AEMAARIS PAK 9

Saulus ai bimak binip atetarame atakam

1Emesare. Saulusam jokoman atakam daytinak era Tuhan bajamkai owe akoroma ajiaaririn. Are era owe batatii atakam akorea ajiaaririn. Armat ipit arawa, Allah Tame pak baem ipit daytupu aesosen. 2Are surat kuasa atakam ajanimen. Are era surat kuasa, era kota Damsik Yahudi owe samayen tame takes kapar owe batetam aememen. Erarawa era asan, Saulus, Tuhan bajamkai oorey apaye, tapes apaye, aporto, armat ipit era owe bajipipirtaa aren. Are era owe banam bajikapom, wanam Yerusalem baesomas aren. Emes surat kuasa atakam ajanimen. 3Emesare, Saulus Damsik aesosen. Damsik setep ambaremerawa, wonamo oup sare daytinak ametefojimsaramdaemtiien. 4Emesare, armat ipit bap andaebuansen, wanam atakam jane ajien. “Saulus! Saulus! Wore apa jurusummanim?” Emes atakam jane ajien. 5Saulus arawa, “Wore tanam?” Emes atakam aesimen. Armat ipit arawa, “Dere Yesus! Dera ajurusummanim Ipit, Derare. 6Wore ere, bawasitey! Era kota aesosey. Owe, era aemtem pak, atakam wora akoretamtemanis.” Emes atakam aesimen. 7Saulus takan ajamjares oweam, atakamam jane ajiesen. Are owe bi bapor apoknaken. Erarawa are ajasipiemesen. Emesare are atakam apok aememesen. 8Emesare, Saulus awasiten. Abanamek awaramemen, me, are baemepor asan apoken. Owerawa, armat ipit era kota Damsik ban akimomasesen. 9Bare bamintep ere, armat ipit, baemepor asan apoken. Are amosam, bwiam, banda apoken.

10Emesare. Era Damsik, Yesus bajamkai ipit juas Ananias aemapen. Armat ipit pak taka bambi aporen. Tuhanam, atakam, armat ipit akoromen. “Ananias!” Emes atakam aesimen. Ananias arawa, “Tuhan! Dere apaia.” Emes atakam aesimen. 11Tuhan arawa, “Wore bawasitey! Era bokot juas Emtuu aesosey. Worarawa, Yudas tame aesosey. Era asan kota Tarsus ipit juas Saulus bajateporey. Armat ipit atakam Dera ajanimman. 12Are jipit taka juas Ananias bambi apora. Ananias ban armat ipit damo ten ataetiim. Are era banamek bawaramtam pak. Emes pak bambi apora.” Tuhan emes atakam aesimen. 13Ananias arawa, “Tuhan! Dere era ipit aema ajaie pak, atakam tanane jane aijia ajaio. Wan woowe era Yerusalem aemapes. Era ipit, jokoman pak era owe aoemen. Dere emes atakam jane ajio. 14Era Allah Tame pak baem kapar owe era ipit, ere Wora ambesemmanis owe, banam bajikitii, atakam asakamtiies.” Emes atakam aesimen. 15Tuhan ere, atakam Ananias aokoromen. “Emesare! Wore baesosey! Dere era ipit, doememo, era Yahudi apok samanam, raja oweam, Israel oweam, atakam bakoretam aeremtaero. 16Era ipit karai Dera aetamteman. Erarawa are ajirisemtem. Dere era pak armat ipit aporomtamtemin.” Emes atakam aesimen.

17Emesare, Ananias aesosen. Are era tame ajiie, wanam aban Saulus damo ten ataetiien. Are atakam akoromen. “Saulus! Wore dejoo ipit. Wore era bokotpu ara asan aemdaem, Tuhan Yesus arawa, wobipu ajateomen. Armat Ipitam dere ara asan aotaendaemman. Ere wobanamek bawaramemom are. Allah Jip wora baemomemkorom are.” Emes atakam aesimen. 18Emesare, enamopa tamen pak Saulus abanamek akorndaen. Abanamek arawa, sare aoememen. Saulusam awasite, wanam Ananias, armat ipit bwi akupimtaeren. 19Armat ipit arawa, amos ande wanam fiak aoememen.

Saulus, Damsik akoretame atakam

Emesare, armat ipit Damsik tapirmi Yesus bajamkai owe, bare bamintep takan ajamememen. 20Armat ipitam Yesus atakam era Yahudi owe samayen tame bomon akan akoretamen. “Yesus Allah Andep.” Emes atakam aesimen. 21Era atakam jane ajies owe takes jinim aeesen. Are ajateporesen. “Ara aemema ipit Yerusalem Yesus eemnak bemesemkorom owe ajurusume ipit aarane? Are, era owe banam bajikapom, wanam Allah Tame pak baem owe daytu abipu batuomas andae ipit aarane?” Emes atakam aesimesen. 22Saulus era akore atakam, fiak aemekoretaaen. Are atakam basonak, era Damsik aemapes Yahudi owe, akoromen. “Yesus, ere Allah Aeremtaere Ipit arare.” Emes atakam aesimen. Era owerawa, atep baemejit asan apoken.

23Ise arkerawa, era Yahudi owe, Saulus batatii, atakam asakamtiiesen. 24Saulus ere, era asakamtiies atakam jane ajien. Era owe jokam, eamam, era kota fami eka tiri jimsap takes, banamek ataiapesen. Are Saulus batatii aemesen. 25Eam ere, Saulus abajamkai owe, armat ipit ataeresen. Are armat ipit eka tiri jafa ataejisimes, wanam tem ese bomon bap ataendaemesen.

Saulus jaki Yerusalem ajite atakam

26Emesare, Saulus Yerusalem aesosen. Are Yesus bajamkai owe ajamkaiemporen. Era owe ere, a ombare aememesen. Are Saulus, Yesus bajamkai pir bae emes jiraoemesen. 27Barnabas ere, armat ipit ataere, wanam era Yesus atakam bakoretam bamirimemom owe bipu atoomtinen. Are atakam era owe akoromen. “Saulus era bokotpu ajare, are Tuhan bi apore. Tuhanam atakam armat ipit akoromen. Armat ipitam era kota Damsik aememe, are Yesus atakam basonak akoretame.” Barnabas emes atakam aesimen. 28Emesare. Saulus era owe Yerusalem asan takes takan aemjaresen. Are Tuhan atakam basonak akoretamen. 29Are era Yunani atakam Yahudi owe, atakam ajamkoramesen. Era owe ere Saulus batatii aemesen. 30Yesus bajamkai owe emes atakamam jane ajiesen. Emes atakam jane ajies arawa, are Saulus kota Kaisarea aesomases, wanam armat ipit kota Tarsus ambirimemomesen.

31Emesare, Yudea tapirmiam, Galilea tapirmiam, Samaria tapirmiam, Yesus basitim bajarisiap owe takes bojirisem apok aemapesen. Are Yesus fiak ajamkaiesen. Are Tuhan ombare aemapesen. Allah Jipam jak fiak era owe atetamen. Erarawa Yesus bamesem owe, tanane betema betema ajisen.

Petrus jaki Lida anama Yope ajite atakam

32Emesare. Petrus samaniin samaniin atawejaremen. Ajoferawa, are Lida tapirmi turunak owe bipu aesosen. 33Era asan, armat ipit owe juas Eneas bimnuk aemamtaeren. Era ipit, kam ipitin. Tahun poman ban bamintep are era tapini ten bawasit asan apoken. 34Emesare, Petrus atakam ara ipit akoromen. “Eneas! Yesus Kristus wora ajaoromtaerman. Bawasitey! Wotapini bataakenemapomey.” Emes atakam aesimen. Emesare. Armat ipit ametewasiten. 35Era kota Lida aemapes owe takesam, Saron tapirmi aemapes owe takesam, armat ipit aporesen. Are bimin awaiemes, wanam Tuhan ajamkaiesen.

36Emesare. Kota Yope, Tuhan bajamkai taot juas Tabita aemapen. (Yunani atakam, ajuas “Dorkas”. Era “Dorkas” juas daatakam jow bauumtaer, “rusa”.) Era taot aemaarir pak akotnaken. Are pak apok owe, pak atetama ajaien. 37Era bare, era taot damo ajaue, wanam dambir aemen. Owerawa, era dambir taot bwi ambumtiiesen. Bwi ambumtiies arawa, oup kamar atemetetaetiiesen. 38Yesus bajamkai owe ere, “Petrus, Lida tapirmi aemeta,” emes atakam jane ajiesen. Are Lida ase apok apores, wanam jipit amnuk, Petrus bajate, ambirimesen. “Fef andaey, Petrus emes atakam aesimami.” Emes atakam aesimesen. 39Emesare, Petrus awasite, wanam era owe takan ajamesosen. Era asan ambaremes arawa, era owe, armat ipit, oup kamar atoomtemetesen. Era tano tapesam, afofojiomesen. Are era Dorkas, jatiaptam aemapaarir, era akekemaarir bajuam, pakaianam, takes aporomtamesen. 40Petrus ere, era owe takes, tasan bawarimjis, atakam asakamtamen. Ararawa, jindi andaepuape, wanam atakam Allah ajanimen. Are era dambir taot bimin aowaiome, wanam atakam akoromen. “Tabita! Bawasitey!” Emes atakam aesimen. Era taot arawa, banamek awaren. Are Petrus bi aporerawa awasiapen. 41Emesare, Petrus era taot ban ataere, wanam awasimemen. Ararawa, era turunak oweam, era tano tapesam, ajaten. Are era taot, jati, era owe aporomtamteteren. 42Era kota Yope owe takesam emes atakam jane ajiesen. Oweam tanane Tuhan ambesemesen. 43Emesare, Petrus bare arke era Yope aemapen. Are binatang pitini karai ipit juas Simon atame aemapen.

Currently Selected:

AEMAARIS PAK 9: LAIASC

Highlight

Copy