AEMAARIS PAK 7

Stefanus akoretame atakam

1Allah Tame pak baem ipit dayturawa, Stefanus ajateporen. “Era akoremas atakam, atakamnak ape?” Emes atakam aesimen. 2Stefanus arawa, atep ajiten. “Duturua, biitia, aykuna. Jane pajiay! Era darerokor juas Abraham, Mesopotamia tapirmi aemape, era akotipitnak Allah, armat ipitpu ambaremen. Abraham, Haran tapirmi jiisi batuos apoken. 3Allah, Abraham atakamam akoromen. ‘Wore, wojoo oweam, wotapirmiam, beken ajiey. Wonom era aporomtamtey tapirmi aesosey.’ Emes atakam aesimen. 4Armat ipit arawa, era Kasdim owe tapirmi beken ajie, wanam Haran tapirmi aemapen. Abraham aritipitam dambir aemen. Dambir aemerawa, Allah, Abraham ara aemapmakam tapirmi, jiisi atuumosomen. 5Era bare ere, Allah era tapirmi Abraham batetam apoknaken. Are tapirmi kope tamenam batetam apoken. Emesare, Abraham jii apoken. Allah ere, era ataaji aeen. Era pak ere, Abrahamam, arurupisam aapaken. 6Allaham atakam armat ipit aokoromen. ‘Wururupis jii owe tapirmi aemaptemas. Era jii owe, wururupis karai baetam, atakam basakamtam tanane asakamtamtemas. Are era wururupis, tahun 400 ajurusumaartemas. 7Dere ere, wururupis karai baetam atakam basakamtam tanane asakamtamtas saman, bajurusum, atakam asakamtiitemin. Asep arawa, era wururupis era tapirmi beken ajiostemas. Are era asan Dera asitimtemanis.’ Allah emes atakam aesimen. 8Allaham tamane pitini basakamosom atakam Abraham ataetiitamen. Era tamane pitini basakamosom ere, ‘Dare Allah ataaji aeetamaro atakam, ji aetemarom,’ Emes baporomtam are. Emesare, Abrahamam Ishak afimen. Ishak umur bare poman ban bamintep aemanse, Abraham era jii atamane pitini asakamosomen. Ishakam Yakub afimen. Yakub arawa, dasaman jii 12 afimen. Ere darfaisomar are.

9Era darfaisomar ere, Yusuf bet asisimomesen. Erarawa are armat ipit wan owe saman atetames, wanam uang ajititesen. Era owe saman arawa, Yusuf, Mesir tapirmi aesomasesen. Allah ere, armat ipit takan aememen. 10Allaham armat ipit era ajiriseme pak takes, asurumtaeren. Wanam Yusuf, Mesir raja ipit juas Firaun bipu aememe, Allah, aememe akotam, bimak binip basoam, Yusuf atetamen. Firaun arawa, Yusuf, Mesir tapirmi owe takesam, era raja tame pak takesam, emes karai bae ipit ataemomen. 11Emesare. Era barerawa, Mesir tapirmi owe takesam, Kanaan tapirmi owe takesam, banda pak janderesen. Owe tanane ajirisemesen. Darfaisam amos apok aemapesen. 12Yakub arawa, atakam jane ajien. ‘Mesir tapirmi banda pak asinta.’ Emes atakam jane ajien. Jane ajierawa, armat ipit darfais era asan ambirimemen. Era mesir tapirmi bonaknak aesoses aren. 13Era tapirmi aoesoses arawa, Yusuf atakam arepotaisam, areotam akoromen. ‘Dere Yusuf.’ Emes atakam aesimen. Erarawa, Firaun, Yusuf asaman, atakam jane ajien. 14Emesare, Yusuf, atakam era aritipit ambirimemen. ‘Dot! Wonom, dajoo owe takesam, ara asan ajinaoey.’ Emes atakam aesimen. Era owe, 75en. 15Emesare, Yakub, Mesir tapirmi aesosen. Era asan armat ipitam, darfaisam, dambir aemesen. 16Owerawa, era dambir owe, Sikem tapirmi aesomases, wanam era asan awuapomesen. Bonak ere, Abraham, awuapomes asan, Hemor aoorey jii, uang ajititen. 17Emesare, Allah, era tapirmi, Abraham awurpis batetam ataaji fiaknak aeen. Era tapirmi atetamto bare, ere setep aemansen. Era darfaisam, owe samane daytu, Mesir tapirmi betema ajiesen. 18Mesir tapirmi ai raja ipit asiemen. Era raja ipit Yusuf amsam apoken. 19Era raja, dasaman owe ate aeomen. Are era darfais ajurusumen. Are era darfais, tapinto jii, tasan bajisitaatii atakam asakamtamen. Era jii dambir baem aren. 20Emesare, era bare, Musa ajisamsen. Allaham era jii akot aporen. Pir bamintep, aritapes era jii atame bomon ajuumesen. 21Ararawa, Musa, basonak asan ajitaapomesen. Firaun arerep ere, era jii ataete, wanam atiinak tamen ajuumen. 22Oweam, Mesir owe aatakamam, atastu pakam, Musa aememtamesen. Musarawa, atakam fiak ipitam, karai fiak ipitam, aememen.

23Are umur tahun 40 aememe, armat ipit ajoo owe bi bapor, emes bimak binip atetaramen. Ajoo owe Israel oween. 24Emesare. Era bare, Mesir ipit, Israel ipit ajurusumen. Musa emes aporerawa, are Israel ipit akot aemomen. Are biti ajien. Emesare, are Mesir ipit atatiien. 25Musa abimak binip ere, ‘Allah dere dejoo owe datapirmi boesos bajaromat ipit ataemen. Dejoo oweam emes pak amsam.’ Emes bimak binip atetaramen. Me, ajoo owe emes amsam apoken. 26Ajoferawa, armat ipit ajoo ipit amnuk owentakam ajamomemis aporen. Musarawa, era ipit amnuk owentakam bakari ataane aweomen. Are atakam akoromen. ‘Tiparaise! Tare samane takan. Tare ere, apa jamjursumammankum?’ Emes atakam aesimen. 27Era ajoo ipit ajurusume ipit ere, Musa awotapememen. ‘Wore dakapar ipitam, daatakam basakamtam ipitam, tao taemen? 28To ere, wore Mesir ipit atatiiem. Wore dera batatii aemanim apaye?’ Emes atakam aesimen. 29Musa emes atakam jane ajierawa, are ombare aesosen. Ararawa, Midian tapirmi, wan saman ipit aemapen. Era asan are oorey jii jamnuk afimen.

30Armat ipit era asan tahun 40 aemape, wanam are fa aptam wus kari, jis jee aptam aporen. Malaikat takaam era jis jee bomon, Musa bipu aememen. Era fami juas Sinai setep, tame apok asanen. 31Musa era malaikat aporerawa, jinim daytinak aeen. Are setep ambareme, wanam banamek fiak apeomen. Are Tuhan atakam jane ajien. 32‘Dere worfais aAllah. Dere Abrahamam, Ishakam, Yakubam, aAllah.’ Emes atakam aesimen. Emesare, Musa ombare damo ditamen andien. Erarawa era asan bopor apoken. 33Tuhan arawa, atakam Musa aokoromen. ‘Era aememmarem asan, karao asan. Emesare bai sendal basumtiiey. 34Dere desaman, Mesir tapirmi ajirisemaaris aporaaru. Derarawa ituwan aeaaris jane ajiaaru. Derarawa, ara bajortaer andae. Wore, de! Dere wore Mesir tapirmi ambirimemomtemin.’ Tuhan emes atakam aesimen.

35Bonak ere, era Israel owe, ara Musa awotapemes, wanam atakam akores, ‘Wore kapar ipitam, daatakam basakamtam ipitam, tao taemen?’ Emes atakam aesimesen. Allah ere, era ipit ara owe akapar ipitam, abajortaer ipitam, ataemomen. Emesare, Allah, malaikat era atakam Musa bakoretam, atakam asakamtamen. Are ara Musa era fa aptam wus kari bomon apore malaikat aren. 36Emesare, Musa era owe Mesir tapirmi beken bajios, bonak ajareomasen. Are jinim bae pak era Mesir tapirmiam, era daytu itimbup juas Laut Meraham, aemeemen. Are era jinim bae pak, tame apok asan tahun 40 aemeemaaririn. 37Me Musaam atakam era Israel owe aokoromen. ‘Allah, ere tajoo ipit taka, aatakam bakoretam ipit, de tamen ataemomtem.’ Emes atakam aesimen. 38Ara Musa, era tame apok asan ajarisies owe, takan aemomen. Emesare, are darfais takan aemomen. Are era malaikat era fami juas Sinai oup takan aemomen. Era malaikat arawa, Allah atakam Musa akoretamen. Emesare, Allaham jiine atakam Musa ataetiitamen. Era atakam daatakamen. 39Darfais ere, armat ipit aatakam ji bae potan. Are Musa awotapemesen. Are Mesir tapirmi bofasi akoten. 40Are atakam Harun akoromesen. ‘Wore juein owe eto bamintep pakenemapomtamaro. Era eto juein owe fiak pak bamintep dare bonak bajaromattaroas. Era owe juas Musa bonak ajaromattemaro. Dararawa, Mesir tapirmi are takan beken ajiosom. Era ipit ere, wama pak eme? Dare damsam apok.’ Emes atakam aesimesen. 41Emesare, era bare, sapi jii eto akenemapomesen. Ararawa, pak era eto bipu ataetiitamesen. Are aban akenemapomes pak apores, wanam tere aeomes, baporesitim pak aemesen. 42Allah ere, era owe beken ajiosen. Are, era owe wonamo oup baet takes basitim, beken ajiosen. Allah atakam bakoretam owe aeapomes buku atakam jipu. Era buku atakamam:

Aemapakam Israel owee! Era tame apok asan tahun 40 aemapaarukum, tare atatiia ajimakam binatang Dera batetam ape?

43Apok. Tare era Molok pitini tame, atomasa ajiaarukum. Tanom tajuein ipit juas Refan abaet eto atomasa ajiaarukum. Tare era eto akenemapomekem, wanam era pak ambesemekem.

Emesare, Dere tare kota Babel era poman tapirmi, jiisi atuumosomtemin.

Era buku emes atakam are.

44Emesare, darfais era owe apok asan aemapaaris, are pitini tame taka aemomesen. Era pitini tame, ‘Allah ara asan aapeta,’ emes baporomtam pak aren. Allaham era tame baeapom atakam Musa aeapomesen. Era owerawa, era tame, Musa apore pak tamen awarnak aporomtamkoromen. 45Emesare, darfais era pitini tame atomasesen. Japen arawa, Allaham ara samaniin samaniin aombirimosomen. Wanam darfais, ere Yusakajie, ara tapirmi takan ataetesen. Era pitini tame, Daut ajiteme bare ajiire, ara tapirmi aemansaaaririn. 46Dautam akot pak aemen. Emesare Allah, armat ipit, asan akot atetamen. Daut arawa, Allah tamenak baeapomtam, atakam Allah ajanimen. Allah, ere Yakub aAllah. 47Me, Solomo Allah Tame aeapomtamen.

48Era oupnak Allah ere, asamot aeapomes tame bomon baemap apok. Emesare, Allah atakam bakoretam ipit atakam akoren:

49‘Tuhan atakam akore. “Ara wonamo oup, deraja fe baemap asan. Era tapirmirawa, debai bataapom asan.

Tare ere, wama tame eapomtamankum? Wanam, dekais banda asan, ete asanarom?

50Ara pak takes, dokenemapomo.” Tuhan emes atakam aesimen.’

Allah atakam bakoretam ipit emes atakam aesimen.

51Tare ere, jane apok owe aemapakam. Tajakam, tajaneam, Allah bajamkai amsam apok owe tarare. Tare ere tarfais owe awar. Tare Allah Jip awotapemmakam. 52Tarfais, Allah atakam bakoretam owe takes ajurusumes. Wan owe atakam akoretames, ‘Era Turunak Ipit andaetem.’ Emes atakam aesimes. Tarfais ere, era owe atatiies. Tanom era Turunak Ipit jokoman owe aotasimemomtamekem. Tanom era Ipit atatiiekem. 53Allah abasakamtam atakam malaikat owe ataetiitamen. Malaikat owerawa era atakam Musa aesimtamesen. Me, tare era basakamtam atakam ji bae apoknak aemmakam.” Stefanus emes atakam aesimen.

Owe eka Stefanus damo asampirimes atakam

54Emesare. Era atakam basakamtii owe, emes atakam jane ajies, are damtan daytinak aemesen. Are Stefanus bipu sisi akekemamtaeresen. 55Allah Jip ere, Stefanus aemomemkoromen. Stefanusam era wonamo oup, banamek fiak apeomen. Are Allah akotipitnak pak aporen. Are Yesus, Allah bo poman aememe, aporen. 56Armat Ipitam atakam akoren. “Baporay! Dere Surga oup apaimmar apormin. Dere era Asamot Anakot Ajaoreme Ipit, Allah bo poman aememe apormin.” Emes atakam aesimen. 57Era owerawa, jokoman atakam afaketaaesen. Are jane apurimomepteteresen. Are Stefanus awasiomites afojomesen. 58Are armat ipit era kota ajimomjises, wanam eka armat ipit asampirimesen. Era pak apores owerawa, apakaian, ai ipit juas Saulus banamek bataitam, abaipu ataetiiesen. 59Emesare, era owe Stefanus eka basampirimini aemes, Stefanus atakam Tuhan ajanimen. “Tuhan Yesus! Deanakot ipit bataerey!” Emes atakam aesimen. 60Ararawa, jindi andaepuapen. Atakamam afaketaeren. “Tuhan! Wore ara aememares owe adosa, bimak binip bajanimomem bas.” Armat ipit emes atakam afaketaererawa, are dambir aemen.

Currently Selected:

AEMAARIS PAK 7: LAIASC

Highlight

Copy