LUKAS 22

Owe Yesus batatii atakam akukuramtiies atakam

(Mat. 26:1-5; Mrk. 14:1-2; Yoh. 11:45-53)

1Emesare. Era Eek Apok Roti Pakambwi bare setep aemansen. Era pakambwi wan juas Paskah Bare Pakambwin. 2Allah Tame pak baem owe daytu anama Musa Basakamtam Atakam baememtam owe Yesus batatii atakam akukuramtiiesen. Me, are ombare bambi owe ambaresen.

Yudas, Yesus, jokoman owe baotasimemomtam asakamtiie atakam

(Mat. 26:14-16; Mrk. 14:10-11)

3Yesus abajamkai owe 12, wan ipit taka juas Yudasen. Me Yudas wan juas Iskarioten. Emesare, Bii Kapar Ipit Yudas jak bomon ajiiapen. 4Me Yudasam aesosen. Ararawa, Allah Tame pak baem owe daytuam, Allah Tame banamek batai komandan oweam, atakam ajamkoramesen. Are Yesus era owe baotasimemomtam, atakam ajamkoramesen. 5Era oweam jak akotnak aememesen. Are Yudasaye, uang, Yudas batetam, atakam ajamsakamamtiiesen. 6Me Yudasam akot ajien. Ararawa, Yesus era owe baotasimemomtam asan akot, andimarporen. Are bambi owe tanane era pak bapor apoken.

Yesus pakambwi atakam akore atakam

(Mat. 26:17-25; Mrk. 14:12-21; Yoh. 13:21-30)

7Emesare. Eek Apok Roti Pakambwi bare aemansen. Ere era Paskah Bare Pakambwi domba jii batatii bareen. 8Yesus arawa, Petrus anama Yohanes, atakam asakamtamen. “Tanom te! Paskah Bare Pakambwi daobanda pak pakenemami.” Emes atakam aesimen. 9Era ipit amnuk arawa, “Dare era pak ete asana kenemtamum?” Emes atakam aesimemisen. 10Yesus arawa, “Tare era kota ambaremtankum, tare jipit taka bwis atoomemto bimnuk aemamtaertemankum. Tare armat ipit era ajiito tame takan ajamjiiami. 11Tararawa, emes atakam era tame armat ipit aesimtamami. ‘Me Guru wora ajateporman. “Denom, debajamkai oweam, Paskah Bare Pakambwi banda ete kamar arom?” Emes ajateporman.’ Emes atakam aesimami. 12Armat ipit arawa, oup kamar daytu era pak takes aporomtamteman. Emesare, tare era Paskah Bare Pakambwi pak era asan afaafetiiami.” Yesus emes atakam aesimen. 13Era ipit amnuk arawa aesosemisen. Are era pak takes Yesus akore atakam jipu taka aporemisen. Are Paskah Bare Pakambwi pak afaafetiiemisen.

Tuhan perjamuan atakam

(Mat. 26:26-30; Mrk. 14:22-26; 1 Kor. 11:23-25)

14Emesare. Era Paskah Bare Pakambwi amos banda setep apore ere, Yesus andaepakiapen. Abajamkai oweam, erapu takan andaepakiapesen. 15Armat Ipit arawa, atakam era owe akoromen. “Dere ara Paskah Pakambwi tare bonak takan banda jak aseseromaaru. Asep arawa, ajirisemtemin. 16Atakamnak! Dere era pak bonda apok— era Paskah Pakambwi anakot andetey bare ajiire. Era pakambwi ere, Allah Ai Tapirmi aemtem.” Emes atakam aesimen. 17Armat Ipit arawa, mbok anggur bwi aptam ataeren. Are terima kasih atakam Allah akoromen. Ararawa, atakam era oweam aokoromen. “Ara bwi bataeray, wanam bajamsaiamonay. 18Baporay! Waa ajiire, Dere ara anggur bwi bonda apok— ere Allah owe takes aomepto bare are.” Emes atakam aesimen. 19Armat Ipitam amos ataere, wanam terima kasih atakam Allah akoromen. Terima kasih atakam Allah aokoromerawa, Are era amos akookome, wanam era owe sai asaietamen. “Are dedamo dasa. Dere dedamo, asan akot tara boem pak, atetammin. Tare emes aemaaray. Era pak tare debimak binip bajanimomem pak.” Emes atakam aesimen. 20Amos andakoromes ere, Yesus mbokam ataeren. Are atakam akoromen. “Ara mbok bwi deesee. Allah, asamot owe bajortaer, ai ataaji aee. Me deesee ajirindaeto, ere Allah ai ataaji aee pak, atakamnak aporomtamtem. Me deesee tara bajortaer esee. 21Me, baporay! Dera aotasimemomtamtan ipit, amos Dere takan ara demamum. 22Emesare, Asamot Anakot Ajaoreme Ipit dambir atemtem. Ere Allah aosakamtiie atakam jipu. Me, era aotasimemomtamto ipit asan potanak aemaptem!” Emes atakam aesimen. 23Me abajamkai owerawa, ajamjateamporesen. “Me darmamon, Yesus tao otasimemomtamto?” Emes atakam aesimesen.

Juas aptam owe atakam

24Era oweam atakam ajamkoramesen. “Dare ara aememom owe, juas aptam ere, tanam?” Emes atakam aesimesen. 25Armat Ipitam atakam era owe akoromen. “Allah bajamkai amsam apok samaniin samaniin owe aomepmas owe, atakam daytinak era bambi owe asakamtamemas. Oweam atakam akoremas. ‘Era kapar owe, owe asan akot baemomem owe.’ Emes atakam aesimemas. 26Tararawa, emes apok. Me tarmamon juas aptam ipit, juas apok ipit tamen baememto. Me tarmamon kapar ipitam, karai baetam ipit tamen baememto. 27Juas aptam ipit ere, tanam? Era amos banda aemapa ipit ape? Era amos batoomattam ipit ape? Era amos banda aemapa ipit, ere owe juas aptam ipit. Me, tarmamon ere, Dere amos batoomattam ipit, ere Derare.

28Ajirisemaaru, tare takan aememaarum. 29Deritipitam Dere owe baomep ipit ataemomen. Emesare, Denom owe baomep owe, tara ataemommin. 30Emesare, Dere owe baomep Ipit aememtey bare, tare amos anama bwi Dere takan andetemarom. Tanom owe baomep fe baemap asan ten aemaptetertemakam, wanam Israel saman 12, atakam asakamtamtemakam.”

Petrus Yesus apatimto atakam

(Mat. 26:31-35; Mrk. 14:27-31; Yoh. 13:36-38)

31“Simon! Jane pajiey! Bii Kapar Ipit tare takes baempor jak aseserome. Owe amos apimi ofe afamdaemas tamen are. 32Dere ere, woatakam Allah ajanimey. Wore Dera bamesem bamompim-ombar. Wanam, wore bimin Dera aowaiomemtanim, wore wojoo owe jak fiak aemapomey.” Yesus emes atakam aesimen. 33Petrus arawa, “Tuhan! Dere woratin buji tame bomon baemap apaye, dambir batem apaye, ere akot.” Emes atakam aesimen. 34Yesus arawa, “Petrus! Atakamnak! Waa eam, wore atakam bare bamintep bonak akorestemarem, ‘Dere Yesus demsam apok,’ emes akorestemarem. Era ajomo ipit arawa, atakam asep akorestem.” Emes atakam aesimen.

Uang ese anama pak ese atakam

35Emesare. Yesus atakam era owe aokoromen. “Dere tara ambirimemomo, denom atakam tara asakamtamo. ‘Tare uang ese anama pak ese, sendalam, emes pak bataer bas,’ emes atakam aesimo. Tare era pak bataer apok aesosekem, tare asan pota aememekem apaye?” Emes atakam aesimen. Era owerawa, “Dare asan pota baemem apok.” Emes atakam aesimesen. 36Armat Ipit arawa, “Waa ere, era uang ese aptam owe era pak bataertas. Era pak ese aptam oweam era pak bataertas. Era jirao warim apok owe, abaju, jirao warim bauumamtaertas. 37Alkitabam, ‘Owe atakam akores, “Armat Ipit, Musa Basakamtam Atakam baoo ipit.” Emes atakam aesimes.’ Alkitab emes atakam akorem. Atakamnak! Era atakam, ere deatakam. Oweam era atakam jipu aemtemas. Era atakam jipu aemtas pak, ere setepnak.” Yesus emes atakam aesimen. 38Era owerawa, “Tuhan! Baporey! Jirao warim jamnuk ara emompom.” Emes atakam aesimesen. Armat Ipit arawa, “Emesare, are.” Emes atakam aesimen.

Yesus fami oup atakam Allah ajanime atakam

(Mat. 26:36-46; Mrk. 14:32-42)

39Emesare. Yesus era kota ajisen. Ajiserawa, fami juas Saitun aapetemeten. Bonak ere, era asan emes aesosa ajaien. Me abajamkai oweam fe asaramesen. 40Armat Ipit erapu ambareme, Are atakam era owe akoromen. “Atakam Allah ajanimaaray. Bii Kapar Ipit tare dosa baem batatapimtaa-ombar.” Emes atakam aesimen. 41Are era owe setep apokpee bonak ambaremen. Owe, eka bonak ambarekoromtiiemas tamen, ambaremen. Ararawa, jindi andaepuapen. Are Atakam Allah ajanimen. 42“Dot! Wore akot aportem, Dera bajurusum bas. Me, era akot apormin pak jipu baem bas. Era akot apormarem pak jipu taka aemey.” Emes atakam aesimen. 43Malaikat takaam andaeomen. Are Armat Ipit bipu ajisomen. Are jak fiak Armat Ipit atetamen. 44Armat Ipitam jak apoknak aemapen. Are atakam Allah fiaknak ajanimen. Me atinu, esee awar andaepitijimtiien. 45Emesare. Armat Ipit atakam Allah ajanimkoromen. Ararawa awasiemen. Are abajamkai owe aofasiomen. Are era owe, jak pota ise aemanses aporen. 46Atakamam era owe akoromen. “Tare apa isiim? Bawasitay! Atakam Allah ajanimaaray. Bii Kapar Ipit tare dosa baem batatapimtaa-ombar.” Emes atakam aesimen.

Yahudi owe Yesus ajipirtaeres atakam

(Mat. 26:47-56; Mrk. 14:43-50; Yoh. 18:3-11)

47Yesus atakam taomekoremape, owe tanane awarimjisesen. Era owe juas Yudas era owe bonak aemen. Are era bajamkai owe 12, wan ipit taka araren. Are Yesus ake bafapie setep ambaromen. 48Yesus ere, atakam armat ipit akoromen. “Yudas! Wore Asamot Anakot Ajaoreme Ipit, ajokoman owe baotasimemomtam, ake afapimareme?” Emes atakam aesimen. 49Me Yesus takan ajamememes owe, era owe aemtas pak apores, wanam atakam akoromesen. “Tuhan! Dare ara owe jirao warim bawasomit ape?” Emes atakam aesimesen. 50Me Yesus takan ajamememe ipit takarawa, Allah Tame pak baem ipit daytu akarai baetam ipit bo poman janemak asakamdaemen. 51Yesus ere, atakam akoromen. “Emes bas!” Emes atakam aesimen. Ararawa, era ipit jane ban akurumen. Are era janemak ajaoromtaeren. 52Me Allah Tame pak baem owe daytuam, Allah Tame banamek batai komandan oweam, duturu oweam, Yesus bataer, era asan aememesen. Yesusam atakam era owe akoromen. “Tare jirao warim anama wusup pak Dera bataer atoomdaemakam, ere wama tamenem? Tare ere, Dere pak tasa baetaa ipiti? 53Juiin afaafeaarir Dere Allah Tame tare takan aemapa ajaiom. Tare ere, Dera bajipirtaer apoknak aemankum. Waa ere, Allah tare ara aemtakam pak baem, asan akot tara atetamman. Waaam era jiiti fiak pak baemomem ipit, aapak baem bare arare.” Yesus emes atakam aesimen.

Petrus, Yesus apatime atakam

(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)

54Emesare. Era owe Yesus ajipirtaeresen. Are Armat Ipit atomasesen. Are Armat Ipit Allah Tame pak baem ipit daytu atame atoomjiiesen. Petrusam Yesus fe setep apok asaramen. 55Era owe era tamsan bupnak, jisimak ajakomtiiesen. Ararawa, takan andaepakiapesen. Petrusam era owe takan andaepakiapen. 56Emesare, karai baetam taot armat ipit jisimak dasman aemape aporen. Are armat ipit banamek asakisimerawa, atakam akoren. “Ara aemapa ipitam Yesus takan ajamememaarir ipit arare.” Emes atakam aesimen. 57Armat ipit ere, apatimen. “Ai! Dere era Ipit demsam apok.” Emes atakam aesimen. 58Bajateem apok, wan ipitam armat ipit aporen. “Wonom era owe ajoo ipit.” Emes atakam aesimen. Me Petrus ere, atakam akoromen. “Ai! Dera apok!” Emes atakam aesimen. 59Jam taka apaye aoemapes arawa, wan ipitam atakam fiak akoren. “Ara aemapa ipit, Yesus takan ajamememaarir ipit arare. Are Galilea tapirmi ipit arare.” Emes atakam aesimen. 60Me Petrus ere, atakam akoromen. “Era akoremarem atakam demsam apok.” Emes atakam aesimen. Me armat ipit atakam taojapekoremape, ajomo jipit atakam ametekoren. 61Tuhan arawa, bimin awaiomen. Are banamek Petrus aoromen. Me Petrus arawa, Tuhan bonak akore atakam, bimak binip ajanimtaeren. Era atakam ere, “Wore atakam bare bamintep bonak akorestemarem, ‘Dere Yesus demsam apok,’ emes atakam akorestemarem. Me ajomo ipit arawa, atakam asep akorestem.” Yesus emes atakam bonak akoren. 62Emesare, Petrus tasan ajisen. Are bate daytinak ambaten.

Owe Yesus wusup ates atakam

(Mat. 26:67-68; Mrk. 14:65)

63Me Yesus banamek ataiomes owerawa, Armat Ipit wote awotomesen. Are Armat Ipit wusup atesen. 64Are Armat Ipit banamek apurimomes, wanam ajateporesen. “Wusup tao teman? Dara oesimtamaro.” Emes atakam aesimesen. 65Are tame atakam daytu Armat Ipit atesen.

Yesus Yahudi Agama Atakam Basakamtii Owe bipu aememe atakam

(Mat. 26:59-66; Mrk. 14:55-64; Yoh. 18:19-24)

66Emesare. Jo apuamsen. Jo apuamserawa, Yahudi duturu oweam, Allah Tame pak baem owe daytuam, Allah atakam baememtam oweam, ajarisiapesen. Era owe ere, Yahudi Agama Atakam Basakamtii Oween. Owe Yesus era owe bipu ambaretoomesen. 67Era owerawa, atakam Armat Ipit akoromesen. “Wore Allah Aeremtaere Ipit ape, atakam baso akoretamaro.” Emes atakam aesimesen. Armat Ipit ere, “Dere atakam tara akoretamtey apaye, tare era atakam bamesem apok aemtemakam. 68Denom tara bajatepor apaye, tanom atep bajit apoknak aemtemakam. 69Me, waa bare ajiire, Asamot Anakot Ajaoreme Ipit, fiaknak Allah bo poman aemaptem.” Yesus emes atakam aesimen. 70Era owe takes arawa, “Wore Allah Andepe?” Emes atakam aesimesen. Armat Ipit arawa, “Tanom, Dere Allah Andep, atakam akoremakam, ere atakamnak.” Emes atakam aesimen. 71Era owerawa, “Emesare, dare ateman jane bojie bas. Dare Armat Ipit atakam jane damba ajimarom.” Emes atakam aesimensen.

Currently Selected:

LUKAS 22: LAIASC

Highlight

Copy