Iohane 18
18
Iesu rahakaꞌ
(Mat. 26:47-56; Mrk. 14:43-50; Luk. 22:47-53)
1Karoona Iesu mekakae, Ia pohuꞌ hingkakani hai topeguruNaheꞌ lao i rawa kótá. Mengkalimbamoheꞌ i lokeꞌ Kidero, laoheꞌ i hinoe kau saitu to tándáꞌ i hambali. 2Iudasiꞌ to mampobaluꞌ Iesu, moisá woꞌo hinoe iti, láwiꞌ Iesu hai topegurunaheꞌ madáháꞌ hirámpu ionoꞌ. 3Mewaliꞌ lao miꞌi Iudasiꞌ i hinoe iti moántiheꞌ rómbóngá surudadoꞌ toRoma#18:3 surudadoꞌ toRoma: Hanggáláꞌ hangko i ini átuna tauna. Topopárentá i Roma malááꞌ ina mewaliꞌ pohiho i Ierusale ane tauna ionoꞌ mosusaheꞌ. Mewaliꞌ tempó Paska handaꞌ surudadoꞌ toRoma mokámpái kótá Ierusale tempó onoꞌ. hai topokámpái Támbina Pueꞌ Ala to rahuoꞌheꞌ kapalaꞌ-kapalaꞌ tadulako menómbá hai toParisi lao mohakaꞌ Iesu. Moántiheꞌ párewá pombeala, huluꞌ hai lanterá.
4Naisá miꞌi Iesu upu-upu to ina mewaliꞌ i wátáNa, onoꞌ haneꞌi melingkaꞌ miꞌi mampohidupaꞌáheꞌ tauna iti, Nakuneꞌheꞌ, “Heáná to nipeliꞌ?”
5Rauliꞌ, “Iesu toNasare.”
Nauliꞌ Iesu, “Kódóꞌ miꞌi deꞌe.”#18:5 Kódóꞌ miꞌi deꞌe: Handaꞌ tauna mampekiri Iesu mokábelái hangaꞌna Pueꞌ Ala, YHWH. Tálu kánina Nauliꞌ noꞌonoꞌ. (Básá woꞌo wátiꞌna ka-6 hai ka-8.) Iudasiꞌ to mampobaluꞌ Iesu i ewáliNa, meángkáꞌ ionoꞌ hingkakani hai hira.
6I kanahángáꞌáꞌáraꞌ Iesu “Kódóꞌ miꞌi deꞌe,” mosuliꞌheꞌ hai madungkáheꞌ i tampoꞌ. 7Napekuneꞌ wopiꞌi Iesu, “Heáná to nipeliꞌ?”
Rauliꞌ, “Iesu toNasare.”
8Nauliꞌ Iesu, “Kuꞌuliꞌ miꞌi ininá, Kódóꞌ miꞌi deꞌe. Ane Kódóꞌ peá to nipeliꞌ, nipatodáhimoheꞌ rángáNgkuꞌ deꞌe pohuꞌ.” 9Nauliꞌ noꞌonoꞌ bona tebukeki miꞌi apa to Nauliꞌ i lalu pekakaeNa ininá, “Hangko i upu-upu tauna to NuweꞌiMoꞌ, tiꞌara ara hadua to ina tegááki hangko i Kódóꞌ.”
10Hangko ionoꞌ, Simoꞌ Peturuꞌ mobutuꞌ pihoꞌna motárási hadua hawiꞌna Tadulako Menómbá Mahile, agáiáná kana peá talinga kuánána hai mawehángi. Hangaꞌna hawiꞌ iti, Málákusi. 11Nauliꞌ Iesu i Peturuꞌ, “Pusaꞌ huleꞌ pihoꞌmu! Ba nupekiri tiꞌara Kuparaluu mantódihá kapári to napakanótóáMoꞌ UmáNgkuꞌ?”#18:11 Básá Iunani: Tiꞌara paꞌi hangaa-ngaa Kuinu hangko i painuá to NaweꞌiAꞌ UmáNgkuꞌ?
Iesu i lindoꞌna Hanasa
(Mat. 26:57)
12Hangko ionoꞌ, surudadoꞌ toRoma hai tadulakoraꞌ, hai tauna to rahuoꞌ tadulako-tadulako toIahudiꞌ, mohakaꞌ Iesu. Ia ratimpuku 13hai raꞌánti lao i támbina Tadulako Menómbá Mahile. Rungu-runguna raꞌánti lao i Hanasa, pengántiꞌina Kaiapa. Kaiapa ia miꞌi Tadulako Menómbá Mahile i tempó iti. 14Ia iti to mohángáꞌáheꞌ tadulakoraꞌ toIahudiꞌ, “Rángina miꞌi hadua tauna mate, mosulewátái upu-upu tauna.”#18:14 Básá Iohane 11:49-50.
Peturuꞌ mosápuáka peuláꞌna i Iesu
(Mat. 26:69-70; Mrk. 14:53-72; Luk. 22:54-71)
15Simoꞌ Peturuꞌ hai hadua topeguruna Iesu to ntániꞌna meuláꞌbókóꞌheꞌ i Iesu. TopeguruNa to ntániꞌna iti mokaisánga Tadulako Menómbá Mahile, mewaliꞌ ia rapaliu mesuaꞌ i tangabaa támbina Tadulako Menómbá Mahile iti, 16agáiáná Peturuꞌ mepegiá peá i rawa babaꞌá. Hangko ionoꞌ, topeguruna Iesu to hadua iti lao huleꞌ i rawa molaluita hai towawine to mokámpái babaꞌá, onoꞌ miꞌi haneꞌi Peturuꞌ woꞌo rapaliu mesuaꞌ.
17Towawine topokámpái babaꞌ iti mekuneꞌ i Peturuꞌ, “Tiꞌara paꞌi io woꞌo hadua topeguruNa tauna doꞌo?”
Nauliꞌ Peturuꞌ, “Tiꞌara!”
18Tempó iti tempó lengiꞌ, mewaliꞌ bahangapa hawiꞌ hai topekámpái mopatueꞌmoheꞌ api i tangabaa, hai meángkáꞌheꞌ motolelingi api rapenenei. Peturuꞌ woꞌo lao meángkáꞌ hai menene hingkakani hai hira.
19I lalu támbi iti, Tadulako Menómbá Mahile#18:19 Tadulako Menómbá Mahile: To ratunggái ieneꞌ ia miꞌi Hanasa (básá wátiꞌna ka-13 hai ka-24). Katoꞌuána ia tiꞌara piꞌi Tadulako Menómbá Mahile, rapaháwángi miꞌi toRoma hai Kaiapa. Agáiáná handaꞌ toIahudiꞌ morekeꞌ mani Hanasa Tadulako Menómbá Mahile i katoꞌu-toꞌuána láwiꞌ tiꞌara mani mate. mekuneꞌ miꞌi i Iesu, nauliꞌ, “Heánáheꞌ iti topeguruMu? Apa to Nupaturoꞌáheꞌ tauna to handaꞌ?”
20Nauliꞌ Iesu, “MolaluitaꞌAꞌ i katoꞌu-toꞌuána i upu-upu tauna. MepaturoꞌAꞌ oaꞌ i handaꞌ támbi penómbáꞌá hai i Támbina Pueꞌ Ala, to paka rakahiruhui toIahudiꞌ. Tiꞌara ara to Kuwuniángi. 21Mewaliꞌ, moapa riꞌi haneꞌi nupekuneꞌ i Kódóꞌ? Nupekuneꞌ i tauna to mohádi paturoꞌKuꞌ. Hangaa-ngaa raisá ntepuꞌu apa to Kuꞌuliꞌ.”
22Kanauliꞌna peá Iesu noꞌonoꞌ, hadua topekámpái to meángkáꞌ i hintáiꞌNa motampedaꞌ lindoꞌNa, nauliꞌ, “Pebáiꞌ mpuꞌuKoꞌ molaluita noꞌonoꞌ i Tadulako Menómbá Mahile!”
23Nauliꞌ Iesu, “Ane tiꞌara hintotoꞌ to Kuꞌuliꞌ, nupatongawaꞌ apa salaꞌKuꞌ. Agáiáná ane toꞌu laluitaNgkuꞌ, moapa riꞌi haneꞌiAꞌ nutampedaꞌ?” 24Hangko ionoꞌ, Hanasa mohuoꞌmoheꞌ topekámpái moánti Iesu lao i Tadulako Menómbá Mahile Kaiapa. Tempó iti, taena Iesu tetimpuku mani.#18:24 Kaliliuána apa to mewaliꞌ i Iesu i lindoꞌna Kaiapa hai totosaeraꞌ toIahudiꞌ to ntániꞌna teukiꞌ i Matiu 26:57-68 hai Marakusi 14:53-65.
25Simoꞌ Peturuꞌ meángkáꞌ menene hingkakani hai topekámpái. Araheꞌ tauna to mekuneꞌ, “Tiꞌara paꞌi io woꞌo hadua topeguruNa?”
Mesápuáka miꞌi Peturuꞌ, nauliꞌ, “Tiꞌara wongkódóꞌá kódóꞌ!”
26Ara woꞌo ionoꞌ hadua hawiꞌna Tadulako Menómbá Mahile. Hawiꞌ iti halaluna tauna to natárási Peturuꞌ talingana. Nauliꞌ hawiꞌ iti i Peturuꞌ, “Tiꞌara paꞌi io to kuita ininá i hinoe iti hingkakani hai Iesu?”
27Mesápuáka wopiꞌi Peturuꞌ, nauliꞌ, “Tiꞌara!” I tempó iti woꞌo, motuturuꞌuá miꞌi manuꞌ.
Iesu raꞌánti lao i lindoꞌna Mágáuꞌ Pilatu
(Mat. 27:1-2,11-14; Mrk. 15:1-5; Luk. 23:1-5)
28Hungkuꞌ mabaa, Iesu raꞌánti hangko i támbina Kaiapa lao i támbina mágáuꞌ. Tadulako toIahudiꞌ, tiꞌaraheꞌ mesuaꞌ i lalu támbina mágáuꞌ. Malááꞌheꞌ tiꞌarapoheꞌ magasaꞌ mouláꞌ áturá ágámáraꞌ, láwiꞌ mágáuꞌ iti tiꞌara toIahudiꞌ, hai ane mesuaꞌheꞌ i lalu támbina, tiꞌaraheꞌ ina peisá moandeꞌ pandeꞌ Posusa Paska. 29Mewaliꞌ Mágáuꞌ Pilatu lao miꞌi i rawa mampohidupaꞌáheꞌ hai nakuneꞌheꞌ, “Apa to nisalaꞌiá tauna deꞌe?”
30Agáiáná rauliꞌ peá, “Ane ketiꞌarai tauna deꞌe to kadake, ketiꞌara ina kiánti mai i hio mágáuꞌ.”
31Nauliꞌ Pilatu, “Niánti miꞌi hai nipakanótó hukuNa mouláꞌ ádá ágámámi haduduámi!”
Rauliꞌ tadulakoraꞌ toIahudiꞌ, “Kiundeꞌ bona tauna deꞌe rahuku mate, agáiáná kaiꞌ toIahudiꞌ, tiꞌaraꞌangkaiꞌ rapaliu toRoma mohuku mate tauna.” 32Iti mewaliꞌ bona tebukeki apa to nauliꞌ Iesu kana i rárá kamateNa.#18:32 Iesu rapakuꞌ i kau duuꞌna mate mouláꞌ áturána popárentáraꞌ toRoma. Tiꞌara mate rawatui tauna mouláꞌ ádáraꞌ toIahudiꞌ. Básá woꞌo Iohane 12:32-33; Matiu 20:19.
33Hangko ionoꞌ, Pilatu mesuaꞌ huleꞌ i lalu támbina, hai nahuoꞌmoheꞌ taunána moánti Iesu i lindoꞌna, haneꞌi nakuneꞌ, “Ba Io mpuꞌui daturaꞌ toIahudiꞌ?”
34Nauliꞌ Iesu, “Ba pekuneꞌmu iti hangko i hio haduduámu, ba nuhádiꞌi i tauna ntániꞌna kaKódóꞌna Datu?”
35Nauliꞌ Pilatu, “Kódóꞌ tiꞌaraꞌaꞌ toIahudiꞌ! Hangka toIahudiꞌMu hai kapalaꞌ-kapalaꞌ tadulako menómbá to moántiKoꞌ mai i kódóꞌ to manguliꞌ noꞌonoꞌ. Salaꞌ apa riꞌi to Nubábehi?”
36Nahániki Iesu, “Kódóꞌ, tiꞌaraꞌAꞌ nodo datu to mepárentá i duniáꞌ deꞌe. Ane kenodoAꞌ datu i duniáꞌ deꞌe, tauna to meuláꞌ i Kódóꞌ bateꞌna ina meꞌewaꞌheꞌ bona ineeꞌAꞌ rahakaꞌ hai rahuhuꞌ i tadulakoraꞌ toIahudiꞌ. Agáiáná tiꞌaraꞌAꞌ datu to hangko i duniáꞌ deꞌe.”
37Nauliꞌ wopiꞌi Pilatu, “Ane noꞌonoꞌi, toꞌu mpuꞌu paꞌi kaꞌIona datu?”
Nauliꞌ Iesu, “Toꞌu mpuꞌu kanuꞌuliꞌna, Kódóꞌ deꞌe datu. Onoꞌ haneꞌi rapoánákaꞌAꞌ i duniáꞌ deꞌe, bona Kupahaweꞌ apa to toꞌu. Tauna to moundeꞌ mampeuláꞌi apa to toꞌu, mampehádingiheꞌ laluitaNgkuꞌ.”
38Nauliꞌ Pilatu, “Apa riꞌi lempóna ‘apa to toꞌu’ iti?”
Iesu rahuku mate
(Mat. 27:15-31; Mrk. 15:6-20; Luk. 23:13-25)
Roo onoꞌ, lao wopiꞌi Pilatu i rawa mopahaweꞌ i tadulakoraꞌ toIahudiꞌ, “Haweꞌ hampákáꞌ salaꞌNa, tiꞌara kulámbiꞌ. 39Agáiáná biásána, pare-parena i Alo Mahile Posusa Paska, kukábáháꞌákou hadua toratarungku, hiolaꞌ hai peundeꞌámi. Mewaliꞌ, noumbá? Ba niundeꞌ ane kukábáháꞌákou daturaꞌ toIahudiꞌ deꞌe?”
40Monganga-ngangamoheꞌ, rauliꞌ, “Ineeꞌ, ineeꞌ Ia! Baraba riꞌi!” Baraba#18:40 Baraba: Lempóna “ánáꞌna umaꞌ”. iti, hadua toperámpáki.
Currently Selected:
Iohane 18: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
