Iohane 10

Ngkóráꞌ pándiriꞌ kana i dimbá hai topoewu

1Iesu molaluita, Nauliꞌ, “Toꞌu ntepuꞌu laluitaNgkuꞌ deꞌe: ane ara hadua to mesuaꞌ i lalu gimpu hai tiꞌara moliu i babaꞌá, agáiáná mengkaheꞌ riꞌi i bosoꞌ, lempóna tauna iti ia miꞌi topanako hai toperampaꞌ. 2Ane topoewu, ia mesuaꞌ moliu i babaꞌá. 3Topokámpái gimpu mobungkáhiá babaꞌá, hai dimbána mampehádingi wambaꞌna topoewuraꞌ. Topoewu iti mokióꞌ hangaꞌraꞌ hambaꞌa-hambaꞌa hai moántiheꞌ lao i rawa. 4Kanaꞌántiraꞌ upu-upu dimbána lao i rawa, ia moioru miꞌi hangko i hira, hai dimbána meuláꞌ i hia, láwiꞌ raisá mampetándái wambaꞌna. 5Tiꞌaraheꞌ mouláꞌ tauna ntániꞌna. Ane ara tauna to tiꞌara topoewuraꞌ to mokióꞌheꞌ, rapelangkaha, láwiꞌ tiꞌaraheꞌ moisá wambaꞌna.”

6Iesu mopahaweꞌ ngkóráꞌ pándiriꞌ iti i toParisi, agáiáná tiꞌara raisá lempóNa. 7Onoꞌ miꞌi haneꞌi Nauliꞌ wopiꞌi, “Toꞌu ntepuꞌu laluitaNgkuꞌ deꞌe: Kódóꞌ miꞌi deꞌe babaꞌá to rapoliui dimbá ane mesuaꞌheꞌ i lalu gimpu. 8Upu-upu tauna to moioru hangko i Kódóꞌ to manguliꞌ kahirana topoewu to maroꞌa#10:8 Rápáꞌna, tadulako to tiꞌara mokádipurá taunána Pueꞌ Ala, tepasuaꞌ toParisi. Básá Ieriemia 10:21; 23:1-4; 25:34-36; Ieheskie 34:2-10; Sakaria gáláꞌna ka-11. hira iti nodo topanako hai toperampaꞌ. Agáiáná dimbáNgkuꞌ, tiꞌaraheꞌ mampeuláꞌi pekióꞌraꞌ. 9Kódóꞌ miꞌi deꞌe to rapándiriꞌ nodo babaꞌá. Heáná to mesuaꞌ i surugáꞌ moliu i Kódóꞌ, molámbiꞌheꞌ katehómpóꞌ. Hira peisáheꞌ rapándiriꞌ nodo dimbá to mesuaꞌ i lalu gimpu hai mesuwuꞌheꞌ lao i rawa molámbiꞌ rumpuꞌ to maruduꞌ. 10Tunggáiána topanako, ina manako peá, mepapate hai mepakarugiꞌ. Agáiáná kamaiNgkuꞌ deꞌe bona tauna molámbiꞌheꞌ katueꞌ to maroꞌa ntepuꞌu.

11Kódóꞌ miꞌi deꞌe topoewu to maroꞌa. Topoewu to maroꞌa timama mampehuhuꞌá wátána bona dimbána tueꞌheꞌ. 12Ane tauna to rasaro peá, tiꞌara maroꞌa poewuna, láwiꞌ ia tiꞌara pueꞌ dimbá. Ane moita mai serigala, ia melangka mopálehi dimbá to handaꞌ iti. Mewaliꞌ hambaꞌa dimbá nahakaꞌ serigala, áláraꞌ to ntániꞌna mahawuꞌ. 13Tauna to rasaro iti melangka, láwiꞌ ia mobágóꞌ bona molámbiꞌ peá sarona. Tiꞌara mampekiri dimbá iti. Noꞌonoꞌ woꞌo tadulako-tadulako agama, tiꞌaraheꞌ mampotepe taunána Pueꞌ Ala.#10:13 Básá Ieheskie gáláꞌna ka-34.

14-15Kódóꞌ miꞌi deꞌe topoewu to maroꞌa. Nodo UmáNgkuꞌ moisáꞌAꞌ, hai Kódóꞌ woꞌo moisáꞌAꞌ UmáNgkuꞌ, noꞌonoꞌ woꞌo Kódóꞌ moisáheꞌ dimbáNgkuꞌ, hai dimbáNgkuꞌ moisáꞌAꞌ. TimamaꞌAꞌ mohuhuꞌ katueꞌKuꞌ bona dimbáNgkuꞌ tueꞌheꞌ.

16Ara mani dimbáNgkuꞌ to ntániꞌna, {iamoheꞌ tauna to tiꞌara toIahudiꞌ to ina mepoinálái i Kódóꞌ},#10:16 Básá Iohane 11:51-52; 12:32; Matiu 28:19; Roma 1:16; Epesu 3:6. agáiáná tiꞌaraheꞌ ara i lalu gimpu deꞌe. Hira woꞌo hangaa-ngaa Kuántiheꞌ mai. Ina moisá ntepuꞌuheꞌ wambaꞌKuꞌ, hai upu-upu dimbáNgkuꞌ ina mewaliꞌ peheꞌ hantobu, hai Kódóꞌ haduduáNgkuꞌ ina mewaliꞌ topoewuraꞌ.

17UmáNgkuꞌ mampokaꞌahiꞌAꞌ, láwiꞌ ina Kuhuhuꞌ katueꞌKuꞌ bona tueꞌAꞌ huleꞌ. 18Tiꞌara ara hadua to mopapateAꞌ ane tiꞌara peundeꞌáNgkuꞌ. Ara kuasaꞌKuꞌ mampeweꞌi wátáNgkuꞌ bona rapapate, hai ara woꞌo kuasaꞌKuꞌ moala huleꞌ katueꞌKuꞌ. Iti miꞌi hawaꞌna UmáNgkuꞌ to Kutarima.”

19Karahádina toIahudiꞌ laluitana Iesu, mombehániꞌ-hániꞌ wopaheꞌ. 20Handaꞌheꞌ to manguliꞌ, “Napesuaꞌi setáꞌ hai magila! Tiꞌara piꞌi paraluu tapehádingi laluitaNa.”

21Agáiáná ara woꞌo to manguliꞌ, “Tiꞌara! Tauna to napesuaꞌi setáꞌ tiꞌara molaluita noꞌonoꞌ. Ara paꞌi setáꞌ to peisá mopakauriꞌ tauna to bilo?”

Iesu tiꞌara ratarima toIahudiꞌ

22I tempó iti i Ierusale, tauna mopaꞌaraheꞌ posusa pambuhinao Alo Popamagasaꞌ Támbina Pueꞌ Ala hangkoia.#10:22 Alo Popamagasaꞌ Támbina Pueꞌ Ala: Pare hangatu ini puloꞌna hai uwalu haweꞌ hangatu ini puloꞌna hai pitu hangko tiꞌara mani Iesu rapoánáka (168-167sM), toSiria mesuaꞌ i Ierusale, hai mampopenómbáheꞌ boeꞌ i lalu Támbina Pueꞌ Ala. Bábehiáraꞌ iti mopakedái katoroꞌá to magasaꞌ. Tálu parena hangko ionoꞌ, Iudasiꞌ Makabe moala huleꞌ Ierusale, hai Támbina Pueꞌ Ala rapamagasaꞌ huleꞌ. Hangko ionoꞌ, mosusaheꞌ toIahudiꞌ uwalu alona mobuhinao tempóna Támbina Pueꞌ Ala rapamagasaꞌ huleꞌ. Góeꞌ ntepuꞌu toIahudiꞌ tempóraꞌ mosusa. Tempó iti tempó lengiꞌ. 23Iesu molumao i tangabaa Támbina Pueꞌ Ala i tambaleꞌ to rahangaꞌ Tambaleꞌ Salomo. 24Bahangapaheꞌ tadulakoraꞌ toIahudiꞌ motolelingiheꞌ Iesu, rahángáꞌá, “Moapa riꞌi haneꞌi Nupatodáhiangkaiꞌ oaꞌ wuli? Tiꞌaraꞌangkaiꞌ Nupakanótóá kaheánáMu. Ane Datu Topehómpóꞌ mpuꞌuKoꞌ, Nupakanótóámongkaiꞌ.”#10:24 Bahangapa miꞌi kánina Iesu mopakanótóá kaheánáNa. Básá Iohane 5:16-47; 6:27-59; 7:14-30; 8:12-29; 8:42-59; 10:17-18.

25Nauliꞌ Iesu, “Roomokou Kuhángáꞌá, agáiáná tiꞌara nipoinálái. Tandaꞌ kuasaꞌ to Kubábehi moliu kuasaꞌna UmáNgkuꞌ, iti miꞌi to mopakanótó kaheánáNgkuꞌ. 26Agáiáná tiꞌara nipoinálái, láwiꞌ tiꞌarakou dimbáNgkuꞌ. 27DimbáNgkuꞌ moisá wambaꞌKuꞌ. Kuisá ntepuꞌuheꞌ, hai meuláꞌheꞌ i Kódóꞌ. 28Kuweꞌiheꞌ katueꞌ to maroꞌa to tiꞌara mokahópóꞌá, hai manótó katiꞌáráraꞌ ina tegááki hangko i Pueꞌ Ala duuꞌna i rue-ruena. Tiꞌara ara hadua to peisá mamperampaꞌiheꞌ hangko i taeNgkuꞌ. 29Melumbuꞌ kuasaꞌNa UmáNgkuꞌ hangko i upu-upuna, hai Ia miꞌi to mampoweꞌiAꞌ dimbáNgkuꞌ. Tiꞌara ara hadua to peisá mamperampaꞌiheꞌ hangko i taena UmáNgkuꞌ. 30Kódóꞌ hai UmáNgkuꞌ, hadua peaNgkaiꞌ.”

31Karahádina peá toIahudiꞌ laluitana Iesu iti, kásáliu motimaꞌheꞌ watu. Rapoinao mowatui Iesu duuꞌna mate {láwiꞌ Ia mopahibali wátáNa hai Pueꞌ Ala}. 32Nahángáꞌáheꞌ Iesu, “Handaꞌ bágóꞌ to maroꞌa to nahuoꞌáꞌAꞌ UmáNgkuꞌ bona Kupopaitaꞌákou. Hangko i upu-upuna iti, umbána to mewaliꞌ ntóáꞌna haneꞌiAꞌ nipoinao nipapate?”

33Rauliꞌ tadulakoraꞌ toIahudiꞌ, “Tiꞌara ánti bágóꞌ to maroꞌa haneꞌi ina kipapateKoꞌ, agáiáná ánti popakóiꞌMu riꞌi Pueꞌ Ala! Tauna biásá peKoꞌ, agáiáná Nuꞌuliꞌ riꞌi Pueꞌ AlaKoꞌ!”

34Nauliꞌ Iesu, “I lalu Sura Magasaꞌ, teukiꞌ miꞌi laluitana Pueꞌ Ala i topebutusi toIahudiꞌ hangkoia to manguliꞌ node: ‘pueꞌ alakou.’#10:34 pueꞌ alakou: Básá Sura Petóiá 82:6. Lempóna: topebutusi toIahudiꞌ nodoheꞌ Pueꞌ Ala láwiꞌ Ia mopileꞌiheꞌ mewaliꞌ sulewátáNa i karabutusiraꞌ kárá-káráraꞌ toIahudiꞌ. Ane hira peisá rauliꞌ ‘pueꞌ ala’, pelumbuꞌna mani Iesu. 35Apa to teukiꞌ i lalu Sura Magasaꞌ iti, tiꞌara ara katebálikiána. Mewaliꞌ, ane Sura Magasaꞌ manguliꞌ ‘pueꞌ alakou’ i tauna to motarima ngkóráꞌna Pueꞌ Ala hangkoia, pelumbuꞌna mani i Kódóꞌ, 36láwiꞌ Kódóꞌ deꞌe to napileꞌi mpiiꞌAꞌ UmáNgkuꞌ to mohuoꞌAꞌ mai i duniáꞌ. Mewaliꞌ, moapa riꞌi haneꞌi niuliꞌ mopakóiꞌAꞌ Pueꞌ Ala ane Kuꞌuliꞌ Kódóꞌ deꞌe ÁnáꞌNaꞌAꞌ?

37Ane tiꞌaraꞌAꞌ mampobágóꞌ bágóꞌ to nahuoꞌáꞌAꞌ UmáNgkuꞌ, ineeꞌAꞌ nipoinálái. 38Agáiáná láwiꞌ mampobágóꞌAꞌ bágóꞌ to nahuoꞌáꞌAꞌ UmáNgkuꞌ, hangaa-ngaa nipoináláiAꞌ. KehapiꞌAꞌ tiꞌara nipoinálái, hangaa-ngaa nipoinálái tandaꞌ kuasaꞌ to Kubábehi. Ane nipoinálái tandaꞌ kuasaꞌ iti, ina niꞌisá ntepuꞌu i lalumi kamohintuwuꞌKuꞌ hai UmáNgkuꞌ, hai UmáNgkuꞌ mohintuwuꞌ hai Kódóꞌ.”

39Karahádina toIahudiꞌ laluitana Iesu, rapoinao wopiꞌi rahakaꞌ, agáiáná tekábáhá peá hangko i taeraꞌ.

40Hangko ionoꞌ, pohuꞌ wopiꞌi Iesu lao tándáꞌ i mata alo uwai Iarade i periuána Iohane hangkoia, hai toroꞌ ionoꞌ. 41Handaꞌ tauna lao mampohidupaꞌá Iesu, rauliꞌ, “Iohane tiꞌara mobábehi tandaꞌ kuasaꞌ, agáiáná tauna deꞌe mobábehi tandaꞌ kuasaꞌ, hai upu-upu to napahaweꞌ Iohane mokana i Hia bateꞌna toꞌu.” 42Onoꞌ miꞌi haneꞌi handaꞌ tauna ionoꞌ mepoinálái i Iesu.

Currently Selected:

Iohane 10: NTBEP

Highlight

Copy