌ laluitana nabiꞌ Iunu.#11:32 Básá Iunu gáláꞌna ka-3. Deꞌe-deꞌe, ara miꞌi i oloꞌmi Hadua to melumbuꞌ kamahilena tueꞌNa hangko i nabiꞌ Iunu, agáiáná kómu to tueꞌ deꞌe-deꞌe, tiꞌarakou menosoꞌ hangko i dósámi i kanihádina laluitaNa. Mewaliꞌ i alo pobutusi i kahópóꞌána duniáꞌ, toNiniwe iti ina meángkáꞌ i lindoꞌmi hai ina mosalaꞌikou.”#11:32 ToIahudiꞌ mampekiri tiꞌaraheꞌ ina rasalaꞌi i alo pobutusi láwiꞌ taunánaheꞌ Pueꞌ Ala, agáiáná mouláꞌ Iesu, ina rasalaꞌi mpuꞌuheꞌ ane tiꞌaraheꞌ menosoꞌ hangko i dósáraꞌ hai mepoinálái i Hia, hibali hai penosoꞌraꞌ hai pepoináláiraꞌ tauna ntániꞌna to tiꞌara toIahudiꞌ.

Pewangkaꞌ hai kamakáindi

33Iesu mopaliliu laluitaNa, Nauliꞌ, “Tiꞌara ara hadua tauna to motótó palita haneꞌi nahumbáki. Palita iti bateꞌna nawoli i kamapángkáꞌána bona pewangkaꞌna raita upu-upu tauna to mesuaꞌ i lalu támbi. {Noꞌonoꞌ woꞌo, tiꞌara Kuwuniángi ngkóráꞌna Pueꞌ Ala i kómu.} 34Mátámi ia miꞌi huluꞌna wátámi, láwiꞌ ane maroꞌa mátámi, pewangkaꞌ hangko i Pueꞌ ina mesuaꞌ i lalumi, mowangkaꞌikou. Agáiáná ane kegawu mátámi, makáindi ntepuꞌu lalumi.#11:34 To natunggái Iesu ia miꞌi, ane tatarima paturoꞌNa, ina taisá woꞌo peundeꞌána Pueꞌ Ala. 35Onoꞌ miꞌi haneꞌi hangaa-ngaa maingáꞌ-ingáꞌkou, bona lalumi to napamabaa miꞌi Pueꞌ Ala, ineeꞌ wopiꞌi nipamakáindi. 36Mewaliꞌ, ane lalumi nawangkaꞌi miꞌi pewangkaꞌna Pueꞌ álána tiꞌara piꞌi ara to makáindi, upu-upu katueꞌmi ina mabaa nodo huluꞌ to mowangkaꞌi kakáindiána.”#11:36 Ane toꞌu-toꞌu nipoinao moisá Pueꞌ Ala, Ia ina mopakanótóákou apa to toꞌu. Ane tiꞌara nisápuáka apa to toꞌu iti, nodokou to tueꞌ i lalu kamabaaꞌáNa.

Iesu mosalaꞌi toParisi hai guru-guru agama

(Mat. 23:1-36; Mrk. 12:38-40; Luk. 20:45-47)

37Karoona Iesu mepaturoꞌ, ara hadua toParisi to mowáwáhá Iesu bona laoheꞌ mandeꞌ i támbina. Mewaliꞌ lao mpuꞌu miꞌi Iesu. 38KahaweꞌNa i támbi, Ia liliu pemiꞌi mandeꞌ, tiꞌara lebaꞌ membahoꞌ. Tingkáráꞌ toParisi iti moita Iesu mandeꞌ, tiꞌara sieruꞌ membahoꞌ mouláꞌ ádá ágámáraꞌ. 39Onoꞌ miꞌi haneꞌi Iesu mohángáꞌá, “Kómu toParisi nodokou tauna to mobahoꞌi painuá hai taboꞌ i rawana peá, láwiꞌ nipekiri ádá to i rawana peá, mole lalumi bukeꞌ to kadake hai mampokaelu pekou oaꞌ párewána tauna ntániꞌna. 40Tiꞌara mpuꞌu niꞌisá apa to maroꞌa! Tiꞌara wátántaꞌ peá to napopewaliꞌ Pueꞌ Ala, agáiáná Ia mampoweꞌikeꞌ pekiri. 41Apa to ara i kómu, hangaa-ngaa niweꞌiheꞌ tauna to meahiahiꞌ tueꞌraꞌ hangko i lalumi ntepuꞌu. Ane noꞌonoꞌ to nibábehi, ina mewaliꞌ ntepuꞌukou tauna to magasaꞌ.

42Hurewuꞌmokou toParisi! Madota ntepuꞌukou mampeuláꞌi párentá to manangkoꞌ. Mogalo riꞌi tudaꞌ-tudaꞌ i kintáꞌmi to nodo háre hai kulaꞌ, nipopenómbá hanggáláꞌ hampuloꞌ i Pueꞌ Ala mouláꞌ Paturoꞌna Musa.#11:42 Burahima to rungu-runguna mampopenómbá hanggáláꞌ hampuloꞌ. Básá Pewaliꞌána 14:20. Básá woꞌo Áturá Menómbá 27:30-33; Pohuleki 14:22-23. Agáiáná párentá to matimi to manguliꞌ hangaa-ngaa nibábehi apa to maroꞌa hai hintotoꞌ i rángámi, hai hangaa-ngaa nipokaꞌahiꞌ Pueꞌ Ala,#11:42 Rápáꞌna, básá Mika 6:8; Pohuleki 6:5. tiꞌara iti to nipeuláꞌi. Katoꞌuána párentá to matimi iti to hangaa-ngaa nipeuláꞌi ntepuꞌu, hai ineeꞌ woꞌo nikábáhá pampeuláꞌimi párentá to manangkoꞌ.

43Hurewuꞌmokou toParisi! Niundeꞌ ntepuꞌu ane rapopehodakou i pehodaꞌá to i lindoꞌ i lalu támbi penómbáꞌá. Góeꞌkou ane rabiláꞌkou tauna to handaꞌ i pobaluꞌ-baluꞌá.

44Hurewuꞌmokou! Nodokou popatawuá to tiꞌara rapetándái. Tauna molumao i wongkona, láwiꞌ tiꞌara raisá kaꞌárána to mepakedái.#11:44 Ane toIahudiꞌ molumao i wongkona popatawuá, mewaliꞌheꞌ kedái mouláꞌ ádáraꞌ pitu alona kamaruena. Noꞌonoꞌ woꞌo kómu: maroꞌa pekou i rawa, mole lalumi kadake.”

45Hadua guru agama toIahudiꞌ molaluita i Iesu, nauliꞌ, “Ee Guru, ane noꞌonoꞌi laluitaMu, tepasuaꞌ miꞌi woꞌo kaiꞌ to Nusasalaꞌi!”

46Nahániki Iesu, “Hurewuꞌmokou woꞌo guru-guru agama! Kómu miꞌi to mampoweꞌi kilinga to matimi i tauna, láwiꞌ nitámbái mani párentá hai ádá agama to matimi,#11:46 Básá Galatia 5:1. Montaniꞌ hangko i kilinga to naweꞌiangkaiꞌ Iesu. Básá Matiu 11:30; Suro 15:10. agáiáná kómu haduduámi, tiꞌarakou mampeuláꞌi áturá iti, hai tiꞌara woꞌo ara haweꞌ hantódiꞌ ahiꞌmi. Mogalo riꞌi hangkau karaweꞌmi, tiꞌara nipakeꞌ motulungiheꞌ.

47-48Hurewuꞌmokou! Mopakaroꞌakou oaꞌ popatawuáraꞌ nabiꞌ-nabiꞌ {to marue miꞌi mate}, agáiáná hibali pekou hai toiorumi to mopapateheꞌ nabiꞌ iti. Bábehiámi iti mopatongawaꞌ peá kanipokanana bábehiáraꞌ toiorumi iti. 49Onoꞌ miꞌi haneꞌi Pueꞌ Ala to moisá upu-upuna, manguliꞌ node:

‘Ina Kuhuoꞌheꞌ nabiꞌ-nabiꞌ hai suro-suro lao i hira.

Hantángáꞌheꞌ ina rapapate, hantángáꞌheꞌ ina rapopeahiahiꞌ.’

50-51Ánti karapapateraꞌ handaꞌ nabiꞌ hungkáꞌna duniáꞌ deꞌe rapopewaliꞌ, mantepuꞌu hangko i karapapatena Abeli haweꞌ-haweꞌ i Sakaria to rapapate i tangabaa Támbina Pueꞌ Ala, i hiliꞌna támbi to magasaꞌ iti hai paintuá popenómbá,#11:50-51 Abeli ia miꞌi tauna to rungu-runguna rapapate (básá Pewaliꞌána 4:8) hai hadua tauna to rahangaꞌ Sakaria, to kaupuána rapapate i Pototowiá to Sae (básá 2 Tuntukáná Datu 24:20-22). onoꞌ miꞌi haneꞌi tauna to tueꞌ tempó deꞌe ina rahuku.

52Hurewuꞌmokou guru-guru agama! Katoꞌuána, kekómu miꞌi to hangaa-ngaa mopaturoꞌ tauna ntániꞌna, bona moisáheꞌ noumbá rárána lao i Pueꞌ Ala. Agáiáná kómu riꞌi haduduámi, tiꞌara niundeꞌ mouláꞌ rárá iti,#11:52 I lalu básá Iunani: kómu moala pegili pampekiri. hai mokóntókou woꞌo tauna to mampoinao moisá Pueꞌ Ala.”

53Kapohuꞌna Iesu hangko i támbina toParisi iti, guru-guru agama hai toParisi mabukoꞌ ntepuꞌuheꞌ, onoꞌ miꞌi haneꞌi ratunggái mekuneꞌ-kuneꞌ oaꞌ i Hia, 54láwiꞌ mampeliꞌheꞌ kamanawoꞌáNa moliu pehániꞌNa.

Currently Selected:

Lukasi 11: NTBEP

Highlight

Copy