Surona Pueꞌ Iesu 4

Peturuꞌ hai Iohane i lindoꞌraꞌ Topepáresáꞌ Mahile Agama Iahudiꞌ

1Tangaꞌraꞌ mani Peturuꞌ hai Iohane mopaturoꞌ tauna i tangabaa Támbina Pueꞌ Ala, haweꞌmoheꞌ bahangapa tadulako menómbá hai toSaduki#4:1 toSaduki: Básá to teukiꞌ i Kahirámpuá Laluita i taleuꞌ. hai tadulakoraꞌ topokámpái Támbina Pueꞌ Ala.#4:1 tadulakoraꞌ topokámpái Támbina Pueꞌ Ala: Ia to motadulakoi surudadoꞌ to mokámpái Támbina Pueꞌ Ala hai tangabaana. Ia hangko i kolompoꞌ tadulako menómbá, hai kuasaꞌna hungkuꞌ hibali hai kuasaꞌna Tadulako Menómbá Mahile. 2Mabukoꞌheꞌ i Peturuꞌ hai Iohane, láwiꞌ mopaturoꞌheꞌ tauna to handaꞌ katueꞌna huleꞌ Iesu mopatongawaꞌ kaꞌina tueꞌna huleꞌ tauna hangko i kapate. 3Onoꞌ miꞌi haneꞌi suro to rodua iti rahakaꞌ, rapopesuaꞌ i lalu tarungku, hai ratahaheꞌ ionoꞌ haweꞌ mepulo, láwiꞌ ina káindi miꞌi hai tiꞌara maniheꞌ peisá mobutusi kárá-káráraꞌ. 4Agáiáná handaꞌ miꞌi tauna to mampehádingi paturoꞌraꞌ Peturuꞌ hai Iohane i Támbina Pueꞌ Ala, hai handaꞌmoheꞌ to mepoinálái i Iesu, álána tetámbái kahandaꞌraꞌ tauna to mepoinálái duuꞌna gánáheꞌ lima sáburaꞌ tobaleilo.

5Kahalona, tadulako agama, tadulakoraꞌ toIahudiꞌ hai guru-guru agama#4:5 guru-guru agama: Hira miꞌi tauna to mapángkáꞌ sikolaꞌraꞌ to mopaturoꞌ tauna mokana i Paturoꞌna Musa. hirámpuheꞌ i kótá Ierusale. 6Araheꞌ woꞌo i pogómbóá iti: Tadulako Menómbá Mahile Hanasa#4:6 Tadulako Menómbá Mahile Hanasa: Katoꞌuána Hanasa deꞌe rapopendáulu miꞌi mewaliꞌ Tadulako Menómbá Mahile, agáiáná rarekeꞌ toIahudiꞌ nodo ia mani to makuasaꞌ, láwiꞌ mouláꞌ áturáraꞌ toIahudiꞌ, Tadulako Menómbá Mahile tiꞌara peisá rapaháwángi ane tiꞌara mani mate. Hanasa mewaliꞌ Tadulako Menómbá Mahile pare 6-15M hai mate pare 36M. hai Kaiapa,#4:6 Kaiapa: Ia to mewaliꞌ Tadulako Menómbá Mahile tempó onoꞌ. Ia mániána Hanasa, hai raꞌángkáꞌ toRoma mewaliꞌ Tadulako Menómbá Mahile pare 18-36M. Iohane,#4:6 Iohane: Iohane deꞌe tiꞌara Iohane topeguruna Iesu, tiꞌara woꞌo Iohane Toperiu to mate miꞌi. Babilaꞌ ia to peisá woꞌo rauliꞌ Ionata ánáꞌna Hanasa, to ina mopaháwángi Kaiapa mewaliꞌ Tadulako Menómbá Mahile. Alesande#4:6 Alesande: Tiꞌara taisá heáná tauna deꞌe. hai tauna ntániꞌna hangko i tinána Tadulako Menómbá Mahile. 7Hirámpuheꞌ upu-upu, hai rapehuoꞌá bona Peturuꞌ hai Iohane raꞌánti i lindoꞌraꞌ. I kahaweꞌraꞌ, hadua hangko i oloꞌraꞌ tadulako iti mekuneꞌ miꞌi i Peturuꞌ hai Iohane, nauliꞌ, “Kómu, noumbá haneꞌi nibuku mopakauriꞌ topaluꞌ iti? Heáná to moweꞌikou kuasaꞌ mobábehi iti?”

8Ánti kuasaꞌna Inao to Magasaꞌ, molaluita miꞌi Peturuꞌ, nauliꞌ, “Tadulako-tadulako hai totosaengkiꞌ! 9Ane nipáresáꞌangkaiꞌ i alo deꞌe ánti popakauriꞌkiꞌ topaluꞌ iti, hai ane nipoinao woꞌo moisá noumbá kamauriꞌna, 10ina kihángáꞌáꞌákou hai upu-upu halaluntaꞌ toSáráeliꞌ: tauna deꞌe mauriꞌ miꞌi hai nabuku meángkáꞌ ieneꞌ ánti kuasaꞌna Iesu Kerisitu toNasare. Iesu iti to nipakuꞌ i kau mombehape, agáiáná napatueꞌ huleꞌ Pueꞌ Ala. 11Ia miꞌi to natunggái i lalu Sura Magasaꞌ to manguliꞌ node:

‘Watu to ratibe topoaró támbi,#4:11 Datu Daudiꞌ moukiꞌ Sura Petóiá gáláꞌna ka-118 rekeꞌ-rekeꞌna hasábu parena hangko tiꞌara mani Iesu rapoánáka. I tempó onoꞌ, toSáráeliꞌ hai daturaꞌ tiꞌara ratarima tauna ntániꞌna. Hasábu parena hangko ionoꞌ, tebukeki ntepuꞌu tempóna Iesu rasápuáka toSáráeliꞌ, rapapate, napatueꞌ huleꞌ Pueꞌ Ala hai Napopehoda tándáꞌ i kuánáNa. Iesu woꞌo mokábelái wátiꞌ deꞌe. (Básá Matiu 21:42; Marakusi 12:10; Lukasi 20:17.)

mole watu onoꞌ riꞌi to mewaliꞌ pehodaꞌá támbi.’ ” (Sura Petóiá 118:22)

Hai kómu miꞌi to rapándiriꞌ nodo topoaró támbi iti. 12Hangko ionoꞌ, nauliꞌ wopiꞌi Peturuꞌ, “Tiꞌara ara rárá ntániꞌna molámbiꞌ katehómpóꞌ, bateꞌna peá moliu Iesu. I humalele duniáꞌ deꞌe, tiꞌara ara tauna ntániꞌna, bateꞌna peá Iesu to nahuoꞌ mai Pueꞌ Ala, to peisá mohómpókikeꞌ hangko i huku dósántaꞌ.”

13Tingkáráꞌ ntepuꞌumoheꞌ tadulako iti mohádi kamapánderaꞌ Peturuꞌ hai Iohane molaluita#4:13 Apa to mewaliꞌ i Peturuꞌ hai Iohane iti, mobukeki apa to nadándi Iesu i Lukasi 12:11-12 hai 21:12-19. láwiꞌ tiꞌaraheꞌ malááꞌ; apa mani láwiꞌ Peturuꞌ hai Iohane tauna biásá peheꞌ to tiꞌara mapángkáꞌ sikolaꞌraꞌ.#4:13 tiꞌara mapángkáꞌ sikolaꞌraꞌ: Upu-upu tobaleilo toIahudiꞌ moisá mobásá hai moukiꞌ, agáiáná tiꞌaraheꞌ handaꞌ to mampegurui Paturoꞌna Musa i posikolaꞌá to mapángkáꞌ. Raisá woꞌo, hira miꞌi iti to meuláꞌ i Iesu. 14Agáiáná tadulako iti, tiꞌaraheꞌ pebáiꞌ molaluita, láwiꞌ topaluꞌ to rapakauriꞌ iti ara woꞌo ionoꞌ meángkáꞌ i hintáiꞌraꞌ Peturuꞌ hai Iohane. 15Onoꞌ haneꞌi rapopesuwuꞌmoheꞌ surona Pueꞌ Iesu iti hangko i pepáresáꞌáraꞌ, haneꞌiheꞌ molaluita, 16rauliꞌ, “Apa to hangaa-ngaa tabábehi i tauna to rodua iti? Upu-upu tauna to toroꞌ i Ierusale moisá kahirana to mobábehi tandaꞌ kuasaꞌ to metitingkáráki iti, mewaliꞌ tiꞌara woꞌo peisá tasápuáka. 17Agáiáná, bona tiꞌara rahádi tauna ntániꞌna, rángina miꞌi tapopalááꞌheꞌ hai takóntóheꞌ bona ineeꞌmoheꞌ molaluita i heáná peá i lalu hangaꞌna tauna iti.”#4:17 i lalu hangaꞌna tauna iti: Tadulakoraꞌ toIahudiꞌ mepakóiꞌheꞌ Iesu, onoꞌ haneꞌi tiꞌaraheꞌ mau mokábelái hangaꞌNa.

18Roo onoꞌ, rakióꞌ wopaheꞌ Peturuꞌ hai Iohane, rauliꞌ, “Ineeꞌmokou mepaturoꞌ ba mokábelái hangaꞌna Iesu.”

19Agáiáná mehániꞌ Peturuꞌ hai Iohane, rauliꞌ, “Nipekiri umbána to naundeꞌ Pueꞌ Ala: mampeuláꞌiangkaiꞌ hawaꞌmi ba hawaꞌNa! 20Kaiꞌ, tiꞌara piꞌi peisá kikábáhá mampolaluita apa to kiꞌita hai to kihádi miꞌi.”

21Hangko ionoꞌ, Peturuꞌ hai Iohane rapopalááꞌ ntepuꞌu wopaheꞌ tadulako iti, hai kahópóꞌána, rakábáháheꞌ. Tiꞌara ara rárá ina mohukuheꞌ láwiꞌ upu-upu tauna motóiá Pueꞌ Ala ánti tandaꞌ kuasaꞌ to rabábehi iti. 22Tauna to rapakauriꞌ iti, tinuwuꞌna iba miꞌi puloꞌna parena lábi.

To mepoinálái i Iesu membiáꞌ róhó hangko i Pueꞌ Ala

23I karakábáháraꞌ Peturuꞌ hai Iohane, laomoheꞌ mampohidupaꞌá halalu hampepepoináláiraꞌ, haneꞌi mampolaluitaheꞌ apa to rahángáꞌáheꞌ kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna. 24Karahádina laluitaraꞌ iti, mekakaemoheꞌ hingkakani i Pueꞌ Ala, haneꞌi hadua hangko i oloꞌraꞌ manguliꞌ, “Ó Pueꞌ, Io miꞌi to mampopewaliꞌ langiꞌ, tampoꞌ, tahiꞌ, hai hinángkáꞌna óntóꞌna.#4:24 Básá Pesuwuꞌá 20:11; Nehemia 9:6; Sura Petóiá 146:6. 25Io to mongkóráꞌ i toiorungkiꞌ Datu Daudiꞌ, huoꞌáMu, haneꞌi ia molaluita moliu Inao to Magasaꞌ, nauliꞌ,

‘Moapa riꞌi haneꞌiheꞌ mabukoꞌ

tauna to tiꞌara toIahudiꞌ?

Moapa riꞌi haneꞌi tauna to handaꞌ

mobábehiheꞌ tunggáiáraꞌ to tiꞌara mobunduꞌ?

26Datu-datu i duniáꞌ mampatimamamoheꞌ ina mombeala,

noꞌonoꞌ woꞌo upu-upu topohawaꞌ,

hintuwuꞌmoheꞌ mampoinao moewaꞌ Pueꞌ Ala

hai Datu Topehómpóꞌ to Napileꞌi.’ (Sura Petóiá 2:1-2)

27Ó Pueꞌ, tebukeki mpuꞌu miꞌi laluitana Daudiꞌ iti, láwiꞌ tiꞌara mani marue mewaliꞌ i lalu kótá deꞌe. Datu Herode Antipa#4:27 Datu Herode Antipa: I Pototowiá to Woꞌu, iniheꞌ tauna to rahangaꞌ Herode. (Básá apa to teukiꞌ i Kahirámpuá Laluita.) Herode Antipa to mohakaꞌ hai mopapate Iohane Toperiu (básá Matiu 4:12) hai mampokana karapapatena Iesu (básá Lukasi 23:6-12). hai Mágáuꞌ Pontiu Pilatu hintuwuꞌmoheꞌ hingkakani hai tauna to handaꞌ, toSáráeliꞌ hai to tiꞌaraheꞌ toSáráeliꞌ. Pohintuwuꞌraꞌ iti, mampoinaoheꞌ moewaꞌ Iesu, HuoꞌáMu to Magasaꞌ to Nupileꞌi mewaliꞌ Datu Topehómpóꞌ, 28agáiáná upu-upu to rabábehi iti mobukeki apa to Nupakanótó miꞌi ami, álána mewaliꞌ hintotoꞌ hai peundeꞌáMu, láwiꞌ Io to makuasaꞌ.

29Pueꞌ, deꞌe-deꞌe Nuhádi miꞌi laluitaraꞌ tauna to mampopalááꞌangkaiꞌ! Mewaliꞌ kaiꞌ huoꞌáMu deꞌe, kipembiáꞌ i Hio bona Nuweꞌiangkaiꞌ karóhó lalu bona tiꞌaraꞌangkaiꞌ malááꞌ mopahaweꞌ ngkóráꞌMu. 30Kipembiáꞌ woꞌo bona Nupopaitaꞌáheꞌ kuasaꞌMu Pueꞌ, hai Nuweꞌiangkaiꞌ kuasaꞌ hangko i Iesu HuoꞌáMu to Magasaꞌ, bona kibuku mopakauriꞌ tauna to tiꞌara ralalu hai mobábehi handaꞌ tandaꞌ kuasaꞌ.”

31Karooraꞌ mekakae, támbi kahirámpuáraꞌ moduá-duá,#4:31 moduá-duá: I Pototowiá to Sae, hangkani-hangkani Pueꞌ Ala mopatongawaꞌ kahaweꞌNa moliu linu. Rápáꞌna, básá Pesuwuꞌá 19:18; Iesaia 6:4. hai nakuasaꞌiheꞌ Inao to Magasaꞌ. Onoꞌ haneꞌi pebáiꞌ mpuꞌumoheꞌ mopahaweꞌ ngkóráꞌna Pueꞌ Ala.

To mepoinálái i Iesu mohintuwuꞌheꞌ

32Upu-upu tauna to mepoinálái i Iesu, mohintuwuꞌ hai hampepekiriheꞌ. Tiꞌara ara hadua to manguliꞌ, “Deꞌe párewángkuꞌ,” agáiáná upu-upu to ara i hira peisá rapopobunduꞌ tauna to moparaluu. 33I tempó iti surona Pueꞌ Iesu molámbiꞌmoheꞌ kuasaꞌ to mahile bona mopahaweꞌheꞌ katueꞌna huleꞌ Pueꞌ Iesu, hai molámbiꞌheꞌ woꞌo handaꞌ pewátiꞌ hangko i Pueꞌ Ala. 34Tiꞌara mpuꞌu ara hadua to nakakuraꞌi, láwiꞌ heáná peá to melábi tampoꞌ ba támbina, mampobaluꞌ hamboloꞌ tampoꞌ ba hambuaꞌ támbi, 35hai dóiꞌ hólóna rahuhuꞌ i surona Pueꞌ Iesu bona ragáláꞌ-gáláꞌáheꞌ tauna to moparaluu.

36Noꞌonoꞌ woꞌo to nabábehi Iusupu to rahangaꞌ surona Iesu Baranaba, lempóna: to mepalindó.#4:36 Pambiárána Iusupu Baranaba to mepalindó. Básá Suro 9:26-27; 11:22-24; 15:37-39. Iusupu iti ia miꞌi hadua toLewi to toroꞌ i puló Sipuru. 37Ia mampobaluꞌ miꞌi hamboloꞌ tampoꞌna,#4:37 Ia mampobaluꞌ miꞌi hamboloꞌ tampoꞌna: Mouláꞌ áturáraꞌ toIahudiꞌ, toLewi (pemuleꞌánaheꞌ Lewi, ánáꞌna Iako) tiꞌara peisá mampopueꞌ tampoꞌ i tampoꞌ Sáráeliꞌ (básá Poimbaꞌ 18:20,24; Pohuleki 18:1-2). Babilaꞌ áturá iti tiꞌara piꞌi rapakeꞌ. Baranaba deꞌe to mamporángá Paulu i polumaona (básá Suro 11:26; 13:2). haneꞌi dóiꞌ hólóna nahuhuꞌáheꞌ surona Pueꞌ Iesu.

Currently Selected:

Surona Pueꞌ Iesu 4: NTBEP

Highlight

Copy