Lukasi 10

Iesu mohuoꞌ pitu puloꞌna topeguruNa lao moánti Ngkóráꞌ Marasa

1Roo onoꞌ, Pueꞌ Iesu mopileꞌi pitu puloꞌna tauna ntániꞌna hangko i oloꞌraꞌ topeuláꞌNa, hai ina Nahuoꞌheꞌ rodua-rodua moioru hangko i Hia lao i upu-upu wánuá to ina Nakalaoi. 2Agáiáná hangko tiꞌara maniheꞌ pohuꞌ, Nauliꞌ, “Handaꞌheꞌ tauna to peisá rapándiriꞌ nodo pare to mangka, láwiꞌ timamamoheꞌ mepoinálái i Kódóꞌ, agáiáná tiꞌara handaꞌ to peisá motulungiheꞌ mai i Kódóꞌ. Mewaliꞌ, mekakaekou i Pueꞌ Ala bona mantámbái tauna to ina moánti Ngkóráꞌ Marasa bona, handaꞌ tauna to ina mepoinálái i Kódóꞌ. 3Laomokou, agáiáná maingáꞌ-ingáꞌkou láwiꞌ Kuhuoꞌkou lao i oloꞌraꞌ tauna to kadake, nodokou ánáꞌ dimbá i oloꞌraꞌ serigala.#10:3 nodokou ánáꞌ dimbá i oloꞌraꞌ serigala: Dimbá tiꞌara moisá meꞌewaꞌ, agáiáná serigala maseke. 4Ineeꞌkou moánti dóiꞌ ba tasi ba sandale i rawa to nipakeꞌ miꞌi. Ane mohidupaꞌkou hai tauna i tangaꞌ rárá, gánámoheꞌ nitabe, ineeꞌmokou lebaꞌ molaluita marue-rue.

5Ane mesuaꞌkou i lalu támbi, hangaa-ngaa nihángáꞌá pueꞌ támbi, ‘Tabeá! Hampóáꞌworia ina nawátiꞌkou Pueꞌ!’ 6Ane bulá laluna pueꞌ támbi motarimakou, bateꞌna ina nawátiꞌheꞌ Pueꞌ Ala. Agáiáná ane tiꞌara bulá laluraꞌ motarimakou, tiꞌaraheꞌ ina molámbiꞌ pewátiꞌ hangko i Pueꞌ Ala. 7Ane pueꞌ támbi motarimakou, ineeꞌkou melimbá-limbá. Toroꞌkou i támbi iti duuꞌmi pohuꞌ lao i wánuá ntániꞌna. Apa to raweꞌikou, niandeꞌ hai niꞌinu, láwiꞌ hintotoꞌ ntepuꞌu topobágóꞌ i bondena Pueꞌ motarima apa to raparaluu, háwángina petulungiraꞌ.#10:7 Básá 1 Korintu 9:3-14; 1 Timotiu 5:18.

8Ane mesuaꞌkou i lalu hambuaꞌ wánuá hai ratarimakou, niandeꞌ apa to raweꞌikou. 9Nipakauriꞌ tauna to tiꞌara nalalu to ara i lalu wánuá iti, hai nihángáꞌáheꞌ pueꞌ wánuá: ‘Popárentána Pueꞌ Ala haweꞌ miꞌi i oloꞌmi.’ 10Agáiáná ane mesuaꞌkou i lalu hambuaꞌ wánuá hai tiꞌarakou ratarima, laomokou i karadaa, hai i lindoꞌraꞌ tauna to handaꞌ, nihángáꞌáheꞌ: 11‘Mogalo awu hangko i wánuámi to mentakaꞌ i pálántáꞌ bitingkiꞌ, kitarónta i lindoꞌmi, tandaꞌna kaꞌina nahukumi Pueꞌ Ala. Haweꞌ miꞌi popárentána Pueꞌ Ala.’ 12Hai Kuhángáꞌáꞌákou: i alo pobutusi i kahópóꞌána duniáꞌ, ina melumbuꞌ kamatimina pehukuna Pueꞌ Ala i tauna iti hangko pehukuNa i toSodomo hangkoia.”

Pueꞌ Ala ina mohuku kótá to tiꞌara motarima Iesu

(Mat. 11:20-24)

13“Hurewuꞌmokou toKorasi! Hurewuꞌmokou toBesaida,#10:13 Korasi hai Besaida: Iti miꞌi wánuá tándáꞌ i wongko rano Galilea, hungkuꞌ i Kapenau (wátiꞌna ka-23). Iesu mopahaweꞌ miꞌi ngkóráꞌna Pueꞌ Ala ionoꞌ, agáiáná tiꞌaraheꞌ handaꞌ to mepoinálái. Handaꞌ ntepuꞌu tandaꞌ kuasaꞌ to Kubábehi i wánuámi, agáiáná tiꞌarakou mampenosoꞌi dósámi. Ane rápáꞌna tandaꞌ kuasaꞌ iti Kubábehiꞌi i kótá Tiru hai Sido,#10:13 kótá Tiru hai Sido: Iti miꞌi kótá to mahile to nakatoroꞌi to tiꞌara toIahudiꞌ. Marue ntepuꞌuheꞌ mosápuáka Pueꞌ Ala hai ngkóráꞌNa. Kahópóꞌána nahukuheꞌ Pueꞌ Ala. Básá Iesaia gáláꞌna ka-23; Ieheskie gáláꞌna ka-26 haweꞌ ka-28; Amosi 1:9-10. bateꞌna maruemoheꞌ menosoꞌ hangko i dósáraꞌ, kehapiꞌ hira tiꞌaraheꞌ toIahudiꞌ. Ina moalamoheꞌ waruꞌ ngkasusa to rabábehi hangko i karuꞌ rapowaruꞌ, hai moawuiheꞌ tutuꞌ wuáꞌraꞌ, tandaꞌ katebálikina miꞌi laluraꞌ. 14I alo pobutusi i kahópóꞌána duniáꞌ, ina melumbuꞌ kamatimina pehukuna Pueꞌ Ala i kómu haneꞌi pehukuNa i toTiru hai toSido.

15Hai kómu woꞌo toKapenau! Ba nipekiri ina naꞌángkáꞌkou Pueꞌ Ala haweꞌ i surugáꞌ? Tiꞌara! Ngkáliꞌna riꞌi ina Natibekou i lalu naraka!”

16Roo onoꞌ, Iesu molaluita wopiꞌi i topeguruNa, Nauliꞌ, “Heáná to mampoinálái laluitami, hibali miꞌi hai mampoinálái laluitaNgkuꞌ. Agáiáná heáná to mosápuákakou, hibali miꞌi hai Kódóꞌ to nasápuáka. Hai heáná to mosápuákaꞌAꞌ, hibali miꞌi hai mosápuáka Pueꞌ Ala to mohuoꞌAꞌ mai.”

{Roo onoꞌ, pohuꞌmoheꞌ topeguruna Iesu to pitu puloꞌraꞌ.}

Pesuleꞌraꞌ topeguruNa to pitu puloꞌraꞌ

17Bahangapa kamaruena hangko ionoꞌ, mesuleꞌmoheꞌ topeguruNa to pitu puloꞌraꞌ iti. Góeꞌ ntepuꞌuheꞌ, hai rahángáꞌáꞌá Iesu, “Pueꞌ, mogalo riꞌi setáꞌ mengkoruꞌheꞌ woꞌo i kaiꞌ, hai kipopesuwuꞌheꞌ i lalu hangaꞌMu.”

18Nauliꞌ Iesu, “Kuita Datu Tokadake manawoꞌ hangko i langiꞌ nodo kiláꞌ!#10:18 Básá Iesaia 14:12-15; Iohane 12:31-32; Pampetudeꞌá 12:8-9. 19Nipehádingi laluitaNgkuꞌ: Kuweꞌimokou kuasaꞌ mopangka lelótó ba kalajengki,#10:19 Básá Sura Petóiá 91:13. hai moliu kuasaꞌ iti nibuku monangi upu-upu kuasaꞌna Datu Tokadake to mewaliꞌ ewálintaꞌ. Onoꞌ miꞌi haneꞌi tiꞌara ara to peisá mopakarugiꞌkou. 20Agáiáná kehapiꞌ noꞌonoꞌ, ineeꞌ nipokagóeꞌ pengkoruꞌraꞌ setáꞌ i kómu. Rángina riꞌi nipokagóeꞌ kateukiꞌna miꞌi hangaꞌmi i lalu surugáꞌ.”#10:20 kateukiꞌna miꞌi hangaꞌmi i lalu surugáꞌ: I lalu surugáꞌ, ara Sura Ngkatueꞌ. Ionoꞌ teukiꞌ hangaꞌraꞌ upu-upu tauna to molámbiꞌ katueꞌ to maroꞌa to tiꞌara mokahópóꞌá. Básá to teukiꞌ i Kahirámpuá Laluita.

Iesu mekakae

(Mat. 11:25-27; 13:16-17)

21I tempó iti, Iesu nakuasaꞌi Inao to Magasaꞌ, hai hangko i kagóeꞌna laluNa, Nauliꞌ, “Ó Umaꞌ, Pueꞌ langiꞌ hai duniáꞌ hai upu-upu óntóꞌna! KutóiáKoꞌ, láwiꞌ upu-upu to tewuniángi hangkoia Nupopaisáꞌámoheꞌ tauna to mengkaiwóiꞌ, agáiáná Nuwuniángiáheꞌ tauna to mampekiri hira miꞌi to mapánde.#10:21 Básá 1 Korintu 1:18-31. Ó Umaꞌ! Upu-upuna iti Nubábehi láwiꞌ iti miꞌi peundeꞌáMu.”

22Roo onoꞌ, nauliꞌ wopiꞌi Iesu i tauna to handaꞌ, “Upu-upu naweꞌiMoꞌ UmáNgkuꞌ. Tiꞌara ara hadua to moisá kaKódóꞌna Ánáꞌna Pueꞌ Ala, bateꞌna peá UmáNgkuꞌ to moisá ntepuꞌuAꞌ. Noꞌonoꞌ woꞌo, tiꞌara ara to moisá UmáNgkuꞌ, bateꞌna peá Kódóꞌ ÁnáꞌNa hai heáná peá to Kupopaisáꞌáheꞌ kaheánána UmáNgkuꞌ.”#10:22 Básá woꞌo Matiu 28:18; Iohane 1:18; 3:35.

23Hangko ionoꞌ, bona tiꞌara rahádi tauna ntániꞌna, Iesu mehaileꞌ i topeguruNa, Nahángáꞌáheꞌ, “Morasiꞌ ntepuꞌukou, láwiꞌ niꞌita miꞌi upu-upu deꞌe. 24Kuhángáꞌákou: hangkoia handaꞌheꞌ nabiꞌ hai datu to mampoinaoheꞌ moita apa to niꞌita deꞌe-deꞌe, {ia miꞌi apa to Kubábehi,} agáiáná tiꞌara raita. Mampoinao ntepuꞌuheꞌ mampehádingi apa to nihádi, {ia miꞌi paturoꞌKuꞌ,} agáiáná tiꞌara rahádi {láwiꞌ maruemoheꞌ mate}.”

Ngkóráꞌ pándiriꞌ kana i toSamaria to maꞌahiꞌ laluna

25Ara hadua guru agama toIahudiꞌ to mampoinao mampampeitai Iesu, napekuneꞌ, “Guru, apa to hangaa-ngaa kubábehi bona molámbiꞌaꞌ katueꞌ to maroꞌa to tiꞌara mokahópóꞌá?”

26Nauliꞌ Iesu, “Apa to teukiꞌ i lalu Paturoꞌna Musa? Apa to nubásá ionoꞌ?”

27Nahániki guru agama iti, “To kubásá, node:

‘Nipokaꞌahiꞌ Pueꞌ Ala Pueꞌmi

i sukáꞌna kabulána lalumi,

i sukáꞌna pekirimi,

i sukáꞌna róhómi,

hai i sukáꞌna kapándemi.’ (Pohuleki 6:4-5)

Hai teukiꞌ woꞌo:

‘Nipokaꞌahiꞌ hángká rángámi nodo pampokaꞌahiꞌmi wátámi haduduámi.’ ”#10:27 Básá Áturá Menómbá 19:18.

28Nauliꞌ Iesu, “Kana to nuꞌuliꞌ iti. Ane onoꞌ to nubábehi, ina molámbiꞌkoꞌ katueꞌ to maroꞌa.”

29Agáiáná guru agama iti mampoinao mopakanótó bábehiána, onoꞌ miꞌi haneꞌi napekuneꞌ wopiꞌi, “Heáná tauna to hangaa-ngaa kupokaꞌahiꞌ?”

30Nahániki Iesu, “Hangkani tempó, ara hadua tobaleilo to molumao hangko i Ierusale ina lao i kótá Ieriko. I tangaꞌ rárá, tauna iti mampohidupaꞌáheꞌ tauna to masilaka. Mamperampaꞌimoheꞌ párewána hai waruꞌna, hai wátána rapapahái duuꞌna malimpu. Upu onoꞌ, rapálehi peá i tangaꞌ rárá. 31I tempó iti, ara hadua tadulako menómbá to moliu ionoꞌ. Kamoitána tauna to hurewuꞌ iti, naleliki peá. 32Noꞌonoꞌ woꞌo ara hadua toLewi, topobágóꞌ i Támbina Pueꞌ Ala, to moliu ionoꞌ. Kamoitána tauna to hurewuꞌ iti, naleliki peá woꞌo.

33Tiꞌara marue hangko ionoꞌ, moliu woꞌo hadua toSamaria#10:33 ToSamaria hai toIahudiꞌ moewaliheꞌ. Tiꞌaraheꞌ biásá mombetulungi. i rárá iti. Maꞌahiꞌ ntepuꞌu laluna moita tauna to hurewuꞌ iti, 34onoꞌ miꞌi haneꞌi lao nahungkuki, to belána nabahoꞌi hai anggoroꞌ haneꞌi napákupui hai lana saitu.#10:34 lana saitu: hangko i wuaꞌ kau saitu. Handaꞌ i tampoꞌraꞌ toSáráeliꞌ. Iti peisá rapakeꞌ mompaihó, mopákupui to bela, hai rapakeꞌ woꞌo i palita. Upu onoꞌ, nawewehi. Roo onoꞌ, napopesaweꞌ i kalidena, naꞌánti lao i támbi kahambengiáraꞌ torare, hai nakádipurá ionoꞌ. 35Kahalona, ia moala miꞌi rompepaꞌ dóiꞌ peráꞌ,#10:35 rompepaꞌ dóiꞌ peráꞌ: Imbaꞌna hibali hai sarona hadua tauna ane mobágóꞌ rongalo. naweꞌi pueꞌ támbi, haneꞌi nahángáꞌá, ‘Kupembiáꞌ tulungi, bona nukádipurá sieruꞌ tauna deꞌe. Ane mesuleꞌaꞌ, hai dóiꞌ to kuweꞌikoꞌ deꞌe tiꞌara mani gáná, ina kutámbái.’ ”

36Upu miꞌi Iesu modarita, Napekuneꞌ i guru agama iti, Nauliꞌ, “Mouláꞌ polámbiꞌmu, hangko i tauna to tálu ininá, heáná to mewaliꞌ rángána tauna to hurewuꞌ iti?”

37Nahániki guru agama, “Tauna to motulungi tauna to hurewuꞌ iti.”

Nauliꞌ Iesu, “Toꞌu pehániꞌmu. Mewaliꞌ, mantepuꞌu deꞌe-deꞌe, iti woꞌo to hangaa-ngaa nubábehi.”

Iesu moweoꞌ Marita hai Maria

38Hangko ionoꞌ, Iesu mopaliliu miꞌi polumaoNa hingkakani hai topeguruNa, ina laoheꞌ i Ierusale. I polumaoraꞌ iti, mehupeꞌheꞌ i hambuaꞌ wánuá.#10:38 Wánuá iti Betania. Básá Iohane 11:1; 12:1-3. I lalu wánuá iti, ara hadua towawine to rahangaꞌ Marita, to mampotorare Iesu i támbina. 39Marita iti ara woꞌo ádina to rahangaꞌ Maria. Maria iti mehoda i hintáiꞌ bitina Iesu mampehádingi laluitaNa. 40I tempó iti, Marita masisiáká ntepuꞌu láwiꞌ handaꞌ bágóꞌna mokádipurá torare. Onoꞌ miꞌi haneꞌi kóiꞌ inaona i Maria, láwiꞌ Maria lao peá mehoda. Mewaliꞌ lao miꞌi Marita i Iesu, nahángáꞌá, “Pueꞌ, ádingkuꞌ deꞌe, tiꞌaraꞌaꞌ nadurei. Napatodáhi peaꞌ haduduángkuꞌ mobágóꞌ! Nuhángáꞌá bona maiaꞌ nadurei.”

41Nauliꞌ Pueꞌ Iesu, “Marita! Masisiáká ntepuꞌukoꞌ, hai mampopengaa to nupekiri. 42Katoꞌuána, hampákáꞌ peá to paraluu ntepuꞌu nupekiri, {ia miꞌi, hangaa-ngaa mampehádingikoꞌ paturoꞌKuꞌ}. Iti miꞌi to maroꞌa ntepuꞌu, hai iti miꞌi to napileꞌi Maria. Hai pewátiꞌ to ina nalámbiꞌ tiꞌara peisá raꞌala hangko i hia.”

Currently Selected:

Lukasi 10: NTBEP

Highlight

Copy