AEMAARIS PAK 10

Petrus anama Kornelius atakam

1Emesare. Kota Kaisarea ere, owe juas Kornelius aemapen. Armat ipit tentara kapar ipitin. Era tentara owe, juas “Italia tentara Oween”. 2Armat ipit agama bajamkai fiak ipitin. Are, atame owe takesam, Allah asitimaarisin. Are uang daytu era Yahudi pak apok owe, atetamaaririn. Are atakam Allah ajanimaaririn. 3Emesare, era bare, jam 3 poronak, armat ipit, Allah malaikat bambi aporen. Era malaikat abipu basonak ajateome aporen. Era malaikatam atakam akoromen. “Kornelius!” Emes atakam aesimen. 4Armat ipit arawa, era malaikat banamek aorome wanam, “Tuhan wore apa pakem?” Emes atakam aesimen. Era malaikat arawa, “Allah era atakam ajanimarem pak jane ajim. Are uang era pak apok owe atetama ajiaaremarem aporem. Are wobimak binip ajanimome. 5Emesare wonom, owe kota Yope pambirimemey. Owe juas Simon bajatey. Are wan juas Petrus. 6Armat ipit binatang pitini karai ipit juas Simon atame aapeta. Era tame jupima emanse.” Malaikat emes atakam aesimen. 7Emesare. Kornelius atakam aesimtame malaikat, aesosen. Aesoserawa, Kornelius, akarai baetam ipit amnukam, tentara ipit takaam, ajaten. Era tentara ipit agama bajamkai fiak ipitin. Are Kornelius karai baetamaar ipitin. 8Emesare, Kornelius era atakam takes era owe aesimtamen. Aoesimtamerawa, are era owe Yope ambirimemen.

9Ajoferawa, era owe era waut ajaresen. Are Yope setep asisiomes, Petrusam era tame oup kais banda asan, atakam Allah bajanim atemetemen. Ere jok, jam 12 aren. 10Emesare. Petrus amostoen. Are amos banda akoten. Wan owe amos bajaatam aememes, armat ipit pak bambi aporen. 11Are wonamo oup ambuape aporen. Wanam to pak bap andae aporen. Era pak, daytinak pitini tamen. Are jap paaro eak taka apok andaeemtepen. 12Bai eak taka apok binatang kupisam, tapirmi afafasiejarmas pak kupisam, wonamo oup apipimas sakao kupisam, era to pak bomon taka aren. 13Petrusam atakam jane ajien. “Bawasitey! Era pak batatiiey. Era dasa bandey.” Emes atakam jane ajien. 14Petrus arawa, “Tuhan! Emes bas! Dere ere karao pak apaye, pano pak apaye, banda demsam apok.” Emes atakam aesimen. 15Emesare, Petrus era atakam jane aojien. “Wore Allah banda pak akenemapome pak, karao pak bajie bas.” Emes atakam jane ajien. 16Era pak bare bamintep aeme, wanam era to pak wonamo oup fef aotemeten.

17Emesare. Petrus era bambi apore pak bimak binip arke atetaramen. “Ere wama pakem?” Emes bimak binip atetaramen. Emes bimak binip taotetaramape, Kornelius ambirimeme owe era tame aporesen. Ararawa, era tame tiri jimsappu aememesen. Bonak ere, are owe ajateporesen. “Simon tame etepum?” Emes atakam aesimesen. 18Emesare, era owe era tame tiri jimsappu aememes, are atakam daytu akoresen. “Ara tame, owe juas Simon Petrus aapetar ape?” Emes atakam aesimesen. 19Petrus ere, era bambi apore pak bimak binip taotetaramape, Allah Jip, atakam armat ipit aokoromen. “Baporey! Owe bamintep wora dimarmanis. 20Wore bawasitey! Bandae! Era owe ajamkaiey. Wonom ombare bas. Dere era owe dobirimemomo.” Allah Jip emes atakam aesimtamen. 21Emesare, Petrus era owe bipu bap andaeapen. Atakamam akoromen. “Tanom baporani. Dere era andimarmankum ipit, derare. Are asan apa daemakam, apamarem?” Emes atakam aesimen. 22Era owerawa, atakam akoromesen. “Kornelius tentara kapar ipit. Are turu ipit. Are Allah ombare ipit. Era Yahudi saman owe takes era ipit asitimes. Turunak malaikatam atakam armat ipit akoromen. ‘Wore Petrus bajatey. Are bajinaoto. Wanam wotame baemapto. Worarawa, aatakam jane pajiey.’ Malaikat emes atakam aesimen.” Emes atakam aesimesen. 23Emesare, Petrus, era owe, era tame atoomjiien.

Ajoferawa Peterus awasiten. Are era owe ajamesosen. Yope wan Yesus bajamkai oweam ajamesosesen. 24Petrusam, era oweam, era waut ise taka aememes, wanam kota Kaisarea ambaremesen. Korneliusam, era owe banamek apeemen. Bonak ere, Kornelius aokaaoweam, ajoo oweam, ajate ajaresisimen. 25Petrus era tame bajii aememe, Kornelius, armat ipit bimnuk aemamtaeren. Kornelius arawa, Petrus baipu jindi andaepuapen. Are Petrus asitimen. 26Petrus ere, Kornelius awasimemen. “Bawasitey! Dere asamot ipit!” Petrus emes atakam aesimen. 27Are Kornelius atakam akorome, wanam era tame ajiien. Are era ajarisiapes owe tanane aporen. 28Are atakam era owe akoromen. “Tanom tamsam. Yahudi saman owe, Yahudi apok saman owe, bajamkaiap karao. Are era Yahudi apok saman owe atame jaki karao. Ere Yahudi owe agama pak tai jipu. Allah ere, dere owe, karaoam, potaam, bajie bas, emes aporomtamen. 29Emesare, tare ajateenkum, dere bimak binip arke apok aemo. Dere ere, tara bajatepora. Tare apa jateenkum?” Petrus emes atakam aesimen.

30Kornelius arawa, “Tojoon ere, jam 3 joknak, dere detame bomon, atakam Allah ajanimo. Ere emes tamen jam are. Jipit taka pakaian sare aptamam debipu ameteememen. 31Armat ipitam atakam akoromen. ‘Kornelius! Allah era atakam ajanimaaremarem pak jane ajim. Are uang era pak apok owe atetamaaremarem, emes bimak binip atoommem. 32Wore owe Yope pambirimemey. Wonom owe juas Simon Petrus bajatey. Armat ipit binatang pitini karai ipit juas Simon atame emapa. Era tame jupima emanse.’ Era ipit emes atakam akoromen. 33Derarawa, wore akan ajateo. Wore jak akot aememem. Emesare wore ara asan ajinaoem. Emesare, dare takes, Tuhan atakam wora asakamtamen atakam takes jane bajie, Allah bipu aemapom.” Kornelius emes atakam aesimen.

Petrus akoretame atakam

34Emesare. Petrus atakam era owe akoromen. “Allaham, ‘emes owe akot, emes owe pota,’ bajie apok. Are takes afaimum. Dere emes apormin. 35Allaham era samaniin samaniin aombare oweam, akot pak baem oweam, akot aporem. 36Allaham owe aatakam era Israel owe bakoretam ambirimemome. Allah Akot Atakam, emes are: ‘Yesus Kristus aeme pak, Allaham, asamot oweam, ajak ji baem pak. Yesus Kristus, ere owe takes aTuhan.’ Are owe emes atakam era Israel bakoretam ambirimemomen. Tanom era atakam tamsam. 37Bonak ere, Yohanes owe bwi bakupimtaer atakam akoretame. Asep ere, Yesus, daytinak pak, era Galilea tapirmi aeme. Wanam era pak wan Yudea tapirmi takes aeme. Tanom emes pak tamsam. 38Emesare, Yesus Nasaret Ipit. Allaham, aJip, Armat Ipit atetame. Are fiak pak Armat Ipit atetame. Are Armat Ipit takan aemaaririn. Erarawa Armat Ipitam samaniin samaniin aesosaarir. Are akot pak aemaarir. Emesare, Bii Kapar Ipit wan owe aemoma ajaie. Yesus ere, era owe ajaoromtaera ajaie. Tanom emes tamsam. 39Emesare, dare Yesus era Yahudi owe tapirmi aeme pak takesam, Yerusalem aeme pak takesam, damba aporom. Oweam, Armat Ipit salib wus oup ataetopomes. Erarawa are Armat Ipit atatiies. 40Bare bamintep, Allah, Armat Ipit ajaoromwasumtume. Are Armat Ipit basonak aporomtame. 41Wan owe ere, Yesus bi bapor apok. Me, Allah bonak aereremartaaero owe taka, Yesus bi aporom. Allah, Armat Ipit ajaoromwasumtumerawa, dare amosam, bwiam, Armat Ipit takan andom. 42Armat Ipitam Yesus Akot Atakam bakoretam, atakam asakamtamero. Allah, Armat Ipit, era jatiaptam oweam, era dambir oweam, adosa, atakam basakamtii Ipit ataeme. Are emes ateman batam atakam asakamtamero. 43Bonaknak ere, Allah atakam bakoretam owe takes, Armat Ipit atakam akoromes. ‘Allah Armat Ipit aemto pak aportem. Erarawa Are Armat Ipit ambesemtas owe takes, adosa bimak binip ajanimemtamtem.’ Emes atakam aesimes.” Petrus emes atakam aesimen.

Wan Yahudi apok owe Allah Jip ataetes atakam

44Petrus atakam basakampim apok ere, Allah Jip, era atakam jane ajies owe takes jak bomon ajiiapteteren. 45,46Era owerawa, wan owe samaniin samaniin atakam kupis akoreteteresen. Are Allah daytinak apores, wanam Armat Ipit asitimesen. Bonak ere, wan Yahudi saman Yesus bajamkai owe, Petrus Yope takan ajinaoesen. Are era Yahudi apok saman owe akores atakam jane ajiesen. Erarawa are Allah aJip, era Yahudi apok samanam atetame aporesen. Ararawa, jinim daytu aeesen.

Emasare, Petrusam atakam aokoretamen. 47“Ara owe, Allah Jip ataetares. Are da tamen aemares. Erarawa ara owe bwi bakupimtaer, atii bata owe ape?” Emes atakam aesimen. 48Petrus arawa, owe Yesus juas bajiem, wanam era owe bwi bakupimtaer, atakam asakamtamen. Era owerawa, Petrus, bare bamintep era asan takan baemap, atakam ajanimesen.

Currently Selected:

AEMAARIS PAK 10: LAIASC

Highlight

Copy