MÁFIYU 27
27
Ti liiní ngáá Jísu Páilɛɛ yelé
(Máa 15:1; Lúu 23:1-2; Njɔú 18:28-32)
1Ngelendáá lɛtɛngí, Ngala sááɣa gula mbélai ti wutúwɔaitii kpɛ́lɛɛ ɛ́ɣɛ kele ɣelé mbélai Júsuai faaw̃a tí faa h̃uubatɛ́ mbói ngáá ti Jísu vaa. 2Tí ngiliní, tí lii lá, tí fe Lóómi gɔ́mɛti nuu walaí sí yáa taa ɣɛ́ ma Páilɛɛ.
Júdɔ haalaí
(Ti Gɛ́ɛ́ Haítii 1:18-19)
3Júdɔ, lɛ́i í Jísu lokolevéi, ná í tɔí ngáá kɛ Jísu lɔɔ́ saa w̃ááhɔlɔ, í vuíw̃a bɛ́, í naholó wóle puu sáángɔi yangáimai Ngala sááɣa gula mbélai ti wutúwɔaitii ɛ́ɣɛ kele ɣelé mbélaitii ma. 4I ɣɛ ta, “Ngí faa ỹɔ́u ɣɛ́nga, sífaa ngí síỹɛ tókolevenga ngáá í há, lɛ́i áá faa fíli kɔ́lɔ fáa wa!”
Nátii tí ngoo yápoteni, ti ɣɛ́ ma, “Ni ndá aa ná h̃ú, í yéle fáá wúl̃a ngáá ná!”
5Júdɔ va i maa náholoi víli nɔɔ́ ndɔwɔlɔ́i wa Hɛ́ɛ́ma Yála Pɛ́lɛi góvii h̃u í gúla naa wa, í lí, í bɔ́wɔ hɛ́lɛ.
6Ngala sááɣa gula mbélai ti wutúwɔai tí naholói ná yéɣei ndɔwɔlɔ́i wa, ti ɣɛ́ ta, “Aá lɔ́ ngáá Ngala sávai w̃aaỹɛ́ɛ́ ngáá, a mɔí naholói sí víli Hɛ́ɛ́ma Yála Pɛ́lɛi wuu yándɔɔlɔmai ná í ngáá ŋaaw̃ɔ náholo.” 7-8Faalɔ, tí suubátɛi ngáá tí ndɔwɔlɔ́i yaá ngáá maa náholoi fɛɛto bátɛ mɔ́i w̃a. Ná lɔ í kɛ́a taá maa ỹándai lolí ngáá Ŋaaw̃ɔ Lɔwɔ́lɔi hááwɔ holoí sí w̃a ɣéle tɔ. Ti naa ɣɛ ngáá nungái sítii kpɔlumái tɛi ɣɛ́ ngáá Júsua.
9Kɛ sí Ngalá ndaa háá lé mɔ́i Jɛlemáya í ndéni, i hitɛá nga ngáá, sí í ɣɛ́i ta, “Tí naholó wóle puu sáángɔi yéɣei ngáá sɔw̃ɔí Ísulɔ yeláitii tí kpála tévei. 10Ti fɛɛto bátɛ mɔ́i lɔ́wɔlɔi ná yáa lá kíya Ndemɔí Ngalá ngí ndéngɔ má.”
Páilɛɛ i Jísu w̃ɔɔnií
(Máa 15:2-5; Lúu 23:3-5; Njɔú 18:33-38)
11Jísu i ɣɛi lói Lóómi gɔ́mɛti nuu walaí Páilɛɛ gakála. Kɛ ná i mɔɔningá, i ɣɛ ma, “Aa ɣɛ́ yá lɔ́ yí ngáá Júsuai ti W̃ása Ngwalaí?”
Jísu í ngoo yápote, i ɣɛ ma, “Ngimɔ́ɔ́ yí ndéa.” 12Ná Ngala sááɣa gula mbélai tí wutúwɔai ɛ́ɣɛ kele ɣelé mbélaitii tí faa láa lɛ́i Jísu wu, aa ngoo yápote fíli féni.
13Kɛ Páilɛɛ i Jísu w̃ɔɔningá, i ɣɛ ma, “Yáá faa bíh̃i bíh̃ingi ỹɛ́nima táá pɛlɛ í wa?”
14Kɛ́ Jísu aa ngoo yílaa kéle tɔ ndeí. Maa hái i Páilɛɛ gindáa vílini ngwála.
Saa haí i loní Jísu wa
(Máa 15:6-15; Lúu 23:13-25; Njɔú 18:39–19:16)
15Ná Ngumaawó Kúi wúya sɔ́wɔi ɔ́ɔ́ foló ma, i ɣɛi ngáá Lóómi gɔ́mɛti nuu walaí ná ndá lúva vele ngáá ná Júsuai tɔ́ɔ́ lokolo pelésina yiláá mbá ɔ́ɔ́ maa w̃ɔ́i gúla kpíndi vɛlɛ́i wu, í maahaaló. 16Táingi ná h̃úú vá, siỹɛndópo yiláá i ɣɛi kpindi vɛlɛí wu nuu kpɛ́lɛɛ í ɣɛ́i kɔlɔ́, tɔ́ɔ tolí ngáá Balába. 17Ná faŋaí í yatɛ́i mba, kɛ Páilɛɛ i ti w̃ɔ́ɔ́nia, i ɣɛ ta, “Ele lɔ wú lóngɔ ngí mááhaalo wú yɛ́, Balába ɔɔ Jísu lɛ́i taá tolí ngáá Ngalángi Lókolo Mbá W̃ɔ́i?” 18I ná léi sífaa, laá gíte i ɣɛi kɔlɔ́ ngáá kɛ tolómai lɔ í kɛngɔ́ ti Jísu lokolevéngɔ ma.
19Páilɛɛ i loí nɔ́ɔ héini kɔsɔ́ kpɔ́kpɔngi ya, ngi ỹáh̃a í keela woí sí lɔ́ve ngelé, i ɣɛ ma, “Yálaa faa fíli kɛ́ ngáá siỹɛndópoi ná, aa faa fíli kɔ́lɔ faa wá, bɔw̃álale, ngi hái i kɛngɔ́ máá í nɔ́w̃ɔ siŋal̃ái h̃u ngí mbóngɔ bɔ́kɔi.”
20Kɛ́ Ngala sááɣa gula mbélai ti wutúwɔai ɛ́ɣɛ kele ɣelé mbélaitii, tí wálai faŋaí wusú ngáá tí ndé masangí w̃a í bé Balába wa, Jísu va í sáa w̃ááhɔlɔ.
21Kɛ Páilɛɛ i ti w̃ɔ́ɔ́nia, i ɣɛ ti w̃a, “Sítii félengɔ h̃u, ele lɔ wú lóngɔ ngí maahaaló wú yɛ́?”
Tí ngoo yápoteni, ti ɣɛ́ ma, “Balába!”
22Kɛ i mɔɔ i ɣɛa ta, “Ndeé lɔ náá ngáá kɛ ngáá nuí síí w̃ɔ́i wáá tolí ngáá Ngalángi Lókolo Mbá W̃ɔ́i?”
Kɛ tí ngoo yápotea, ti ɣɛ́ ma, “Kpakpá kulɔ́sii w̃a, í ló na í há!”
23Í mɔ́ɔ́ ti w̃ɔ́ɔ́ni, i ɣɛ ta, “Ndeénii le? Faa ỹɔ́i bɛɛ́ lɔ í kɛ́ngɔ?”
Kɛ́ ti kpɛ́lɛɛ tí woo gúlai nɔ́ɔ ngwala, ti ɣɛ́ ma, “Kpakpá kulɔ́sii w̃a!”
24Ná Páilɛɛ í tɔ́i ngáá kɛ pele áá ɣɛ́i njɛpɛí sí h̃u í puí faŋaí w̃a kɛ́ kpɔɔlɔ wála í ɣɛi áá vá lɔ́kula héima, i njɛí yéɣei, í yaa wúya faŋaí yaah̃ú, i ɣɛ ta, “Siỹɛndópoi sí ỹááw̃ɔi haa aa ngáá mbáá háá pá! Wá lɔ i ngáá wú wáá háá!”
25Nuí kpɛ́lɛɛ tí ngoo yápoteni, ti ɣɛ́ ma, “Bɛlɛ́ ngi ỹááw̃ɔi háá í ɣɛ́ ngáá ni waaháá naá ní léngaitii!”
26Páilɛɛ va i Balába w̃aahaalóni, kɛ́ i ndení ngáá ti Jísu leve ngáá nyɔungɔ́, í tokóleve Lóómingai ti hóyaitii ma ngáá tí kpakpá kulɔ́sii w̃a.
Sóyaitii tí ngɛ́lɛ gúlani Jísu h̃u
(Máa 15:16-20; Njɔú 19:2-3)
27Kɛ sóyaitii tí lía ngáá Jísu gɔ́mɛti nuu walaí Páilɛɛ vɛlɛí la. Tí tí mbála hoyá bɔ́sɔwɔngi yatɛ mba ti Jísu w̃aayelé mbéle. 28Tí ngí gúlai gúla ma, tí kula biỹá pú ma. 29Kɛ tí masa mbɔ́ɔ́lɔi bátɛa ngáá ngalí ngáli sapeí, ti njéi ngungí w̃a. Tí ngúlui wála ngisa lokói ya, ti hítɛ wumbú ya kakála. Táá ngɛlɛ́ gúla su, táá ɣɛ́ ta, “Í lɛɛh̃úi h̃uu ɣɛ́ gooh̃á, Júsuai ti W̃ása Ngwalaí!” 30Tí laayɛ́i vú ma, tí ngulúi gúla ngeyá, tí ndevé lá ngu mba ká ká. 31Ná ti vílai ngɛlɛ́ gúlama su, tí kula biỹángi gúlai náa ma, tí kpɔ́wɔ bɔ́wɔ gulaí vú ma. Kɛ tí liingá lá ngáá tí kpákpa kulɔ́sii w̃a.
Ti Jísu bakpáni kulɔ́sii w̃a, í há
(Máa 15:21-32; Lúu 23:26-43; Njɔú 19:17-27)
32Ná ti ɣɛ́i taa gúla Jɛlúsɛl̃ɛ wa, ti w̃ɛ́ɛ́ni taá siỹɛndópo yiláá taa ɣɛ́ ma Sáimɔ. I ɣɛi ngáá taí sí h̃uu w̃ɔ́ɔ́ taa náá lolí ngáá Saílini. Maa h̃íỹɛndopoi lɔ sóyaitii tí kpái ma ngáá kule ngáá í lí ngáá Jísu gulɔsií. 33Tí folói ỹandái ta taá náa lolí ngáá Gɔgɔ́ta, ná wuí wáá ngáá Ngu Kokó Ỹándai. 34Ná tí fóloi na, tí ndɔ́i héi Jísu yaá ná supungɔ́ ngáá ŋani tá tabangɔ́ sáli sáli. Kɛ́ ná í kpélei, i beeleí mba, aa kpɔlení.
35Ná tí kpakpáni kulɔ́sii w̃a, tí falángi yáleni ngi gúlai w̃a, tí kɔ́lɛ wa. 36Ná ná í gúlai su, ti héini náa na táá maah̃ú béle. 37Faí sí tí pɛ́lɛni Jísu wa, ti paaní fááw̃a, tí pɔ́nɛni tí pɛ́lɛ ngu kɔlɔ́ɔ́ veleí, i ɣɛi ngáá sí, “Jísu lɔ ngáá sí, Júsuai ti W̃ása Ngwalaí.” 38Ná vólu, tí ŋuỹa yélaa félengɔ bákpani kulɔ́siitii ma. Ngiláángi i ɣɛi Jísu yisa h̃u vélei, pekaí i kɔvɔ h̃u vélei.
39Nungái sítii ti ɣɛ́i taa lɔ́ve mbéi Jísu bakpángɔ í ɣɛ́i lá na, ti ɣɛ́i taá laa bɛ́ɛ́lu lá, táá suuhaláta ngóitii nde, 40tíwaa ɣɛ́ ta, “Yɛ́i yí ɣɛ́a yáá vá Hɛ́ɛ́ma Yála Pɛ́lɛi wóloma, yí tó volú foló sáángɔ laa lówah̃u, bɔwɔ́ wúmaawo ná! Yí gúla kulɔ́sii w̃a, yí hítɛ, ná yá lɔ tí yí ngáá Ngalángi H̃íỹɛndou Loí ngáá tɔɔỹaá!”
41Ngimɔ́ɔ́ nɔ́ɔ jɔ́ Ngala sááɣa gula mbélai ti wutúwɔai bɛ́lɛ taá kele ɣelé mbélaitii ɛ́ɣɛ kaamɔítii Ngala sávai hááw̃a ti ɣɛ́i taá ngɛ́lɛ gúla Jísu h̃u, 42táá ɣɛ́ ta, “I nungáá vekaítiini maawalónga kɛ́ ɛi hombó ɔ́ɔ́ bɔ́wɔ w̃ááwalo. Kɛmbɛ laá lɔ í ngáá masa ngwálai Ísulɔ yeláitii fááw̃a? Bɛlɛ́ ná hɔ́ɔ́ í gula kulɔ́sii w̃a í hítɛ, naá lá náá la! 43Ndangɔ́ɔ́ lé ngáá Ngalá aáva i ɣɛ laá lɔ́ í ngáá Ngalángi H̃íỹɛndou Loí, ná ná áá ɣɛ́, a mú tɔ́ lɛɛ ná wɔ́lii Ngalá ndóngɔ lé í maaɣawó!”
44Ŋúỹa yélai sítii kele tɔ tí tí bakpáni taa Jísuni, ngimɔ́ɔ́ nɔ́ɔ tiyá bɛ́lɛ ti ɣɛ́i taa Jísu yɛɛlí.
Jísu haalaí
(Máa 15:33-41; Lúu 23:44-49; Njɔú 19:28-30)
45Í séi foló yákpangɔi w̃a í foló kpɔkɔ hólo yakpámai w̃a, ndɔ́wɔlɔi kpɛ́lɛɛ su bindíngɔ i ɣɛi lá háwa sáángɔ hááw̃a. 46Kpɔkɔ hólo yakpámai kpéi, Jísu i baíni woo wála h̃ú ti híí woí h̃u, i ɣɛ ta, “Ila, Ila, léma sabahááni?” Ná wuí wáá ngáá, “Ní Yálangi, ní Yálangi, ndeénii le yí kúlanga ndɔ́bɔ?”
47Nungái sítiini tɛingáá ti ɣɛ́i lóóni na, ti Jísu woo ỹɛ́nini, kɛ ti ɣɛ́a ta, “Aá lɔɔ́ Ngalá ndaa háá lé mɔ́i Iláija lolí.” 48Ngamá nɔ́ɔ, tiyɛ́i ti ɣɛ́i lói na, kɛ ti tá yiláa i liingá ngáá viliỹɛ́ í ŋani tá yeɣé kɛngɔ́ nyɔ́ɔ́h̃u, í njéi ndɔɔ lábangɔi wu, í lɛ́bɛ ngáá ndɔɔ yɛ́i ná límbɔ, í ngili ngulúi ya, í fé Jísu yaa ngáá í kpɔ́le.
49Kɛ́ pekáitii tí ɣɛ́i ta, “Bé lɛ́ɛ mba a mú tɔ ná wɔ́lii Iláija lɔɔ vá í ngumááwo!”
50Jísu i baíni mɔ́ɔ woo wála h̃u, í há.
51Maa táingi ná w̃a, kula walái í ɣɛ́i hɛ́lɛni Hɛ́ɛ́ma Yála Pɛ́lɛi wu, i wálini su féle, í séi kɔlɔ́ɔ́ vélei, í foló kɔwɔ́ yángi. Ndɔwɔlɔ́i í bɛ́li, kɔtuítii ti wáli walí sú bɛ́kpɛ. 52Kambáitii ndaa í wó, Júsuai sítii kpih̃íw̃aa ti ɣɛ́i ngáá Ngalángi vóngaitii, ti ɣɛ́i náa haaní, tí wuyoɣeni sái h̃ú ndɛɛh̃úi í vú ti h̃u, 53ti gúla kambáitii su. Ná Jísu wuyoɣelái saí h̃u í gúlai su, tí liiní hɛ́ɛ́ma láá wálai Jɛlúsɛl̃ɛ h̃u mbéi nuu bíh̃iw̃aa tí ti lɔí na.
54Sóya nuu walaí ná ɛ́ɣɛ sóyai sítii ti ɣɛ́i mba táa Jísu w̃aah̃ú belé, ná tí ndɔwɔlɔ́i lɔní í bɛ́lini, ɛ́ɣɛ sí kpɛ́lɛɛ í híyai na, nduwái i vuí tí h̃u. Kɛ ti ɣɛ́a tá, “Tɔɔỹaá kái kai té, i ɣɛngɔ ngáá Ngalángi H̃íỹɛndou Loí!”
55Nyah̃aá bih̃íw̃aa ti ɣɛ́i na, ti lóóni góóh̃ama táa náa béle. Tí ɣɛ́i ngáá Jísu waa bɔ́mba yélaa. Tí lói Jísu wa ti híɣe Galéli. 56Nyáh̃ai nátii su, Mɛɛloí sí í ɣɛ́i ngáá Magadála taí h̃uu w̃ɔ́i i ɣɛi na, ɛ́ɣɛ Jimisíni ngaa Joosɛ́ ti njée Mɛɛloí, ɛ́ɣɛ Sɛ́bɛdi h̃iỹɛndou lengáitii ti njée.
Jísu bɔlundái
(Máa 15:42-47; Lúu 23:50-56; Njɔú 19:38-42)
57Kpɔkɔ hólo yandɛ́imai, kpatɛ h̃íỹɛndopo yiláá taa ɣɛ́ ma Joosɛ́ i ɣɛi ngáá taí sí h̃uu w̃ɔ́ɔ́ taá náá lolí ngáá Alemátiya i vaaní. Laá bɛ́lɛ i ɣɛi ngáá Jísu volú w̃ɔ́i ta. 58I liiní Lóómi gɔ́mɛti nuu walaí Páilɛɛ yelé, í Jísu vuw̃ái h̃uu hɛ́li ma. Páilɛɛ va í ndeí ngáá ti Jísu vuw̃ái hé Joosɛ́ yáa. 59Joosɛ́ í Jísu vuw̃ái yéɣeni, í maayelé mbéle ngáá kula wolé panda niiná. 60I Jísu vuw̃aí laí kpɔwɔ́ bɔ́wɔ gámbai h̃u í ɣɛ́i ngáá kokongí mbɔngɔ́ í ɣɛ́i la ngáá niina kɔtuí wa, í kɔtu walái ta gilí kíli, í tíbi kambái la, í híɣe na í lí. 61Nyah̃ápoi sí tɔ́ɔ ɣɛ́ ma Mɛɛloí, Magadála taí h̃uu w̃ɔ́i, ɛ́ɣɛ Mɛɛloí vékai, tí ɣɛ́i héini na kambái wutúwɔ.
Jísu gambaí w̃aah̃ú béle fái
62Ná ngele vekái í wóni, ná waa ngáá Júsuai ti Lɛ́ɛ́lɛmbo Ngála Fɛli Fóloi, Ngála sááɣa gula mbélai ti wutúwɔai ɛ́ɣɛ Júsuai sítii taa ɣɛ́ ti w̃a Falósiai tí liiní Páilɛɛ yelé, 63ti ɣɛ́ ma, “Kawálai, ní giséingɔ ndɛɛ gɔ́ɔ́la mɔ́i ná laawói w̃a í ndéi, ná h̃u fulúngɔ í ɣɛ́i la. I ndeí i ɣɛ ta, ‘Ná ngáá há foló félengɔ áá gúla su, sawa kélei w̃a, ngáá wuyoɣé sái h̃u!’ 64Faalɔ, ndé tí kambái w̃aah̃ú béle ngáá pangɔ́ í ló su foló sáangɔi í lɔ́ve. Kɛ́ náá láá lé, tɛingaa polú yélaitii taá vá tí ngi vúw̃ai w̃uỹá na, tí lí tí nde nungáá w̃a ngáá í wuyoɣénga sái h̃u. Ná ná áá ɣɛ, ngapúmaa lɛí taá kɔ́ɔ́la suu áá ɣɛ́ wɔɔlɔ í lɔ́ve hése keleí wa.”
65Kɛ Masangí Páilɛɛ i ɣɛa ti w̃a, “A sóyaitii ngeɣé wú lí wú maa kámbai w̃aah̃ú béle ngáá hɛmbɛ́ fíli.”
66Tí lií náa tí loko vondó kambái wa ti sóyaitii ndó ná naa w̃ááh̃u béle fááw̃a kɛinɔ́ɔ faa fíli álaa ɣɛ́ na.
Currently Selected:
MÁFIYU 27: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
