Iohane 17

Iesu mampekakaeá topeguruNa hai upu-upu tauna to mepoinálái i Hia

1Karoona Iesu mopahaweꞌ upu-upuna iti, Ia mengoaꞌ i langiꞌ mekakae, Nauliꞌ, “UmáNgkuꞌ, haweꞌ miꞌi tempóna! NupomahileMoꞌ ÁnáꞌMu, bona Kódóꞌ woꞌo mampomahileKoꞌ Umaꞌ. 2NuweꞌiMoꞌ kuasaꞌ motadulakoi upu-upu tauna, bona tauna to NuweꞌiMoꞌ iti, ina Kuweꞌiheꞌ woꞌo katueꞌ to maroꞌa to tiꞌara mokahópóꞌá. 3To Kutunggái hai laluita ‘katueꞌ to maroꞌa to tiꞌara mokahópóꞌá’ ia miꞌi: raisá kaꞌIona peá Pueꞌ Ala to toꞌu, hai raisá woꞌo kaKódóꞌna Iesu Kerisitu to Nuhuoꞌ mai. 4Umaꞌ, i lalu duniáꞌ deꞌe Kupatongawaꞌámoheꞌ peawaꞌMu moliu kaKuparoona miꞌi bágóꞌ to NuweꞌiAꞌ. 5Onoꞌ miꞌi haneꞌi Kupembiáꞌ bona NupopeawaꞌAꞌ huleꞌ, nodo peawaꞌKuꞌ tempóNgkuꞌ hingkakani hai Io hangko tiꞌara mani rapopewaliꞌ duniáꞌ deꞌe.

6Umaꞌ, Kupopaisáꞌámoheꞌ kaheánáMu i tauna to NuweꞌiMoꞌ hangko i oloꞌraꞌ tauna to i duniáꞌ deꞌe. Hira iti taunáMumoheꞌ to NuweꞌiAꞌ bona Kukádipuráheꞌ, hai mampeuláꞌimoheꞌ ngkóráꞌMu. 7Deꞌe-deꞌe raisá miꞌi upu-upu to NuweꞌiAꞌ mentóáꞌ hangko i Hio. 8Kupahaweꞌámoheꞌ upu-upu laluita to NupahaweꞌáꞌAꞌ. Laluita iti ratarima miꞌi, hai deꞌe-deꞌe raisá miꞌi kaKódóꞌna to hangko i Hio Umaꞌ. Rapoinálái miꞌi kaꞌIona to mohuoꞌAꞌ mai.

9Kupekakaeáheꞌ topeguruNgkuꞌ iti. Tiꞌaraheꞌ Kupekakaeá upu-upu tauna i duniáꞌ, bateꞌna peá tauna to NuweꞌiMoꞌ, láwiꞌ hira miꞌi taunáMu. 10Upu-upu tauna to mewaliꞌ taunáNgkuꞌ, taunáMumoheꞌ woꞌo. Hai upu-upu tauna to mewaliꞌ taunáMu, taunáNgkuꞌmoheꞌ woꞌo. Hai peawaꞌKuꞌ tongawaꞌ moliu taunáNgkuꞌheꞌ deꞌe.

11Ina laoAꞌ i Hio Umaꞌ, tiꞌaraPoꞌ marue i duniáꞌ deꞌe. Agáiáná topeguruNgkuꞌheꞌ deꞌe ara maniheꞌ oaꞌ i duniáꞌ. Ó UmáNgkuꞌ to magasaꞌ, Kupembiáꞌ bona Nukámpáiheꞌ hai kuasaꞌna hangaꞌMu to NuweꞌiMoꞌ. Nukádipuráheꞌ bona hampepekiriheꞌ oaꞌ, nodo Io hai Kódóꞌ hampepekiriKeꞌ. 12TempóNgkuꞌ hingkakani hai hira, Kódóꞌ miꞌi to mokámpáiheꞌ hai kuasaꞌMu to NuweꞌiAꞌ. Kukámpáimoheꞌ bona tiꞌaraheꞌ ara to tegááki hangko i Kódóꞌ. Bateꞌna peá hadua to tegááki, ia miꞌi to ina molámbiꞌ pehuku to rumihi bona tebukeki apa to teukiꞌ i lalu Sura Magasaꞌ.#17:12 Básá Sura Petóiá 55:13-16; 109:4-5.

13Deꞌe-deꞌe, ina laoAꞌ i Hio. Upu-upuna iti Kuhángáꞌámoheꞌ i tempóNgkuꞌ mani hingkakani hai hira i duniáꞌ deꞌe, bona ina bukeꞌ kagóeꞌraꞌ to ralámbiꞌ hangko i Kódóꞌ. 14Kupahaweꞌámoheꞌ laluitaMu, áláraꞌ tauna i duniáꞌ mokáhihiꞌheꞌ, láwiꞌ pekiriraꞌ topeguruNgkuꞌ deꞌe tiꞌara piꞌi hibali hai pekiriraꞌ tauna to i duniáꞌ. Noꞌonoꞌ woꞌo Kódóꞌ, tiꞌaraꞌAꞌ mouláꞌ pekiriraꞌ tauna to i duniáꞌ deꞌe to tiꞌara mepoinálái. 15Tiꞌara Kupembiáꞌ bona Nualaheꞌ topeguruNgkuꞌ hangko i duniáꞌ deꞌe, ngkáliꞌna riꞌi Kupembiáꞌ bona Nukámpáiheꞌ hangko i Datu Tokadake.#17:15 Datu Tokadake: Peisá woꞌo ralempónga: to kadake. 16Kódóꞌ tiꞌaraꞌAꞌ mouláꞌ pekiriraꞌ tauna i duniáꞌ, noꞌonoꞌ woꞌo topeguruNgkuꞌ tiꞌaraheꞌ mouláꞌ pekiriraꞌ. 17Kupembiáꞌ bona Nupamagasaꞌheꞌ, hai Nupopewaliꞌheꞌ taunáMu moliu paturoꞌMu to toꞌu. NgkóráꞌMu, iti miꞌi to toꞌu. 18Umaꞌ, NuhuoꞌMoꞌ mai i duniáꞌ, noꞌonoꞌ woꞌo Kódóꞌ mohuoꞌheꞌ lao i tauna ntániꞌna to ara i duniáꞌ. 19Umaꞌ, Kuhuhuꞌ katueꞌKuꞌ i Hio mewaliꞌ gáláꞌMu, bona hira woꞌo mewaliꞌ gáláꞌMu.#17:19 Peisá woꞌo ralempónga: bona hira woꞌo mewaliꞌheꞌ taunáMu i pampeuláꞌiraꞌ paturoꞌ to toꞌu.

20Umaꞌ, tiꞌara peá topeguruNgkuꞌ iti to Kupekakaeá. Kupekakaeáheꞌ woꞌo tauna to ina mepoinálái i Kódóꞌ ánti pobámbáriraꞌ ngkóráꞌMu topeguruNgkuꞌ. 21Kupembiáꞌ bona hira upu-upu hampepekiri, hibali hai Io mohintuwuꞌ hai Kódóꞌ, hai Kódóꞌ mohintuwuꞌ hai Io. Kupembiáꞌ bona hira woꞌo mohintuwuꞌ hai Kitaꞌ bona upu-upu tauna i duniáꞌ ina mampoinálái kaꞌIona to mohuoꞌAꞌ mai.

22Kupatongawaꞌámoheꞌ peawaꞌ to NuweꞌiAꞌ, bona ina raisá hampepekiri, nodo woꞌo Kitaꞌ hampepekiriKeꞌ. 23Kódóꞌ mohintuwuꞌ hai hira, hai Io woꞌo mohintuwuꞌ hai Kódóꞌ. Kuhárungá hira ina mewaliꞌ mpuꞌuheꞌ hampepekiri. Ane noꞌonoꞌi, upu-upu tauna ina moisá kaNuhuoꞌKuꞌ mai hai kaNupokaꞌahiꞌraꞌ tauna to mepoinálái i Kódóꞌ. AhiꞌMu i hira hibali hai ahiꞌMu i Kódóꞌ.

24PeundeꞌáNgkuꞌ bona hira to NuweꞌiAꞌ ina toroꞌheꞌ hingkakani hai Kódóꞌ i katoroꞌáNgkuꞌ, bona moitaheꞌ peawaꞌKuꞌ. PeawaꞌKuꞌ iti NuweꞌiMoꞌ hangko tiꞌara mani duniáꞌ deꞌe rapopewaliꞌ, láwiꞌ NupokaꞌahiꞌAꞌ. 25Ó UmáNgkuꞌ, Io miꞌi to bukeꞌ timbá. Tauna i duniáꞌ deꞌe to tiꞌara mepoinálái i Hio, tiꞌaraheꞌ moisá kaheánáMu. Agáiáná Kódóꞌ, KuisáKoꞌ. Hai upu-upu tauna to mepoinálái i Kódóꞌ moisá kaꞌIona miꞌi to mohuoꞌAꞌ mai. 26Kupopaisáꞌámoheꞌ kaheánáMu, hai bateꞌna ina Kupahaweꞌáheꞌ oaꞌ kaheánáMu, bona hira mampokaꞌahiꞌheꞌ hángká rángáraꞌ nodo kaNupokaꞌahiꞌKuꞌ, hai bona Kódóꞌ ina araꞌAꞌ oaꞌ hingkakani hai hira.”

Currently Selected:

Iohane 17: NTBEP

Highlight

Copy