MARKUS 2

Yesus kam ipit ajaoromtaere atakam

(Mat. 9:1-8; Luk. 5:17-26)

1Asep barerawa, Yesus kota Kapernaum aofasien. Owe tanane, “Yesus tame aometar.” Emes atakam jane ajiesen. 2Owe tananenak ajarisiemesen. Era tame bomon baemejii asan apoken. Erarawa, tasanam jimsappuam baemeemem asan apoken. Armat Ipit ere, era tame bomon, Allah atakam akoretamen. 3Owe eak taka apok, kam ipit era asan atomasesen. 4Me, erapuam owe tananenak aememesen. Erarawa, are era kam ipit Yesuspu baemetoomjii asan apoken. Are emes apores, wanam era tame oup atoomtemetesen. Ararawa, Yesus aememe kuuspu wone jafa awaramapomesen. Erarawa, era kam ipit tapini aptam, bap ataendaemesen. 5Yesusam era owe eemnak Ara bamesemkorom aporen. Ararawa, atakam kam ipit akoromen, “deTii! Dere wodosa bimak binip ajanimemtammin.” Emes atakam aesimen.

6Wan Musa Basakamtam Atakam baememtam oweam era asan aemapesen. Era owe bimak binip atetaramteteresen. 7“Ara aememar Ipit wama tamen atakam koreme? Are Allah awaren. Emesare Are potanak atakam akorem. Ara dosa bimak binip bajanimemtamkorom ipit, ere Allah taka erare.” Emes atakam aesimesen. 8Yesusam era owe atetaramteteres bimak binip fef aporen. Ararawa, “Tare wama tamen bimak binip tetarammakam? 9Dere tene atakam ara kam ipit, wama atakam koretamtey? ‘Dere wodosa bimak binip ajanimemtammin,’ emes atakam are? Wanam, ‘Bawasitey! Wotapini bataerey! Wore baemjarey!’ Emes atakam are? 10Me, Asamot Anakot Ajaoreme Ipit, ara aemansa tapirmi owe dosa bimak binip bajanimemtam fiak pak aoemommar. Dere tare era pak ara aporomtammin.” Emes atakam aesimtamen. Ararawa, atakam kam ipit aokoromen. 11“Bawasitey! Te! Wotapini bataerey!” Emes atakam aesimen.

12Erarawa, era kam ipit awasiten. Are atapini fef ataere, wanam aesosen. Era owe takes era pak aporesen. Are jinim daytu aeesen. Ararawa Allah tere aeomesen. “Dare emes pak basamo bata apok.” Emes atakam aesimesen.

Yesus. Lewi, Ara bajamkai ajate atakam

(Mat. 9:9-13; Luk. 5:27-32)

13Emesare. Yesus jupima aofasiosen. Erapu owe tanane Armat Ipitpu andaeomesen. Armat Ipit arawa atakam era owe akoretamen. 14Erapu ajare, Are owe juas Lewi bi aporen. Lewiam, Alfeus andepen. Ara Lewi pemerintah uang bajanimtam tame bomon aemapen. Yesus arawa atakam Lewi akoromen. “Dera jamkaian!” Emes atakam aesimen. Erarawa, Lewi awasite, wanam are Yesus ajamkaien.

15Yesus Lewi tame amos taondemap, pemerintah uang bajanimtam owe tanane, wanam era Yahudi agama pak tai aooes owe tanane, ajinaoesen. Are Yesus anama abajamkai owe, amos takan ajamdesen. Emesare, pemerintah uang bajanimtam owe tanane, Yahudi agama pak tai aooes owe tanane ajamkaiesen. 16Wan Musa Basakamtam Atakam baememtam owe, Yesus era Yahudi agama pak tai aooes owe, wanam pemerintah uang bajanimtam owe, amos takan andes aporesen. Emesare, era owe Yesus bajamkai owe ajateporesen. “Yesus ara pemerintah uang bajanimtam owe, wanam Yahudi agama pak tai aooes owe, amos anama bwi takan andemas ere wama tamenem?” Emes atakam aesimesen. (Ara ajatepores Musa Basakamtam Atakam baememtam owe, ere Parisi oween.) 17Yesusam era ajatepores atakam jane ajien. Ararawa, “Damo akot owe dokter bajate apok aememas. Me, damo pota owe dokter ajatetaeremas. Dere turu owe bajate bandae apok. Dere jaos owe bajate andaeo.” Yesus emes atakam aesimen.

Banda pak bamase atakam

(Mat. 9:14-17; Luk. 5:33-39)

18Emesare. Bare taka, Yohanes bajamkai oweam, wanam Parisi bajamkai oweam, banda pak ambasesen. Wan oweam, Yesus ambaromes, wanam ajateporesen. “Yohanes ajamkaimas owe, wanam Parisi ajamkaimas owe, banda pak ambasemas. Me, wora ajamkaimanis oweam andemas. Ere wama tamenem?” Emes atakam aesimesen.

19Yesusam atakam akoromen. “Ai petae ipit ajoo owe takan aemapmas apaye, ajoo owe banda pak bamase ape? Emesare, ai petae ipit ajoo owe takan aemapmas apaye, era owe banda pak andemas. 20Asep bare ere, owe ai petae ipit era owe waut aeresumtaertemas. Era bare ere, ajoo owe banda pak ambasetemas.

21Owe, ai kain, tarai baju ten bakamkamimapompor apok. Are ai kain tarai baju ten akamkamimapomtas, wanam baju bwi aeosomtas, ere aikain, ara tarai baju akekemtaertem. Ara kee ere, jirao aojiraotem. 22Oweam, ai anggur bwi, tarai pitini ese baoweapom apok. Owe ai anggur bwi, tarai pitini ese aoweapomtas, era ai anggur bwi ara pitini ataramomestem. Ara bwi aokoameskoromtem. Me, owe ere, ai anggur bwi, ai pitini ese aoweapomemas.” Yesus emes atakam aesimen.

Yahudi Owe Samayen Bare atakam

(Mat. 12:1-8; Luk. 6:1-5)

23Emesare. Bare taka, Yahudi Owe Samayen Bare aemanse, Yesus anama abajamkai owe gandum kebun aemjaresen. Abajamkai owe aemjares, are gandum eek aptam ametekokomtaaesen. 24Era Parisi owe ere, atakam Yesus akoromesen. “Baporey! Era owe aememmas pak, Musa Basakamtam Atakam aoomas. Are wama tamenem?” Emes atakam aesimesen.

25Yesus arawa, “Tare Daut aeme pak, aoeapome atakam baca baem apok apeno? Armat ipitam abajamkai owe, banda pak apoknak aememesen. Are amosto daytu aememesen. 26Erarawa, Daut, Allah Tame ajiien. Ajiierawa, are Allah bipu ataetiies amos andemen. Wanam are wan amos, ara ajamkaies owe sai asaietamen. Me, bambinak owe era amos banda karaonaken. Are Allah Tame pak baem owe taka, era amos apa banda eraren. Emesare, era bare Abiyatar, Allah Tame pak baem ipitkor, aememaaririn.

27Allah, asamot owe, Yahudi Owe Samayen Bare bimak binip bajanimomaar atakam asakamtame, ere asamot owe asan akot baemap are. Me, Are asamot owe era Yahudi Owe Samayen Bare basakamtam atakam bambi ji bae potan. 28Erarawa, Asamot Anakot Ajaoreme Ipit, Yahudi Owe Samayen Bare armat ipit aememem.” Emes atakam aesimen.

Currently Selected:

MARKUS 2: LAIASC

Highlight

Copy