Iohane 9
9
Iesu mopakauriꞌ hadua tobilo
1Tangaꞌna Iesu molumao, Ia moita hadua tauna to bilo hangko i karapoánákana. 2Hadua hangko i oloꞌraꞌ topeguruNa mekuneꞌ, “Guru, moapa riꞌi haneꞌi tauna deꞌe bilo hangko i karapoánákana? Ánti dósána haduduána, ba ánti dósáraꞌ tosaena?”
3Mehániꞌ Iesu, Nauliꞌ, “Tiꞌara ánti dósána haduduána, hai tiꞌara woꞌo ánti dósáraꞌ tosaena. Ngkáliꞌna riꞌi tauna deꞌe bilo bona kuasaꞌna Pueꞌ Ala ina tongawaꞌ moliu i hia. 4Tempóna mani mabaa, hangaa-ngaa Kupopolumao bágóꞌna Pueꞌ Ala to mohuoꞌAꞌ mai. Láwiꞌ ina haweꞌ tempó makáindi, hai ane makáindi miꞌi, tiꞌara piꞌi ara tauna to peisá mobábehi apa-apa. 5TangaꞌKuꞌ mani i duniáꞌ, Kódóꞌ miꞌi deꞌe pewangkaꞌ to mopamabaa laluraꞌ tauna i humalele duniáꞌ.”
6Karoona Iesu molaluita noꞌonoꞌ, metinudu miꞌi i tampoꞌ. TinuduNa Nagalo hai tampoꞌ bona mewaliꞌ regeꞌ, haneꞌi Napoporiro mátána tobilo iti. 7Roo onoꞌ, Nahángáꞌá, “Laomokoꞌ membahoꞌ i Wuhuꞌ Siloa.” (“Siloa” iti, lempóna “rahuoꞌ”.)#9:7 Wuhuꞌ Siloa: Wuhuꞌ Siloa iti nabábehi Datu Hesekia rekeꞌ-rekeꞌna pitu átuna parena hangko tiꞌara mani Iesu rapoánákana, bona moánti uwai i lalu kótá Ierusale. (Básá 1 Datu-datu 20:20.) Teukiꞌ i Iesaia 8:6, toSáráeliꞌ tiꞌara motarima uwai hangko i Siloa. Lao mpuꞌu miꞌi membahoꞌ, hai i pesuleꞌna, meita miꞌi.
8Hangko ionoꞌ, rángána hai tauna to moisá ia tobilo to membiáꞌ-mbiáꞌ peá iaꞌo, mombekuneꞌ-kuneꞌheꞌ, rauliꞌ, “Heáná riꞌi doꞌo? Tiꞌara paꞌi ia tobilo to biásá mehoda membiáꞌ-mbiáꞌ?”
9Ara to manguliꞌ, “Ia mpuꞌu!”
Ara woꞌo to manguliꞌ, “Tiꞌara. Kahibalina peá lenggeꞌraꞌ.”
Agáiáná tobilo iti manguliꞌ, “Kódóꞌ miꞌi deꞌe!”
10Mewaliꞌ, rapekuneꞌ, “Noumbá riꞌi haneꞌi peisákoꞌ meita?”
11Nahángáꞌáheꞌ, “Tauna to rahangaꞌ Iesu mobábehi regeꞌ, Napoporiro mátángkuꞌ, haneꞌi Nahángáꞌáꞌáꞌaꞌ, ‘Laokoꞌ membahoꞌ i Wuhuꞌ Siloa.’ Lao mpuꞌumoꞌ membahoꞌ, hangko ionoꞌ meitamoꞌ!”
12Rapekuneꞌ, “Iumbá miꞌi tauna iti deꞌe-deꞌe?”
Nahángáꞌáheꞌ, “Tiꞌara kuisá baiumbá miꞌi lao.”
ToParisi mopáresáꞌ karapakauriꞌna tobilo
13-14Iesu moala tampoꞌ, Nagalo hai tinuduNa, haneꞌi mopakauriꞌ tobilo iti. Iti mewaliꞌ i alo Satu, alo penómbáꞌáraꞌ toIahudiꞌ, onoꞌ miꞌi haneꞌi tobilo to meita iti raꞌánti lao i toParisi. 15ToParisi mekuneꞌ woꞌo i hia, rauliꞌ, “Noumbá riꞌi haneꞌi peisákoꞌ meita?”
Nahángáꞌáheꞌ, “Ara to morirohi mátángkuꞌ hai regeꞌ. Upu onoꞌ, Nahuoꞌaꞌ lao membahoꞌ, onoꞌ miꞌi haneꞌiaꞌ meita.”
16Mewaliꞌ hantángáꞌheꞌ toParisi manguliꞌ, “Ane noꞌonoꞌi, tauna iti tiꞌara hangko i Pueꞌ Ala, láwiꞌ tiꞌara mampeuláꞌi áturá ineeꞌkeꞌ mobágóꞌ i alo penómbáꞌá.”
Agáiáná hantángáꞌ woꞌo manguliꞌ, “Ane Ia tauna to madósá, hangko iumbá riꞌi mai kuasaꞌNa mobábehi tandaꞌ kuasaꞌ to noꞌonoꞌ?” Onoꞌ miꞌi haneꞌi mombehániꞌ-hániꞌheꞌ hadua hai hadua.
17Hangko ionoꞌ, mekuneꞌ wopaheꞌ toParisi i tobilo iti, rauliꞌ, “Noumbá polámbiꞌmu mokana i tauna iti? Nuꞌuliꞌ ininá Ia to mopakauriꞌ mátámu.”
Nauliꞌ tobilo iti, “Tongawaꞌ Ia hadua nabiꞌ.”
18Agáiáná tadulakoraꞌ toIahudiꞌ tiꞌara rapoinálái kaꞌiana mpuꞌu miꞌi tauna to bilo hangkoia hai hangkaꞌ-hangkaꞌ peá meita. Onoꞌ miꞌi haneꞌi rakióꞌ inána hai umána bona mampohidupaꞌáheꞌ, 19haneꞌi rapekuneꞌ, “Toꞌu-toꞌu mpuꞌu paꞌi tauna deꞌe ánáꞌmi, to bilo hangko i karapoánákana? Noumbá riꞌi haneꞌi peisá meita?”
20Rauliꞌ tosaena, “To kiꞌisá, ia miꞌi deꞌe ánáꞌkiꞌ, hai bilo hangko i karapoánákana. 21Agáiáná noumbá rárána haneꞌi peisá meita, tiꞌara kiꞌisá. Hai heáná to mopakauriꞌ, tiꞌara woꞌo kiꞌisá. Ia manginao miꞌi. Nipekuneꞌ rái i hia. Ia peisá mohániki pekuneꞌmi.” 22Inána hai umána manguliꞌ noꞌonoꞌ, láwiꞌ malááꞌheꞌ i tadulako-tadulakoraꞌ toIahudiꞌ, láwiꞌ ara miꞌi kahimpuduána hawaꞌraꞌ tadulako-tadulako iti to node: heáná peá to manguliꞌ kaꞌIesuna Datu Topehómpóꞌ, tiꞌarapoheꞌ rapaliu mesuaꞌ i lalu támbi penómbáꞌá. 23Onoꞌ miꞌi haneꞌi tosaena manguliꞌ, “Ia manginao miꞌi. Nipekuneꞌ rái i hia.”
24Roo onoꞌ, rakióꞌ wopiꞌi tauna to bilo iti, hai rahángáꞌá, “Nunóáká i katoꞌu-toꞌuána i lindoꞌna Pueꞌ Ala! Kiꞌisá tauna iti tauna to madósá.”
25Nahángáꞌáheꞌ, “Kódóꞌ, tiꞌara kuisá to mopakauriꞌ iti tomadósá ba tiꞌara. To kuisá peá, biloaꞌ hangkoia, agáiáná deꞌe-deꞌe meitamoꞌ.”
26Hangko ionoꞌ, rapekuneꞌ wopiꞌi, “Apa to Nabábehi i hio? Hai noumbá ráráNa mopakauriꞌkoꞌ?”
27Nahánikiheꞌ, “Roomokou kutuntuá ininá. Tiꞌara paꞌi nihádi? Moapa riꞌi haneꞌi mekuneꞌ-kuneꞌ manikou oaꞌ i kódóꞌ? Ba nipoinao woꞌo mewaliꞌ topeguruNa?”
28Hangko ionoꞌ, mabukoꞌ ntepuꞌumoheꞌ haneꞌi rahángáꞌá, “Io riꞌi topeguruNakoꞌ tauna iti! Kaiꞌ, topegurunaꞌangkaiꞌ nabiꞌ Musa! 29Kiꞌisá Pueꞌ Ala mopahaweꞌ laluitaNa i Musa hangkoia. Agáiáná tauna iti, tiꞌara kiꞌisá kahangko iumbáNa mai.”
30Mehániꞌ tobilo iti, “Mepawuli mpuꞌukou! Niuliꞌ tiꞌara niꞌisá kahangko iumbáNa mai, mole riꞌi Ia to mopakauriꞌ mátángkuꞌ! 31Taisá Pueꞌ Ala tiꞌara mohániki pembiáꞌna tauna to madósá, ngkáliꞌna riꞌi Ia mampehádingi pembiáꞌna tauna to mengkoruꞌ i Hia hai to mampeuláꞌi hawaꞌNa. 32Hangko i pewaliꞌána duniáꞌ, tiꞌara mani haweꞌ hangkani tahádi daritakáná to peisá mopakauriꞌ tauna to bilo hangko i karapoánákana. 33Ane ketauna iti tiꞌara hangko i Pueꞌ Ala, manótó ketiꞌara peisá mobábehi nodo to mewaliꞌ i kódóꞌ!”
34Rahániki tadulakoraꞌ toIahudiꞌ iti, “Io riꞌi to bukeꞌ dósá hangko i karapoánákamu. Moapa riꞌi haneꞌi báiꞌkoꞌ mopaturoꞌangkaiꞌ?” Hangko ionoꞌ, ia rapopesuwuꞌ hangko i támbi penómbáꞌá.
35Nahádi Iesu karapopesuwuꞌna hangko i támbi penómbáꞌá, onoꞌ miꞌi haneꞌi lao Napombelámbiꞌá hai Nakuneꞌ, “Ba mepoináláikoꞌ i Ánáꞌ Mánusiá?”
36Nauliꞌ tauna iti, “Tuá, Nuhángáꞌáꞌáꞌaꞌ heáná tauna iti, bona mepoináláiaꞌ i Hia.”
37Nauliꞌ Iesu, “Nuita miꞌi! Ia miꞌi deꞌe to tangaꞌNa mampolaluitaꞌákoꞌ.”
38Nauliꞌ tauna iti, “KupoináláiKoꞌ, Pueꞌ!” haneꞌi molingkudu menómbá i Hia.
39Nauliꞌ Iesu, “KamaiNgkuꞌ i duniáꞌ deꞌe, maiAꞌ mobutusi kárá-káráraꞌ tauna, bona tauna to bilo peisá meita, hai tauna to meita ina mewaliꞌ bilo.”#9:39 Básá Iesaia 61:1-2.
40Araheꞌ bahangapa toParisi ionoꞌ to mohádi laluitana Iesu, rahángáꞌá, “Ba Nuꞌuliꞌ biloangkaiꞌ woꞌo?”
41Nauliꞌ Iesu, “Ane kebilokou, ketiꞌara ina niꞌisá apa to toꞌu, hai ketiꞌarakou masalaꞌ. Agáiáná láwiꞌ niuliꞌ meitantokou, bateꞌmi masalaꞌ hai dósámi tiꞌara teámpungi.”#9:41 Teukiꞌ i lalu Sura Magasaꞌ, Datu Topehómpóꞌ ina mopakauriꞌ tobilo. (Básá Iesaia 29:18, 35:5, 42:7.) Agáiáná tadulakoraꞌ toIahudiꞌ bilo laluraꞌ.
Currently Selected:
Iohane 9: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
