Surona Pueꞌ Iesu 8

1Saulu woꞌo mampokana karapapatena Setepanu iti.

Saulu mampopeahiahiꞌ tauna to mepoinálái i Iesu

Mantepuꞌu alo iti, upu-upu to mepoinálái i Pueꞌ Iesu to ara i kótá Ierusale#8:1 Rekeꞌ-rekeꞌna rompuloꞌ sáburaꞌ tauna to mepoinálái i Iesu i Ierusale hangko tiꞌara maniheꞌ rapopeahiahiꞌ. rapopeahiahiꞌ ntepuꞌuheꞌ, álána mahawuꞌheꞌ i humalele tampoꞌ Iudá hai Samaria. Bateꞌna perái surona Pueꞌ Iesu to tiꞌaraheꞌ melangka. 2Bahangapaheꞌ tauna to mengkoruꞌ i Pueꞌ Ala moala wátána Setepanu. Ánti kawioraraꞌ, rateriahi sieruꞌ, hangko ratawu.#8:2 Mouláꞌ áturáraꞌ toIahudiꞌ, tiꞌaraheꞌ peisá moteriahi to rahuku mate. Agáiáná araheꞌ to moteriahi Setepanu, lempóna, ia tiꞌara masalaꞌ.

3Hai i tempó iti, Saulu mampopeahiahiꞌheꞌ oaꞌ tauna to mepoinálái i Pueꞌ Iesu. Upu-upu támbiraꞌ nasuaki, hai upu-upu tauna to mepoinálái i Iesu, maroꞌa tobaleilo maroꞌa towawine, nahakaꞌheꞌ hai naꞌántiheꞌ lao natarungku.

Pilipu i tampoꞌ Samaria

4Mewaliꞌ, tauna to mepoinálái to tehawukaheꞌ iti, hira miꞌi to mopahaweꞌ Ngkóráꞌna Pueꞌ iumbá-umbá peá kalaoáraꞌ. 5Rápáꞌna, Pilipu#8:5 Pilipu: Pilipu iti hadua hangko i pituheꞌ tauna to rapileꞌi mewaliꞌ topekádipurá (básá Suro 6:5). lao miꞌi i hambuaꞌ wánuá i tampoꞌ Samaria,#8:5 Samaria: ToSamaria tauna to tiꞌara toIahudiꞌ to rungu-runguna mohádi Ngkóráꞌ Marasa mokana i Iesu. Hira hambikáꞌ toIahudiꞌ, hambikáꞌ tiꞌara. Ágámáraꞌ woꞌo ragalo, onoꞌ miꞌi haneꞌi rakahihiꞌheꞌ toIahudiꞌ. mopahaweꞌáheꞌ kaꞌIesuna Datu Topehómpóꞌ. 6Karahádina pueꞌ wánuá apa to nauliꞌ Pilipu, rapailalu ntepuꞌu laluitana, hai raita woꞌo tandaꞌ kuasaꞌ to nabábehi to mopatongawaꞌ paturoꞌna hangko i Pueꞌ Ala. 7Rápáꞌna, ia mampopesuwuꞌ tokadake hangko i handaꞌ tauna to napesuaꞌi, álána mesuwuꞌ mpuꞌuheꞌ tokadake iti hai monganga-ngangaheꞌ. Handaꞌ woꞌo tauna to paluꞌ hai to kompiha bitiraꞌ napakauriꞌ Pilipu. 8Góeꞌ ntepuꞌumoheꞌ pueꞌ wánuá mampeita apa to pewaliꞌ iti.

9I lalu kótá iti, ara hadua tobaleilo to rahangaꞌ Simoꞌ. Simoꞌ iti, hadua tauna to handaꞌ pangisána, to bahangapa miꞌi parena mampopaita isána to mehelei i toSamaria. Nauliꞌ kaꞌiana tauna to mahile kuasaꞌna. 10Mentakaꞌ ntepuꞌu laluraꞌ upu-upu pueꞌ wánuá i hia, maroꞌa ánángkóiꞌ, maroꞌa totosae, rauliꞌ, “Simoꞌ iti, ara kuasaꞌna Pueꞌ Ala i hia, hai ia peisá rauliꞌ ‘Kuasaꞌ Mahile’.” 11Mewaliꞌ upu-upu pueꞌ wánuá meuláꞌ i hia, láwiꞌ maruemoheꞌ moita apa to nabábehi to mehelei moliu pangisána. 12Agáiáná kahaweꞌna Pilipu i wánuáraꞌ, ia mopahaweꞌ bámbári kana i popárentána Pueꞌ Ala, hai napaturoꞌáheꞌ kaꞌIesuna Datu Topehómpóꞌ, áláraꞌ handaꞌ tobaleilo hai towawine mepoinálái i Iesu hai rariuheꞌ. 13Hangko ionoꞌ, Simoꞌ mepoinálái miꞌi woꞌo hai rariu. Karoona rariu, meuláꞌ miꞌi oaꞌ i Pilipu, láwiꞌ tingkáráꞌ laluna moita tandaꞌ kuasaꞌ to nabábehi Pilipu.

14Roo onoꞌ, surona Pueꞌ Iesu to ara i Ierusale mohádimoheꞌ bámbári, toSamaria motarimamoheꞌ ngkóráꞌna Pueꞌ Ala, onoꞌ miꞌi haneꞌi mohuoꞌheꞌ Peturuꞌ hai Iohane lao i tampoꞌ Samaria. 15Kahaweꞌraꞌ Peturuꞌ hai Iohane, mampekakaeámoheꞌ toSamaria to mepoinálái i Pueꞌ Iesu, bona molámbiꞌheꞌ Inao to Magasaꞌ, 16láwiꞌ Inao to Magasaꞌ tiꞌara mani mendáulu i hira. Rariu peheꞌ i lalu hangaꞌna Pueꞌ Iesu. 17Mewaliꞌ Peturuꞌ hai Iohane mopágá wuáꞌraꞌ toSamaria iti mampekakaeáheꞌ,#8:17 I átuna miꞌi parena, moewaliheꞌ toIahudiꞌ hai toSamaria (básá to teukiꞌ i wóiꞌna wátiꞌna ka-5). Pendáuluna Inao to Magasaꞌ i toSamaria mewaliꞌ tandaꞌ kapeisáraꞌ mohintuwuꞌ. Mewaliꞌ toIahudiꞌ to mepoinálái i Iesu motarimaheꞌ toSamaria i jemaꞌaraꞌ. álána motarimaheꞌ Inao to Magasaꞌ.

18Naita Simoꞌ, heáná peá to rapekakaeá Peturuꞌ hai Iohane, hira to motarima Inao to Magasaꞌ. Onoꞌ miꞌi haneꞌi Simoꞌ moánti miꞌi dóiꞌ lao i Peturuꞌ hai Iohane, 19nahángáꞌáheꞌ, “Weꞌiaꞌ woꞌo kuasaꞌmi iti, bona heáná peá to kupágá wuáꞌna ina motarima Inao to Magasaꞌ.”

20Agáiáná nauliꞌ Peturuꞌ, “Hurewuꞌmokoꞌ hingkakani hai dóiꞌmu! Ina nahukukoꞌ Pueꞌ Ala láwiꞌ nupekiri kabulána laluna Pueꞌ Ala peisá rahóló hai dóiꞌ! 21Tiꞌarakoꞌ hintotoꞌ mobágóꞌ hingkakani hai kaiꞌ, láwiꞌ tiꞌara manótó lalumu i Pueꞌ Ala. 22Menosoꞌmokoꞌ hangko i tunggáiámu to kadake iti, hai mekakaekoꞌ i Pueꞌ bona Ia moámpungi tunggáiána lalumu to kadake iti; 23láwiꞌ kuita mahiniꞌ lalumu, hai tetakaꞌ manikoꞌ i kakadakemu.”

24Nauliꞌ Simoꞌ i Peturuꞌ hai Iohane, “Nipekakaeáꞌaꞌ wongkódóꞌá i Pueꞌ bona tiꞌaraꞌaꞌ narampe pehukuNa nodo to nuꞌuliꞌ!”

25Karooraꞌ Peturuꞌ hai Iohane mepaturoꞌ hai mopahaweꞌ ngkóráꞌna Pueꞌ, mesuleꞌmoheꞌ lao i Ierusale. I polumaoáraꞌ, ngkóráꞌna Pueꞌ rabámbári woꞌo i wánuá-wánuá ntániꞌna i tampoꞌ Samaria.

Pilipu hai toEtiopia

26Ara hadua malaꞌekana Pueꞌ to mopahaweꞌ laluita deꞌe i Pilipu, nauliꞌ, “Laomokoꞌ tándáꞌ i wóiꞌ, hai mouláꞌkoꞌ rárá to hangko i Ierusale haweꞌ i Gasa.” Rárá iti malaaꞌ rapelempói tauna. 27-28Lao mpuꞌu miꞌi Pilipu monóntóhi rárá to natudeꞌá Pueꞌ. I tempó iti, ara woꞌo hadua toEtiopia to moliu i rárá iti mesuleꞌ lao i tampoꞌna. Tauna iti, mapángkáꞌ lántiꞌna láwiꞌ ia tadulako topokádipurá dóiꞌ i humalele kadatuá i tampoꞌ Etiopia.#8:27-28 tampoꞌ Etiopia: Tiꞌara hibali hai tampoꞌ Etiopia tempó deꞌe. Hangkoia, tepasuaꞌ tampoꞌ Másiriꞌ tándáꞌ i wóiꞌ, hai tampoꞌ Sudana tándáꞌ i wongko. Etiopia peisá woꞌo rauliꞌ Nubia, ba Kusi i lalu básá Iberani. Datu towawine i Etiopia, iti hangaꞌna Kandake.#8:27-28 Kandake ia miꞌi lántiꞌna inána datu, hai ia to mepárentá láwiꞌ daturaꞌ toEtiopia rarekeꞌ ánáꞌna alo hai magasaꞌ haneꞌi tiꞌaraheꞌ paraluu mobágóꞌ. Karoona toEtiopia iti menómbá i Pueꞌ Ala i Ierusale, ia mengkaheꞌ i kereta to nadiiꞌ dárá hai mesuleꞌ lao i tampoꞌna. Tangaꞌna mehoda i lalu keretana, ia mobásá hambuaꞌ sura to naukiꞌ nabiꞌ Iesaia hangkoia.

29I tempó iti, Inaona Pueꞌ Ala molaluita i Pilipu, nauliꞌ, “Lao nuhungkuki kereta iti.”

30Mewaliꞌ melangka mpuꞌu miꞌi Pilipu lao i kereta iti. Kahaweꞌna, nahádi tauna iti tangaꞌna mobásá Surana Nabiꞌ Iesaia. Napekuneꞌ Pilipu, “Tuá, ba nuisá lempóna to nubásá iti?”

31Nahániki tauna iti, “Noumbá kakuisána, láwiꞌ tiꞌara ara tauna to mopakanótóáꞌaꞌ.” Roo onoꞌ, toEtiopia iti mowáwáhá miꞌi Pilipu mengkaheꞌ i lalu keretana bona mehodaheꞌ hingkakani. 32Deꞌe miꞌi laluita to nabásá hangko i Surana Nabiꞌ Iesaia:

“Ia nodo hambaꞌa dimbá to raꞌánti lao rasambale.

Ia nodo hambaꞌa ánáꞌ dimbá to ragundiꞌ wuluna

agáiáná tiꞌara mobungkáhi humena;

maniiꞌ-niiꞌ peá.

33Ia rasasalaꞌi hai rahuku;

tiꞌara hintotoꞌ karahukuNa.

Tiꞌara ara hadua tauna to peisá mampolaluita kana i pemuleꞌáNa,

láwiꞌ Ia rapapate.” (Iesaia 53:7-8)

34Hangko ionoꞌ, mekuneꞌ miꞌi toEtiopia i Pilipu, nauliꞌ, “Nuhángáꞌáꞌaꞌ ba heáná to natunggái nabiꞌ iti, ba wátána haduduána ba tauna ntániꞌna?” 35Mewaliꞌ hangko i to nabásá ininá, Pilipu mopatuntuá Ngkóráꞌ Marasa mokana i Iesu. 36Tangaꞌraꞌ mokereta, moitaheꞌ uwai i wiwi rárá. Nauliꞌ toEtiopia iti i Pilipu, “Peita, indolouꞌ ara uwai. Ba peisáꞌaꞌ nuriu?”

[ 37Nahániki Pilipu, “Ane nupoinálái ntepuꞌu miꞌi, peisákoꞌ kuriu.”

Nauliꞌ toEtiopia iti, “Kupoinálái Iesu Kerisitu. Kuisá kaꞌIana miꞌi Ánáꞌna Pueꞌ Ala.”]#8:37 I surana Lukasi deꞌe (Suro) básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ.

38Hangko ionoꞌ, napopengkaroo miꞌi keretana, hai mendáulumoheꞌ lao i lalu uwai, haneꞌi toEtiopia iti nariu mpuꞌu miꞌi Pilipu. 39Pesoreraꞌ hangko i uwai, hangkaꞌ-hangkaꞌ perái Inaona Pueꞌ Ala moánti Pilipu hangko ionoꞌ. Mewaliꞌ Pilipu tiꞌara piꞌi naita toEtiopia. ToEtiopia iti mopaliliu miꞌi polumaona hai góeꞌ ntepuꞌu laluna. 40Agáiáná Pilipu hangkaꞌ-hangkaꞌ haweꞌ i kótá Asadoꞌ,#8:40 kótá Asadoꞌ: Iti miꞌi hambuaꞌ kótá mahile i tampoꞌ Pelisitiꞌ (básá Iosuá 13:3). Kótá iti rekeꞌ-rekeꞌna tálu puloꞌna hai lima kilómete tándáꞌ i wongko kótá Gasa (wátiꞌna ka-26) hai hahioꞌ puloꞌna kilómete tándáꞌ i wóiꞌ kótá Kaisarea. hai liliu miꞌi lao i kótá Kaisarea.#8:40 Kaisarea: Iti miꞌi hambuaꞌ kótá mahile i wiwi tahiꞌ Tangaꞌ. Babilaꞌ Pilipu hangko i kótá iti, ba melimbá ionoꞌ (básá Suro 21:8). I polumaoána iti, ia mobámbári oaꞌ Ngkóráꞌ Marasa i upu-upu wánuá to napoliui.

Currently Selected:

Surona Pueꞌ Iesu 8: NTBEP

Highlight

Copy