Iohane 16

1Iesu mopaliliu wopiꞌi laluitaNa, Nauliꞌ, “Upu-upu deꞌe Kuhángáꞌáꞌákou, bona tiꞌarakou ina mokábáhá pepoináláimi i Kódóꞌ. 2Tiꞌarakou ina rapaliu menómbá i támbi penómbáꞌá. Hai tiꞌara iti peá, agáiáná ina haweꞌ tempóna tauna ina mopapatekou, hai ina rapekiri onoꞌ riꞌi peundeꞌána Pueꞌ Ala.#16:2 Rápáꞌna, Paulu mampekiri ia mampeuláꞌi peundeꞌána Pueꞌ Ala tempóna mampopeahiahiꞌ toSarani. 3Upu-upu iti ina rabábehi i kómu láwiꞌ tiꞌaraheꞌ moisá UmáNgkuꞌ, tiꞌaraheꞌ woꞌo moisá kaheánáNgkuꞌ. 4Upu-upu deꞌe Kuhángáꞌáꞌákou, bona i tempóna mewaliꞌ, ina nibuhinao apa to Kuhángáꞌámokou ami.”

Pobágóꞌna Inao to Magasaꞌ

Iesu mopaliliu wopiꞌi laluitaNa, Nauliꞌ, “Upu-upu paturoꞌ deꞌe tiꞌarakou Kuhángáꞌá hangko i rungu-runguna, láwiꞌ ara maniAꞌ hingkakani hai kómu. 5Agáiáná deꞌe-deꞌe, ina laoAꞌ i UmáNgkuꞌ to mohuoꞌAꞌ mai, agáiáná tiꞌara haweꞌ hadua hangko i oloꞌmi to mekuneꞌ i Kódóꞌ ba iumbá kalaoáNgkuꞌ. 6Masusa lalumi i kamohádimi laluitaNgkuꞌ ininá to manguliꞌ kaꞌina pohuꞌKuꞌ, 7agáiáná katoꞌuána, ina molámbiꞌkou rasiꞌ ane pohuꞌAꞌ, láwiꞌ ane tiꞌaraꞌAꞌ pohuꞌ, tiꞌara ina haweꞌ Topetulungi, ia miꞌi Inao to Magasaꞌ. Agáiáná ane pohuꞌAꞌ, Ia ina Kuhuoꞌ mai i kómu.

8Ane haweꞌ miꞌi Inao to Magasaꞌ iti, Ia to ina mopakanótó i tauna kamadósáraꞌ láwiꞌ Ia ina mopatongawaꞌ woꞌo kamanótóNgkuꞌ hai mopakanótó pehukuna Pueꞌ Ala. 9Ia ina mopakanótó kamadósáraꞌ tauna, hai dósá to melumbuꞌ kamahilena ia miꞌi ane tauna mosápuáka kaKódóꞌna miꞌi Datu Topehómpóꞌ. 10Ina laoAꞌ i UmáNgkuꞌ, hai tiꞌaraPoꞌ ina niꞌita. PesuleꞌKuꞌ i surugáꞌ ina mopatongawaꞌ kamanótóNgkuꞌ. 11Hai bateꞌna Inao to Magasaꞌ ina mopakanótó woꞌo kanahukuraꞌ Pueꞌ Ala tauna to madósá, láwiꞌ tepakanótó miꞌi Datu Tokadake to mokuasaꞌi duniáꞌ deꞌe ina Nahuku.

12Handaꞌ mani to Kupoinao Kuhángáꞌáꞌákou, agáiáná deꞌe-deꞌe tiꞌara mani nibuku motarima upu-upuna iti. 13Ane haweꞌ miꞌi Inao to Magasaꞌ, Ia miꞌi to ina moteteꞌkou hai mampopaisáꞌákou upu-upu paturoꞌ to toꞌu. Ia tiꞌara ina molaluita mouláꞌ pekiriNa haduduáNa. Apa to Nahádi hangko i UmáNgkuꞌ, iti miꞌi to ina Napahaweꞌákou. Hai Ia ina mopahaweꞌákou apa to ina mewaliꞌ i alo to ina haweꞌ. 14Ia ina mampomahileAꞌ moliu popahaweꞌNa laluita to Natarima hangko i Kódóꞌ. 15Upu-upu to ara i UmáNgkuꞌ, ara woꞌo i Kódóꞌ, onoꞌ miꞌi haneꞌi Kuꞌuliꞌ: apa to natarima Inao to Magasaꞌ hangko i Kódóꞌ, iti miꞌi woꞌo to ina Napahaweꞌákou.”

Kasusa hai kagóeꞌ lalu

16Nauliꞌ wopiꞌi Iesu, “Tiꞌara piꞌi marue, tiꞌaraPoꞌ ina niꞌita, agáiáná tiꞌara marue hangko ionoꞌ, ina niꞌita wopaꞌAꞌ.”

17Wuliheꞌ topeguruNa, hai araheꞌ to mombekuneꞌ-kuneꞌ, rauliꞌ, “Apa tunggáiáNa haneꞌi Nahángáꞌáꞌákeꞌ: ‘Tiꞌara piꞌi marue, tiꞌaraPoꞌ ina niꞌita, hai tiꞌara piꞌi woꞌo marue, ina niꞌita wopaꞌAꞌ’? Hai apa wopiꞌi tunggáiáNa haneꞌi Nauliꞌ, ‘LaoAꞌ i UmáNgkuꞌ’?” 18Mombekuneꞌ-kuneꞌheꞌ oaꞌ, rauliꞌ, “Moapa riꞌi haneꞌi Nauliꞌ, ‘Tiꞌara piꞌi marue’? Tiꞌara taisá lempóna.”

19Naisá Iesu karapoinaona mekuneꞌ i Hia, onoꞌ miꞌi haneꞌi Nahángáꞌáheꞌ, “Ba mampopombekuneꞌ-kuneꞌkou apa lempóna laluitaNgkuꞌ ininá to manguliꞌ: ‘Tiꞌara piꞌi marue, tiꞌaraPoꞌ ina niꞌita, agáiáná tiꞌara marue hangko ionoꞌ, ina niꞌita wopaꞌAꞌ’? 20Toꞌu ntepuꞌu laluitaNgkuꞌ deꞌe: ina teriaꞌkou, agáiáná tauna to tiꞌara mepoinálái i Kódóꞌ, ina góeꞌ ntepuꞌuheꞌ. Ina masusa lalumi, agáiáná kamasusami iti ina tebáliki mewaliꞌ kagóeꞌmi. 21Kagóeꞌmi iti, ina nodo kagóeꞌna hadua towawine ane roo miꞌi moánáꞌ. Rungu-runguna mantódihá humádi, agáiáná ane mesupaꞌ miꞌi ánáꞌna, towawine iti tiꞌara piꞌi mambuhinao pantódihána. Góeꞌ miꞌi láwiꞌ mesupaꞌ miꞌi ánáꞌna i duniáꞌ. 22Noꞌonoꞌ woꞌo kómu: deꞌe-deꞌe masusa lalumi {láwiꞌ Kuꞌuliꞌ ina pohuꞌMoꞌ}. Agáiáná ina Kupohidupaꞌá wopakou. I tempó iti, ina góeꞌkou huleꞌ, hai tiꞌara ara to peisá moala kagóeꞌmi iti hangko i kómu. 23I tempó iti, tiꞌara piꞌi paraluu nipekuneꞌ ba apa-apa i Kódóꞌ. Peisámokou mekuneꞌ haduduámi i UmáNgkuꞌ. Noꞌonoꞌ woꞌo ane membiáꞌkou, peisámokou woꞌo haduduámi membiáꞌ i UmáNgkuꞌ i lalu hangaꞌKuꞌ, hai bateꞌna ina Nabukeki pembiáꞌmi iti. 24Duuꞌna deꞌe-deꞌe, tiꞌara manikou membiáꞌ apa-apa i lalu hangaꞌKuꞌ. Hangaa-ngaa nipembiáꞌ oaꞌ, hai ina nitarima bona góeꞌ ntepuꞌukou.”

Iesu monangi kuasaꞌ tokadake

25Iesu mopaliliu wopiꞌi laluitaNa, Nauliꞌ, “Upu-upu deꞌe Kuhángáꞌáꞌámokou moliu pándiriꞌ. Agáiáná ina haweꞌ tempóna, tiꞌara piꞌi Kupakeꞌ pándiriꞌ. Ina Kupolaluitaꞌákou kana i UmáNgkuꞌ i kanótó-nótóána. 26I tempó iti, ina membiáꞌkou i UmáNgkuꞌ i lalu hangaꞌKuꞌ. Tiꞌara piꞌi paraluu Kupembiáꞌákou apa to niparaluu i UmáNgkuꞌ, 27láwiꞌ UmáNgkuꞌ haduduáNa to mampokaꞌahiꞌkou. Ia mampokaꞌahiꞌkou, láwiꞌ nipokaꞌahiꞌAꞌ, hai nipoinálái kaKódóꞌNa miꞌi to hangko i Pueꞌ Ala. 28KahaweꞌKuꞌ i duniáꞌ deꞌe, maiAꞌ hangko i UmáNgkuꞌ. Deꞌe-deꞌe, ina Kupálehi duniáꞌ deꞌe, hai mesuleꞌAꞌ lao i UmáNgkuꞌ.”

29Rauliꞌ topeguruNa, “Pueꞌ, deꞌe-deꞌe manótó miꞌi laluitaMu, láwiꞌ tiꞌaraKoꞌ mopakeꞌ pándiriꞌ. 30Manótó miꞌi i kaiꞌ: Io to moisá upu-upuna. Tiꞌara ara to paraluu kipekuneꞌ i Hio. Deꞌe-deꞌe, kipoinálái miꞌi kahangko i Pueꞌ AlaMu.”

31Nauliꞌ Iesu, “Toꞌu paꞌi kanipoináláina? 32Nipehádingi! Ina haweꞌ tempóna hai katoꞌuána tempó iti haweꞌ miꞌi, ina melangkakou hadua-hadua lao i támbimi, hai ina nipálehiAꞌ.#16:32 ina melangkakou… nipálehiAꞌ: Teukiꞌ miꞌi ami i Sakaria 13:7, rekeꞌ-rekeꞌna iba átuna uwalu puloꞌna parena hangko tiꞌara mani Iesu rapoánáka. Agáiáná i tempó iti, tiꞌaraꞌAꞌ haduduáNgkuꞌ, láwiꞌ UmáNgkuꞌ ina mamporángáꞌAꞌ. 33Upu-upu deꞌe Kuhángáꞌámokou bona molámbiꞌkou katinda lalu hangko i pohintuwuꞌmi hai Kódóꞌ. Tangaꞌmi mani i duniáꞌ deꞌe, bateꞌna rapopeahiahiꞌkou. Agáiáná nipakaróhó lalumi, láwiꞌ Kunangi miꞌi kuasaꞌ to kadake to ara i lalu duniáꞌ deꞌe.”

Currently Selected:

Iohane 16: NTBEP

Highlight

Copy