MARKUS 1

ARE MARKUS

Aeapome Allah Akot Atakam

Yohanes Owe Bwi Bakupimtaer Ipit atakam akoretame atakam

(Mat. 3:1-12, Luk. 3:1-18, Yoh. 1:19-28)

1Ara aemansa atakam ere Yesus Kristus Akot Atakam. Armat Ipit wan juas ere, Allah Andep. 2Ara Allah Akot Atakam ere Allah atakam bakoretam ipit juas Yesaya aeapome atakam jipu. Bonaknak ere, Yesaya Armat Ipit atakam emes atakam aeapomen:

“Allaham, ‘Dere debamirimemom ipit taka bonak ambirimemomtemin. Wore ere asep andaetemarem. Armat ipit wodaetem atakam, atakam akoretamtem. Are wobandae, bokotpu ajasosotiitem.’ Allah emes atakam aesimen.

3Jipit taka tame apok asan atakam afaketaatem. ‘Tuhan ajarto bokotpu akenemtiiay. Era bokotpu imtuunaka.’ Emes atakam aesimtem.”

Yesaya emes atakam aeapomen.

4Emesare, era atakam jipu owe juas Yohanes Owe Bwi Bakupimtaer Ipitin. Are tame apok asan aesosen. Are atakam akoretamen. “Tare tadosa takes ambakemkoromay wanam Allah atakam ji aeay. Owerawa bwi tara bakupimtaertetertan. Ere Allah tadosa bimak binip ajanimemtamteman.” Emes atakam aesimen. 5Erarawa Yudea tapirmi owe takes, wanam kota Yerusalem owe takes, ara owerawa Yohanespu aimaroma ajaiesen. Adosa atakam afafasimteteresen. Yohanes arawa, ju juas Yordan, era owe bwi akupimtaera ajaien.

6Yohanes ajiime pakaian, binatang juas unta fini pitini jiimomen. Asemak banam pak, ere binatang pitini jikomen. Me abanda pak ere, pikamo anama embore bwin. 7Are aikoretama ajien. “Jipit taka defe andaetem. Era Ipit ere, owe juas aptam. Dere juas apok. Emesare, dere bandaeap wanam asendal banam pak, basurumtam, dere emes pak baemeem asan apok. 8Dere bwi tare etekupimtaero. Armat Ipit ere, Allah Jip tara akupimtamteman.” Emes atakam aesimen.

Yohanes, Yesus bwi akupimtaere atakam

(Mat. 3:13-17; Luk. 3:1-22)

9Emesare. Yesusam Galilea tapirmi kota juas Nasaret aejinaoen. Yohanes arawa, Yesus Yordan ju bwi akupimtaeren. 10Yesus arawa bwi aesokunaoemen. Bwi aesokunaoerawa, wonamo oup ataramtopome ameteporen. Allah Jip sakao sai bapiendae tamen andaen. Yesus damo ten andaepiapen. 11Allah atakam Surga oup aekorendaemen. “Wore deTii! Dere Wora afaimommin. Dere Wore akotnak.” Emes atakam aesimen.

Bii Kapar Ipit, Yesus aempore atakam

(Mat. 4:1-11; Luk. 4:1-13)

12Allah Jip ere, Yesus, tame apok asan baesos ametebirimemen. 13Yesus arawa tame apok asan ise 40 aemaaririn. Bii Kapar Ipitam Yesus aempore. Era wasen wopiam, era asan ajamememaarisin. Me, malaikat oweam Yesus ajamememaarisin. Are Yesus pak afaafetamaarisin.

Yesus jimi bapie owe Ara bajamkai ajate atakam

(Mat. 4:12-22; Luk. 4:14-15, 5:1-11)

14Emesare. Owe Yohanes buji tame bomon ajiitaapomesen. Yesus arawa Galilea tapirmi aesosen. Ararawa Allah Akot Atakam era asan akoretamen. 15“Allah akore atakam bare etedayamse. Allah owe aobaomep bare, setep asisimara. Tare tadosa takes, bamakemkoromay wanam Allah atakam ji aeay! Tare Allah Akot Atakam ji aeemay!” Emes atakam aesimen.

16Emesare, Yesus era fo daytu juas Galilea jupima aemjaren. Erarawa Simon anama areot juas Andreas aporen. Era areotam jimi bapie tastu ipit amnuken. Ararawa jimi apiemisen. 17Yesus arawa atakam era areotam akoromen, “De! Dera jamkaianimi! Dere, tare asamot owe Dera bajamkai, enamo tamen bapietaa, aememtamtemin.” Yesus emes atakam aesimen. 18Ara ipit amnuk arawa, ajimi beken ametejiosemisen. Ararawa Yesus ajamkaiemisen. 19Yesusam aotaseremen. Are Yakobus anama Yohanes aporen. Ara ipit amnuk Sebedeus andep amnuken. Are ajimi jafa bakikim ti bomon aemapemisen. 20Yesus arawa ara ipit amnuk ametejaten. Ara ipit amnuk arawa, aritipit Sebedeusam, wanam akarai baetam oweam, ti bomon beken ajiosemisen. Ara ipit amnuk Yesus ajamkaiemisen.

Jak bomon bii aemape ipit atakam

(Luk. 4:31-37)

21Emesare. Yesus anama abajamkai owe, kota Kapernaum ambaremesen. Yahudi Owe Samayen Bare aemanse, Yesus Yahudi Owe samayen tame ajiien. Atakam arawa aememtamen. 22Era atakam jane ajies oweam jinim daytu aeesen. Are Yesus ara Musa Basakamtam Atakam baememtam owe tamen apok aporesen. Me, Armat Ipit atakam aememtame, Are atakam fiaknak akoren. 23Wan ipit taka ara Yahudi owe samayen tame ajamjiien. Ara ipit jak bomon, bii aemapen. Are atakam afaketaeren. 24“Yesus! Wore Nasaret Ipit. Wore wama tamen pak emtaroam? Wore dara bandanaesumosomkorom andaemi? Wore demsam. Wore Allah ataendaeme turunak Ipit.” Emes atakam aesimen.

25Yesus arawa, bii bajis atakam asakamtamen. “Atakam bakariey! Wore ara ipit jak bomon ajisey.” Emes atakam aesimen.

26Emesare. Bii era ipit jis aopimen. Bii anom damo jende daytu era ipit jak bomon aekejisen. 27Era owe takes jinim daytu aeesen. Ararawa armamon atakam ajamkoramesen. “Wama tamenem? Armat Ipit ai atakam aememtamum! Are atakam fiaknak akoretamum. Are bii bajis atakam asakamtamum. Biirawa aatakam ji aeemas.” Emes atakam aesimesen.

28Emesare, Yesus, Galilea dasman tansan takes andi fefnak afufuosen.

Yesus damo pota owe ajaoromtaere atakam

(Mat. 8:14-17; Luk. 4:38-41)

29Emesare. Yesus anama abajamkai owe, Yahudi Owe samayen tame aejisesen. Ajises arawa, Petrus anama Andreas atame akan ajakosesen. Yakobus anama Yohanes anom takan ataemesen. 30Erapuam Simon anapot damo aemansen. Yesus anama abajamkai owe ara asan ambaremes, owerawa damo taot atakam Yesus fef aesimtamesen. 31Yesus arawa era taot setep ambaromen. Are era taot ban atapimtaere, wanam awasimapomen. Era taot arawa, fef ajufamapen. Are banda pak era owe atetamen.

32Pororawa, jee asapiepuen. Jee asapiepuerawa, era saman owe, damo pota owe anama jak bomon bii aemapteteres owe, Yesuspu aituomasa ajaiesen. 33Era kota owe takes era tamepu ajarisiemesen. 34Armat Ipitam, damo pota owe tanane ajaoromtaeren. Atat kupis damo pota ajaoromtaerteteren. Anom jak bomon bii tanane awutiijisimteteren. Ara bii Yesus amsam. Erarawa Yesus, bii, atakam bakore, atii aten.

Yesus, Galilea tapirmi akoretame atakam

(Luk. 4:42-44)

35Emesare. Ajofe tomitim, Yesus awasiten. Armat Ipit tame aejiserawa, tame apok asan aesosen. Era asan Allah atakam ajanimen. 36Me, Simon anama wan takan ajamjares owe, Yesus andimaresen. 37Ara owe Yesus andimartaeres, atakam akoromesen. “Owe takes Wora dimarmanis.” Emes atakam aesimesen.

38Yesus arawa, “Dare era pakeosar samaniin samaniin aesosamo. Dere era asan kupis bakoretam. Emesare, Dere emes pak taka baem andaeo.” Emes atakam aesimen 39Emesare, Armat Ipit Galilea tapirmi samaniin samaniin Yahudi Owe samayen tame bomon akoretama ajaien. Are era owe jak bomon aemapes bii awutiijisima ajaien.

Yesus owe ombare bamarem damo pitini potanak ipit ajaoromtaere atakam

(Mat. 8:1-4; Luk. 5:12-16)

40Emesare owe ombare bamerem damo pitini potanak ipit Yesuspu ambareme, wanam era ipit Yesus bipu jindi andaepuapen. Are atakam fiak Yesus ajanimen. “Wore akot aportem, Wore damo akot dera batetam Wore erare.” Emes atakam aesimen.

41Yesus era ipit seekot aoorporen. Armat Ipit ban ataesume, ararawa era ipit damo ten ataetiien. “Dere akot apormin. Wore damo akot aememey.” Emes atakam aesimen. 42Yesus emes akorome, ararawa era damo pitini potanak ametepakapiosen. Era ipit damo akot aememen. 43,44Yesus atakam fiak era ipit asakamtamen. “Wore ara pak wan owe boesimtam bas. Wore ere, Allah Tame pak baem ipit akan ajakosey. Wanam wodamo akot aememarem atakam armat ipit ajanime. Erarawa wore Musa atakam asakamtame pak, Allah atetamey. Era pak wore damo akot aememem baporomtam pak erare.” Emes atakam aesimen. Emes atakam aesimerawa Yesus era ipit ametebirimosomen.

45Era ipit aesosen. Me, are era atakam asamaniin samaniin aikoretama ajaien. Owe tanane Yesus, aeme pak atakam jane ajiesen. Erarawa Yesus kota kupis baso baemejar asan apoken. Me, Are tame apok asan taka aemapen. Era samaniin samaniin oweam Yesuspu aejinaoma ajaiesen.

Currently Selected:

MARKUS 1: LAIASC

Highlight

Copy