AEMAARIS PAK 11

Petrus, Yahudi apok saman Yesus ajamkaies, atakam Yerusalem owe aokorome atakam

1Era Yesus atakam bakoretam bamirimemom oweam, era Yudea tapirmi takes Yesus bajamkai oweam, atakam jane ajiesen. “Era Yahudi apok samanam, Allah atakam jane etejies.” Emes atakam jane ajiesen. 2Emesare, Petrusam, Yerusalem aesosen. Era tamane pitini basakamosom akot ajies owe ere, Petrus atakam ajamkoramesen. 3“Wore tamane pitini basakamosom apok owe tame jaki ajitem, wanam amos era owe takan andemakam.” Emes atakam aesimesen. 4Petrus ere, era bonak ameteetaere pak takes, wanam ajiirenak aemtiie pak atakam era owe aesimtamkoromen. Petrusam:

5“Yope aemapo, denom atakam Allah ajanimo. Derarawa, pak taka bambi aporo. Pak kain daytu tamen, wonamo oup aendae. Era kain, jap paaro eak taka apok ajanietepe. Era pak ere debipunak andae. 6Denom era pak aporkoromo. Derarawa binatang bai eak taka apok aptamam, wasen binatangam, afafasijarmas pakam, sakaoam, aporo. 7Denom atakam jane ajio. ‘Petrus! Bawasitey! Era pak batatiiey. Era dasa bandey.’ Emes atakam akoromen. 8Derarawa, ‘Tuhan! Emes bas! Ere karao pak apaye, ere pano pak apaye deokone bataetukum demsam apoknak.’ Emes atakam aesimo. 9Emesare, era wonamo oup atakam jane aojio. ‘Wore, Allah era banda pak akenemapome pak, karao pak bajie bas.’ Emes atakam akoromen. 10Erarawa bare bamintep aeme, wanam era pak takes wonamo oup aotemetes. 11Emesare, emes pak aemes takarawa, Kaisarea owe bamintepam tame jimsappu ameteememes. Owe era owe dera bajate ataendaemes. 12Allah Jipam atakam aokoromen. ‘Era owe ajamkaiey. Wonom ombare bas.’ Emes atakam aesimen. Yesus bajamkai owe poman ban takaam, ajamesosenis. Dare Kornelius tame ajiiom. 13Armat ipit arawa, atakam akoromero. ‘Dere malaikat, detame bomon aememe aporo. Era malaikatam atakam akoromen. “Owe, Yope pambirimemey. Era asan owe juas Simon Petrus aapeta. Era ipit bajatey. 14Armat ipit wonom, wotame owe takesam, ajoremtakam bokotpu, atakam akoretamteman.” Malaikat emes atakam aesimtamen.’ Kornelius emes atakam aesimtamero. 15Dere atakam emes kope akoreorawa, Allah Jip, era owe jak bomon ajiiaptetere. Are era bonak aemero pak taka are. 16Derarawa, Tuhan akore atakam bimak binip atoomo. ‘Yohanes, owe, bwi akupimtaere. Me, Allah ere, aJip tara akupimtamteman.’ Tuhan emes atakam aesime. 17Danom Tuhan Yesus Kristus ambesemom ere, Allah, aJip dara atetamero. Allaham era owe emes taka atetame. Dere emes apororawa, dere Allah baemekekem asan apok.” Petrus emes atakam aesimen. 18Era owe emes atakam jane ajies arawa, are atakam apok aemapesen. Are Allah asitimesen. “Emesare, Allah, dosa bamekemteter anama aatakam ji baeteter, emes bimak binip, era Yahudi apok saman etetetame. Era oweam jiinenak aemomemas.” Emes atakam aesimen.

Antiokia owe Yesus ajamkaies atakam

19Bonak ere, owe Stefanus atatiiesen. Wan oweam Yesus bajamkai owe takes ajurusumesen. Erarawa Yesus bajamkai owe, Fenisia tapirmiam, woo juas Siprusam, kota Antiokiaam, apatosesen. Era owe ere, Yesus atakam, Yahudi saman owe taka, akoretamesen. 20Wan Yesus bajamkai owe, ere Siprus owe. Wan owe ere, kota Kirene owe. Erarawa, era owe Antiokia aesoses, are Yesus Akot Atakam, Yunani saman oweam, akoretamesen. 21Tuhanam, era owe takan ajamememen. Erarawa owe tanane era atakam ambesemesen. Are bimin awaiemes, wanam Tuhan ajamkaiesen.

22Emesare, Yerusalem Yesus basitim bajarisiap owe, emes atakam jane ajiesen. Ararawa, Barnabas, Antiokia ambirimemesen. 23Armat ipit era asan ambareme, are, Allah, asan akot era owe atetame aporen. Ararawa, jak akot aememen. Wanam are era owe takes jak aptam Tuhan fiak bajamkai ataane aweomen. 24Barnabas, owe akot. Allah Jipam, armat ipit aemomemkoromen. Armat ipitam, Tuhan bamesem fiak ipitin. Emesare, Tuhan ambesemes owe, tanane betema ajiesen.

25Emesare. Barnabas, Saulus bandimarpor Tarsus aesosen. 26Are Saulus ataererawa, Antiokia aesomasen. Emesare, tahun taka, Barnabas anama Saulus Yesus basitim bajarisiap owe takan ajarisiapesen. Are atakam owe tanane aememtamemisen. Emesare, Antiokia, owe, ara Yesus bajamkai owe “Kristen owe,” emes juas bonak atakamjiapesen.

27Emesare, era bare, Allah atakam bakoretam owe, Yerusalem aites, wanam Antiokia andaesen. 28Me wan ipit juas Agabusen. Emesare, Allah Jip, atakam bimak binip, armat ipit atetamen. Armat ipit arawa, awasite, wanam atakam akoren. “Asep bare, ara tapirmiin tapirmiin owe takes amosto daytu aemaptemas.” Emes atakam aesimen. (Asep arawa, Klaudius owe baomep ipit aememe, owe amosto daytu aemapesen.) 29Erarawa Yesus bajamkai owe, uang, era Yudea tapirmi Yesus bajamkai owe bataerjirim, atakam ajamsakamamtiiesen. Uang daytu owe, uang daytu bataejirim, wanam uang janderes owe, uang janderes bataejirim, emes atakam ajamsakamamtiiesen. 30Emesare, emes taka aemesen. Are Barnabas anama Saulus, era uang, Yesus basitim bajarisiap armat baemem owe batoomtintam, atakam akoresen. Emesare, Barnabas anama Saulus, era uang atoomtinemis, wanam era Yesus basitim bajarisiap armat baemomem owe atetamemisen.

Currently Selected:

AEMAARIS PAK 11: LAIASC

Highlight

Copy