Surona Pueꞌ Iesu 9

Saulu menosoꞌ hai mepoinálái i Iesu

1I tempó iti, Saulu mampoinao ntepuꞌu oaꞌ mampopalááꞌ hai mopapate tauna to mepoinálái i Pueꞌ Iesu.#9:1 Mouláꞌ Saulu, tauna to mepoinálái i Pueꞌ Iesu moántiheꞌ paturoꞌ to salaꞌ. Onoꞌ miꞌi haneꞌi lao i Tadulako Menómbá Mahile,#9:1 Tadulako Menómbá Mahile: Babilaꞌ Kaiapa mani to mewaliꞌ Tadulako Menómbá Mahile tempó iti. 2membiáꞌ sura kuasaꞌ to peisá naꞌánti lao i tadulako támbi penómbáꞌá#9:2 támbi penómbáꞌá: Tempó iti, tauna to mepoinálái kahandaꞌáraꞌ toIahudiꞌ, hai menómbá maniheꞌ i támbi penómbáꞌá. i kótá Damasiꞌ.#9:2 Damasiꞌ: Ia miꞌi hambuaꞌ hangko i hampuloꞌ kótá i poropensi Dekapoli (básá Marakusi 5:20). I sábuna toIahudiꞌ to toroꞌ ionoꞌ. Tunggáiána, ane araheꞌ nahumba tobaleilo ba towawine to mampeuláꞌi Paturoꞌna Iesu,#9:2 Babilaꞌ rungu-runguna mohádiheꞌ mokana i Iesu hangko i tauna to ara handaꞌ setáꞌ. Iesu mampopesuwuꞌ setáꞌ iti. Básá Marakusi 5:20. ina nahakaꞌ hai naꞌántiheꞌ lao i Ierusale.

3Agáiáná i polumaoáraꞌ lao i Damasiꞌ, i tempóna hungkuꞌmoheꞌ i kótá, hangkaꞌ-hangkaꞌ perái ara to mewangkaꞌ hangko i langiꞌ motolelingi Saulu. 4Madungká miꞌi Saulu haneꞌi mohádi wambaꞌ to manguliꞌ, “Saulu, Saulu! Moapa riꞌi haneꞌiAꞌ nupopeahiahiꞌ?”#9:4 Pohintuwuꞌraꞌ Iesu hai tauna to meuláꞌ i Hia maróhó ntepuꞌu, onoꞌ haneꞌi tempóna Saulu mampopeahiahiꞌ topeuláꞌna Iesu, nodo Iesu haduduáNa to rapopeahiahiꞌ. Básá woꞌo Lukasi 10:16; 1 Korintu 12:12,26-27; Epesu 1:22-23.

5Nauliꞌ Saulu, “Tuá, heánáKoꞌ?”

Nahániki, “Kódóꞌ miꞌi Iesu, to nupopeahiahiꞌ! 6Mearómokoꞌ hai laomokoꞌ i kótá. Ionoꞌ ina rapahaweꞌákoꞌ apa to hangaa-ngaa nubábehi.”

7Wambaꞌ to nahádi Saulu iti, rahádi woꞌo rángánaheꞌ, agáiáná tiꞌara ara to raita. Onoꞌ miꞌi haneꞌi malááꞌheꞌ hai tiꞌara piꞌi raisá molaluita. 8Hangko ionoꞌ, meángkáꞌ miꞌi Saulu mobungkáhi mátána, agáiáná tiꞌara piꞌi meita. Mewaliꞌ, onoꞌ miꞌi haneꞌi rateteꞌ perái lao i kótá Damasiꞌ. 9Tálu alona kamaruena tiꞌara meita, hai tiꞌara woꞌo mandeꞌ ba mainu.

10I kótá Damasiꞌ, ara hadua tauna to mepoinálái i Iesu. Hangaꞌna Anania. Ia moita pampetudeꞌá hangko i Pueꞌ. I lalu pampetudeꞌá iti, Pueꞌ Iesu mekióꞌ, Nauliꞌ, “Anania!”

Mehániꞌ Anania, nauliꞌ, “Deꞌentoaꞌ, Pueꞌ.”

11Nauliꞌ Pueꞌ, “Laomokoꞌ deꞌe-deꞌe i támbina Iudasiꞌ i wiwi rárá to rahangaꞌ Rárá Manoroꞌ. Nupeliꞌ i támbi iti hadua tauna hangko i kótá Tarusu. Hangaꞌna Saulu. Tauna iti ina nuhumba tangaꞌna mekakae, 12hai i lalu pampetudeꞌá, naitamokoꞌ lao mampohidupaꞌá hai moángkáꞌ taemu i wátána bona meita huleꞌ.”

13Nahániki Anania, “Pueꞌ! Handaꞌ tauna mampolaluita kana i Saulu iti. Rumihi pampopeahiahiꞌna tauna to mepoinálái i Hio i kótá Ierusale. 14Hai ia mai woꞌo ieneꞌ láwiꞌ raweꞌi kuasaꞌ hangko i kapalaꞌ-kapalaꞌ tadulako menómbá, bona mohakaꞌ upu-upu tauna to mepoinálái i Hio.”

15Nauliꞌ wopiꞌi Pueꞌ Iesu i Anania, “Hangaa-ngaa laokoꞌ, láwiꞌ Saulu iti, Kutunggái miꞌi Kupileꞌi mewaliꞌ topobágóꞌKuꞌ. Ia ina mopahaweꞌ hangaꞌKuꞌ i toSáráeliꞌ hai i tauna ntániꞌna haweꞌ-haweꞌ woꞌo i datu. 16Ina Kutudeꞌá kapári to hangaa-ngaa nalámbiꞌ ánti pobágóꞌna i Kódóꞌ.”#9:16 Básá mokana i kapári to nalámbiꞌ Paulu, 2 Korintu 11:23-28.

17Mewaliꞌ, lao mpuꞌu miꞌi Anania i támbi to natunggái Pueꞌ Iesu ininá, hai moángkáꞌ miꞌi taena i wongkona Saulu, nauliꞌ, “Saulu, halalungkuꞌ! I kamaimu ieneꞌ, nuita Pueꞌ Iesu i tangaꞌ rárá. Ia miꞌi to mohuoꞌaꞌ mai moweoꞌkoꞌ hai kupekakaeákoꞌ bona meitakoꞌ huleꞌ hai nakuasaꞌikoꞌ Inao to Magasaꞌ.” 18I tempó iti, ara mpuꞌu to nodo ruke bouꞌ to malókáki hangko i mátána, hai Saulu kásáliu meita. Hangko ionoꞌ, meángkáꞌ miꞌi hai liliu rariu. 19Roo onoꞌ, mandeꞌ miꞌi haneꞌi maróhó huleꞌ wátána.

Saulu mepaturoꞌ i Damasiꞌ hai i Ierusale

Bahangapa alona kamaruena, Saulu toroꞌ hingkakani hai to mepoinálái i kótá Damasiꞌ. 20Ionoꞌ, ia liliu lao i támbi-támbi penómbáꞌá, mopahaweꞌ bámbári kana i Iesu i hangka toIahudiꞌna, nauliꞌ, “Iesu Ia miꞌi Ánáꞌna Pueꞌ Ala.”#9:20 Raisá miꞌi toIahudiꞌ, Datu Topehómpóꞌ Ia miꞌi Ánáꞌna Pueꞌ Ala. Rápáꞌna, básá Sura Petóiá 2:6-7,12; Iesaia 9:6-7; Ieremia 23:5-6; Matiu 26:63. 21Tingkáráꞌ ntepuꞌu tauna to mampehádingi Saulu, rauliꞌ, “Noumbá riꞌi noeneꞌ? Iaꞌo i Ierusale ia miꞌi to mopapate tauna to menómbá i Iesu. Hai tunggáiána mai ieneꞌ, bona mohakaꞌheꞌ woꞌo tauna to mepoinálái i Iesu to ara ieneꞌ, haneꞌi naꞌántiheꞌ i kapalaꞌ-kapalaꞌ tadulako menómbá i Ierusale bona molámbiꞌheꞌ pehuku.”

22Agáiáná kamaróhó-róhóá riꞌi Saulu mepaturoꞌ, onoꞌ miꞌi haneꞌi mopawuliheꞌ toIahudiꞌ to ara i Damasiꞌ, láwiꞌ paturoꞌna iti mopakanótó mpuꞌu kaꞌIesuna Datu Topehómpóꞌ.

23Bahangapa kamaruena hangko ionoꞌ, mohimpudumoheꞌ toIahudiꞌ ina mopapate Saulu. 24Tunggáiáraꞌ ina mokámpáiheꞌ upu-upu babaꞌá bente kótá, maroꞌa mabaa maroꞌa káindi, bona ane moliu Saulu, ina rapapate. Agáiáná tunggáiáraꞌ iti rapahaweꞌ miꞌi i Saulu. 25Mewaliꞌ tangaꞌ káindi, bahangapa rángána Saulu moánti lao i bente kótá to motolelingi Damasiꞌ. Ionoꞌ, Saulu rapopehoda i lalu kárándi haneꞌi raulu hangko i sungkekeꞌ to i bente kótá, tóá-tóá i tampoꞌ i rawa kótá.#9:25 Hangko tiꞌara mani Paulu lao i Ierusale, ia lao i Arabia hai toroꞌ ionoꞌ bahangapa parena. Básá Galatia 1:17-18.

26Mesuleꞌ miꞌi Saulu lao i Ierusale. Kahaweꞌna, napoinao mohintuwuꞌ hai tauna to mepoinálái i Iesu, agáiáná malááꞌheꞌ i Saulu, láwiꞌ tiꞌara maniheꞌ mampoinálái kapeuláꞌna mpuꞌu miꞌi i Iesu. 27Agáiáná Baranaba lao miꞌi mampobale Saulu, hai naporángá lao i suro-surona Pueꞌ Iesu. Baranaba mopatuntuáheꞌ noumbá Saulu moita Pueꞌ Iesu i tangaꞌ rárá kalaona i Damasiꞌ, hai noumbá Pueꞌ molaluita i hia. Napahaweꞌáheꞌ woꞌo kapebáiꞌna Saulu mopahaweꞌ bámbári kana i Pueꞌ Iesu i Damasiꞌ.

28Hangko ionoꞌ, Saulu toroꞌ hingkakani hai hira, hai lao i humalele kótá Ierusale hingkakani hai halalu hampepepoináláina, mopahaweꞌ bámbári kana i Pueꞌ Iesu, hai tiꞌara ara kamalááꞌna. 29Ia molaluita hai mampombeheheꞌá toIahudiꞌ to mobásá Iunani, onoꞌ miꞌi haneꞌi rapoinao toIahudiꞌ iti mopapate Saulu. 30Mewaliꞌ, karaisána halalu hampepepoináláina tunggáiáraꞌ tauna iti, ia raporángá miꞌi lao i kótá Kaisarea.#9:30 Kótá Kaisarea rekeꞌ-rekeꞌna hangatu kilómete i wongko tándáꞌ i katámpuá alo kótá Ierusale. Hangko i Kaisarea, rapopeángkáꞌ miꞌi lao i kótá Tarusu.#9:30 Tarusu: Saulu rapoánáka i kótá Tarusu (básá Suro 22:3). Kótá iti pehodaꞌána poropensi Kilikia, hai ara bahangapa universitas ionoꞌ. Kótá Atena, Alesandaria hai Tarusu hangkoia mewaliꞌ pehodaꞌá posikolaꞌ, hai mahile hangaꞌraꞌ.

31I tempó onoꞌ, tauna to mepoinálái i Pueꞌ Iesu tiꞌara piꞌi rapopeahiahiꞌ i tampoꞌ Iudá, Galilea hai Samaria. Tetámbái miꞌi tauna to mepoinálái i Iesu, hai kamaróhó-róhóá riꞌi pepoináláiraꞌ láwiꞌ mengkoruꞌ mpuꞌuheꞌ i Pueꞌ Ala, hai Inao to Magasaꞌ mopakaróhó laluraꞌ.

Peturuꞌ mopakauriꞌ Enea

32Tempó onoꞌ woꞌo, Peturuꞌ lao motunggái bahangapa wánuá i tampoꞌ Iudá, Galilea hai Samaria. I polumaoána iti, ia mehupeꞌ i wánuá Lida#9:32 Wánuá Lida rekeꞌ-rekeꞌna tálu puloꞌna hai iba kilómete i wongko tándáꞌ i katámpuá alo hangko i kótá Ierusale. bona mampombelámbiꞌá tauna to mepoinálái. 33Ionoꞌ, ia mampohidupaꞌá hadua tobaleilo to rahangaꞌ Enea. Enea iti, uwalu miꞌi parena paluꞌ, maturu peá oaꞌ. 34Nauliꞌ Peturuꞌ, “Enea, Iesu Kerisitu mopakauriꞌkoꞌ! Mearómokoꞌ, hai nulóló miꞌi aleꞌmu.” Kásáliu mearó mpuꞌu miꞌi Enea. 35Handaꞌ tauna to toroꞌ i kótá Lida hai i wánuá-wánuá to ara i lembo Saro,#9:35 Lembo Saro ia miꞌi lembo to maruduꞌ ntepuꞌu, hungkuꞌ i tahiꞌ Tangaꞌ. Kamaeláꞌna rekeꞌ-rekeꞌna hampuloꞌ hai ini kilómete, hai uwalu puloꞌna kilómete kakálángána. Kótá Lida ara i wóiꞌ tándáꞌ i mata alo lembo iti. moitaheꞌ kamauriꞌna miꞌi, hai mepoináláiheꞌ i Pueꞌ Iesu.

Peturuꞌ mopatueꞌ huleꞌ Dóká

36Tiꞌara karaoꞌ hangko i kótá Lida, ara woꞌo hambuaꞌ kótá to rauliꞌ Iope. I Iope, ara hadua towawine to mepoinálái i Iesu. Hangaꞌna Tabita. I lalu básá Iunani hangaꞌna Dóká, lempóna: lagiwa. Maroꞌa ntepuꞌu bábehiána, hai ia motulungi oaꞌ tauna to meahiahiꞌ. 37I tempó iti, ia maduꞌa duuꞌna mate. Roo radói, wátámandoꞌna rawoli miꞌi i paturuána i lintuꞌ to i wongko. 38Ánti katiꞌárána karaoꞌ kótá Iope hangko i kótá Lida,#9:38 Kótá Iopa rekeꞌ-rekeꞌna hampuloꞌ hai ini kilómete hangko i kótá Lida. onoꞌ miꞌi haneꞌi tauna to mepoinálái to ara i Iope mohádi kaꞌárána Peturuꞌ i Lida. Rodua tauna rahuoꞌ lao i Peturuꞌ membiáꞌ bona hawiáꞌ lao i Iope.#9:38 Biásána tauna ratawu i alo kamateraꞌ, mewaliꞌ Peturuꞌ hangaa-ngaa manggagu lao i Lida. 39Mewaliꞌ, Peturuꞌ pohuꞌ mpuꞌu miꞌi lao hingkakani hai hira. Kahaweꞌraꞌ i Iope, liliu raꞌánti lao i lintuꞌ karapowátáꞌána Dóká. Upu-upu towawine to bembaꞌ motolelingi Peturuꞌ, teriaꞌheꞌ hai rapetudeꞌá miꞌi i Peturuꞌ badu hai kumbáraꞌ to nadauáheꞌ Dóká i tempóna mani tueꞌ. 40Agáiáná Peturuꞌ mampopesuwuꞌ upu-upu tauna hangko i lintuꞌ, haneꞌi molingkudu hai mekakae. Roo mekakae, nalindoꞌ miꞌi tomate iti, nauliꞌ, “Tabita, mearómokoꞌ!” Kásáliu tebungkáhi mátána Dóká. Kamoitána Peturuꞌ, liliu mehoda. 41Mewaliꞌ Peturuꞌ motibaaꞌ taena hai napopeángkáꞌ. Roo onoꞌ, mokióꞌmoheꞌ huleꞌ upu-upu tauna to mepoinálái i Iesu, tepasuaꞌheꞌ tobembaꞌ iti, nahángáꞌáheꞌ, “Peita! Halalumi Dóká tueꞌ huleꞌ.”

42Apa to pewaliꞌ iti rapolaluita i humalele kótá Iope, álána handaꞌ tauna mepoinálái i Pueꞌ Iesu. 43Roo onoꞌ, Peturuꞌ toroꞌ i Iope bahangapa kamaruena. Ia toroꞌ i támbina Simoꞌ, hadua to motandoꞌ koliꞌ.#9:43 Tauna to motandoꞌ koliꞌ rarekeꞌ toIahudiꞌ to kedái láwiꞌ motibaaꞌ to mate. (Básá Áturá Menómbá 11:39-40.) Láwiꞌ Peturuꞌ toroꞌ ionoꞌ, lempóna timama miꞌi megááki hangko i áturá-áturá toIahudiꞌ hai moánti Ngkóráꞌna Pueꞌ i tauna to tiꞌaraheꞌ toIahudiꞌ.

Currently Selected:

Surona Pueꞌ Iesu 9: NTBEP

Highlight

Copy