LUKAS 20

Yesus afiak pak atakam

(Mat. 21:23-27; Mrk. 11:27-33)

1Emesare. Bare taka, Yesus, Allah Tame bomon owe, atakam aememtamen. Are Allah Akot Atakam era owe akoretame ere, Allah Tame pak baem owe daytuam, Musa Basakamtam Atakam baememtam oweam, Yahudi duturu oweam, erapu ambaremesen. 2Are atakam Armat Ipit akoromesen. “Ara aemmarem pak ere, atakam tao sakamtaman? Atakam boesimtamaro.” Emes atakam aesimesen. 3Armat Ipit arawa, era owe atep ajiten. “Denom tara bajatepor aemmin. Tanom atep ajitani. 4Me Yohanes owe bwi akupimtaeraye, atakam tao sakamtame? Allah ape? Asamot owe ape?” Emes atakam aesimen. 5Era owerawa, era atakam armamon atakam ajamkoramesen. “Dare atep ajitam, ‘Allah atakam aosakamtame,’ emes atep ajitam, Armat Ipit arawa, ‘Tare armat ipit atakam bamesem apok ere, wama tamenem?’ Emes atakam aesimtemaro. 6Dararawa, ‘Asamot ipit Yohanes atakam aosakamtame,’ emes atep ajitam, ara aememes owe takes, eka dara asampirimtemaroas. Ara owe abimak binip ere, ‘Yohanes, Allah atakam bakoretam ipit.’ Emes bimak binip atetarammas.” Emes atakam aesimesen. 7Emesare, era owe, Yesus atep ajitesen. “Yohanes owe bwi akupimtaeraye, atakam tao pasakamtameye? Danom damsam apok.” Emes atakam aesimesen. 8Yesus arawa, “Denom ara aememmin fiak pak, atakam asakamtamen Ipit, atakam tara boesimtam apok.” Emes atakam aesimen.

Anggur kebun karai baetam owe baetaa atakam

(Mat. 21:33-46; Mrk. 12:1-12)

9Armat Ipit arawa, emes baetaa atakam, era owe akoretamen. “Jipit taka, anggur kebun ajapomen. Are era kebun, kebun karai baetam owe aotasimtiitamen. ‘Tare deanggur kebun karai aetamtankum, dere wan anggur eek tara atetamtemin. Me wan ere, dos.’ Emes ataaji aeen. Ararawa, wan ju tapirmi tarai aesosaaririn. 10Era anggur eek bakokomtaa bwiam aemansen. Era kebun armat ipit arawa, wan karai baetam ipit, kebun karai baetam owepu ambirimemomen. Are era ipit aanggur eek atakam bajanim ambirimemomen. Era owe ere, era ipit wusup atesen. Are era ipit bambi ban taka afasimdaemesen. 11Era kebun armat ipit arawa, wan karai baetam ipit ambirimemomen. Era kebun karai baetam owerawa, era ipitam wusup atesen. Are asan pota pak era ipit aemes, wanam bambi ban taka aofasimdaemesen. 12Era kebun armat ipit arawa, wan karai baetam ipitam abirimemomen. Era kebun karai baetam owerawa, era ipit daso atames, wanam era kebun awotapemjisimesen. 13Era kebun armat ipit arawa, ‘Dere wama pak emtey? Dere afaimomemmin detii, ambirimemommin. Emesare, era owe detii atakam ji taka aetemas.’ Emes atakam aesimen. 14Era kebun karai baetam owe ere, era andep aporesen. Are atakam ajamkoramesen. ‘Ara ipit, era kebun armat ipit pak atoomem. De! Era ipit batatiiamo. Erarawa aritipit pak takes damba baporetoomem!’ Emes atakam aesimesen. 15Emesare, are era ipit, era kebun awotapemjisimes, wanam atatiiesen. Era kebun armat ipit ere, era owe, wama pak emto? 16Are erapu ambaremtem, wanam era kebun karai baetam owe atatiitem. Are era kebun, wan karai baetam owe aootasimtiitamtem.” Yesus emes atakam aesimen. Era atakam jane ajies owerawa, “Me! Emes bas!” Emes atakam aesimesen. 17Yesus arawa, banamek era owe aoromen. Are atakam akoromen.

“Alkitabam:

Tame baeapom owe, eka taka pota apores, wanam era eka aeremtiies. Era eka ere, tame fesis eka anakotnak aemanse.”

Emes atakam akorem. Era ayat ere, wama tamenim? 18Emesare, era eka ten andaeamestas owe, andanaesuamestemas. Wanam era eka, owe andaekamimomepto, are era owe apweamtiitem. Yesus emes atakam aesimen. 19Yesus, era baetaa atakam akoretame ere, are Musa Basakamtam Atakam baememtam owe anama Allah Tame pak baem owe aoemaaris pak, emes atakam akoren. Era oweam emes aporesen. Erarawa are era bare taka Yesus bajipirtaer aemporesen. Me, era owe, wan owe tanane ombare aememesen.

Uang Raja Kaisar batetam atakam

(Mat. 22:15-22; Mrk. 12:13-17)

20Emesare are Yesus banamek apeomesen. Are pir bae owe, Armat Ipitpu ambirimemesen. Era owe, turu owe tamen aememesen. Emesare, Yesus, pota atakam bakore apaye, are Armat Ipit, gubernur baotasimemomtam aememesen. Gubernur ere, era tapirmi owe atakam basakamtam ipit. 21Me era pir bae owerawa, atakam, Yesus akoromesen. “Guru! Era akoretamemarem atakamam, era aememtamemarem atakamam, atakamnak apormarom. Wonom, ‘Wan owe akot, wan owe pota,’ bajie apok. Me, Wore Allah akot apormar pak baem atakam, atakamnak aememtamemarem. 22Dare ere, Kaisar atakam asakamtamero uang ara atetamtam, dare Musa Basakamtam Atakam baoo ape?” Emes atakam aesimesen. 23Yesus ere, era atakam pota atakam aporen. Ararawa, atakam era owe akoromen. 24“Tare uang taka Dera poromtamani. Ara uang ara aemapa gambar ta bim? Ara aemapa waoam ta juasem?” Emes atakam aesimen. Era owerawa, “Are Kaisar bi. Are Kaisar juas.” Emes atakam aesimesen. 25Armat Ipit arawa, atakam era owe aokoromen. “Emesare, tare Kaisar pak, Kaisar atetamay. Tanom Allah pak, Allah atetamay.” Emes atakam aesimen. 26Emesare, era owe, Yesus era owe tanane bipu, jaos atakam baemekore asan apoken. Are Yesus era atep ajite atakam jinim aeesen. Are atakam apoknak aememesen.

Dambir owe bajaorwasit atakam

(Mat. 22:23-33; Mrk. 12:18-27)

27Emesare. Wan Saduki oweam, Yesus ambaromesen. Saduki owe abimak binip ere, “Dambir aemes owe bajaorwasit apok.” Emes bimak binip atetaramemas. Are Armat Ipit ajateporesen. 28“Guru! Musa emes basakamtam atakam aeapomtamero. ‘Petaetii ipit jii apok dambir aemto, areot ara dambir aeme ipit aremo bojiemto. Ararawa, jii arepot bafimtamto.’ Musa emes atakam aesimen. 29Emesare, jipit taka oorey jii poman ban jamnuken. Era biiti ipit petae ajiemen. Are jii bafimut apok dambir aemen. 30Me abeak ipit arawa, era taot aojiemen. Are jii bafimut apok dambir aoemen. 31Me wan aykun ipitam emes taka aoemen. Wanam era owe poman ban jamnuk, era taot ajiema ajaiesen. Are takes jii bafimut apok dambir aema ajaiesen. 32Asep arawa, era taotam dambir aemen. 33Emesare, era owe poman ban jamnuk era taot ajiema ajaiesen. Me, dambir owe ajaorwasittas ere, era taot ta ipit aremo emapto?” Emes atakam aesimesen.

34Yesus arawa, atakam era owe akoromen. “Ara aemansa tapirmi aemapes owe, petae anama oorey ajuuamutmas. 35Allah wan owe, turunak owe aportem. Era owe dambir aemtas, asep bare are ajaorwasittemas. Are Surga oup tapirmi aemaptemas. Era asan ere, are petae anama oorey bojuuamut apok aemtemas. 36Era owe, malaikat owe tamen aememtemas. Erarawa are dambir baemeem asan apok. Allah era owe ajaoromwasumtumtem. Are Allah arereis. 37Musaam era dambir owe ajaorwasittas atakam akore. Era fa aptam wus kari atakam aeapom ere, Musa, emes atakam akoren. ‘Tuhan Abrahamam, Ishakam, Yakubam, Are aAllah.’ Emes atakam aeapomen. 38Emesare, Allah, dambir owe aAllah apok. Are jatiaptam owe aAllah. Armat Ipitam owe takes jatiaptam aporem.” Yesus emes atakam aesimen. 39,40Me wan Musa Basakamtam Atakam baememtam owe, Yesus bojatepor, ombare aememesen. Erarawa are atakam akoromesen. “Guru! Era akoremarem atakam ere, akotnak.” Emes atakam aesimesen.

Daut Wurpis Ipit anama Allah Aeremtaere Ipit atakam

(Mat. 22:41-46; Mrk. 12:35-37)

41Yesus ere, era owe ajateporen. “Owe atakam akoremas, ‘Allah Aeremtaere Ipit, Raja Daut wurpis Ipit,’ emes atakam aesimemas. Era owe ere, emes atakam bokore wama tamenem?

42Daut ere, Buku Masmur emes atakam aeapome:

‘Tuhan atakam deTuhan akorome: “Wore debo poman aemapey—

43Dere wojii owe akumimosomkoromtey bare ajiire.” Tuhan emes atakam akoren.’

Daut emes atakam aesimen. 44Emesare, Daut Allah Aeremtaere Ipit, atakam akore, ‘Are deTuhan.’ Emes atakam aesimen. Emesare, Allah Aeremtaere Ipit, Daut wurpis Ipit aememe ere, wama tamenem?” Yesus emes atakam aesimen.

Musa Basakamtam Atakam baememtam owe turuar atakam

(Mat. 23:1-36; Mrk. 12:38-40)

45Erapu aememes owe Yesus atakam jane taojimapes, Yesus arawa bimin abajamkai owe awaiomen. Wanam emes atakam asakamtamen. 46“Tare Musa Basakamtam Atakam baememtam owe turuar. Era owe baju jirao bajiimomem, wanam batawejar jak aseseromemas. Era pasar asan ere, are owe ‘selamato’ ara bajie jak aseseromemas. Asamayen tame bomonam, pakambwi tame bomonam, are bonak owe baemap asan jak aseseromemas. 47Are potet era tano tapes atutumemas, wanam aapak takes wosom ataatemas. Atakam Allah ajanimtas, are atakam jiraonak ajanimemas. Me, are bwea atakam taka. Emesare, Allah daytinak era owe, ajurusumtem.” Yesus emes atakam aesimen.

Currently Selected:

LUKAS 20: LAIASC

Highlight

Copy