Surona Pueꞌ Iesu 5

Anania hai Sapira

1Ara woꞌo tohamboko to mampobaluꞌheꞌ hamboloꞌ tampoꞌraꞌ. Hangaꞌna toámána iti Anania, haneꞌi hangaꞌna toinána Sapira. 2Karooraꞌ mampobaluꞌ tampoꞌraꞌ, Anania lao miꞌi mohuhuꞌ dóiꞌ iti i surona Pueꞌ Iesu. Nauliꞌ, “Demiꞌe hólóna tampoꞌkiꞌ,” mole riꞌi, hiolaꞌ hai polaluitaraꞌ ngkábuni hai toinána, hanggááꞌ hangko i hólóna tampoꞌraꞌ iti rawoli.

3Onoꞌ miꞌi haneꞌi nauliꞌ Peturuꞌ i Anania, “Moapa riꞌi haneꞌi nupatodáhi lalumu nakuasaꞌi Datu Tokadake!#5:3 Datu Tokadake: Básá to teukiꞌ i Kahirámpuá Laluita i taleuꞌ. Mampodongkoꞌákoꞌ Inao to Magasaꞌ, láwiꞌ hanggááꞌ hangko i hólóna tampoꞌmu nuwoli ngkábuni! 4Hangko tiꞌara mani nupobaluꞌ tampoꞌ iti, io pueꞌna, hai ane nupobaluꞌi, io woꞌo pueꞌna hólóna. Peisántokoꞌ mopakanótó haduduámu hangapa to nupopenómbá. Mewaliꞌ, moapa riꞌi haneꞌi ara tunggáiána lalumu mobábehi noꞌonoꞌ? Tiꞌara peá tauna to nudongkoki, agáiáná Pueꞌ Ala riꞌi!”

5Kanahádina Anania laluitana Peturuꞌ, kásáliu mate haneꞌi madungká. Upu-upu tauna to mohádi apa to pewaliꞌ iti, malááꞌ ntepuꞌuheꞌ. 6Hangko ionoꞌ, bahangapaheꞌ ánáꞌntomoane mobungkuhi wátámandoꞌna Anania mouláꞌ ádáraꞌ toIahudiꞌ, haneꞌi rakowaꞌ lao ratawu.

7Rekeꞌ-rekeꞌna tálu jaa hangko ionoꞌ, haweꞌ miꞌi woꞌo toinána Anania i Peturuꞌ, agáiáná tiꞌara naisá apa to pewaliꞌ i toámána. 8Nauliꞌ Peturuꞌ i hia, “Nuhángáꞌáꞌaꞌ, ba deꞌe mpuꞌu miꞌe upu-upu hólóna tampoꞌmi to nipobaluꞌ?”

Nahániki Sapira, “Iti mpuꞌu miꞌi upu-upu.”

9Nauliꞌ Peturuꞌ, “Moapa riꞌi haneꞌi hampepekirikou hai toámámu i bábehiámi iti? Ba nipoinao paꞌi mopampehukáꞌi Inaona Pueꞌ? Peita! Tauna to hangko rooheꞌ mopatawu toámámu, domoheꞌo i babaꞌ, ina rakowaꞌkoꞌ woꞌo lao ratawu.” 10I kamohádina laluitana Peturuꞌ, kásáliu madungká woꞌo towawine iti láwiꞌ mate miꞌi. Kamesuaꞌraꞌ ánáꞌntomoane to roomoheꞌ motawu Anania, moita wopaheꞌ toinána iti mate. Liliu rakowaꞌ lao ratawu i hintáiꞌna toámána. 11Mewaliꞌ upu-upu tauna to mepoinálái i Pueꞌ Iesu to toroꞌ i Ierusale hai tauna ntániꞌna, malááꞌ ntepuꞌuheꞌ mohádi apa to pewaliꞌ iti.

Tandaꞌ kuasaꞌ to rabábehi surona Pueꞌ Iesu

12Surona Pueꞌ Iesu mobábehiheꞌ handaꞌ tandaꞌ to metingkáráki i oloꞌraꞌ tauna to handaꞌ.#5:12 Pueꞌ Ala mobukeki pekakaeraꞌ tauna to mepoinálái bona peisáheꞌ mobábehi tandaꞌ kuasaꞌ i lalu hangaꞌna Iesu. Básá Suro 4:30. Upu-upu tauna to mepoinálái i Iesu hampepekiriheꞌ, hai pakaheꞌ hirámpu i Tambaleꞌ Salomo to ara i tangabaa Támbina Pueꞌ Ala. 13Tauna to tiꞌaraheꞌ mepoinálái i Iesu, tiꞌaraheꞌ pebáiꞌ meromu-romu hingkani hai hira. Agáiáná kehapiꞌ noꞌonoꞌ, upu-upu to mepoinálái rabiláꞌ ntepuꞌuheꞌ tauna to handaꞌ. 14Katetátámbáiá tauna to mepoinálái i Pueꞌ Iesu, maroꞌa tobaleilo maroꞌa towawine.

15Handaꞌ tandaꞌ kuasaꞌ to rabábehi suro iti, onoꞌ miꞌi haneꞌi handaꞌ to tiꞌara ralalu raꞌánti hai aleꞌraꞌ, rapopaturuheꞌ i wiwi rárá. Rabábehi noꞌonoꞌ láwiꞌ rahárungá, ane Peturuꞌ moliu ionoꞌ, kehapiꞌ babaiona peá kana i wátáraꞌ to tiꞌara ralalu iti, hangaa-ngaa mauriꞌheꞌ. 16Mewaliꞌ, mobárárámoheꞌ tauna hangko i wánuá-wánuá to hungkuꞌ, laoheꞌ i kótá Ierusale moánti halaluraꞌ to maduꞌa hai tauna to napesuaꞌi tokadake. Upu-upuheꞌ rapakauriꞌ.

Surona Pueꞌ Iesu rapopeahiahiꞌ

17I tempó iti, Tadulako Menómbá Mahile#5:17 Tadulako Menómbá Mahile: Babilaꞌ to ratunggái ia miꞌi Hanasa. Básá to teukiꞌ i wóiꞌ Suro 4:6. hai taunánaheꞌ to mampeuláꞌi paturoꞌraꞌ toSaduki, mantepuꞌuheꞌ mahiniꞌ i surona Pueꞌ Iesu, onoꞌ miꞌi haneꞌi mantepuꞌuheꞌ mampopeahiahiꞌ surona Iesu iti. 18Surona Pueꞌ Iesu iti rahakaꞌheꞌ hai rataha i lalu tarungku. 19Agáiáná wengi iti, haweꞌ miꞌi hadua malaꞌekana Pueꞌ hai mobungkáhi babaꞌ tarungku iti, haneꞌi moántiheꞌ lao i rawa. Nahángáꞌáheꞌ malaꞌeka iti, 20“Laomokou i Támbina Pueꞌ Ala, nipahaweꞌáheꞌ tauna to handaꞌ, upu-upu bámbári kana i katueꞌ to woꞌu.”

21Mewaliꞌ mepulo-pulo, lao mpuꞌumoheꞌ suro iti i Támbina Pueꞌ Ala hai mantepuꞌuheꞌ mopaturoꞌ tauna to ara ionoꞌ.

Tangaꞌraꞌ mepaturoꞌ, Tadulako Menómbá Mahile hai taunánaheꞌ mokióꞌ upu-upu tadulakoraꞌ toSáráeliꞌ to ntániꞌna bona hirámpuheꞌ i Támbi Pogómbóá Topepáresáꞌ Mahile Agama Iahudiꞌ.#5:21 Topepáresáꞌ Mahile Agama Iahudiꞌ: Básá to teukiꞌ i wóiꞌ Suro 4:1. Hirámpu mpuꞌumoheꞌ upu-upu, haneꞌi rahuoꞌ miꞌi tauna bona laoheꞌ moala surona Pueꞌ Iesu to i lalu tarungku, bona raꞌántiheꞌ i lindoꞌraꞌ. 22Agáiáná kahaweꞌraꞌ to rahuoꞌ iti i petarungkuá, surona Iesu iti tiꞌarapoheꞌ ara! Mesuleꞌmoheꞌ i tadulakoraꞌ, hadua hangko i oloꞌraꞌ manguliꞌ, 23“Kahaweꞌkiꞌ i petarungkuá, kiꞌita babaꞌ tarungku tetuko mani hai tegili. Hai surudadoꞌ meángkáꞌ maniheꞌ mokámpái babaꞌ. Agáiáná i kakibungkáhina babaꞌ, hoa miꞌi, tiꞌara haweꞌ hadua tauna to kihumba i lalu!”

24I tempóraꞌ tadulakoraꞌ surudadoꞌ topokámpái Támbina Pueꞌ Ala#5:24 tadulakoraꞌ surudadoꞌ topokámpái Támbina Pueꞌ Ala: Básá to teukiꞌ i wóiꞌ Suro 4:1. hai kapalaꞌ-kapalaꞌ tadulako menómbá mohádi bámbári iti, wuliheꞌ láwiꞌ tiꞌara piꞌi raisá baiumbámoheꞌ lao suro iti, hai malááꞌmoheꞌ woꞌo, láwiꞌ tiꞌara raisá apa to ina mewaliꞌ.

25Hangko ionoꞌ, haweꞌ miꞌi hadua tauna mohángáꞌáheꞌ, “Nipehádingi! Tauna to nitarungku, deꞌe-deꞌe aramoheꞌ i Támbina Pueꞌ Ala mopaturoꞌ tauna to handaꞌ mokana i Iesu!” 26Onoꞌ miꞌi haneꞌi tadulako surudadoꞌ hai surudadoꞌna laoheꞌ i Támbina Pueꞌ Ala, mohakaꞌ wopaheꞌ suro iti, agáiáná suro iti, tiꞌaraheꞌ sieruꞌ rapapahái, láwiꞌ malááꞌheꞌ ina rawatui tauna to handaꞌ.#5:26 malááꞌmoheꞌ ina rawatui tauna to handaꞌ: I tempó Pototowiá to Sae, ane toIahudiꞌ mohuku mate tauna, rawatui haweꞌ mate. Tempóna tampoꞌ Sáráeliꞌ nakuasaꞌi toRoma, tiꞌarapoheꞌ peisá mohuku mate tauna (básá Iohane 18:31-32). Agáiáná ane mabukoꞌ mpiiꞌ tauna to handaꞌ, hangkani-hangkani mowatuiheꞌ tauna kehapiꞌ ralaraꞌ toRoma (básá Suro 7:57-60).

27Mewaliꞌ suro iti raꞌántiheꞌ i lindoꞌraꞌ Topepáresáꞌ Mahile. Nakuneꞌheꞌ Tadulako Menómbá Mahile, nauliꞌ, 28“Kikóntómokou iatoliu, ineeꞌkou mepaturoꞌ kana tauna iti.#5:28 tauna iti: Mokáhihiꞌ ntepuꞌuheꞌ Iesu, onoꞌ miꞌi haneꞌi tadulakoraꞌ toIahudiꞌ tiꞌara moundeꞌ mokábelái hangaꞌNa. Peita to nibábehi! I humalele kótá Ierusale, handaꞌ tauna mampehádingi paturoꞌmi iti! Ba niuliꞌ ripaꞌi kaiꞌ to masalaꞌ i karapapatena tauna iti?”

29Peturuꞌ mohánikiheꞌ mosulewátái surona Pueꞌ Iesu to ntániꞌna, nauliꞌ, “Tiꞌara hawaꞌna tauna to kipeuláꞌi, agáiáná bateꞌna hawaꞌna Pueꞌ Ala to kipeuláꞌi. 30Iesu nipapate, nipakuꞌ i kau mombehape,#5:30 Mouláꞌ toIahudiꞌ, heáná tauna to rapakuꞌ i kau mombehape napahárárá Pueꞌ Ala (básá Pohuleki 21:22-23; Galatia 3:13). Peturuꞌ mosalaꞌi tadulakoraꞌ toIahudiꞌ, láwiꞌ membiáꞌheꞌ bona Iesu rapapate. Agáiáná iti to napakanótó miꞌi Pueꞌ Ala. agáiáná Pueꞌ Ala to rapenómbái toioruntaꞌ mopatueꞌ huleꞌ Iesu, 31hai Naꞌángkáꞌ Napopehoda tándáꞌ i kuánáNa, haneꞌi Naweꞌi kuasaꞌ mewaliꞌ Tadulako hai Topohómpóꞌ Salaꞌ. Nabábehi noꞌonoꞌ, bona kitaꞌ toSáráeliꞌ peisákeꞌ menosoꞌ hangko i bábehiántaꞌ to kadake hai molámbiꞌkeꞌ peámpungi. 32Kaiꞌ mideꞌe to mosabiki upu-upuna iti, hai Inao to Magasaꞌ to napeweꞌi Pueꞌ Ala i upu-upu tauna to mengkoruꞌ i hawaꞌNa mopatongawaꞌ katoꞌuna paturoꞌkiꞌ iti.”#5:32 To natunggái Peturuꞌ, tadulakoraꞌ toIahudiꞌ tiꞌaraheꞌ mampeuláꞌi peundeꞌána Pueꞌ Ala.

Laluitana Gamalie

33Karahádina Topepáresáꞌ Mahile laluitaraꞌ iti, mabukoꞌ ntepuꞌuheꞌ, hai mampoinaoheꞌ mopapate surona Pueꞌ Iesu iti. 34Agáiáná ara hadua hangko i oloꞌraꞌ to rahangaꞌ Gamalie. Ia hadua toParisi,#5:34 toParisi: Básá to teukiꞌ i Kahirámpuá Laluita. hai ia woꞌo guru agama to rabiláꞌ upu-upu tauna. Meángkáꞌ miꞌi Gamalie#5:34 Gamalie: Ia miꞌi guru mahile i posikolaꞌá to tekahangaꞌiá ntepuꞌu. Pueꞌna Gamalie ia miꞌi guru Hilel, to motepuꞌu posikolaꞌá to mapángkáꞌ iti, bona toParisi peisáheꞌ mampegurui Paturoꞌna Musa. Gamalie iti guruna woꞌo Paulu (básá Suro 22:3). mohuoꞌ tauna moánti suro iti lao hampaiꞌ i rawa. 35Roo onoꞌ, ia mopahaweꞌ laluita, nauliꞌ, “Halalu-halalu toSáráeliꞌ! Hangaa-ngaa nipekiri maroꞌa, apa to ina nibábehi i tauna iti. 36Bahangapa parena to liu, ara hadua tobaleilo to rahangaꞌ Teuda to mopahaweꞌ kaꞌiana tauna to makuasaꞌ {moewaꞌ topopárentá Roma}. Mewaliꞌ handaꞌ tauna to meuláꞌ i hia, araheꞌ paꞌi iba átuna. Agáiáná kahópóꞌána ia rapapate, hai topeuláꞌna mahawuꞌheꞌ, álána tiꞌara piꞌi mewaliꞌ tunggáiáraꞌ. 37Hangkani wopiꞌi, i tempóraꞌ upu-upu tauna raimbaꞌ topopárentá Roma,#5:37 raimbaꞌ topopárentá Roma: Poimbaꞌ tauna to rungu-runguna rapaꞌara i tempóna Kireniu mewaliꞌ mágáuꞌ i tampoꞌ Siria (básá Lukasi 2:2). Poimbaꞌ to nakábelái Gamalie iti mewaliꞌ rekeꞌ-rekeꞌna pare kaꞌini roo karapoánákana Iesu (6M), bona topopárentá Roma peisá morekeꞌ bahanoumbá ásele to hangaa-ngaa raróróꞌ. Mouláꞌ toIahudiꞌ, Pueꞌ Ala peá Daturaꞌ, mewaliꞌ tiꞌara hiolaꞌ hai ágámáraꞌ ane mobaiariheꞌ ásele i Datu Mahile, daturaꞌ toRoma. ara hadua toGalilea to rahangaꞌ Iudasiꞌ.#5:37 Iudasiꞌ: Iudasiꞌ iti tiꞌara Iudasiꞌ Isikarioꞌ ba Iudasiꞌ topeguruna Iesu ba ádina Iesu. Ia hadua to motadulakoi bahangapaheꞌ toIahudiꞌ moewaꞌ toRoma. Karooraꞌ ranangi toRoma, kolompoꞌ Seloꞌ mopaliliu poewaꞌraꞌ toRoma. Ia woꞌo moánti handaꞌ tauna moewaꞌ topopárentá Roma. Agáiáná i karapapatena, topeuláꞌna mahawuꞌheꞌ woꞌo. 38Mewaliꞌ halalu-halalu, deꞌe peá laluitangkuꞌ: ineeꞌheꞌ nipopoapa topeguruna Iesu iti. Rángina miꞌi nipatodáhiheꞌ, láwiꞌ ane paturoꞌraꞌ hai tunggáiáraꞌ hangko i tauna peá, ina manangiheꞌ nodo Tadeu hai Iudasiꞌ. 39Agáiáná ane hangko i Pueꞌ Ala, tiꞌaraheꞌ peisá ninangi, láwiꞌ ane niewaꞌheꞌ, hibali pekou hai moewaꞌ Pueꞌ Ala.”#5:39 To nauliꞌ Gamalie iti ina mampopambuhinaoá Topepáresáꞌ Mahile kana i pepopaingáꞌi to raisá miꞌi to manguliꞌ: “Ineeꞌmokou moewaꞌ Pueꞌ Ala to rapenómbái toiorumi, láwiꞌ ina manangikou!” (Básá 2 Daritakáná Datu 13:12.)

Mewaliꞌ, laluitana Gamalie iti ratarima mpuꞌumoheꞌ Topepáresáꞌ Mahile. 40Roo onoꞌ, suro iti rakióꞌmoheꞌ huleꞌ haneꞌi rahepeheꞌ hai gulaꞌ,#5:40 rahepeheꞌ hai gulaꞌ: Pehepe rabábehi hangko i koliꞌ binataꞌ to rapopotakaꞌ besiꞌ ba buꞌu. Biásá tauna rahepe tálu puloꞌna hai hahioꞌ kánina i ponda hai i káduꞌ. Básá Pohuleki 25:2-3. rauliꞌ, “Ineeꞌmokou mopaturoꞌ tauna kana i Iesu!” Hangko ionoꞌ, rakábáhámoheꞌ.

41Suro iti pohuꞌheꞌ hangko i Pogómbóá Topepáresáꞌ Mahile Agama Iahudiꞌ. Góeꞌ ntepuꞌu laluraꞌ, láwiꞌ napokana Pueꞌ Ala karapopeahiahiꞌraꞌ, hai rasasalaꞌiheꞌ ánti peuláꞌraꞌ i Iesu. 42Alo-alona i Támbina Pueꞌ Ala ba i támbi tauna, mopahaweꞌheꞌ oaꞌ Ngkóráꞌ Marasa deꞌe: “Iesu Ia miꞌi Datu Topehómpóꞌ!”

Currently Selected:

Surona Pueꞌ Iesu 5: NTBEP

Highlight

Copy