AEMAARIS PAK 18

Paulus Korintus aemape atakam

1Emesare. Era pak aemkoromes, Paulus kota Atena aite, wanam kota Korintus aesosen. 2Era asan ere, are Yahudi ipit juas Akwila bi aporen. Era ipit Pontus tapirmi ajisamsen. Japen arawa, Klaudius, Yahudi owe takes, era kota Roma bajis, atakam asakamtamen. Erarawa, Akwila aremotin Italia tapirmi aejinaoemisen. Aremo juas Priskilaen. Paulusam jaki era owe tame ajitemen. 3Akarai pak takan apore, erarawa are era owe tame aemapen. Are karai takan aeesen. Are pitini tame bakenemapom oween. 4Era Yahudi Owe Samayen Bareiin, Paulus era Yahudi owe samayen tame bomon, atakam akoreaaririn. Are Yahudi oweam, Yunani oweam, Yesus bamesem atakam akoromporaaririn.

5Me Silas anama Timotius, Makedonia tapirmi aejinaoemisen. Ajinaoemis arawa, Paulus Yesus atakam taka akoretamaaririn. “Yesus, Allah Aeremtaere Ipit.” Emes ateman era Yahudi owe atamaaririn. 6Era owe ere, era atakam aooesen. Are tame atakam akoromesen. Erarawa, Paulus apakaian apatapipime, wanam atakam fiaknak akoromen. “Tare neraka ajiiaptakam, tanom tamba. Emesare, dere atakam tare emekoretamey. Emesare, dere waa era Yahudi apok owepu aesosmin.” Emes atakam aesimen. 7Armat ipit arawa, era asan aite, wanam Allah basitim ipit juas Titus Yustus atame ajiiapen. Era tameam, era samayen tameam aip amnuk aotomamtiiesen. 8Era Yahudi owe samayen tame kapar ipit juas Krispusam, atame oweam, Tuhan ambesemesen. Korintus owe tananeam era atakam jane ajies, wanam Tuhan ambesemesen. Are Tuhan ambesemes arawa, owe era owe bwi akupimtaeresen.

9Emesare. Eam ere, Paulus pak taka bambi aporen. Tuhanam atakam Paulus akoromen. “Wore ombare bas. Atakam akoromey. Atakam apok baemem bas. 10Denom takan wora ajamememmin. Owe wora baemesokom asan apok. Ara kota owe tanane ere, emesare, deowe apormin.” Tuhan emes atakam aesimen. 11Emesare, Paulus era asan pir 18 aemapaaririn. Are Allah atakam era owe aememtamaaririn.

12Me, Akaya tapirmi gubernur ipit juas Galio aememe, era Yahudi owe, Paulus bootapem awarimwasites taka aren. Are Paulus era baoorpor asan atoomjiiesen. 13Are atakam akoresen. “Era ipit, owe Allah basitim, apa atakam jipu ajomtame. Era atakam ere, Musa Basakamtam Atakam jipu apok.” Emes atakam aesimesen. 14Me Paulusam atakam bakore aeme. Me, Galio, atakam era Yahudi owe, bonak akoromen. “Era ipit pota pak aeme apaye, jokoman pak aeme apaye, ere dere taatakam jane bajie erare. 15Me, era akoremakam atakam, pak juas atakam ajamkoramakam. Owe juasam atakam ajamkorammakam. Taagama basakamtam atakam ajamkorammakam. Emesare, dere era pak, atakam basakamtii pota.” Emes atakam aesimen. 16Armat ipit arawa, era owe era baoorpor asan aombirimjisimen. 17Era owe takes arawa, Yahudi owe samayen tame kapar ipit juas Sostenes ajipirtaeres, wanam are armat ipit, era baoorpor asan, wusup atesen. Me Galio ere, bapor apok tamen aemapen.

Paulus Antiokia aofasie atakam

18Emesare. Paulus era Korintus ise tanane aoemapen. Ararawa, atakam Yesus bajamkai owe akoromen. “Dere aake. Dere baesos.” Emes atakam aesimen. Armat ipit arawa, Siria tapirmi bajir andaejuuen. Priskila anama Akwila, takan andaejuuesen. Bonak ere, Paulus kota Kengkrea aememe, are ataaji Allah aeen. Erarawa are kuus fini wakan ajakuemen. 19Emesare, era owe kota Efesus asetesen. (Asep bare, Paulus Priskila anama Akwila, era asan beken ajiosen.) Asetes arawa, Paulus Yahudi owe samayen tame ajiien. Are era Yahudi owe atakam ajamkoramesen. 20Era oweam Paulus, era asan ise jirao boemap, atakam ajanimesen. Paulus ere, potan. 21Armat ipit arawa, “Dere aake. Dere baesos. Allah akot aporto, dere tara aofasiomemtemin.” Emes atakam aesimen. Emesare, armat ipit Efesus andaejuuen. 22Ararawa, kota Kaisarea aseten. Aseterawa, asokuen. Are Yesus basitim bajarisiap owe, selamat atakam akorome, wanam kota Antiokia aesosen. 23Are era asan ise tanane aemape, wanam aoesosen. Are Galatia tapirmiam, Frigia tapirmiam, afafasiejaren. Era asan ere, are Yesus bajamkai owe takes jak fiak aemtamen.

Apolos, Efesus anama Korintus akoretame atakam

24Emesare. Yahudi ipit juas Apolos kota Efesus ajinaoen. Are kota Aleksandria ajisamse ipit araren. Are atakam tastu ipitin. Are, Alkitab atakam amsam takesen. 25Bonak ere, owe era ipit Tuhan bokotpu atakam eteememtamesen. Armat ipitam, Yesus atakam, fiak akoromen. Era atakamam turu akoromen. Me, armat ipit, Yohanes abwi bakupimtaer atakam taka amsamen. 26Armat ipit, era Yahudi owe samayen tame bomon atakam jak fiaknak akoretamen. Priskila anama Akwila ere, armat ipit aatakam jane ajiemis, are era ipit atame atoomjiiemis, wanam Allah asamot owe bajortaer akukuretiie atakam, atakam, armat ipit aesimtamkoromemisen. Ere Yesus atakam are. 27Emesare, Apolos, Akaya tapirmi bajir, atakam akoren. Yesus bajamkai owerawa, “Emesare. Akaya tapirmi ajirey.” Emes atakam aesimesen. Are Akaya tapirmi Yesus bajamkai owe, Apolos atame batoomjii, surat aetamesen. Bonak ere, Allah, asan akot, wan Akaya owe atetamen. Erarawa bonakam, era owe Yesus ambesemesen. Emesare, Apolos Akaya asete ere, are era owe Yesus bajamkai fiak aemtamen. 28Armat ipitam Alkitab atakam baso akoretamkoromen. “Allah Aeremtaere Ipit, ere Yesus are.” Emes atakam aesimen. Erarawa are era Yahudi owe, era owe tanane bipu, atakam pomat akumimosomen.

Currently Selected:

AEMAARIS PAK 18: LAIASC

Highlight

Copy