Surona Pueꞌ Iesu 7

Tuntuna Setepanu

1Mekuneꞌ miꞌi Tadulako Menómbá Mahile#7:1 Tadulako Menómbá Mahile: Babilaꞌ Kaiapa mani Tadulako Menómbá Mahile tempó onoꞌ. Básá to teukiꞌ i wóiꞌ Suro 4:6. i Setepanu, nauliꞌ, “Nuhángáꞌáꞌangkaiꞌ, ba toꞌu mpuꞌu apa to rauliꞌ tauna to mesalaꞌi iti?”

2Nahániki Setepanu, “Tadulako-tadulako to kubiláꞌ! Nipehádingi hampaiꞌ laluitangkuꞌ! Hangkoia, Burahima toioruntaꞌ toroꞌ i tampoꞌ Mesopotamia. Hangko tiꞌara mani melimbá lao i kótá Hara, Pueꞌ Ala to mahile kuasaꞌNa mopatongawaꞌ wátáNa i Burahima iti,#7:2 To napaioru Setepanu, Pueꞌ Ala haweꞌ i Burahima tempóna Burahima toroꞌ mani i tampoꞌ ntániꞌna. Lempóna: Pueꞌ Ala peisá rapenómbái iumbá peá, tiꞌara paraluu toIahudiꞌ mopaioru Támbina Pueꞌ Ala i kótá Ierusale. 3Nauliꞌ, ‘Pohuꞌmokoꞌ hangko i tampoꞌmu deꞌe, nupálehi halalumuheꞌ, hai laomokoꞌ i tampoꞌ to ina Kutudeꞌákoꞌ.’ 4Onoꞌ miꞌi haneꞌi Burahima mopálehi tampoꞌraꞌ toKasidimi#7:4 toKasidimi: Toroꞌheꞌ i tampoꞌ Mesopotamia, to rauliꞌ woꞌo tampoꞌ Kasidimi. lao i kótá Hara. Ionoꞌ, umána Burahima mate. Roo onoꞌ, Pueꞌ Ala mohuoꞌ wopiꞌi Burahima melimbá i tampoꞌ deꞌe to takatoroꞌi deꞌe-deꞌe.

5I tempó iti, tiꞌara ara tampoꞌ to raweꞌi Burahima, mogalo riꞌi hampágá tampoꞌ tiꞌara ara raweꞌi. Agáiáná Pueꞌ Ala modándi i Burahima, Nauliꞌ, ‘Tampoꞌ Kánáꞌá ina Kuweꞌikoꞌ haweꞌ-haweꞌ i pemuleꞌámuheꞌ.’#7:5 Básá Pewaliꞌána 12:7; 17:8. Tempó onoꞌ, tiꞌara mani ara ánáꞌna, 6agáiáná nauliꞌ Pueꞌ Ala i Burahima node: ‘Pemuleꞌámu ina toroꞌ i tampoꞌraꞌ tauna ntániꞌna. Hira ina rapohawiꞌheꞌ i tampoꞌ iti hai ina rapopeahiahiꞌheꞌ iba átuna parena kamaruena. 7Agáiáná roo onoꞌ, ina Kuhukuheꞌ tauna to mampohawiꞌ pemuleꞌámuheꞌ iti, hai kahópóꞌána pemuleꞌámu ina pohuꞌheꞌ hangko i tampoꞌ iti mai menómbá i Kódóꞌ i tampoꞌ Kánáꞌá deꞌe.’

8Hangko ionoꞌ, Pueꞌ Ala mopaꞌara dándiNa hai Burahima, hai Nahuoꞌ bona Burahima ratileꞌ, tandaꞌ podándiraꞌ. Hai upu-upu pemuleꞌána Burahima hangaa-ngaa ratileꞌ woꞌo. Mewaliꞌ Isakiꞌ ánáꞌna Burahima ratileꞌ miꞌi i alo kaꞌuwalu hangko i karapoánákana. Hai Isakiꞌ momuleáka Iako, haneꞌi Iako momuleáka ánáꞌna to hampuloꞌ hai rodua, hai hira iti to mewaliꞌ toioruntaꞌ.

9Toioruntaꞌ iti mahiniꞌheꞌ i Iusupu ádiraꞌ,#7:9 Iako ara ánáꞌna tobaleilo hampuloꞌ hai rodua, agáiáná ánáꞌna to napomahile ntepuꞌu ia miꞌi Iusupu, láwiꞌ Iusupu iti ánáꞌna Raheli, toinána Iako to naundeꞌ ntepuꞌu. Daritakáná Iusupu telámbiꞌ i Pewaliꞌána gáláꞌna ka-37 haweꞌ gáláꞌna ka-50. onoꞌ miꞌi haneꞌi rapobaluꞌ, bona rapohawiꞌ i tampoꞌ Másiriꞌ. Agáiáná Pueꞌ Ala mamporángá oaꞌ Iusupu, 10hai kahópóꞌána Nakábáhá hangko i upu-upu kapárina hai Pueꞌ Ala moweꞌi kabukeꞌ pekiri to mopagóeꞌ laluna Piraoꞌ,#7:10 Piraoꞌ: hibali lempóna hai “datu”. Upu-upu daturaꞌ toMásiriꞌ rauliꞌ Piraoꞌ, hai ara woꞌo hangaꞌraꞌ. Básá to teukiꞌ i Kahirámpuá Laluita. datu i tampoꞌ Másiriꞌ, álána Piraoꞌ moángkáꞌ Iusupu mewaliꞌ mágáuꞌ i tampoꞌ Másiriꞌ hai topohawaꞌ i lalu támbi kadatuána.

11Liu pitu parena hangko ionoꞌ,#7:11 Pitu parena hangko ionoꞌ: Básá Pewaliꞌána 41:26-30,53. tempó rimi to rumihi merampe i humalele tampoꞌ Másiriꞌ hai Kánáꞌá. Tempó iti, handaꞌ tauna mantódihá rimi, hai toioruntaꞌ woꞌo tiꞌara piꞌi ara pandeꞌraꞌ. 12Kanahádina Iako ara bahiꞌ to rapobaluꞌ i tampoꞌ Másiriꞌ, ia mohuoꞌheꞌ ánáꞌna, iamoheꞌ toioruntaꞌ, lao i Másiriꞌ mohóló pandeꞌ. Iti miꞌi polumaoraꞌ to rungu-runguna. 13Kalaoraꞌ i karongkánina, Iusupu mopakanótóáheꞌ kaꞌiana miꞌi halaluraꞌ. I tempó iti hangko naisá riꞌi Piraoꞌ kahirana miꞌi halaluna Iusupu. 14Roo onoꞌ, Iusupu motewái halalunaheꞌ bona rahángáꞌá Iako umáraꞌ hai upu-upu tinána, bona melimbáheꞌ lao i tampoꞌ Másiriꞌ. Kahandaꞌraꞌ tauna to melimbá lao i Másiriꞌ, pitu puloꞌraꞌ hai lima.#7:14 pitu puloꞌraꞌ hai lima: Imbaꞌna iti mosisalaꞌ hai imbaꞌna to teukiꞌ i Pewaliꞌána 46:27 hai Pesuwuꞌá 1:5. Mouláꞌ Pototowiá to Sae i lalu básá Iberani, pitu puloꞌna tauna, tepasuaꞌ Iako, Iusupu hai rodua ánáꞌna Iusupu, agáiáná mouláꞌ Septuaginta (Pototowiá to Sae to ralimbá i básá Iunani), pitu puloꞌna hai lima tauna to melimbá lao i tampoꞌ Másiriꞌ. Iako hai Iusupu tiꞌara teimbaꞌ, agáiáná ánáꞌna Iusupu to hahioꞌ teimbaꞌ. Setepanu mouláꞌ to ralimbá i básá Iunani iti. 15Mewaliꞌ, melimbá miꞌi Iako i tampoꞌ Másiriꞌ, hai toroꞌ ionoꞌ duuꞌna mate. Noꞌonoꞌ woꞌo upu-upu ánáꞌna. 16Agáiáná buꞌuraꞌ Iako hai Iusupu raꞌánti huleꞌ lao i kótá Sikeꞌ i tampoꞌ Kánáꞌá, hai ratawu i lalu popatawuá to nahóló Burahima hai dóiꞌ peráꞌ hangko i pemuleꞌána Hemo.#7:16 Katoꞌuána, Iako to mohóló tampoꞌ hangko i ánáꞌna Hemo i kótá Sikeꞌ (básá Pewaliꞌána 33:19). Burahima mohóló tampoꞌ hai balamba popatawuá hangko i Epero toHeti hungkuꞌ i wánuá Hebero (básá Pewaliꞌána 23:15-18). Setepanu moparembe peá daritakáná iti. Iako ratawu i Hebero, i lalu balamba to nahóló Burahima (básá Pewaliꞌána 50:13), hai Iusupu ratawu i Sikeꞌ (básá Pesuwuꞌá 13:19; Iosuá 24:32).

17Marue-rue hangko ionoꞌ, hungkuꞌ miꞌi tempóna Pueꞌ Ala mobukeki dándiNa i Burahima. Memuleꞌ-muleꞌmoheꞌ toioruntaꞌ i tampoꞌ Másiriꞌ duuꞌna handaꞌ pemuleꞌáraꞌ. 18Kahópóꞌána, ara hadua datu to mepárentá i tampoꞌ Másiriꞌ to tiꞌara moisá kaheánána Iusupu. 19Datu iti mopamapári katueꞌraꞌ toioruntaꞌ iti. Napopeahiahiꞌheꞌ hai napárentáheꞌ motibe ánáꞌleiraꞌ tobaleilo bona mateheꞌ.#7:19 Básá Pesuwuꞌá 1:8-22.

20I tempó iti, mesupaꞌ miꞌi Musa. Musa iti, hadua ánángkóiꞌ to malásáꞌ ntepuꞌu.#7:20 malásáꞌ ntepuꞌu - I lalu básá Iunani: malásáꞌ i peitána Pueꞌ Ala. Iti pándiriꞌ i lalu básá Iberani. Tálu peá wulána rakádipurá tosaena i lalu támbiraꞌ, hai roo onoꞌ, ratibe miꞌi. 21Ánángkóiꞌ to ratibe iti, naꞌala miꞌi ánáꞌntawine, ánáꞌna Piraoꞌ, hai nakádipurá nodo ánáꞌna haduduána. 22Ánti karakádipurána, upu-upu kapánderaꞌ toMásiriꞌ rapaguruá Musa, álána makuasaꞌ ntepuꞌu i polaluitana hai i bábehiána.

23Magáná miꞌi iba puloꞌna parena tinuwuꞌna, Musa ara miꞌi pekirina lao moweoꞌ hangka toSáráeliꞌna. 24I tempó iti, naita hadua toSáráeliꞌ napapahái hadua toMásiriꞌ. Lao miꞌi Musa mamperuruꞌi halaluna duuꞌna mopapate toMásiriꞌ iti. 25Nauliꞌ i laluna, hangaa-ngaa raisá halaluna kaꞌiana to napileꞌi Pueꞌ Ala mokábáháheꞌ hangko i karapohawiꞌraꞌ. Mole riꞌi tiꞌara raisá.

26Kahalona, Musa moita wopiꞌi rodua toSáráeliꞌ to mosisalaꞌ. Ánti kanapoinaona mopahintuwuꞌheꞌ, onoꞌ miꞌi haneꞌi nahángáꞌáheꞌ, ‘Moapa riꞌi haneꞌi mosisalaꞌkou? Kómu topohalalukou.’ 27Agáiáná hadua to mopapahái rángána mohumbángá riꞌi Musa, nahángáꞌá, ‘Heáná to moángkáꞌkoꞌ mewaliꞌ tadulako to mobutusi posisalaꞌkiꞌ? 28Ba nupoinao woꞌo mopapateaꞌ, nodo kanupapatena toMásiriꞌ iamáindi?’ 29Kanahádina Musa tewungkeꞌ miꞌi bábehiána, melangka miꞌi hangko i tampoꞌ Másiriꞌ lao toroꞌ i tampoꞌ Midia.#7:29 tampoꞌ Midia: tándáꞌ i mata alo hangko i tahiꞌ Malei, hangatu ini puloꞌna lábi kilómete hangko i tampoꞌ Másiriꞌ. Ionoꞌ ia mohamboko hai momuleáka rodua ánáꞌna.

30Iba puloꞌna parena hangko ionoꞌ, haweꞌ miꞌi hadua malaꞌeka#7:30 hadua malaꞌeka: Tongawaꞌ malaꞌeka iti ia miꞌi Pueꞌ Ala haduduáNa. mampohidupaꞌá Musa i pádá loriꞌ hungkuꞌ i Buluꞌ Sinai.#7:30 Buluꞌ Sinai: Hangaꞌ ntániꞌna - buluꞌ Horeb. Básá Pesuwuꞌá 3:1. Malaꞌeka iti naita nodo api to roreꞌ i lalu dui. 31Tingkáráꞌ Musa moita api iti, onoꞌ miꞌi haneꞌi lao nahungkuki láwiꞌ napoinao naisá ba apai to pewaliꞌ. Iaperái nahádi wambaꞌna Pueꞌ Ala to manguliꞌ, 32‘Kódóꞌ miꞌi Pueꞌ Ala to rapenómbái toiorumu. Kódóꞌ miꞌi deꞌe Pueꞌ Ala to rapenómbái Burahima, Isakiꞌ hai Iako.’ Kanahádina Musa wambaꞌ iti, moridiꞌ ánti kamalááꞌna, hai tiꞌara piꞌi pebáiꞌ motótói api to roreꞌ iti.

33Roo onoꞌ, nauliꞌ wopiꞌi Pueꞌ Ala i Musa, ‘Nuposu sandalemu, láwiꞌ tampoꞌ to nupeángkáꞌi deꞌe, tampoꞌ to magasaꞌ.

34Kuita miꞌi pantódiháraꞌ taunáNgkuꞌ toSáráeliꞌ

i tampoꞌ Másiriꞌ.

Kuhádi miꞌi peraruaꞌraꞌ.

Onoꞌ miꞌi haneꞌi mendáuluAꞌ

mai mokábáháheꞌ.

Mewaliꞌ deꞌe-deꞌe Kuhuoꞌkoꞌ mesuleꞌ

lao i tampoꞌ Másiriꞌ,

bona nukábáháheꞌ toSáráeliꞌ.’

35Mewaliꞌ Musa, to rasápuáka toIahudiꞌ hangkoia, ia miꞌi to nahuoꞌ Pueꞌ Ala mesuleꞌ lao mokábáháheꞌ. Rungu-runguna toSáráeliꞌ iti manguliꞌ i Musa, ‘Heáná to moángkáꞌkoꞌ mewaliꞌ tadulakongkiꞌ to mobutusi posisalaꞌkiꞌ?’ Agáiáná kahópóꞌána ia riꞌi to nakióꞌ Pueꞌ Ala i tempóna hadua malaꞌeka molaluita hangko i lalu dui to roreꞌ. Ia miꞌi to naꞌángkáꞌ Pueꞌ Ala mewaliꞌ tadulakoraꞌ toSáráeliꞌ to mokábáháheꞌ hangko i karapohawiꞌraꞌ.#7:35 Nodo Iusupu rasápuáka wutuꞌnaheꞌ, hai Musa rasápuáka toSáráeliꞌ, noꞌonoꞌ woꞌo toSáráeliꞌ mosápuáka Iesu to nahuoꞌ mai Pueꞌ Ala bona mokábáháheꞌ hangko i karapohawiꞌraꞌ i dósá. 36Musa iti to moántiheꞌ toSáráeliꞌ hangko i tampoꞌ Másiriꞌ, hai to mobábehi handaꞌ tandaꞌ kuasaꞌ hai tandaꞌ to metingkáráki i tampoꞌ Másiriꞌ, i tahiꞌ Malei, hai i pádá loriꞌ, iba puloꞌna parena kamaruena.

37Hai Musa woꞌo to mopahaweꞌ laluita deꞌe i toSáráeliꞌ, nauliꞌ, ‘Pueꞌ Ala ina moángkáꞌ hadua hangko i halalumi bona mewaliꞌ nabiꞌ nodo kódóꞌ deꞌe.’#7:37 Básá Pohuleki 18:15,18. 38Musa iti to motadulakoi toSáráeliꞌ to handaꞌ i pádá loriꞌ. Ia woꞌo to mohádi ngkóráꞌna malaꞌeka i Buluꞌ Sinai hai mewaliꞌ topetangaꞌ-tangaꞌi to mampoweꞌi ngkóráꞌ to moánti katueꞌ iti#7:38 ngkóráꞌ to moánti katueꞌ: Básá woꞌo Pohuleki 30:15-20; 32:46-47. i toioruntaꞌ bona rapahaweꞌ woꞌo i kitaꞌ.

39Agáiáná, kehapiꞌ noꞌonoꞌ, toioruntaꞌ hangkoia, tiꞌara raundeꞌ mengkoruꞌ i Musa. Rasápuáka karapotadulakona hai rapoinao peá mesuleꞌ huleꞌ lao i tampoꞌ Másiriꞌ. 40Mewaliꞌ, i tempóna Musa ara mani i wongko buluꞌ Sinai, laoheꞌ i Haruni wutuꞌna Musa,#7:40 Haruni modurei Musa molindoꞌ Piraoꞌ hai motadulakoi toSáráeliꞌ mesuwuꞌ hangko i tampoꞌ Másiriꞌ. Ia woꞌo mewaliꞌ Tadulako Menómbá Mahile to rungu-runguna. rapembiáꞌ, rauliꞌ, ‘Nubábehiáꞌangkaiꞌ lenggeꞌ ba apa peá to peisá kipenómbái, bona lenggeꞌ iti miꞌi to mewaliꞌ tadulakongkiꞌ,#7:40 Pueꞌ Ala to mobábehi handaꞌ tandaꞌ kuasaꞌ bona toSáráeliꞌ peisá mesuwuꞌ hangko i tampoꞌ Másiriꞌ hai i tempóraꞌ i pádá loriꞌ. Agáiáná toSáráeliꞌ mosápuákaheꞌ kaꞌIana Pueꞌraꞌ, hai mobábehiheꞌ hambuaꞌ lenggeꞌ to rapenómbái. láwiꞌ tiꞌara piꞌi kiꞌisá apa to mewaliꞌ i Musa to moántiangkaiꞌ mai hangko i tampoꞌ Másiriꞌ.’ 41Hangko ionoꞌ, mobábehiheꞌ hambuaꞌ lenggeꞌ ánáꞌ gapiꞌ hangko i buláwá. Lenggeꞌ to rabábehi iti, rapenómbái hai raposambaleá binataꞌ. Mosusaheꞌ motóiá apa to rabábehi hai taeraꞌ iti.#7:41 Básá Pesuwuꞌá gáláꞌna ka-32. Mouláꞌ toIahudiꞌ, dósáraꞌ toioruraꞌ iti dósá to melumbuꞌ ntepuꞌu kamahilena, pelumbuꞌna mani láwiꞌ Pueꞌ Ala to mokábáháheꞌ hangko i karapohawiꞌraꞌ. 42Onoꞌ miꞌi haneꞌi nataleukiheꞌ Pueꞌ Ala hai Napatodáhiheꞌ menómbá i betue i langiꞌ#7:42 betue i langiꞌ - I lalu básá Iunani: surudadoꞌ langiꞌ. Lempóna alo, wulá hai betue, to rapenómbái tauna to toroꞌ hungkuꞌ i toSáráeliꞌ. Básá Pohuleki 4:9. nodo to teukiꞌ i lalu suraraꞌ nabiꞌ-nabiꞌ#7:42 suraraꞌ nabiꞌ-nabiꞌ: To natunggái ia miꞌi suraraꞌ nabiꞌ Amosi haweꞌ Maleaki. to manguliꞌ:

‘Kómu toSáráeliꞌ! Iba puloꞌna parena kamaruemi i pádá loriꞌ,

tiꞌarakou haweꞌ hangkani mosambale binataꞌ

nipopenómbá i Kódóꞌ,

agáiáná nipopenómbá riꞌi i handaꞌ pákáꞌna ánitu.

43Niánti-ánti támbi katoroꞌána ánitu Moloꞌ#7:43 ánitu Moloꞌ: Ia miꞌi palaneꞌ Venusi to rapenómbái toKánáꞌá hai toPenisia. Rauliꞌ riꞌi iti pueꞌna langiꞌ hai alo. Ánángkóiꞌ rahunu mewaliꞌ popenómbá i ánitu Moloꞌ.

hai pinowali to molenggeꞌ betue Repana.#7:43 Repana: Ia miꞌi palaneꞌ Saturunu to rapenómbái toMásiriꞌ.

Lenggeꞌ iti nibábehi bona nipenómbái.

Onoꞌ miꞌi haneꞌi ina Kupatodáhikou ratawani,

duuꞌna raꞌántikou haweꞌ tándáꞌ i hambalina kótá Bábeli.’ (Amosi 5:25-27)

44Tangaꞌraꞌ toioruntaꞌ i pádá loriꞌ, Pueꞌ Ala mohuoꞌ miꞌi Musa mobábehi Bambaruꞌ Penómbáꞌá#7:44 Bambaruꞌ Penómbáꞌá rabábehi hangko i koliꞌ binataꞌ hai báná. I lalu básá Indonesia: Kemah Kesaksian. Pueꞌ Ala moukiꞌ Hawaꞌ to Hampuloꞌ i watu poukiꞌá, hai moweꞌi Musa bona upu-upu hawaꞌNa rapeuláꞌi toSáráeliꞌ. Watu poukiꞌá iti rauliꞌ “Sabiꞌ” (básá Pesuwuꞌá 25:10-21) hai rawoli i lalu Petiꞌ Podándi, onoꞌ miꞌi haneꞌi Bambaruꞌ Penómbáꞌá iti rauliꞌ woꞌo Bambaruꞌ Sabiꞌ. to peisá rabubungkáhi hai raꞌánti-ánti iumbá-umbá peá kalaoáraꞌ. Bambaruꞌ Penómbáꞌá iti mewaliꞌ tandaꞌ kaꞌárána Pueꞌ Ala mamporángá toSáráeliꞌ, hai rabábehi mouláꞌ apa to napopaitaꞌá Pueꞌ Ala i Musa. 45Marue hangko ionoꞌ, matemoheꞌ toioruntaꞌ i pádá loriꞌ,#7:45 matemoheꞌ toioruntaꞌ i pádá loriꞌ: Tiꞌara upu-upu toioruraꞌ toSáráeliꞌ to mate. To mate iamoheꞌ to manginaomoheꞌ tempóraꞌ mesuwuꞌ hangko i tampoꞌ Másiriꞌ, láwiꞌ malááꞌheꞌ mesuaꞌ i tampoꞌ Kánáꞌá. Básá Poimbaꞌ gáláꞌna ka-13 haweꞌ ka-14. hai Bambaruꞌ Penómbáꞌá iti raꞌánti ánáꞌraꞌ tempóraꞌ mesuaꞌ i tampoꞌ Kánáꞌá deꞌe. Tempó onoꞌ, Iosuá motadulakoiheꞌ toioruntaꞌ mamperampaꞌi tampoꞌraꞌ toKánáꞌá, hai tampoꞌ iti to takatoroꞌi deꞌe-deꞌe. I tempó iti, Pueꞌ Ala mampopesuwuꞌ upu-upu tauna to toroꞌ i tampoꞌ iti, tampoꞌ Kánáꞌá deꞌe. Hai Bambaruꞌ Penómbáꞌáraꞌ iti ara mani i oloꞌraꞌ duuꞌna haweꞌ i tempóna Datu Daudiꞌ.

46Daudiꞌ mopagóeꞌ Pueꞌ Ala, hai membiáꞌ bona moaró támbi to ina nakatoroꞌi Pueꞌ Ala to napenómbái Iako hangkoia. 47Agáiáná tiꞌara riꞌi Daudiꞌ to moaró Támbina Pueꞌ Ala, ngkáliꞌna riꞌi Salomo ánáꞌna.#7:47 Básá 1 Datu-datu gáláꞌna ka-5 haweꞌ gáláꞌna ka-8.

48Agáiáná Pueꞌ Ala to i Surugáꞌ tiꞌara toroꞌ i támbi to rabábehi tauna, láwiꞌ i lalu sura nabiꞌ hangkoia teukiꞌ node:

49Nauliꞌ Pueꞌ Ala,

‘Langiꞌ ia miꞌi pehodaꞌáNgkuꞌ,

hai tampoꞌ peángkáꞌáNgkuꞌ.

Támbi apa to nipoinao niaróáꞌAꞌ?

Iumbá támbi to hintotoꞌ Kukatoroꞌi?

Tiꞌara ara,

50láwiꞌ Kódóꞌ to mampopewaliꞌ upu-upuna!’ ” (Iesaia 66:1-2)

51Nauliꞌ wopiꞌi Setepanu i tadulako agama, nahángáꞌáheꞌ, “Halalu-halalu, rumihi kamatuꞌana lalumi, hai rumihi pentibongoꞌmi! Rumihi woꞌo pentibebemi mohádi laluitana Pueꞌ Ala! Kómu hibalikou hai toiorumi hangkoia láwiꞌ mosápuákakou oaꞌ Inao to Magasaꞌ. 52Upu-upu nabiꞌ hangkoia rapopeahiahiꞌ toiorumi. Hai toiorumi mopapateheꞌ woꞌo suro-surona Pueꞌ Ala to manguliꞌ kaꞌina haweꞌna Huoꞌána Pueꞌ Ala to Manótó.#7:52 Huoꞌána Pueꞌ Ala to Manótó: Básá Iesaia 53:11; Ieremia 23:5; 33:15. Hai deꞌe-deꞌe, kómu to mampobaluꞌ Huoꞌána Pueꞌ Ala i ewáliNa. Kómu woꞌo to mopapate HuoꞌáNa iti, Ia miꞌi Iesu. 53Mole riꞌi kómu miꞌi to motarima paturoꞌna Pueꞌ Ala to rapahaweꞌ malaꞌeka i toioruntaꞌ, agáiáná tiꞌara nipeuláꞌi paturoꞌNa iti.”

Setepanu rapapate

54Karahádina tadulako-tadulako iti laluitana Setepanu, mabukoꞌ ntepuꞌuheꞌ hai kóiꞌ inaoraꞌ.#7:54 kóiꞌ inaoraꞌ - I lalu básá Iunani: mangkukuꞌheꞌ bágáraꞌ. 55Agáiáná Setepanu nakuasaꞌi miꞌi Inao to Magasaꞌ, hai mengoaꞌ i langiꞌ. Naita mpuꞌu peawaꞌna Pueꞌ Ala, hai naita woꞌo Iesu meángkáꞌ tándáꞌ i kuánána Pueꞌ Ala. 56Nauliꞌ Setepanu, “Peita! Kuita langiꞌ tebungkáhi hai Ánáꞌ Mánusiá meángkáꞌ tandaꞌ i kuánána Pueꞌ Ala!”#7:56 Ánáꞌ Mánusiá meángkáꞌ tándáꞌ i kuánána Pueꞌ Ala: To natunggái Setepanu, Iesu Ia miꞌi Pueꞌ Ala hai Datu Topehómpóꞌ (básá Danieli 7:13-14). Onoꞌ miꞌi haneꞌi rauliꞌ tauna Setepanu mopakóiꞌ Pueꞌ Ala, hai mouláꞌ Paturoꞌna Musa, heáná to mopakóiꞌ Pueꞌ Ala hangaa-ngaa rawatui haweꞌ mate (básá Áturá Menómbá 24:16).

57Roo onoꞌ, tadulako agama iti motukoheꞌ talingaraꞌ, hai monganga-ngangaheꞌ rapasimbuku. Kásáliu laoheꞌ mohakaꞌ Setepanu, 58hai radiiꞌ lao i rawa kótá bona rawatui.#7:58 haneꞌi rawatui: Katoꞌuána, toIahudiꞌ tiꞌara peisá mohuku mate tauna, agáiáná hangkani-hangkani rapatodáhi toRoma to makuasaꞌ i tampoꞌ Iudá tempó onoꞌ. Tauna to mosalaꞌi Setepanu iti, mowehángiheꞌ kumbáraꞌ bona motimaꞌheꞌ watu haneꞌi rawatui.#7:58 tauna to mosalaꞌi Setepanu…: Babilaꞌ hira to mowaliꞌ sabiꞌ dongkoꞌ (básá Suro 6:13). Moliu áturáraꞌ toIahudiꞌ, sabiꞌ to hangaa-ngaa ioru motelá hai watu. (Básá Áturá Menómbá 24:14; Pohuleki 17:7.) Kumbáraꞌ raweꞌi hadua tobaleilo to rahangaꞌ Saulu#7:58 Saulu: Saulu iti to rauliꞌ Paulu i lalu básáraꞌ toRoma (básá Suro 13:9). Tempóna Setepanu rapapate, babilaꞌ tinuwuꞌna Saulu tálu miꞌi puloꞌna parena. bona nakámpái. 59Tangaꞌna Setepanu rawatui, mekakae miꞌi, nauliꞌ, “Pueꞌ Iesu, Nuala miꞌi peinaongkuꞌ!” 60Ia molingkudu, nauliꞌ napasimbuku, “Pueꞌ, ineeꞌheꞌ Nuhuku ánti dósáraꞌ deꞌe.”#7:60 Básá woꞌo laluitana Iesu. Lukasi 23:34,46. Roo molaluita noꞌonoꞌ, ia mate miꞌi.

Currently Selected:

Surona Pueꞌ Iesu 7: NTBEP

Highlight

Copy