AEMAARIS PAK 20

Paulus Makedonia tapirmi anama Yunani tapirmi, aesose atakam

1Emesare. Era asawuames akariemesen. Akariemes arawa, Paulus Yesus bajamkai owe ajate, wanam ataane aweomen. Ararawa, “Dere aake. Dere baesosa.” Emes atakam aesimen. Emesare, are Makedonia tapirmi aesosen. 2Are era tapirmi takes afafasiejaremen. Are ataane daytinak era owe aowee, wanam Yunani tapirmi ajaremen. 3Are pir bamintep era asan aemapen. Yahudi owe ere, armat ipit batatii atakam akoramesen. Paulus, Siria tapirmi bajir aememe, are era atakam jane ajien. Ararawa, atakam asakamtiien. “Ajirtey, Makedonia tapirmi ato takamfafasiejartemin.” Emes atakam aesimen. 4Me Paulus ajamjares owe, kota Berea ipit juas Sopater. (Armat ipit Pirus andep.) Kota Tesalonika ipit amnuk juas Aristarkus anama Sekundus are. Derbe ipit juas Gayusam are. Timotiusam are. Asia tapirmi ipit amnuk juas Tikikus anama Trofimusam are. Emes owe aren. 5Era owe ere, bonak atakamjires, wanam kota Troas ambarapesen. Are era asan dabantem apeomperoes. 6Dararawa, kota Filipi aemapom. Dare Eek Apok Roti Pakambwi atiom, wanam andaejuuom. Dare waut ise ban taka aemesom, wanam Troas aseteom. Era asan ere, dare era owe bimnuk aemamtaerom. Danom ara Troas ise poman ban jamnuk aemapom. 7Emesare, Hari Minggu ere, danom perjamuan banda ajarisiapom. Paulus arawa, atakam era owe akorome. Are to baesos aememe, emesare are atakam eam joknak ajiire akoretiien. 8Era oweam pelita tanane ajarisiapom oup kamar bomon ataapomes. 9Ai ipit juas Eutikus jendela aemape. Paulusam atakam jiraonak akoretame. Erarawa era ipit ise manamesnak aemape. Ararawa, ise apwitape, wanam era oupnak kamar aejondae. Oweam era ipit ataeres, emesare dambir emeteeme. 10Me Paulus ere, bap andae. Are era ipit damo ten aemanse, wanam batir ajipiromse. Are atakam akorome. “Tare jak pota bas. Armat ipit asinta.” Emes atakam aesime. 11Paulus arawa, oupnak kamar aotemete, wanam amos akookomtaae. Are, wan Yesus bajamkai oweam, amos takan andes. Paulus arawa, atakam jo apumape. Are atakam jirao era owe akorome, wanam aesose. 12Era owe, era ai ipit jati ataeres. Emesare are jak akot aememes.

Paulus Miletus aesose atakam

13Emesare. Dare era kapalpu bonak atakamesosom, wanam andaejuuom. Danom kota Asos ajirom. Bonak ere, Paulus atakam akoromero. “Emesare, tare Asos bonak ajiray. Dere ere, Asos tamao aemtemin.” Emes atakam aesimero. Danom, “Emesare, dare Paulus Asos batoomjuu.” Emes atakam aesimom. 14Emesare, danom Paulus Asos bimnuk aomamtaerom. Danom armat ipit atoomjuuom, wanam kota Mitilene ajirom. 15Danom era asan aendaejuuom, wanam ajofe woo juas Kios jamimin aemesom. Joon tamen arawa, woo juas Samos aseteom, wanam bare jamnuk kota Miletus aseteom. 16Paulusam atakam asakamtiie. “Dare Efesus basete bas. Dere Asia tapirmi jiraonak baemap pota. Dere Yerusalem fef bajir akote. Pentakosta Bare baemames apok dere Yerusalem bamarem akote.” Emes atakam aesime.

Paulusam, Efesus Yesus basitim bajarisiap armat baemem oweam, beak bimin awar ajiames atakam

17Paulus Miletus aememe, are owe atakam asakamtame. “Tare Efesus aesosay. Era Yesus basitim bajarisiap armat baemem owe bajateay.” Emes atakam aesime. 18Emesare, era Yesus basitim bajarisiap armat baemem owe Pauluspu ajinaomes. Ajinaomes arawa, armat ipit atakam era owe akorome. “Asia tapirmi bonak ambaremo bare, dere tare takan aemapom. Era aoesoso bare ajiiream, dere tare takan aemapaarum. 19Dere Tuhan karai, bate manames aptam aetamaaru. Denom dema baemetemtem apok. Yahudi oweam, dera bajurusum atakam asakamtiiaaris. Emesare dere ajirisemaaru. 20Emesare, dere Allah pi tara bajat atakam, atakam tara batukumomim apoknak. Tanom emes tamsam. Emesare, dere era atakam, era owe tanane bipuam, tatame bomonam, akoretamaaru. Denom era atakam tara aememtamaaru. 21Dere ataane Yahudi saman oweam, Yahudi apok saman oweam aweomaaru. ‘Me tadosa ambakemteteray. Allah atakam ji aeay. DaTuhan Yesus eemnak ambesemkoromay.’ Emes atakam akoromaaru. 22Emesare, dere waa Allah Jip atakam ji aemin. Me dere Yerusalem aesosmin. Dere Yerusalem owe aemtanis pak, demsam apok. 23Me, era kotaiin kotaiin aesoso ere, Allah Jip atakam akoroma ajieman. ‘Owe banam wora ajikapomtemanis. Wonom ajirisemtemarem.’ Emes atakam akoroma ajiman. 24Emesare, Tuhan Yesus, karai Ara baetam, atakam asakamtamen. Era karai ere, Allah aasan akot atetamar pak Akot Atakam bakoretam are. Erarawa dere era karai baekoromomamis akote. Dere dambir apaye, dambir apok baemem apaye, ere awar.

25Emesare. Dere tara ambarpora ajaio, dere Allah owe aobaomep atakam tara akoretamaaru. Me, tare debi bopor apok aemtemakam. Dere emes demsam. 26Emesare, dere atakam baso tara bokoroma: wan owe jisimak asan ajiiaptas, ere apak. Ere depak apok 27Dere Allah akukuretiie pak, atakam tara batukumomem apoknak. 28Emesare, era aemtakam pak turuar. Tanom Allah bajamkai owe takes banamek fiaknak apeomay. Allah Jip tare era owe pibajamomat owe baemem aereremartaateteran. Emesare, tare Allah basitim bajarisiap owe banamek ataiomay— domba banamek batai owe adomba banamek ataiemas emes tamena. Emesare, Allah Andep aesee ajirindae. Emesare era owe Allah aowe. 29Denom aesostey ere, wasen jokoman juuri, tawaut aememtemas. Are Allah bajamkai owe seis akot bajie apok aemtemas. 30Wan tarmamon owe asiemtemas, wanam pote atakam akoretemas. Ere, Yesus bajamkai owe ara bajamkai atakam atatapimtaatemas. 31Emesare, tanom banamek fiaka. Emesare tahun bamintep ere, jokam, eamam, dere ataane tara aweomteteraaru. Denom bate manames aptam ataane tara aweomteteraaru. Tanom emes bimak binip bajanimem bas.

32Emesare, dere taTuhan ban ten atetammin. Armat Ipitam asan akot tara aoemteman. Tanom era asan akot atakam ji aetakam, asan akot aememtemakam. Armat Ipit tare Ara bajamkai fiak, bimak binip atetamteman. Are asan akot era turunak owe aemtem. Emesare Are era pak tara aemteman. 33Emesare, dere owe uang apaye, pakaian apaye, basenomem apok aemaaru. 34Dere depak dema aemaaru. Denom de takan aemaarinis owe, pak afaafetamaaru. Tanom emes tamsam. 35Era pak takes aemaaru, dere karai fiak aeaaru. Dere tare emes jipu batawejom aporomtamaarin. Danom karai fiak, wanam pak damo pota owe bafaafetam, emes baem. Bonaknak, Tuhan Yesusam atakam akoren. ‘Owe pak owe atetamtas, are jak akotnak aememtemas. Me, owe pak ataettas, are jak akot kope emes aememtemas.’ Emes atakam aesimen. Emesare, danom era atakam bimak binip bajanimem bas.” Paulus emes atakam aesime.

36Me emes atakam akorerawa, armat ipitam, era owe takesam, jindi andaepuapes, wanam atakam Allah ajanimes. 37Era owerawa, bate daytu ambates. Are Paulus batir ajipires, wanam ake afapieteteres. 38Are Paulus era owe bi bopor apok atakam apores, erarawa jak potanak aememes. Emesare, are armat ipit, kapalpu takan ajamdaes.

Currently Selected:

AEMAARIS PAK 20: LAIASC

Highlight

Copy