AEMAARIS PAK 19

Paulus Efesus akoretame atakam

1Emesare. Apolos Korintus taomape, Paulus wan setep apok tapirmi aokorefiosen. Ararawa, kota Efesus andaemen. Era asan Tuhan bajamkai owe bimnuk aemamtaeren. 2Are atakam, era owe, akoromen. “Tare Yesus eemnak ambesemkoromekem, tare Allah Jip etetaetekeme?” Emes atakam aesimen. Era owerawa, “Apok! Dare Allah Jip atakam jane bajie apoknak.” Emes atakam aesimesen. 3Paulus arawa, “Owe bwi tara akupimtaeren, ere apa bwi kupimtaeren?” Emes atakam aesimen. Era owerawa, “Era bwi bakupimtaer, ere Yohanes aememtame bwi bakupimtaer taka are.” Emes atakam aesimesen. 4Me Paulus arawa, “Yohanes, dosa ambakemes wanam Allah atakam ji aees owe bwi akupimtaeren. Are atakam era owe akoromen. ‘Tare de fe asep andaeto Ipit ambesemay. Ere Yesus are,’ Yohanes emes atakam akore.” Paulus emes atakam aesimen. 5Era owe emes atakam jane ajies arawa, wan owe Yesus juas ajiemes, wanam era owe bwi akupimtaeresen. 6Paulusam ban era owe damo ten ataetiie, wanam Allah Jip era owe jak bomon ajiiapteteren. Era owerawa, wan owe samaniin samaniin atakam kupis akoreteteresen. Are Allah atakam akoretamesen. 7Emes aemes owe, poman bai jamnuk apayeen.

8Emesare. Pir bamintep, Paulus Yahudi owe samayen tame ajiia ajaien. Are jak fiak aptam atakam era owe akoretama ajaien. Are atakam ajamkorama ajaien. Are era owe Allah owe aobaomep atakam eemnak bamesemkorom, ajomtampora ajaien. 9Wan owe ere, jane sake aememesen. Are era atakam aooesen. Are Tuhan asamot owe bajortaer akukuretiie atakam, tame atakam akoresen. Ere Yesus atakam are. Paulus emes aporerawa, are era owe beken ajiosen. Are Yesus bajamkai oweam ataeren. Ararawa, juiin afaafeaarir, Tiranus sekolah tame bomon, atakam aememtamaaririn. 10Are tahun amnuk aemaaririn. Erarawa, Asia tapirmi aemapes Yahudi owe takesam, Yunani owe takesam, Tuhan atakam jane ajiesen. 11Emesare Allah fiak pak, Paulus atetamen. Erarawa armat ipit jinim bae pak daytinak aemen. 12Owe Paulus damo akurumes ban atoomatemas kain koseram, pakaianam, damo owepu atoomtinesen. Era damo owerawa, ajaoremesen. Biiam era owe jak bomon ajisesen.

Skewa aoorey jii atakam

13Me wan Yahudi owe, owe jak bomon bii bamirimjisim, samaniin samaniin afafasiejaresen. Era owerawa, era bii bamirimjisim, Tuhan Yesus juas ajietaerporesen. Are atakam era bii akoromesen. “Dere Paulus akoremar ipit juas Yesus ajuas ajietaermin. Emesare dere atakam wora asakamtammin.” Emes atakam aesimteteresen. 14Allah Tame pak baem ipit juas Skewaen. Are Yahudi ipitin. Me aoorey jii poman ban jamnuk emes atakam aesimteteresen. 15Emes atakam aesimteteres arawa, era bii era owe atep ajiten. “Yesus demsam. Paulusam demsam. Tare ere, tanam?” Emes atakam aesimen. 16Era bii jak bomon aemape ipit arawa, era owe aemen. Erarawa are era owe akumimosomen. Are era owe ajurusumen. Erarawa, era owe era tame ametejisesen. Are damo burifieam, damo daso aptamam aemomesen. 17Era kota Efesus aemapes Yahudi owe takesam, Yunani owe takesam, emes atakam jane ajiesen. Are takes ombare aememesen. Emesare, Tuhan Yesus juas andi afufuosen. 18Yesus eemnak ambesemkoromes owe tananeam andaesen. Are era aemaaris pak, atakam afafasimesen. Are era aemaaris pak, baso aporomtamesen. 19Ta pak aemaaris owe tanane, ata pak atakam buku takes ajarisimapomes, wanam era owe bipu jis ambomesen. Are era buku harga ajititimaresen. Era harga uang perak 50.000en. 20Erarawa, era samaniin samaniin owe, Tuhan atakam jane ajiesen. Emesare Tuhan atakam ji aees owe, betema betema ajiesen.

Efesus owe jokoman aememes atakam

21Emes aemkoromes, Paulus Makedonia tapirmiam, Akaya tapirmiam, baofejis, wanam Yerusalem bajir, atakam asakamtiien. “Dere era asan aesostey, denom Roma bapor.” Emes atakam aesimen. 22Are akarai pi bajat ipit amnuk juas Timotius anama Erastus Makedonia tapirmi ataejirimen. Armat ipit arawa, Asia tapirmi aoemapen.

23Era bare ere, owe Tuhan asamot owe bajortaer akukuretiie atakam, asawuamesen. Ere Yesus atakam are. 24Perak pak bakenem ipit taka juas Demetrius, eto juas Artemis pak tame tanane akenemaaririn. Emesare, perak pak bakenem owe emes karai, uang daytinak ataetaarisin. 25Demetrius, era perak karai oweam, emes tamen wan karai oweam, ajarisimapome, wanam atakam akoromen. “Ara aememakam owee! Dare era karai aeemarom ere, emesare uang daytinak ataeta ajiemmarom. Tanom emes tamsam. 26Paulus ere, Efesus owe tananeam, Asia tapirmi owe tananeam, atakam ajomtamum. Are era owe tanane bimin awaimemum. ‘Era asamot akenemapommas pak, juein owenak apok,’ emes atakam aesimum. Tare apormakam. Emes atakamam jane ajimakam. 27Owe dakarai pak, atakam pota akoretemas apeno. Wanam juein taot daytu juas Artemis atame, bambi tame, emes atakam akoretemas apeno. Asia tapirmi owe takesam, samaniin samaniin takesam, ara daytu juein taot asitimmas. Owe ere, era juein taot afiak pak ajanimosomtemas apeno.” Demetrius emes atakam aesimen.

28Era owe emes atakam jane ajies, are jak ambapnak aememesen. Are atakam afaketaaa ajaiesen. “Artemis, ara aememom Efesus owe dajuein taot. Are fiaknak!” Emes atakam aesima ajaiesen. 29Era kota samaniin takes asawuamesen. Era owe, Paulus takan ajamjares Makedonia tapirmi ipit amnuk juas Gayus anama Aristarkus, ajipirtaeres, wanam era kota owe ajarisiapemas asan ametetomasesen. 30Paulusam era owe tanane bipu atakam bakore aemen. Yesus bajamkai owe ere, armat ipit akikimomesen. 31Emesare Asia wan tapirmi pemerintah owe, Paulus ajoo oween. Are atakam Paulus ataejinaomesen. “Wore era kota owe bajarisiap asan bajii bas.” Emes atakam aesimesen. 32Emesare, era ajarisiemes owe, basawuam daytu aemesen. Are era ajarisiemes pak amsam apoken. Erarawa wan owe apa atakam afaketaaesen. Wan owe ere, apa atakam afaketaaesen. 33Era Yahudi oweam, owe juas Aleksander arawa, era owe tanane bipu ambareotasimemesen. Emesare era wan owe armat ipit ara asawuames amsamen. Me Aleksander arawa, ara owe atakam apok baemap, ban apatapipimen. Are era owe atep bajit aememen. 34Era owe ere, Aleksander, Yahudi ipit aporesen. Erarawa jam jamnuk era owe takes atakam awar afaketaaa ajaiesen. “Era Artemis, ara aememom Efesus owe dajuein taot arare. Are fiaknak.” Emes atakam aesima ajaiesen.

35Emesare sekretaris kota, era owe tanane, atakam apok aemapome, wanam atakam akoren. “Ara aememakam Efesus owee! Efesus ara Artemis tame asan arare. Are era wonamo oup aejendae eka asan arare. Owe takes emes amsam. 36Emes atakam, ere atakamnake. Oweam, ‘pote atakam’ baemejie asan apok. Emesare, tare atakam basnak. Tanom jokoman bas. 37Tare ara aememes owe atoomdaeakam. Era owe ere, eto tame pak wosom owe apok. Are era dajuein taot tame atakam apok. 38Emesare, Demetriusam, perak pak bakenemapom oweam, ara aememes owe apormas apaye, are atakam pemerintah bakoromtas. Jokoman pak baoorpor owe ajarisiapemas. Gubernuram aapeta. Owe era jokoman pak atakam, era asan bajamkoramtas. 39Tare ere, wan atakam ape, ara kota atakam basakamtii owe era atakam jane bajitas. 40,41Me waa basawuam daytu aemmarom, emesare pemerintah oweam, ‘Tare jokoman pak aemmakam,’ emes atakam akoretemaroas apeno. Danom atakam fe apoknak. Erarawa dare atep baemejit asan apok. Tanom, te! Baesosay!” Era sekretaris emes atakam akoromen.

Currently Selected:

AEMAARIS PAK 19: LAIASC

Highlight

Copy