Génesis 31

Uje Jacob chimo uje Labán uredie e niji enga enochai pati enga jé u uje pésu dáyipiedie ujetiga chajniápo aja daniri rĩ

1Mu Jacob chiraja uje jecucha ga Labán ujnacarode ore cho chere chere chere ome. Enga ore chojninga: "Ugúcharã́que Jacob gu uje chijna yocai gachidedie iji gari." 2Enga Jacob chimo to uje Labán uredie e niji enga enochai pati rĩ. Enga jecucha ga enochai pajnota nanique iji taningai, mu quigade ga enochai pati enga uredie nijiápo rĩ. 3Enga jé u nanique uje Pangarádejnai Dupade catecãrápoi Jacob nanique rĩ enga chojninga:

–Ajniápo aja baniri rĩ enga ajniapója bayé, ore iji ore uniri te rĩ. Enga a yijína ua jne aja bajesúode.–

4Enga jé u nanique uje Jacob tibidi dacotedie, Léa, Raquel ore enga chojninga:

–Abáchoi yu iji yirodedie áyasai jogadi tudé. Yipota jeta yicatecã́ri uaque jnese.–

5Uje ore chise enga jé u uje catecã́ri ore to enga chojninga:

–E yimo uje uacai enochai que pajnotápo ome yu rĩ. Mu uacai enochai dosója yu, mu yai angureni Dupa jecucha ga nóna yu aja quedéjnane. 6Mu uacarajáyopise yisocade uje yirodípise uacai gachidedie iji dirode jnese. Que yimoque dínique uje que yujuseque gachidedie. 7Mu uacai ga jecucha ga chãra yu to, enga que doi dáyipiedie ome yajnenie áyasai. Jecucha ga chécãre, chécãre dáyipiedie. Mu Pangarádejnai Dupade chirota yu gatuaque enga que toc ujetiga uacai chijnime yãrírique. 8Enga chise dirode uñane enga chojningame yu: "A bajnetígo u jne ujetiga odóbei irárarigui iji yachidedie ujade." Mu chimo uje base abidie udire enga odóbei iráradie jnese enga doi enga e chécãrapo dáyipiedie quigode ome yu rĩ, enga chojninga: "Bajnetígo a u jne ujetiga uruchachade umáño aja dajesúode." Mu chise diri uje abode basapo rĩ enga uruchachade umáño aja dajesúode jnese enga jé isoca uje chécãre dáyipiedie quigode. 9Cho ujetiga Dupade pota jeta chirota yu ga chijna Labán gachidedie iji gari gatuaque enga chisi ome yu.–

10Jacob qué jnopo daruode údi ome dacotedie ore rĩ enga chojninga:

–Yĩ́cara ica ga yocachite choquíode e tungarája chequedíe iji yurigode ica. Enga uruchachai póroro chayo uñane gai ga utataringuei déji ajéode. Uñane enga odobe ore uruchachade, jé basa uñane ga uruchachade umarejna aja dajesúode. 11Enga yudute darade ica iji yurigode uje chĩ́care yi ica, enga Dupade iroque gaté unirísõre ica. Enga yichajnai ga yojninga: "¡Yugúsiji de á!" 12Enga Dupade iroi uté catecã́ri yu ica enga chojningame yu: "Jé cajire to choquíode e ore tungarája chequedíe. Bamo uje ore uruchachade cuse jnese. Yimo gu Labán urupatáringane ome ua, jecute yipésu áyasadie ujetiga uruchacharẽ́ ore abidie, abode ore jnese ome ua. 13Bacatecãraini Dupa uyu uje yiqueta yu aja ua ica iji bamochádi Betel ica uje bacáji Harán udé yui ica. Yojningai tuté u uje basingare cucarané ica enga bójnepo aceite aja gai to ica rĩ uje basi ome baru iyiejájnane ome yu iji uté ica. Bo ga acáji puniri uté uje babatigai tu uje babasíji baté nanique iji taningapísi.–

14Uje Jacob cha catecã́ri enga acotedie Léa, Raquel ore chajnai uruode enga ore chojninga:

–Ejẽ́, yico jne. Chamáñaje que cuchárique déji yoque ome yocai uté gu. 15Bamo uje yocai que ajéngome yoque ga que chajire gadórique, cho ayoré quedéjna iji yoque gu. Bamo uje cho dagúcha iji yoque nanique enga doi yocoredie ome ua. Doi oré tome yoque ga yisago ua nanique, ga quedéjna isocai ome yoque. 16Enga jé tiógarapísa uje Dupade chijna yocai gachidedie iji gari enga chisi ome yoque ujetiga urodie, ájnamone ore yagutíyangome udire. Enga jé bepísi Dupade ajegaidode cucha ome ua, Jacob á, ga yijínango ua jne.–

Jacob jnoji ore uniri Padan-áram enga acotedie, abode, irógode, iróguedie, gachidode ore nóna jnese aja dajesúode

17-18Ga Jacob e pésu dagúchade aja ñane jeta ore chajni dai Isaac gai iji puniri Canaán uje dayé idai tu gu. Enga abode, acotedie ore choru burica quedéjna caméllo uñane, jé basa uñanie chijnoque ore ugúchade enga chedu iji dabáyode. Enga Jacob gachidode cucha uje cãra rome ñane ore nóna ore aja ore ajesui, uje Labán guẽracho ica uje Jacob doi iroquéode ica iji ore uniri Padan-áram. 19Labán e déji siñeque enga idája iji daguíjnai uje qué chaquesu dachidedie acarane, enga jé u uje Raquel toria ayoré gajnúone iji iguíjnai ajei. 20Enga jé u uje Labán qué déji ta ga Jacob chojningame dacotedie: "Boyo yico, ga yico uje cáma chimo yoque." Enga jé u uje Jacob pógu dacoringai ome araméogosi Labán nanique. 21Ga que noñome dagúcha uñeque mu cho tujuru aja dajesui. Enga ore chise tié jmané uje i tu Éufrates enga ore chaquesu ga ore chicai uéchai enga ore chise cucarãte oroné tuijnamié uje tuijnai cho jñuque, jñuque, jñuque. Enga ore uniri uté i tu Galaad.

Labán chajna Jacob ore nanique uje ore jno

22Enga ore mochádode e gadioque iji ore quigade uje Labán chudute uje Jacob ore jno. 23Enga jé u uje Labán tibidi dacayade jnanío enga ore chajna ore. Mu ore mochádode e gare iji ti yijmanuñai uje ore chise ore iji cucarãte oroné tuijnamié Galaad. 24Enga araméogosi Labán e chirõre Jacob ore mu e dejaque uje guedé eruei jé u gu, enga moji guedé eruei. Ga jé u gajiné uje Dupade chiqueta raja Labán uté iji mochádi. Enga catecã́ri enga chojninga: "Labán, angári yuruode udojo. Ujetiga eso Jacob dirome enga barúrigo ca dosója jne."

25Dire uñai enga Labán e chise Jacob uje qué ore déji darengúi tiji uaté, cucarãte oroné uje i tu Galaad. Enga Labán, jorane ore moji ore irengúi to. 26Enga Labán catecã́ri Jacob enga chojninga:

–¿Gotique gu a uje que ango ua aja yoque diríca uje babo diríca? Cho jetiga babé pocaningárique diríca ga basagué yurodie aja bajesui diríca. 27Bãra yu diríca uje que angome bacoringárique aja yu diríca uje babo. Enga bo chugúperone ga baboji yijmainie ¡bu! diríca. Ujetiga angorása ua aja yoque diríca enga a yipecorásu yoquininaquérique diríca ome ñane. Enga a yoquirógode a ore chujérase degode diríca enga ore chijñecárirásaja. 28Uje que angoño uágaja yoque enga uacaboyo ¡bu! diríca enga que yagábu yurodie uredie, jé aja yájnamone ore. Ise ga áyipie eyuque ua diríca uje que ango ua aja yoque diríca. 29Yáyipie dorási pocaningai ome uaque diríca, mu bayé angureni Dupade catecã́ri uyu diríca iji yimochádi tiji uacaquigade enga chojningame yu: "Labán, jé ca baruode dosója Jacob jne." Jecute yiya yájningai ome uaque. 30E mu cucha uñai qué déji yu ome ua. Yiraja uje unérirase bayé yui jeta ajníño gai iji uniri mu uacoriayo yangurenone ayoré gajnu uñane to ga que yirajapise uacasocárique gu uacasocade udore uje uacapótayo yangurenone udore ayoré gajnúo.–

31Enga Jacob chajnai Labán enga chojninga:

–Yipógu yicoringai diríca gu uje yitodo ua diríca. Ga yojningame yu diríca: "A chiraja yicoringai enga a chãraque darodie ome yu jne jeta ore nóna yu."–

32Mu Jacob chojninga:

–A yijorane udore uñeque oricho bangurenone ayoré gajnúo enga a yujégo orisónique jne. Be ga ajire yocugúchade jnese enga ajna bagúchade uñeque jeta esíji. Enga yocacayade jnanío a ore chiraja jne ujetiga esíji uñeque ugúcharigo ajénique.–

Mu Jacob que chiraja uje acoté Raquel oricho ayoré gajnúone udore.

33Enga Labán chucué iji Jacob iguíjna cárpai údi bajaque enga chase ore ugúchade iji ajei jnese. Ga jé upome Léa iguíjna cárpai údi to, chase ore ugúchade to aja dejode, jé aja Jacob acotedie iróguedie ore ugúchade rĩ. Mu que chise dacuegode ayoré gajnúo iji ore ugúchade. Uje e cha chucué iji Léa ugúchade, ga dopoi rĩ Raquel, orugúchade to. Enga chacája Raquel iguíjna cárpai údi to. 34Mu Raquel e pógu doridode ayoré gajnúo iji iquei uje cáma chase ugúchade. Enga uaté oruti caméllo charipi déji iguíjna cárpai údi to. Enga chicha ayoré gajnúone udore aja ajei gatei enga chácariji gai. Enga Labán chase ugúchade jnese aja dejode mu que chise cuchárique. 35Enga jé u uje uro Raquel catecã́ri dayé enga chojninga:

–Iapá, ca bajei dotárome yu jne uje que yachai ua que iji yiguíjna piagoi. Chamáñaje iyorẽ́ yu gu iji guedosi tudé. Jecute qué yácariji yiyaridi tudé.–

Jecute Labán qué jnopo rĩ enga chasápo ore ugúchade jnese rĩ iji ore irengúi údode, mu que chise dacuegode ayoré gajnúo. 36Enga jé u uje ájningarãque Jacob enga catecã́ri Labán enga chojninga:

–¿Ama yibárique cucha déji rique ome ua ya? ¿Ama yisijnaringuei cuchadaté ome ua ya, uje bajna yu ga ajérase uyu a? 37¿Mu ese bacuegode ayoré gajnúo iji yocugúchade uje base yocugúchade aja bejode a? Bamo yocacayade jnanío iji yoquejode arĩ́e, enga ore chingo yoquibáringome yoque, jeta diquiyáguiji yocugúcharique. ¿Ama bayoguei tu uje bajna yoque bisideque? 38Cachi yejnanie sequerei e jiépisi iji bari enga chise 20 años iji bari uje yañurupúsu bachidedie áyasai guio, enga que uñáraque ataque carujnáji. Ga jé chopome erámoro quedéjnanie rĩ uje ore abode base gatuac, tuaque to. Enga que yujé bachitique áyasa choqui enga yagu yitique ãrírique uje yugúsi bari ica. 39Uyu ga que yo barógode ore uje a ore chise cucha potéraque iji bachidedie ga ore chisi ome ua ga ore chojninga: "Cajire to bachidé, cuchárique tagu ga ca o yijnose carubi oré iji jne," ore chojningame ua. Mu uyu ga a yise cucha potéraguiji bachidedie enga yo oré iji yachidé enga yisi ome ua gatuaque. Ujetiga uñeque toria yirodedie bachidei iji dínique, jeoga dejátique enga a jecucha batai yu ome udire oredie to. 40Enga chise dirode uñane enga yo yujuñame yu ome baroquéode. Enga guedé ojodie chujé yu iji dirode uñane iji baroquéode, jé basa mongone, tejnuringane chujé yu iji dejade uñane iji baroquéode rĩ, mu que cucha ome ua. 41Ga yejnanie sequeré iji baguíjnai chejna ayoré chojmára iji baroquéode, mu que añuru yio gotique. Enga jé chopome barodie rĩ, que asíome ore ome yu bisidec. Basíome ore ome yu gu baroquéode enga sequeredie chise 14 años ome barodie udire ore ome yu uje basíome ore ome yu. Jé chopome yachidedie udire rĩ uje sequeredie chojmára iji ti yijmanuñai uje basíome uruchacharenie ome yu ica uje bo yisagode oré. Jecucha ga bécãre báyipiedie aja quedéjnane ome bachidedie uruchacharenie nanique enga bojninga: "A bajné jne uje odóbei iráradie," jé basa ga uje odóbei iráradie base ga e bécãrapo báyipiedie rĩ enga bojningápo rĩ: "A abidie base jne enga bajné jne uje uruchachade umáño," mu base enga iráradie umare enga e bécãrapo báyipiedie quigode rĩ. 42Ujetiga ca yátajasṍri turásu yáqui casica Abraham angureni Dupa, uje yai Isaac angureni u to, enga a yijírase diríca ga yedorase yijmainie aja yajesui. Uje que bacaniratiguei u uje basi ome yachidedie uruchacharenie ome yu, mu Dupade u uje pésu bachidedie uruchachade iji ajéode enga chisi ome yu gatuaque. Uje jecucha ga bécãre uruchacharenie ome yu gu, mu base ga uruchacharẽi enga bécãrapo báyipiedie quigode rĩ. Mu Dupade chiraja yu iji baroquéode jmainie uje jecucha ga yejnáreque yu ome badode udore, jecute uruode dosója ua iji dejai tuqué iji bamochádi tuqué.–

Jacob, Labán ore chisi ome daru iyiejájnane ome ñane nanique

43Mu e Labán chajnai Jacob uruode udore nanique enga chojninga:

–Cachi bacotedie u yurodie, ga yájnamone jé upo babode rĩ. Ga jé chopome rĩ uje yachidedie jé upo bachidedie rĩ. Yocajirigode cucha iji uacarengúi tudé jé yugúcha jnese. Bamo uje que toc ujeta yijṍcarome yurodie, yájnamone udore. 44Jecute be enga yisígo yocuru ũrepísome ñane ujetiga cuchade udojo doi jnumone ome ñane enga yocajéode chopo sere ome ñane jne rĩ. Enga ca yicadíjoi yocuru ũrepísode udore ome ñane, enga a jé ca yocajéode dotãrapome ñane jne rĩ.–

45Enga jé u uje Jacob jno ga chisa cucarané ga chisingare aja gaté enga catáji gaté. 46Enga Jacob tibidi dajorane enga chojninga:

–Beyoi cucaranenie enga ajéyo aja ñane gai enga apéso unéraque, enga a yajico udire jne enga gajnui tu uje e pajesereringai déji yógome ñane.–

Enga jé u uje ore doi uruode enga ore doi cucaranenie enga ore pésu uné. Enga jé u uje Labán, Jacob ore urasade jnese ore chácariji ejode jnese enga ore taguíji ñane gari jnese. 47Enga Labán, Jacob ore pésu cucaranenie uné i nanique enga "Pajesereringai Gãrapiétodie" u ome ore nanique. Mu Labán, Jacob ore uruode cãra rome ñane nanique. Jecute Labán chĩ́care "Jegar Sahadúta" aja nanique, jé basa ga Jacob chícãre "Galaad" aja nanique.

48-49Enga e ore cha chagu enga Labán narare enga chojninga:

–Yoquipesudedie cucarané uné imoi tu ome yoque jnese uje yiyágo yocájningane ome ñane enga a ca yipécopo ñane ujuredie rĩ.–

Ore chĩ́care Galaad, Mízpa aja cucarané uné uaté gu uje uruode udore qui tu jnese gu "piminingásõre." Ga jé cho to Labán uruode to nanique uje chojninga:

–Uje a idája yógome ñane jne mu Pangarádejnai Dupade a timíninga yógaja quedéjnai jne iji yocajesúrigo erámio ujetiga ũré yoc, jeoga taque yoque ome yocuru iyiejájnane ome ñane uje yisíngome ñane iji pijogadi tudé. 50Mu ujetiga gajnareque batique ome yurodie uñáraque jne, jeoga apota óji chequé unejángueraque gari iji uñáraque ejórique, enga a ca yimo ua jne, e mu Dupade timíninga ua ga chimo ua jne enga a cho dajuñame ua to jne.–

51Enga Labán qué jno daruode údi gaté rĩ enga chojninga:

–Cajire to yipesudedie cucarané uné jé aja yisingara cucarané to rĩ. Enga udire imoi cuse ome ayoré gárode uyoque. 52Bamo uje barasade déji cucaranenie uécha uñai, jé basa ga yugúcoi uécha uñai ga déji yocujai. Enga a ca uñeque chicáji cucaranenie uéchai jne, jé aja barasade, yurasade uyoque to rĩ. Bamo uje yichago cucaranenie udire aja yocujai. Ujetiga gosi chicáji cucaranenie uéchai enga pocaningane a déji yógome ñane jne. 53Enga yocáqui casodica, Abraham, Nacor ore, ore angureni Dupápisi a chimo uyoc uñeque jne jetiga yocuñeque chicáji cucaranenie uéchai enga a chiraja gosi jne uje bai tu yoquijocaningane ome ñane jne.–

Enga Jacob chajnai uruode enga chojninga:

–Yai Isaac angureni Dupa a chiraja yúringai ũrepise jne uje a ca yurasade yocuñeque yicagóji cucaranenie uéchai jne.–

54Enga Jacob doi dachidedie uñanie enga tẽrame Dupade iji ore jogadi uté iji cucarani ójo. Enga jé u uje tibidi dajorane enga ore taguíji ñane gari iji uté. Mu Labán que ore jno míraque iji darengúi mu ore taque to iji uté enga ore moji darengúi jnese, Labán urasade, jé aja Jacob ore urasade ore jnese.

55Enga chise dire uñai enga Labán doi darodie, jé aja dájnamone ore enga tagu ore uredie jnese. Enga jé u uje chingo daru ueradéjnane ome ore ujeta ueradéjnapise ore aja ore ajesúode. Enga jé u uje Labán e chajni aja daniri enga e ore cho jmíti, jmíti ome ñane, urodie, ájnamone ore.

Currently Selected:

Génesis 31: Ayore

Highlight

Copy