Génesis 30

1Enga Raquel e chiraja dáringa aberé enga charatáyime nero abode ome. Enga catecã́ri Jacob enga chojninga:

–Ujetiga ca yocatique cuse enga yipota jeta yitoi. Amóji yari ga asa yejode enga yocatique cuse to.–

2Enga Jacob ájningarãque enga chajnai Raquel uruode enga chojninga:

–¿Ama yipesute báringa aberé a? Dupade u uje pésu ua enga aberé ua. Que Dupade u yu gotique jeta yĩro báringa aberé.–

3Mu Raquel qué catecãrápoi dabai gaté rĩ enga chojninga:

–Be yoquirogué Bílha enga asa ejode. Ja seca batique tṍraji uaté enga a chopise jne jeta yabipísi u. Enga a quene yatique cuse to jne ome uaté.–

4Enga jé u uje Raquel jno darogué údi aja Jacob enga chojninga: "A bacoté tu uaté jne iji quedéjnarique jne ome yu." Enga jé u uje Jacob chisa Bílha ejode to. 5Enga jĩraque jeque uaté enga ica base enga diyoqui to. 6Enga Raquel chojninga: "A yipésu yocabi i jne enga a yĩ́care Dan aja to jne. Chamáñaje Dupade tangári yicatecãraitigade gu enga a chojninga: "Jé tiógara ujeta Raquel atique cuse to."

7Mu iji abi uté quigade enga jequepo Bílha to rĩ enga ica base enga diyoquíapo rĩ. 8Enga Raquel chisasi to enga chojninga: "Disabi suti a i u Neftalí jne. Chamáñaje yẽro jecucha ga chietáyime yu, mu e yujnué gai uje e yabode cuse to."

9Mu Léa chimo to uje que jequepo rĩ ga chisiapome darogué ome Jacob to rĩ ujeta chopo dacoté iji rĩ iji quedéjnarique. Jecute Jacob chisa Léa irogué Zílpa ejode to. 10Enga Zílpa jĩraque jeque enga ica base enga diyoqui to. 11Enga Léa chisa darogué Zílpa abi to enga chojninga: "A yetotiguérique pijoque jne ome yẽro uje yabi e cusapo rĩ. Enga a yĩ́care Gad aja uté jne."

12Udojo quigade enga Jacob chisapo Zílpa ejode rĩ enga jequepo rĩ. Enga ica basapo rĩ enga diyocape rĩ. 13Enga jé u uje Léa nínapúsu re enga chojninga: "Yirasépise yu. A yujodie chequei jnese irasé re ome yu jne uje yabode e jiei ore. A yipésu disabi suté írique to jne enga yĩ́care Aser aja jne."

14Enga chise diri nanique uje Léa abi Rubén qué chisõre iji dati uje déji ore irógode gari uje ore na dacade trígo. Enga chimósi porabidie uje chajnasi jnumi uje adie cho cocho-cochógaja jnumone. Enga na adie enga chimáta enga jé u uje jno údi aja daté. Enga adie udire i tu mandrágoras nanique. Mu uje Raquel chimo adie enga catecã́ri nero enga chojninga:

–Be babi yuguedie udire pore adie uñáringui ga yagu to.–

15Mu Léa chajnai nena enga chojninga:

–¿Gotique gu ome ua ica uje bajna yabai iji yari ica? Enga e bapotapo rĩ yabi yuguedie pore adie jetiga agu to.–

Mu Raquel chojninga:

–A yagu babi yuguedie pore adie uñáringui enga a jé u jne jetiga yiroque Jacob aja ua iji dejai gajiné ujetiga moji bari iji dejai.–

16Enga e dejaque enga jé u uje Jacob chajníji dejnai enga Léa chachai iji garani. Enga catecã́ri enga chojninga:

–Amóji yari jne iji dejai gajiné. Uje bacoté Raquel jé urúo que uje tagu yabi yuguedie mandrágoras adie que. Cachi yo boré iji bacoté que uje yujuéga adie udire ome.–

Jecute Jacob nóna Léa enga jé u gajiné uje chisa ejode iji dejai. 17Enga jé u uje jequepo Léa rĩ, ga abi base enga e chejna yijmanai abipísode. Enga Dupade tangaripísi Léa icatecãraitigade ome re uje que atique cusapo diríca rĩ. 18Enga Léa chojninga: "A yipésu yape ejábi sudé írique jne enga a yĩ́care Ísacar aja jne. Chamáñaje a Dupade irasique yisocai ica gu uje yisi ome yirogué ome yabai ica enga e tẽrapo yu rĩ ome yabipísi."

19Mu Léa jequepo rĩ enga ica base enga diyoquíapo rĩ enga abipísode e chojmára iji yijmanuñai. 20Enga Léa chojninga: "Dupade gueranámi suté ome yu jecute yirasépise yu ome suté. A picota yu jne ome yabai uje yabode e chojmára iji yijmanuñai. Jecute a yĩ́care Zabulón aja yababi sudé jne."

21Enga Léa jequepo rĩ mu ica base enga diyequé ica tuaté, enga daté chĩ́care Dína aja uaté.

22Mu Dupade que chicadígui Raquel gotique. Mu chudute icatecãraitigade enga chiqueta iji úringa aberé, enga abode cuse to. 23Uje Raquel ape bajai base enga chojninga: "Dupade e chĩro yajegátigade ome yúringa aberé. 24Jetiga Dupade ajéo enga juégapo yape uñeque ome yu rĩ." Enga jé u uje chĩ́care José aja dape bajai nanique.

Labán chetaque Jacob áyipiedie nanique uje pota chajniapója dai uniri rĩ

25Raquel ababi José basosi nanique enga udojo quigade u nanique uje Jacob catecã́ri Labán enga chojninga:

–Apota doi ome yoque enga yajningopója yuniri rĩ. 26Enga ajuéga ome yabode, yacotedie ore ga ore nóna yu to. Bamo uje e yimate ore oredie diríca uje yiji baroquéode. Baraja uje yejna yetotiguei aja baroquéode, ga jé tiógara ujetiga aroque yu aja doi ga e yico.–

27Mu Labán chetaque áyipiedie enga chojninga:

–Ácarabíji yocari iji de to. Uje yicatecã́ri daijnane ome enga ore chingome yu uje Pangarádejnai chatapísaja yu iji de ome ua, enga cuchade déji yu gu ua, uje Dupade chátaja ua gu. 28Ácaripísiji de. Ango yu bajegaitígo cucha ga yisi ome ua jne, enga yo boré jne ome basatígo cucha iji yiroquéode.–

29Enga Jacob chajnai uruode enga chojninga:

–Barajapise yisocade rĩ uje que yujuseque bachidedie enga yañurupúsu guio gatuaque. 30Barajapise to uje yise ua nanique ga qué garósi bachidedie nanique, mu e jiépisi bachidedie. Enga baraja uje Pangarádejnai u uje chatapísaja ua enga e yirajágo uje chátaja ua. Yirasique yu uje cuchade déji ua jnese, e mu a jé bajegaidi u to jõ ujetiga cuchade déji yacotedie, yabode ore uyoque to.–

31Mu Labán chojninga:

–Be ga angome yu bajegaitique cucha jetiga yisi ome ua, enga ácariji yocari to jne.–

Mu Jacob chajnai uruode enga chojninga:

–Jé dóji á. Ca o yoré jne. Mu a jé yácariji de jne, enga a jé yirote bachidedie áyasai jne. Enga gusu jeta be yáyipiedie quigode jne. 32Jé iji de diri enga ujetiga apota enga a yimáta yajnéringuiji bachidedie ujade. Iji bachidedie áyasai enga yijnime yajnéringuiji jeta utatai, jé basa erámoro quedéjnane enga yijnime ĩrararéringuiji jetiga ore uruchachárigo odobe iji ore ujade, jeoga uruchachade umarejna iji ore ujade. Enga jecucha ate jne jeta yachia ĩrararéringuiji bachidedie ujade. 33Yigaidi tu gu ujetiga yachidedie ĩrararẽ́ uéguei enga araja enga ca otigase yu jne jeta ca aguhéta bachidedie yibai. Yigaidi tu gu ujetiga amo yachidedie uñáringui jetiga ca ĩrararẽ́i enga jĩraque baraja uje bachidedie u. Yigaidi tu gu ujetiga íjnoque iráradie enga yatire babai enga bajnepo rĩ.–

34Enga jé u uje Labán chajnai uruode enga chojninga:

–Jé areque baruode.–

35Mu uje Jacob, Labán e ore cha ore catecã́ri ñane ga Labán chayóji dachidedie yui enga jĩraque chijnime áyasa choquíode uje ĩrararãcho ujade, enga chijnimápo erámoro quedéjnanie to rĩ uje iráradie odóbei iji gachidedie ujade, enga chijnimápo áyasa utatadie iji ore ujade jnese. Enga chojningame dajnacarode ore:

–Boyo, yico udire údi jne, enga yingarángo jogatique jne iji sañeque ga arocho iji ta jne jogatique.–

36Enga jé u uje Labán ore jno dachidedie áyasai uruchacharẽi údi enga ore mochádode gadioque uje ore jno údi ga jé u uje ore pésu jogadi iji ta.

Mu Jacob jé chácariji gachidedie jogate bajai enga qué chirote joranie iji. 37Enga jé u uje Jacob doi poridie jmanecade iji caningóronie enga chaquesu enga chujñúngaja eruéode ujetiga uode cuse aja dajesúode jeta pijoque porororinguei jé aja perupíringai iji jnese. Enga ujñungunguenie pore ore íode u udojo: álamo, aja alméndro, aja castáño ore. 38-39Enga chimate ga jé u uje pésu iyoyai tiji poridie jmanecade iji darodedie áyasai agapi yui uje ore chójija ome yodi. Enga gaidi tu gu ujetiga choquíode tungarája chequedíe iji uté enga ore chajire ujñungungone pore jmaneca enga ore abode base enga ore cho ore ujñungungone pore jmaneca isocade. 40Enga ore abode, abidie ore basapo rĩ enga jé u uje cãrapo ore abode jogadode ome Labán gachidedie ore rĩ, enga chicha ore aja Labán gachidedie tiógarei uje utata, jeoga uruchacharẽi ore iji taningai. Enga Jacob jecucha ga isocai tu uté uje cãra dachidé uruchacharenie jogadi, enga ore quérã, enga jiépisi ore. 41Enga Jacob chajiripise dachidedie uje ore chóji yodi. Enga chimo choquíode uje querújnapiso ujetiga tungarája chequé enga doi dajñungunguenie pore jmanecárique caningóro enga chicháji iquei. Gaidi tu gu ujetiga abi base jne enga chopise choqui tuté uje uruchacharãque ga querúpise. 42Mu chimo dachite choqui uje ajámape enga que chicha dajñungúi pore jmaneca aja iquei to. Enga ore ababode basosi enga Labán gajnenie u uje íjnoque uruchacha ajámamone, jé basa abode base enga querújna enga jecucha uruchacharãque enga Jacob gajnecho. 43Enga jé u nanique uje Jacob chise dáringai atáguiji dasocade udojo quigade. Enga gachidedie áyasai quérã nanique enga jiépisi ore to, aja burica quedéjnane to rĩ, jé aja burica quedéjna uñane to rĩ uje ore íode u caméllo to. Jé aja irógode, iróguedie jiépisi ore to.

Currently Selected:

Génesis 30: Ayore

Highlight

Copy