Iohane 8
8
Towawine to ralámbiꞌ mebualosi
1Agáiáná Iesu pohuꞌ lao i Buluꞌ Saitu, hai hambengi ionoꞌ.#8:1 Buluꞌ Saitu: uwalu átuna lima puloꞌna mete kamapángkáꞌna hangko i tahiꞌ, ia miꞌi ini puloꞌna mete mapángkáꞌ mani hangko i kótá Ierusale. Buluꞌ iti tiꞌara karaoꞌ hangko i Ierusale, tándáꞌ i mata alo, i hambalina lokeꞌ Kidero. Buluꞌ iti rapohinoe kau saitu. Saitu ia miꞌi wuaꞌngkau to peisá rapoanaꞌi lana.
2Kahalona mepulo-pulo, lao wopiꞌi Iesu i tangabaa Támbina Pueꞌ Ala. Haweꞌmoheꞌ tauna to handaꞌ mengkahungkuꞌ, hai Ia mehoda hai mopaturoꞌheꞌ.
3TangaꞌNa Iesu mepaturoꞌ, guru-guru agama hai toParisi haweꞌmoheꞌ moánti hadua towawine to ralámbiꞌ tangaꞌna mebualosi. Towawine iti rapopeángkáꞌ i oloꞌraꞌ tauna to handaꞌ, 4haneꞌi rahángáꞌá Iesu, “Guru, towawine deꞌe kilámbiꞌ tangaꞌna mebualosi! 5I lalu Paturoꞌna Musa, ara párentá to manguliꞌ towawine to mobábehi noꞌonoꞌ hangaa-ngaa rawatui duuꞌna mate. Mewaliꞌ noumbá polámbiꞌMu?” 6Tunggáiána pekuneꞌraꞌ iti, mampeliꞌ peheꞌ kamanawoꞌána laluitana Iesu bona rasalaꞌi.#8:6 Tunggáiána pekuneꞌraꞌ iti, mampeliꞌ kamanawoꞌána laluitana Iesu bona rasalaꞌi. Ane Iesu manguliꞌ towawine iti hangaa-ngaa rawatui, lempóna Ia moliu áturána toRoma. (ToRoma mokuasaꞌiheꞌ toIahudiꞌ tempó onoꞌ.) Básá Iohane 18:31. Ane Nauliꞌ towawine iti tiꞌara paraluu rawatui, lempóna moliu Paturoꞌna Musa. Básá Áturá Menómbá 20:10; Pohuleki 22:27. Agáiáná Iesu tiꞌara mehániꞌ, motóngkóꞌ peá moukiꞌ hai karaweꞌNa i awu i wongko daula.
7Mekuneꞌheꞌ oaꞌ i Hia, onoꞌ miꞌi haneꞌi mengoaꞌ miꞌi Iesu, Nahángáꞌáheꞌ, “Heáná i oloꞌmi to tiꞌara madósá, ia miꞌi to ioru-oru mowatui towawine iti!” 8Roo onoꞌ, motóngkóꞌ wopiꞌi moukiꞌ i awu hai karaweꞌNa.
9Karahádina tadulako-tadulako toIahudiꞌ laluitana Iesu iti, hadua-haduaheꞌ pohuꞌ, mantepuꞌu hangko i tosae duuꞌna haweꞌ i to maleheꞌ, {láwiꞌ raisá kamasalaꞌraꞌ}. Kaupuána, Iesu perái to ara ionoꞌ hai towawine iti. 10Roo onoꞌ, Iesu mampengoaꞌ miꞌi towawine iti haneꞌi Nahángáꞌá, “Iumbámoheꞌ tauna to mosalaꞌikoꞌ ininá? Tiꞌara piꞌi paꞌi ara to mampoinao mohukukoꞌ?”
11Nahániki towawine iti, “Tiꞌarapoheꞌ ara, Pueꞌ.”
Nauliꞌ Iesu, “Kódóꞌ woꞌo, tiꞌarakoꞌ ina Kuhuku. Mewaliꞌ, mesuleꞌmokoꞌ, hai mantepuꞌu deꞌe-deꞌe, ineeꞌ wopakoꞌ mebualosi.”]#7:53–8:11 I surana Iohane básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i sura to raukiꞌ huleꞌ i bókóꞌ.
Iesu ia miꞌi pewangkaꞌ to mopamabaa laluna tauna
12Roo onoꞌ, molaluita wopiꞌi Iesu i toIahudiꞌ, Nauliꞌ, “Kódóꞌ miꞌi deꞌe pewangkaꞌ to mopamabaa laluraꞌ tauna i humalele duniáꞌ. Tauna to meuláꞌ i Kódóꞌ, tiꞌaraheꞌ molumao i lalu kakáindiána. Bateꞌna ina molámbiꞌheꞌ kamabaa to mopaꞌara katueꞌ to tiꞌara mokahópóꞌá.”
13Rauliꞌ toParisi, “Tiꞌara paraluu kipoinálái laluitaMu, láwiꞌ tiꞌara ara sabiꞌMu. Nupakanótó peá wátáMu haduduáMu.”#8:13 Básá to teukiꞌ i wóiꞌ Iohane 5:31.
14Nauliꞌ Iesu, “KehapiꞌAꞌ molaluita kana i wátáNgkuꞌ haduduáNgkuꞌ, bateꞌna toꞌu laluitaNgkuꞌ, láwiꞌ Kuisá kahangko iumbáꞌáNgkuꞌ mai hai Kuisá woꞌo iumbá kalaoáNgkuꞌ. Agáiáná kómu, tiꞌara niꞌisá. 15Kómu mebutusi mouláꞌ peá pekiri tauna. Kódóꞌ, tiꞌaraꞌAꞌ mohoda-hoda kárá-kárána ba heáná peá. 16Agáiáná, ane mohoda-hodaꞌáꞌAꞌ kárá-kárána tauna, pobutusiNgkuꞌ bateꞌna manótó, láwiꞌ tiꞌara haduduáNgkuꞌ. UmáNgkuꞌ to mohuoꞌAꞌ, Ia miꞌi to mamporángáꞌAꞌ.
17I lalu Sura Áturámi ara teukiꞌ node: ‘Ane ara rodua sabiꞌ to hibali polaluitaraꞌ, posabiꞌraꞌ iti hangaa-ngaa rapoinálái.’ 18Ara rodua sabiꞌKuꞌ: Kódóꞌ haduduáNgkuꞌ, hai karoduána UmáNgkuꞌ to mohuoꞌAꞌ mai. Mewaliꞌ polaluitaNgkuꞌ hangaa-ngaa rapoinálái.”
19Onoꞌ miꞌi haneꞌi rapekuneꞌ toParisi, “Ane ara UmáMu, iumbá miꞌi deꞌe-deꞌe?”
Mehániꞌ Iesu, “Tiꞌara niꞌisá kaheánáNgkuꞌ, hai tiꞌara woꞌo niꞌisá kaheánána UmáNgkuꞌ. Ane keniꞌisáꞌAꞌ, hangaa-ngaa keniꞌisá woꞌo UmáNgkuꞌ.” 20Upu-upu iti napahaweꞌ Iesu tangaꞌna mepaturoꞌ i lalu tangabaa Támbina Pueꞌ Ala hungkuꞌ i petiꞌ pemboliá dóiꞌ popenómbá. Hai Iesu tiꞌara mani mewaliꞌ rahakaꞌ, láwiꞌ tiꞌara mani haweꞌ tempóNa.
Iesu tiꞌara hangko i duniáꞌ deꞌe
21Iesu molaluita wopiꞌi i tauna to handaꞌ, “Ina pohuꞌAꞌ, hai ina nipeliꞌAꞌ, agáiáná ane matekou, dósámi tiꞌara ina teámpungi.#8:21 Dósá to mahile ntepuꞌu ia miꞌi mosápuáka kaꞌIesuna Datu Topehómpóꞌ. Mewaliꞌ i kalaoáNgkuꞌ, tiꞌarakou peisá ina lao.”
22Karahádina tadulakoraꞌ toIahudiꞌ laluitaNa iti, molaluitaheꞌ hadua hai hadua, rauliꞌ, “Apa lempóna laluitaNa ininá? Ba mampoinao riꞌi menoꞌo, haneꞌi Nauliꞌ tiꞌarakeꞌ peisá lao i kalaoáNa.”
23Nahángáꞌáheꞌ Iesu, “Kómu hangko i wóiꞌ, Kódóꞌ hangko i wongko. Kómu hangko i duniáꞌ deꞌe to bukeꞌ hai to kadake, Kódóꞌ tiꞌaraꞌAꞌ hangko i duniáꞌ deꞌe. 24Onoꞌ miꞌi haneꞌi Kuhángáꞌáꞌákou, ane matekou, dósámi tiꞌara ina teámpungi, láwiꞌ ane tiꞌara nipoinálái laluitaNgkuꞌ to mopakanótó kaKódóꞌna miꞌi deꞌe,#8:24 kaKódóꞌna miꞌi: Babilaꞌ Iesu mopakeꞌ hangaꞌna Pueꞌ Ala, ia miꞌi YHWH, bona mokábelái wátána haduduáNa (básá Pesuwuꞌá 3:14). bateꞌna mpuꞌukou mate hai dósámi tiꞌara ina teámpungi.”
25Rapekuneꞌ, “Katoꞌu-toꞌuána, heáná mpuꞌuKoꞌ?”
Mehániꞌ Iesu, “Kuhángáꞌámokou hangko i rungu-runguNgkuꞌ mepaturoꞌ! 26Handaꞌ mani to ina Kuꞌuliꞌ hai Kusalaꞌiákou. Agáiáná Ia to mohuoꞌAꞌ mai, Ia to hintotoꞌ rapoinálái, hai apa to Kuhádi hangko i Hia, iti miꞌi to Kupahaweꞌ i kómu to ara i duniáꞌ.”
27To natunggái Iesu, ia miꞌi UmáNa to i surugáꞌ, agáiáná tiꞌara raisá tauna heáná to Natunggái. 28Onoꞌ miꞌi haneꞌi Nahángáꞌá wopaheꞌ, “Ane Ánáꞌ Mánusiá nipamapángkáꞌ i kau mombehape, hangko niꞌisá riꞌi kaKódóꞌna miꞌi deꞌe.#8:28 Básá to teukiꞌ i wóiꞌna wátiꞌna ka-24. Hai ina niꞌisá woꞌo, tiꞌara ara hampákáꞌ to Kubábehi mouláꞌ peundeꞌáNgkuꞌ haduduáNgkuꞌ. Bateꞌna peá Kuꞌuliꞌ apa to NapaturoꞌáꞌAꞌ UmáNgkuꞌ. 29Ia miꞌi to mohuoꞌAꞌ hai to mamporángáꞌAꞌ. TiꞌaraꞌAꞌ Napatodáhi haduduáNgkuꞌ, láwiꞌ Kubábehi oaꞌ apa to mopagóeꞌ laluNa.”
30Tangaꞌna Iesu mopahaweꞌ upu-upu iti, handaꞌ toIahudiꞌ mepoinálái i Hia.
Pemuleꞌánaheꞌ Burahima to tiꞌara mentóáꞌ hangko i Pueꞌ Ala
31Hangko ionoꞌ, Iesu molaluita i tauna to mepoinálái i Hia, Nauliꞌ, “Ane nipeuláꞌi oaꞌ paturoꞌKuꞌ, ina mewaliꞌ mpuꞌukou topeuláꞌKuꞌ, 32hai ina niꞌisá miꞌi apa to toꞌu mokana i Pueꞌ Ala, álána tekábáhákou hangko i karapohawiꞌmi.”
33Mehániꞌheꞌ, rauliꞌ, “Kaiꞌ deꞌe, pemuleꞌánaꞌangkaiꞌ Burahima! Tiꞌaraꞌangkaiꞌ hangkani rapohawiꞌ. Moapa riꞌi haneꞌi Nuꞌuliꞌ ina tekábáháꞌangkaiꞌ?”
34Nauliꞌ Iesu, “Toꞌu ntepuꞌu laluitaNgkuꞌ deꞌe: upu-upu tauna to mobábehi dósá, napohawiꞌheꞌ dósá. 35Ane hawiꞌ, tiꞌara peisá toroꞌ oaꞌ i támbina pueꞌna. Agáiáná ane ánáꞌnai, peisá toroꞌ oaꞌ i támbina umána duuꞌna i rue-ruena.#8:35 Noꞌonoꞌ woꞌo tadulakoraꞌ toIahudiꞌ. Rauliꞌ taunánaheꞌ Pueꞌ Ala, láwiꞌ pemuleꞌánaheꞌ Burahima. Agáiáná katoꞌu-toꞌuána, ánti kanapohawiꞌraꞌ peundeꞌáraꞌ haduduáraꞌ, onoꞌ miꞌi haneꞌi madósáheꞌ, hai tiꞌarapoheꞌ ánáꞌna Pueꞌ Ala. 36Mewaliꞌ, ane Kódóꞌ mokábáhákou hangko i dósámi, tekábáhá mpuꞌumokou, láwiꞌ Kódóꞌ ÁnáꞌnaꞌAꞌ Pueꞌ Ala. 37Kuisá kakómuna pemuleꞌána Burahima. Agáiáná arakou to mampoinao ina mopapateAꞌ, láwiꞌ tiꞌara nipailalu laluitaNgkuꞌ. 38Apa to Kuita i lindoꞌna UmáNgkuꞌ, iti miꞌi to Kuhángáꞌáꞌákou. Agáiáná kómu mobábehi apa to napaturoꞌákou umámi.”
39Rauliꞌ toIahudiꞌ, “Umángkiꞌ ia miꞌi Burahima!”
Nauliꞌ Iesu, “Ane toꞌu-toꞌu ánáꞌnakou Burahima, moapa riꞌi haneꞌi tiꞌara nipeuláꞌi bábehiána? 40Kupahaweꞌákou paturoꞌ to toꞌu to Kutarima hangko i Pueꞌ Ala, agáiáná nipoinao peAꞌ nipapate! Ane Burahima, tiꞌara noꞌonoꞌ bábehiána. 41Bábehiámi iti bateꞌna mampeuláꞌi bábehiána umámi!”
Rahániki toIahudiꞌ, “Tiꞌaraꞌangkaiꞌ ánáꞌ bule! Umángkiꞌ hadua peá, Ia miꞌi Pueꞌ Ala.”
42Nauliꞌ Iesu, “Ane toꞌu-toꞌu mpuꞌu Pueꞌ Ala Umámi, kenipokaꞌahiꞌAꞌ, láwiꞌ Kódóꞌ hangko i Pueꞌ AlaꞌAꞌ mai, hai Kódóꞌ miꞌi to Nahuoꞌ mai. TiꞌaraꞌAꞌ mai mouláꞌ peundeꞌáNgkuꞌ haduduáNgkuꞌ. MaiAꞌ mouláꞌ peundeꞌána Pueꞌ Ala, láwiꞌ Ia to mohuoꞌAꞌ mai. 43Moapa riꞌi haneꞌi tiꞌara niꞌisá lempóna laluitaNgkuꞌ? Láwiꞌ tiꞌara nibuku mantaha mampehádingi paturoꞌKuꞌ. 44Umámi ia miꞌi Datu Tokadake! Hai nipoinao oaꞌ mampeuláꞌi peundeꞌána umámi iti. Hangko i rungu-runguna ia miꞌi topepapate. Paturoꞌna tiꞌara nodo paturoꞌ to toꞌu, láwiꞌ tiꞌara ara to toꞌu i hia. Ia modongkoꞌ, láwiꞌ noꞌonoꞌ miꞌi pambiárána. Ia miꞌi pentóáꞌána upu-upu dongkoꞌ, hai upu-upu tauna to modongkoꞌ mampeuláꞌi peundeꞌána.#8:44 Datu Tokadake tiꞌara ara i rungu-runguna. Ia woꞌo napopewaliꞌ Pueꞌ Ala. Dongkoꞌna to rungu-runguna ia miꞌi, “Tiꞌarakou ina mate.” Básá Pewaliꞌána 3:4. 45Mewaliꞌ, onoꞌ miꞌi haneꞌi tiꞌaraꞌAꞌ nipoinálái, láwiꞌ apa to Kuꞌuliꞌ bateꞌna toꞌu. 46Kódóꞌ tiꞌaraꞌAꞌ madósá, hai tiꞌara ara hadua hangko i kómu to peisá mopakanótó kaꞌárána dósáNgkuꞌ. Kupahaweꞌ apa to toꞌu, mewaliꞌ moapa riꞌi haneꞌi tiꞌaraꞌAꞌ nipoinálái? 47Taunána Pueꞌ Ala moundeꞌ mampehádingi hai mampeuláꞌi laluitana Pueꞌ Ala. Agáiáná kómu, tiꞌara niundeꞌ mampehádingi laluitaNgkuꞌ, láwiꞌ tiꞌarakou hangko i Pueꞌ Ala.”
Iesu hai Burahima
48Rauliꞌ tadulakoraꞌ toIahudiꞌ, “Toꞌu to kiuliꞌ! Io toSamaria, tiꞌara toIahudiꞌ, hai napesuaꞌiKoꞌ setáꞌ.”
49Nauliꞌ Iesu, “TiꞌaraꞌAꞌ napesuaꞌi setáꞌ. Kódóꞌ mobiláꞌAꞌ UmáNgkuꞌ. Agáiáná kómu, tiꞌaraꞌAꞌ nibiláꞌ. 50TiꞌaraꞌAꞌ mampeliꞌ bona rapomahileAꞌ. Naundeꞌ Pueꞌ Ala bona rapomahileAꞌ, hai Ia miꞌi to mobutusi heáná to toꞌu. 51Toꞌu ntepuꞌu laluitaNgkuꞌ deꞌe: heáná to mampeuláꞌi laluitaNgkuꞌ, tiꞌaraheꞌ ina mate, agáiáná ina tueꞌheꞌ duuꞌna i rue-ruena.”
52Rauliꞌ tadulakoraꞌ toIahudiꞌ, “Deꞌe-deꞌe kiꞌisá ntepuꞌu kanapesuaꞌiMu! Burahima mate miꞌi. Noꞌonoꞌ woꞌo upu-upu nabiꞌ hangkoia, matemoheꞌ. Agáiáná Nuꞌuliꞌ riꞌi heáná to mampeuláꞌi laluitaMu tiꞌaraheꞌ ina mate. 53Ba Nuꞌuliꞌ riꞌi melumbuꞌ kamahilena tueꞌMu hangko i toioruntaꞌ Burahima to marue miꞌi mate? Ba melumbuꞌ kamahilena tueꞌMu hangko i upu-upu nabiꞌ to matemoheꞌ? HeánáraKoꞌ haneꞌi Nuꞌuliꞌ noꞌonoꞌ?”
54Nauliꞌ Iesu, “Ane mampomahileAꞌ wátáNgkuꞌ haduduáNgkuꞌ, tiꞌara ara pobunduꞌána. Agáiáná UmáNgkuꞌ to mampomahileAꞌ. Niuliꞌ kaꞌIana Pueꞌ Ala to nipenómbái, 55agáiáná katoꞌuána tiꞌarakou moisá Pueꞌ Ala. Kódóꞌ, Kuisá. Ane keKuꞌuliꞌ tiꞌara Kuisá, modongkoꞌAꞌ hibali hai kómu. Agáiáná Kuisá, hai Kupeuláꞌi laluitaNa. 56Ane Burahima toiorumi, góeꞌ laluna láwiꞌ naisá kaꞌina naitaNgkuꞌ i alo kahaweꞌáNgkuꞌ. Ia moita miꞌi kahaweꞌáNgkuꞌ hai góeꞌ ntepuꞌu.”
57Rauliꞌ tadulakoraꞌ toIahudiꞌ, “TinuwuꞌMu tiꞌara mani gáná lima puloꞌna parena. Noumbá haneꞌi Nuꞌuliꞌ Nuita miꞌi Burahima?”
58Nauliꞌ Iesu, “Toꞌu laluitaNgkuꞌ deꞌe: hangko tiꞌara mani Burahima mesupaꞌ, Kódóꞌ araMoꞌ ami.”#8:58 Burahima tueꞌ rekeꞌ-rekeꞌna rosábu parena hangko tiꞌara mani Iesu rapoánáka.
59Karahádina toIahudiꞌ laluitaNa iti, motimaꞌmoheꞌ watu rapoinao mowatui Iesu.#8:59 Mouláꞌ polámbiꞌraꞌ tauna, Iesu mopahibali wátáNa hai Pueꞌ Ala, lempóna, Napakóiꞌ Pueꞌ Ala. Pehukuna tauna to mopakóiꞌheꞌ Pueꞌ Ala, rawatui duuꞌna mate. Básá Áturá Menómbá 24:13-16. Agáiáná Ia pohuꞌ ngkániiꞌ-niiꞌ hangko i Támbina Pueꞌ Ala hai tiꞌara piꞌi raita.
Currently Selected:
Iohane 8: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
