MÁFIYU 11
11
Ngúya Wo Mɔ́i Njɔú i volú yélaitii tɔvení Jísu yelé
(Lúu 7:18-35)
1Ná Jísu í vílani volú yélaa púúngɔ maah̃úú félengɔitii galámboma, kɛ i hiɣengá maa ỹándai, í lí kalambo mbóma ɛ́ɣɛ mɔ́ɔ́ keela woó vándai léma taítii su ti ɣɛ́i naa béla.
2Táingi ná h̃u, Nguya Wo Mɔ́i Njɔú í ɣɛ́i kpindi vɛlɛ́i wu. Ná í ɣɛ́i na, kɛ i sí w̃áá woo ỹɛ́ninga Ngalángi Lókolo Mbá W̃ɔ́i í ɣɛ́i áá kɛ. Faalɔ, i vólu yélaitii tɛingáá lɔ́veni ngelé ngáá tí mɔ́ɔ́ni. 3Ná nátii tí fóloni Jísu w̃a, tí mɔ́ɔ́nii ti ɣɛ́ ma, “Nuí sí Njɔú í fáá léngɔ kɔwɔ́ato mba ngáá laá lɔɔ́ vá vááma ngelewu, maa w̃ɔ́i waa ngáá í ye, baa ní nuu véka luwɔɔ́ béle?”
4Kɛ Jísu i ti woo yápotenga, i ɣɛ ti w̃a, “A yangáima, wú fái sítii nde Njɔú w̃a wúwaa mɛni ɛ́ɣɛ sítii wúwaa naa lɔ táá ɣɛ́. 5A nde ma ngáá kɛ mbole yeláitii tiyá lɔ́ɔ ỹandá lɔ́, nɔɔnɔ yelái táá híya, sítii nduwu w̃aa heebɛ́ ỹɔ́u ỹɔ́ungi í tí luwúi w̃a, nátii tiyá lɔ́ɔ mbaló mááhɔlɔ, sítii ti wolí h̃u hítɛngɔ ngá, nátii tiyá lɔ́ɔ fáa ỹɛ́ni náa, ná vólu, saa yeláitii tiyá lɔ́ɔ wúyoɣe sái h̃u, keela woó vándai lɔ́ɔ lé nyaani yélaitii ma. 6Nuí sí ngi lángi ɛ́i gúla su kɔwɔ́ato mbá, aá lɔ́ ngáá faa vánda maa w̃ɔ́i hááw̃a.”
7Ná Njɔú vólu yélai nátii tí ɣɛ́i náa taa yangáima, kɛ Jísu i pɛ́lɛnga fáŋai w̃ɔ́ɔ́nima kɔwɔ́ato Njɔú wa áá ɣɛ́ ti w̃a, “Ndeé lɔ wú lííni tɔmá ngaalaí h̃u? Tufaí fɛfɛngí áá máála maalá aá lɔ wú lííni tɔma? 8Ná ɛ́i ɣɛ́ ngáá ná, kɛ ndéé lɔ́ hɔ́ɔ́ wú lííni tɔmá? Siỹɛ máá yílingɔ vánda wala lɔ wú lííni tɔmá? Wú súúwɔlɔ nɔ́ɔ ngáá kɛ nungái sítii taá kula vandá vándai yíli w̃a taá ɣɛ́ masa pɛ́lɛ wála waláitii mbu.” 9Í mɔ́ɔ́ ɣɛ ti w̃a, “Kɛ ndéé lɔ́ hɔ́ɔ́ wú lííni tɔmá? Ngalá ndaa háá lé mɔ́ɔ́ lɔ wú lííni tɔmá? Tɔɔỹaá hááw̃a, wú líí háwui wúl̃a. Kɛ́ nyá lɔ́ɔ ndé wú w̃a ngáá kɛ nuí sí wú tɔ́ni tɔvengɔ́ɔ́ lé Ngalá ndaa háá lé mɔ́ɔ́ wa. 10Njɔú lɔ́ Ngala Kɔ́lɔi áá yɛ́pɛ kɔwɔ́ato mba mbéi pɔnɛngɔ́i na ngáá sí Ngalá ngí ɣɛ́ngɔ ta, ‘Nyá lɔ́ɔ vá ní géélai lɔ́vema í wútuwɔ, lɛ́i íwaa vá í vélei ɣɛ kíli batɛmá í wútuwɔ.’ 11Ngí tɔɔỹái le wú w̃á, Nguya Wo Mɔ́i Njɔú lɔ́vengɔɔ lé nuu búsa góó h̃u lóu kpɛ́lɛɛ mbá. Kɛ́ nuí sí tí kpɛ́lɛɛ ti lɔ́vengɔ mba Ngalángi w̃ásandai h̃u, tɔvengɔ́ɔ́ lé Njɔú wá. 12I síɣe táingi ná h̃úú w̃a, Nguya Wo Mɔ́i Njɔú í tɔkúla héini ngáá ngi gééla woí lendaí, í foló sí h̃ui w̃a, Ngalángi w̃ásandai i ndiiya tɛtɛ́ lápi bih̃íw̃aa w̃aahɔ́lɔnga. Ná vólu, mal̃a kula mbélaa táá yakpá ngáá tí ngeɣé ngáá tí yákpa. 13Í ló su kpóloo í fólo Nguya Wo Mɔ́i Njɔú ndá l̃áingi h̃úú w̃a, Ngalá ndaa háá lé mbélaitii ɛ́ɣɛ Ngala sávai í féni Muusé yáá, ti kpɛ́lɛɛ ti ɣɛ́i taa yɛ́pɛ kɔwɔ́ato Ngalángi w̃ásandai wa. 14Ná wɔ́lii wáá ɣɛ́ lói wú lá ngáá sí ti ɣɛ́i taá nde, kɛ Njɔú lɔ́ tí ɣɛ́i taa yɛ́pɛ kɔwɔ́ato mba ná tí ndéni ngáá, Iláija lɔɔ vá vaamá. 15Nuí fíli faa ỹɛ́ni ngóli áá ɣɛ́ ngu mba, í fái sí yéɣe ngáá hɛmbɛ́ fíli.”
16Jísu í mɔ́ɔ́ ɣɛ ta, “Kɛ ndeé lɔ́ náa hɔ́ɔ́ ngáá sí h̃úú yéteyangi h̃úú yélaitii suw̃á ma?” Í mɔ́ɔ́ ɣɛ ta, “Ti ɣɛ kíli gulangɔ́ɔ́ lé nɔ́ɔ ngáá ndopoá taa ɣɛ́ héi ngití wálai ya táa ɣɛ́ ỹɔw̃ɔ́ ỹɔ́w̃ɔ w̃a, 17‘Ní nyah̃á wɔ́li kúú wuyá ngúle hɔɔlɛngá wú yɛ́, kɛ́ wáá kɛ́ngɔ wɔ́ɔ́ lóóli. Ná vólu, ní saa guú wúya ngúle hɔɔlɛ́nga wú yɛ́, kɛ́ wáá kɛ́ngɔ wɔ́ɔ́ wɔ́lɔ!’ 18Ná Nguya Wo Mɔ́i Njɔú í vááni íwaa súngi hóu, aáva ɛ́i belé ndɔɔ fíli kpɔ́le aáva nuu kpɛ́lɛɛ ti ɣɛ́i ta, ‘Ỹína nyɔí lɔ polú.’ 19Aáva nuí síí w̃ɔ́i taa ɣɛ́ ma Nuu Búsa Goo H̃ú Loí i vaangá íwaa laaỹɛ́, íwaa kpɔle kpɔlé ŋáni bɔle, nungái kpɛ́lɛɛ ti mɔ́ɔ ɣɛ ta, ‘A wɔlɛ lɛ́ɛ́ siỹɛndópoi sí wa! Aá lɔ́ ngáá kooh̃á w̃ɔ́ɔ́ ɛ́ɣɛ ndɔɔ bɔ́le mɔ́ɔ. Pava gula mbélaitii ɛ́ɣɛ faa ỹɔ́u yélaitii ngufema áá nuu fíli ngéya ti hááw̃a tiyá lɔ́ ti ngáá ngi mbálangaitii.’ Kɛ́ aáva ná fíli su, nuu áá ɣɛ́ kɔ́lɔ ngáá kɛ Ngalángi ndá géle ɣelengí lɔ́ í ngáá tɔɔỹaá gélei bɔw̃álale sítii taá lókohei mbu ti luvá veléi aa ngakɛ́.”
Taí sítii suu yélai taa ɣɛ́i laí ngáá Jísu
(Lúu 10:13-15)
20Kɛ Jísu i pɛlɛá nungái nátii suuh̃ándɛma tiyɛ́i í ɣɛ́i náá ngi gááma haítii kpih̃íw̃aa ɣɛ́i ti láitii su, bɔw̃álale taá ɣɛ́i volú yáfei ti háá ỹɔítii mba. 21I ɣɛi áá ɣɛ́ ti w̃a, “Wɛ́i wú tái sítii su taa ti lóli ngáá Kɔ́lasi ɛ́ɣɛ Bɛsééda, suu lɔɔ vá ɣɛ́ma ỹɔ́u wú w̃a ngwala. Sífaa káámaa haí sítiini ngí tí ɣɛ́ngɔ wú yááh̃u w̃a kɛbei ngí ɣɛ́i kɛ́ni taí sítiini su taa ti lóli ngáá Táya ɛ́ɣɛ Sáidɔ, bele wɔ́lɔ kpɔ́lɔɔ naa yélaitii tí w̃ááyilinga ngáá kúlai kpatɛngɔ ngáá njée kpélengi ngáá ɔ́ɔ́ ngákɛ ngáá kɛ ti w̃aaw̃áánungɔɔ lé ngwala tí háá ỹɔítii faaw̃a, tí vólu yáfe ti wa lííwaa wála. 22Kɛ́ nyá lɔɔ́ ndé náa wú w̃a ngáá suu lɔɔ vá ɣɛ́ma ỹɔ́u wú w̃a í lɔ́ve sítii mba ti ɣɛ́i Táya ɛ́ɣɛ Sáidɔ, Ngalángi gɔ́sɔ foloí w̃a. 23Wɛ́i vangí wú ngáá Kapɛ́ɛ́niya taa h̃u yélaitiini, aa lɔ́ wú gí ma ngáá wú wú nga tɔ́ɔ́ vá yóóɣema í lɛ́ í tó ngeleí wa? Kpéle, wú wú nga tɔ́ɔ́ va yéima ndɔwɔlɔ́i wa fáli. Kááma haítii ngí ti ɣɛngɔ́ wú lái h̃u, kɛbei ngí ɣɛ́i ti ɣɛí taí sí h̃u tɔ́ɔ́ naa lolí ngáá Sɔ́dɔu Ngalá ngí naa ỹáánini sífaa ti ỹáámangɔ í ɣɛ́i la, maa lái ɔ́ɔ́ ɣɛ́ ɣɛi loí na í ló su sí h̃úi í fólo! 24Kɛ́ nyá lɔ́ɔ ndé wú w̃a ngáá kɛ suu áá ɣɛ́ ỹɔ́u wú w̃a wɛ́i wú ngáá Kapɛ́ɛ́niya yélaitii í lɔ́ve Sɔ́dɔu taí h̃u yélai mba Ngalángi gɔ́sɔ foloí w̃a.”
A vá ngéle wú lɛ́ɛ́lɛmbo
(Lúu 10:21-22)
25Táingi ná w̃a kínɛi, kɛ Jísu i ɣɛa ta, “Kɛɛɣɛ́ Ngalá, yɛ́i yí ngáá Ndemɔí faa kpɛ́lɛɛ mááh̃u ngelewu, ngí sɛ́ɣɛɛ gula í w̃a bɔw̃álale yí fái sítii ndɔɔwungá nungái sítii mba ti gi máá gúlangɔ ɛ́ɣɛ sítiini tí faa gálangɔ, kɛ́ yí ngakɛ́ngɔ kpál̃au ngáá sítii taá faa gálangɔ. 26Tɔɔỹaá le, Kɛɛɣɛ́ Ngalá, aá lɔ́ ngáá í líívo fáá aáva i í góóh̃unɛɛngɔ ngáá yí fái sítii kɛ h̃íí ná.”
27Jísu i mɔ́ɔ ɣɛ ta, “Ní Kɛ́ɛ́ɣɛ i ŋani kpɛ́lɛɛ fénga ngéya. Nuú fíli pá aa Ngalángi H̃íỹɛndou Loí wɔ́lɔ kɛ léi Kɛɛɣɛí. Nuu fíli pá aa Kɛɛɣɛí wɔ́lɔ kɛ léi ngi H̃íỹɛndou Loí ɛ́ɣɛ sítiini ngi H̃íỹɛndou Loí áá lókolo ti wa ngáá í Kɛɛɣɛí Ngalá kɛ ngáá ti ye kpál̃au.”
28Jísu í mɔ́ɔ́ ɣɛ ti w̃a, “Wu kpɛ́lɛɛ a vá ngéle wɛ́i wú bɔ́lɔngɔ aáva kasɔ́ ỹííngɔi áá bɔ́lu wú la. Ngáá kɛ́ ngáá háwu wú lɛ́ɛ́lɛmbo. 29-30A lokohéi ní gálambongi wú, wú kalambo mááhɔlɔ ngéya bɔw̃álale ngɛ́i bandí bándi héi nuu w̃á aáva súú áá wɔ́ɔ́lɔ. Ná vólu, wáá ndɛɛlɛmbó mááhɔlɔ bɔw̃álale kalambongí ngáá mbó ngáá wú ye aa baní aáva kasɔ́i ngáá fé wú yáa ɛi ɣɛ ỹííni.”
Currently Selected:
MÁFIYU 11: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
