LUKAS 21

Tano taot Allah Tame uang atetame atakam

(Mrk. 12:41-44)

1Emesare. Yesus banamek apemen. Are pak daytu owe, Allah Tame uang, uang asan ataapomteteres aporen. 2Are pak apok tano taot uang sen kope jamnuk ataapome aporen. 3,4Armat Ipit arawa, atakam akoren. “Atakamnak, era owe tanane uang daytu. Are wan uang era Allah Tame uang asan ataapomtetermas. Me, ara aemema taot ere, pak apok. Are aapak bajitin uang takesam era uang asan ataapomum. Are wan uang apoknak. Emesare, ara aemema taot uang daytu emes ataapomum. Era wan owe takes, uang kope emes ataapomtetermas.” Emes atakam aesimen.

Owe Allah Tame batietii atakam

(Mat. 24:1-2; Mrk. 13:1-2)

5Wan oweam, Allah Tame atakam akoramesen. Are era Tame eka akotnak atakam akoramesen. Are era Tame tasee pak atakamam akoramesen. Bonaknak ere, owe era Tame tasee pak, Allah bataetiitam pak, emes atetamesen. Yesus arawa, atakam akoromen. 6“Era apormakam pak, asep bare ara Tame eka wan eka ten baemames apoknak aemtemas. Jii owe ere, era eka takes atietiikoromtemas.” Emes atakam aesimen.

Owe ajirisemtas atakam

(Mat. 24:3-14; Mrk. 13:3-13)

7Era owerawa, ajateporesen. “Guru! Era pak ere, ete bare emto? Era bare setep aemamesto, Allah wama jinim bae pak poromtamto?” Emes atakam aesimesen. 8Armat Ipit arawa, “Tare turuar! Owe potet tara batutum-ombar. Owe tanane ajinaotemas, wanam ‘Allah Aeremtaere Ipit, ere derare,’ emes atakam aesimtetertemas. Wanam, ‘Armat Ipit bofasie bare emeemansa.’ Emes atakam aesimtemas. Me, era owe atakam ji bae bas. 9Tare, owe jii bajamomam, owe pemerintah atakam baooam, emes atakam jane ajitakam, ere ombare bas. Era pak bonak aemtemas. Me asepnak bare ere, fef bafemeemames apok aemtem.” Yesus emes atakam aesimen.

10Armat Ipitam atakam era owe aokoromen. “Wan samane tanane jii wan samane tanane ajamoma ajitemas. Wan tapirmi tanane jii wan tapirmi tanane ajamoma ajitemas. 11Ajieam daytinak tanane asisima ajitem. Asan tananeam owe amosto dambir aema ajitemas. Atairam asan tanane ajinaoa ajitem. Ombare baemem pak daytinakam, jinim bae pak daytinakam, wonamo oup aendaetemas. 12Me, era pak takes ere, asep aemtemas. Bonak ere, owe tare Dera bajamkai owe aporteman. Erarawa are ban tara akimomemteman. Are tara ajurusumteman. Are tare era Yahudi owe samayen tame atakam basakamtii owe aotasimemomteman. Are buji tame bomon ajiitaapomteman. Are tare raja owe bipuam, gubernur owe bipuam atatapimtaateman. 13Ere, tare Allah Akot Atakam era owe bakoretam, asan akotpu erare. 14Tare emes atakam asakamemteteray. ‘Dare era owe atep ajittam atakam, bimak binip arke batetaram apok aemtemarom.’ Emes atakam asakamtiiteteray. 15Denom bimak binip baso tara atetamtemin. Tararawa, atakam akot akoretemakam. Erarawa tapota baem pak atakam akoretas owe, taatakam baemeoo asan apok aemtemas. Are atep tara baemejit asan apok aemtemas. 16Tarisaream, tarepotaisam, tareotaisam, taofwe tame oweam, tajoo oweam, tare era jokoman owe aotasimemomtamteman. Are tare wan owe atatiiteman. 17Owe tare Dera bajamkai aporteman. Erarawa era owe takes bifane tara afeomemteman. Me, tare asan akot aemaptemakam. 18Me, takuus fini takakopeam bapakapios apok aemtem. 19Tare bamompim apok aemtakam, wanam jak jirao aememtakam, ajoremtemakam.”

Yerusalem danais aemamestem atakam

(Mat. 24:15-21; Mrk. 13:14-19)

20“Tare jii tentara Yerusalem bafojomem aportakam, tare era kota danais baemames bare setepnak aportemakam. 21Era bare ere, Yudea tapirmi aemapmas owe, ombare era fami baesostas. Era kota aemapmas oweam baesostas. Era samaniin samaniin tamsan aemapmas oweam, kota boesos bas. 22Era bare ere, Allah era owe Bajurusum Bare. Ere era Alkitab atakam jipu. 23Era bare, jak aptam tapesam, jii aoo andamtas tapesam, asan potanak aemaptemas. Era tapirmi owe ajirisemtemas. Allah, ara saman ajurusumtem. 24Me wan owe, jirao warim bande ajatetatiitemas. Jii owe wan owe tau ataatemas. Ararawa, era owe era samaniin samaniin takes atapirmi atuomastemas. Era Yahudi apok oweam Yerusalem danais aemtiikoromtemas— are era tapirmi baemomem ambompimtas bare ajiire.”

Asamot Anakot Ajaoreme Ipit aofasito bare atakam

(Mat. 24:29-31; Mrk. 13:24-27)

25“Jee jinim bae pakam, pir jinim bae pakam, baet jinim bae pakam, ajistemas. Ara aemansa tapirmi ere, era samaniin samaniin jak pota aememtemas. Are bimak binip arke atetaramtemas. Are era itimbup wo daytinak ajumto pak jane ajitemas, wanam ombare aememtemas. 26Allaham era wonamo oup sare pak akookomtem. Owerawa, ara aemansa tapirmi ajirisemto pak, banamek apemtemas. Erarawa are ombare daytinak ambartemas, wanam ajak ajirfinitemas. Damo fefeam aemamestemas. 27Owerawa, Asamot Anakot Ajaoreme Ipit, wonamo bomon oup andaeto aportemas. Armat Ipit, fiaknak pak aptamam, akotipitnak aememe sare aptamam, pakambwi andaeomemtem. 28Era pak takes aemtas, tare bawasitay. Tare bi oupa. Allah tara bajortaer bare, ere setepnak erare.” Yesus emes atakam aesimen.

Yesus, wus juas “ara” baetaa atakam

(Mat. 24:32-35; Mrk. 13:28-31)

29Armat Ipit arawa, baetaa atakam era owe akoretamen. “Wus juas ‘ara’ am, wan wus takesam, bimak binip atetaramay. 30Tare wus era jini pak bajis aportakam, ere jusue bwi setep aporemakam. 31Emesamare, tare ara akoremin atakam aememto aportakam, tare Allah aowe baomep bare setep aportemakam. 32Atakamnak, ara tapirmi aememtas owe, dambir baem apok, era akoremin atakam takes bonak ato takamemkoromtem. 33Era wonamo oupam, ara tapirmiam, ajaniostem. Deatakam ere, emes aemansaartem.”

Banamek bataiapaar atakam

34“Tare ere, turuar! Tare pakambwiam, bir bwi banda jaytuam, ara aemansa tapirmi pakam, bimak binip daytu batetaram bas. Tanom bimak binip jiiti bas. Tuhan bare fef aemamesto, tare tamsam apok baemap-ombar. 35Era bare aemto pak, ara aemansa tapirmi baemap owe takes fef aemamestem. Are siso wo fef andaekamimompemas emes tamen are. 36Banamek ataiapaaray. Atakam Allah ajanimaaray. Erarawa tare era aemamestas pak takes, jak fiak aememtemakam. Tanom, Asamot Anakot Ajaoreme Ipit, bipu baemem, jak fiak aememtemakam.” Yesus emes atakam aesimen.

37Emesare. Juiin afaafeaye, Armat Ipit, Allah Tame bomon atakam aememtama ajaien. Eam ararawa, Are era fami juas Saitun oup aesosa ajaie, wanam ise isita ajaien. 38Tomnak ararawa, owe takes awasita ajaiesen. Are Allah Tame bomon ajiia ajaiesen. Are, aatakam jane bajie, Armat Ipitpu ambaroma ajaiesen.

Currently Selected:

LUKAS 21: LAIASC

Highlight

Copy