AEMAARIS PAK 8

Saulus, Yesus basitim bajarisiap owe ajurusume atakam

1Saulusam era owe Stefanus batatii akot aporen. Era baream, owe Yerusalem Yesus basitim bajarisiap owe, daytinak ajurusumesen. Era Yesus eemnak bamesemkorom owe takes arawa, Yudea tapirmiam, Samaria tapirmiam, apatosesen. Era Yesus atakam bakoretam bamirimemom owe ere, bapatos apoken. 2Tuhan bajamkai fiak oweam, Stefanus awuapomesen. Are Stefanus jier bate daytu ambatesen.

3Saulusam Yesus basitim bajarisiap owe, daytinak ajurusumen. Are tameiin tameiin ajiia ajaien. Wanam oorey oweam, tapesam, ajimomjisa ajaien. Are era owe buji tame ataejiima ajaien.

Filipus anama Petrus, Allah Akot Atakam Samaria tapirmi owe akoretamemis atakam

4Era apatoses owe ere, ara Allah Akot Atakam, era asan takes atirminomesen. 5Filipusam Samaria tapirmi kota taka aesosen. Are owe Kristus atakam akoretamen. 6Era owe tanane, Filipus akoretame atakam, jane taka ajiesen. Are era aeme jinim bae pak aporesen. Ararawa, aatakam jane ajiekoromesen. 7Era asan owe tanane, jak bomon, biin. Era biiam daytu afakea ajies, wanam era owe jak bomon awarimjisteteresen. Kam owe tananeam, jindi akamuapes owe tananeam, ajaoremesen. 8Emesare, era kota owe jak akotnak aememesen.

9Bonak ere, owe juas Simon era kota aemapaaririn. Are bii aptam ipitin. Era Samaria owe, Simon aemaarir pak aporaaris, wanam jinim daytu aeaarisin. Armat ipitam atakam akorea ajaien. “Dere juas aptam ipit.” Emes atakam aesimen. 10Era kota ere, era daytu owe takesam, era bambi owe takesam, armat ipit era atakam jane ajiekoromesen. Era oweam, “Era Allah juas fiak Daytu Ipit era tapirmi andae. Are Simon are.” Emes atakam aesimesen. 11Tarainak ere, era ipit, era bii aptam jinim bae pak era owe aporomtamaaririn. Emesare, oweam jinim daytu aeaarisin. Are armat ipit atakam jane taka ajiaarisin. 12Filipus ere, Allah owe aobaomep Akot Atakamam, Yesus Kristus Akot Atakamam, era owe akoretamen. Owerawa, Yesus Kristus ambesemes ooreyam. Tapesam, bwi akupimtaerteteresen. 13Me Simonam Yesus Kristus eemnak ambesemkoromen. Owe ere, armat ipit bwi akupimtaeresen. Armat ipit bwi akupimtaeres, are Filipus ajamesosa ajaien. Are Filipus era jinim bae pak aemaarir aporaarir, are jinim daytinak aeaarir. 14Emesare. Samaria owe, Allah atakam ji aeesen. Yerusalem aemapes Yesus atakam bakoretam bamirimemom owe, emes atakam jane ajies, Petrus anama Yohanes era owepu ataejirimesen. 15Petrus anama Yohanes era asan ambarememis, Allah Jip era owe batetam atakam Allah ajanimemisen. 16Bonak ere, owe era owe bwi akupimtaeres, are Tuhan Yesus juas taka ajiemesen. Erarawa, Allah Jip era owe jak bomon bajiapteter apoken. 17Emesare, Petrus anama Yohanes, ban era owe damo ten ataetiiemisen. Ataetiiemis arawa, Allah Jip era owe jak bomon ajiiapteteresen.

18Emesare, ara Yesus atakam bakoretam bamirimemom owe, ban era owe damo ten ataetiies arawa, Allah, aJip era owe atetamen. Simon emes aporerawa, are uang Petrus anama Yohanes, batetam aememen. 19Armat ipitam atakam akoromen. “Tare era fiak pak dera tetamani. Erarawa, dere ban, owe damo ten ataetiitey, Allah Jip era owe jak bomon ajiiaptem.” Emes atakam aesimen. 20Petrus arawa, atakam era ipit akoromen. “Wonom bimak binip atetarammarem, ‘Dere Allah atetamtaro pak, uang bajit.’ Emes atakam aesimmarem. Emesare wonom, wouangam, era neraka ajiiey. 21Wonom Allah atakam ji bae apok. Emesare Allah karai baetam, ere wom apok. 22Era jokoman bimak binip ajanimomem pak bamakemey. Wore atakam Tuhan ajanimey. Armat Ipit era bimak binip atetarammarem dosa bimak binip ajanimemtamteman apeno. 23Wore itim daytinak akemmarem. Wore dosa atakam ji aekorommarem. Dere emes apormin.” Petrus emes atakam aesimen. 24Me Simon ere, atakam aokoromen. “Tare atakam Tuhan bajanimtamani. Era atakam akoremakam pak dera baem-ombar.” Emes atakam aesimen. 25Emesare, era Yesus atakam bakoretam bamirimemom ipit amnuk Tuhan atakam ateman atamemisen. Are Tuhan atakam era owe akoretamemisen. Akoretamkoromemis arawa, are Yerusalem aoesosemisen. Era waut ere, are Yesus Akot Atakam, Samaria tapirmi saman tanane akoretamemisen.

Filipus, Etiopia ipit bwi akupimtaere atakam

26Emesare. Tuhan malaikat, atakam Filipus akoromen. “Bawasitey! Bokot bin Yerusalem aemanse. Era bokot taka wan bokot bin Gasa aemanse. Wore era bokot aesosey. Era bokot, tame apok.” Emes atakam aesimen. 27Emesare, Filipus awasite wanam aesosen. Era waut ere, are Etiopia tapirmi pemerintah ipit daytu bimnuk aemamtaeren. Era ipit Etiopia ratu taot juas Kandake aakot pak takes banamek bataitam ipitin. Bonak ere, era ipit Yerusalem Allah basitim aesosen. 28Era bare, armat ipit, atapirmi bofasie, kereta bomon aemapen. Are, Allah Atakam Bakoretam Ipit juas Yesaya aeapome buku aemompen. 29Allah Jip arawa, atakam Filipus aokoromen. “Wore era kereta setepa. Wonom era kereta takan ajamjarey.” Emes atakam aesimen. 30Emesare, Filipus era keretapu akukosen. Are era pemerintah ipit, Yesaya aeapome buku baca aeme, jane ajien. Filipus arawa, ajateporen. “Baca aemmarem atakam, wore, womsame?” Emes atakam aesimen. 31Era pemerintah ipit arawa, “Owe dera baememtam apok aemtanis, dere ere, demsam baemeemem asan apok. Wore ere, de! Ara kereta ajamkunaoapan.” Emes atakam aesimen. 32Era baca aemape buku emes atakam are:

“Owe Armat Ipit atomases. Are owe atatiitas domba jii tamen atomases. Owe domba jii fini basesakamosom aemtas, era domba jii atakam apok aememas. Armat Ipitam emes tamen atakam apok aememe. Are atakam apoknak.

33Owe Armat Ipit, pota ipit tamen aemes. Era jaos atakam basakamtii oweam, Armat Ipit atakam asakamtiies. Me, are pote atakam asakamtiies.

Oweam Armat Ipit atatiies. Emesare, Armat Ipit ajaniemes owe, jokoman daytinak aemomes. Emesare oweam era jokoman pak, atakam baemekorekorom asan apok.”

Emes atakam baca aemompen.

34Era pemerintah ipit arawa, atakam Filipus aokoromen. “Atakam bakoretaman. Allah atakam bakoretam ipit, taipit atakamum? Amba atakam ape? Wan ipit atakame?” Emes atakam aesimen. 35Filipus arawa, era baca aeme buku, atakam akoretamen. Are Yesus Akot Atakam, armat ipit akoretamen. 36Filipusam, era pemerintah ipitam, era kereta bomon aesosemisen. Are bwi setep ataejiesen. Era pemerintah ipit arawa, atakam akoromen. “Bwi aro! Dere wore bwi dera bakupimtaer akot. Erarawa karao dera bajie pak ape?” Emes atakam aesimen. 37Filipus arawa, atakam akoromen. “Wore ere, eemnak bamesemkorom ape, emesare wore bwi bakupimtaer aememem.” Emes atakam aesimen. Era pemerintah ipit arawa, “Yesus Kristus, Allah Andep. Dere Armat Ipit eemnak ambesemkorommin.” Emes atakam aesimen. 38Era pemerintah ipit arawa, kereta baseap atakam asakamtamen. Emesare, Filipusam, armat ipitam era bwi andaesemisen. Filipus arawa era ipit bwi akupimtaeren. 39Are era bwi asokunaoemisen. Asokunaoemis arawa, Tuhan Jip Filipus aesomasen. Era pemerintah ipitam, Filipus bi bapor apoken. Armat ipit ere, jak akotnak apa aesosen. 40Erarawa, owe, Filipus bi, kota Asdod aporesen. Armat ipit arawa, era samaniin samaniin takes ajaremen. Are ara Yesus Akot Atakam akoretamen. Emesare are era atakam kota juas Kaisarea ajiire akoretamen.

Currently Selected:

AEMAARIS PAK 8: LAIASC

Highlight

Copy