Génesis 29

Jacob chise puniri Harán, enga chácariji daquerámi gari iji uté nanique

1Enga Jacob e jno iji dayaridi uje catecã́ri Dupade iji enga chicáji punire uñai uje déji guedé garani yui.

2Enga chimo ore erui iji te enga áyasadie déji ejode, enga gadioque áyasadie uáguedie iji ejode. Enga áyasadie irodisórone ore chimáta darodedie áyasai iji ore erui ejode gu jetiga ore chóji to. Enga Jacob chimo uje cucarané cuchabé chaco ore erui gai. 3Enga uje áyasadie irodingórone ore chise ore erui jnese, enga jé u uje ore chátaja ñane ga ore chisa cucarané jnese ga ore chamurase. Enga jé u uje ore chijnime yodi ome darodedie áyasa pojójnai to. Enga ore irodedie e chejna dayádode enga jé u uje ore chacopo cucarané ore erui gai rĩ.

4Enga Jacob catecã́ri ore enga chojninga:

–Yijorane uaque á, ¿Órañoji rique a?–

Enga ore chajnai uruode enga ore chojninga:

–Yórangoji yoquidai Harán que.–

5Enga Jacob catecã́ri ore ome daquerámi enga chojninga:

–¿Ama arajáyo jnani jogatique a uje i tu Labán, uje uté dai casica i tu Nacor ica?–

Enga ore chajnai uruode enga ore chojninga:

–Yirajágo arĩ́e uté jogadi.–

6Enga Jacob chojningame ore:

–¿Jé uajate a?–

Enga áyasadie irodingórone ore chajnai uruode enga ore chojninga:

–Ejẽ́, uajadipise. Jé cajire to, bojningai tuté uro Raquel e di darodedie dayé áyasai údi to.–

7Mu Jacob catecãrápoi ore rĩ ome ore irodedie áyasai enga chojninga:

–Quedéjna uacasocai. Guedé qué idája mu jé uacamácho uacarodedie aja piedie. Omi tu ujetiga ore chejna dayádode, enga boyopo ore údi rĩ aja garai jeta ore tagupo dabosode tiji rĩ.–

8Mu ore chajnai Jacob uruode enga ore chojninga:

–Guedé qué idája mu jiei yoquirodedie áyasai gu, enga yiroco ñane iji de uje iménujna joride gu ga yátagoja ñane ome yoquirodedie gatuaque ujeta yuchẽco yodi gai ome ore jeta ore chóji.–

9Mu Jacob, áyasadie irodingórone qué ore déji ñane gari uje qué ore catecã́ri ñane mu neri uro Raquel chise ore iji ñane gari enga chijñaque dayé gachidedie áyasai aja uté to, uje uaté u gu uje jecucha ga chijñaque dayé gachidedie áyasai to iji dirode jnese. 10Mu uje Jacob chimo neri Labán uro uaté enga jé u uje doi cucarané iji ore erui pijnani enga chamurase, enga chijnime yodi ome uaté irodedie áyasai to. 11Enga Jacob chingo raja uaté enga chucu neri uro uré enga jé u uje poji dejode.

12Enga Jacob chojninga:

–Rebéca ujnacari tu yu, jecute bayé abuji tu yu.–

Enga jé u uje neri uro chayo iji dayé yui jetiga chingo ujnomei taja, uje abuji e diji ore.

13Enga Raquel diji dayé enga chojninga:

–Bẽro Rebéca ujnacari di iji yoque.–

Uje Labán chudute uje abuji di iji ore ga chachai. Uje chise enga chisa pajei taja re, enga tagu uré to, enga jé u uje jno údi aja daguíjnai. Uje e ore déji ñane gari iji Labán iguíjnai enga Jacob chatata dajnéone cucha ome ore jnese.

14Enga Labán chojningame Jacob: "Jé ũrepise yu uje yiguiosipísi tu ua."

Jacob chingo Labán nanique uje pota uro ejo Raquel ujetiga chóji gari

Enga jé chácariji neri gari iji iguíjnai iji guedosi chojmára. 15Mu uje ore chejna guedosi chojmarai udé enga Labán catecã́ri Jacob enga chojninga:

–Yiguiose ua mu gajnareque ome yu ujetiga áta yisagode cucha aja yu bisideque. A yimate ua jne ome basagode cucha. ¿Cho rique bapotigáderigui jeta yimate ua ome?–

16Enga Labán urodie gare nanique. Enga bajé i tu Léa, jé basa uña i tupo Raquel rĩ. 17Enga ore cãra rome ñane. Enga Léa omépise ome edodie, mu jõra Raquel u omépise, enga cáputapísiji jnumi uje omépise jnese gu, jé basa uña gusu edodie. 18Mu Jacob irasépise Raquel, jecute chajnai Labán uruode enga chojninga:

–Que yipota baplátadie. Gusu yipota baro Raquel uaté. A yiji baroquéode enga yejnanie sequerei gare iji ti yijmanuñai, enga jé u jeta yóji baro gari.–

19Enga jé u uje Labán chajnai uruode enga chojninga:

–Ejẽ́, ácare iji yocari jne enga óji yuro gari ujetiga bejnanie sequerei e gare iji ti yijmanuñai. Enga que yipota jeta purása quedéjnarique chóji gari, ga jé arec ujeta yoquiguioséjnarique uñeque chóji gari.–

20Jé u nanique uje Jacob e guejnanie sequerei e gare iji ti yijmanuñai uje doi Labán iroquéode nanique. Iyajmaque nanique uje doi Labán iroquéode mu cho jetiga dirode garósi ome nanique, uje chijnorapise Raquel gu. 21Enga jé u nanique uje Jacob tibágui Labán enga catecã́ri enga chojninga:

–Asi ome yacoté tome yu enga yójigoji ñane gari. Chamáñaje e chise yocojninganie sequeré eruei gu.–

22Enga jé u nanique uje Labán tibidi dajorane ore enga pésu dabose unérone uje irasique re uje uro, abai ore chisa ñane jne. 23Enga e ore chejna datigai guesi enga Jacob chajni aja daguíjnai enga chirote dacoté yui iji ti. Ga jé u uje Labán jno daro uña údi aja Jacob uje que ajegaidé tu. Enga Jacob que chiraja uje Léa u, enga que ajegaidé tu gotóraque. Enga e ore moji ñane gari iji dejai. 24Enga Labán jnopo darogue uñáraque údi aja Jacob iguíjnai to rĩ ujetiga doi Léa iroquéode iji to. Enga ore irogué uaté i tu Zílpa nanique. 25Enga qué durasepise enga Jacob chajire damochápasa mu que Raquel u gotique, unejangue ome dajegaidé. Enga Raquel nero urẽja Léa tu. Jecute Jacob chayóji Labán yui enga chise ga catecã́ri enga chojninga:

–¿Gotique gu a uje que asi ome yajegaidé baro ome yu que? Barajapise yu uje yiji baroquéode gu Raquel jetiga asi ome yu, que yi baroquéode gu uaté uje bajna aja yu. ¿Gotique gu a uje bãra yu?–

26Mu jé u uje Labán chajnai uruode enga chojninga:

–Que yoquisocai tu arĩ́e jetiga yocuro ejo e chisa damanique, uje cáma bajé chisa damanique. 27Be ga bejnatígo dire gare iji ti iji yijmanuñai iji uaté gari, enga jé u jne jeta yisi ome Raquel ome ua jetiga bacoté tu to jne. Mu oré tupo jne rĩ jeta bepoi yiroquéode jne rĩ enga sequeredie a garapo iji ti rĩ iji yijmanuñai.–

28Enga Jacob chajnai Raquel dayé uruode enga chojninga:

–A yijiápo baroquéode gaté ome Raquel uaté jne rĩ.–

Enga jé u uje dirode e gare iji ti iji Léa gari enga Labán chisiapome Raquel ome rĩ, enga quene chójipisiji gari. 29Enga Labán chisíome darogue uña tome Raquel ujetiga doi iroquéode to, enga ore irogué uaté i tu Bílha. 30Enga jé u uje Jacob, Raquel ore chisa ñane enga Jacob chijnorapise uaté ome bajé casé Léa. Mu qué chácarapóji Labán gari rĩ ujetiga qué dopoi iroquéode gaté rĩ jé aja sequeredie gare iji ti yijmanuñai. Uje acoté Raquel oré tu gu.

Jacob abode ore íode u udojo nanique

31Mu Pangarádejnai chimo uje Jacob chetaque dacoté bajé Léa. Enga chosõripise enga chisi ome abi tome. Jé basa ga chisi ome Raquel uje aberé uje chiraja gu uje Jacob chijnorapise. 32Enga Léa abi e cuse enga diyoqui. Enga daté chĩ́care Rubén aja uje chojninga: "Pangarádejnai chosõripise yu diríca iji yáyuguhebátigade jmainie. Ise mu yabai a chijnóra yu jne uje yabi e cuse gu."

33Enga Léa jequepo rĩ enga diyoquíapo rĩ enga daté chĩ́care Simeón aja uté enga chojninga: "A Pangarádejnai chudute ore uru gajnaréngone ome yu uje yabai que chijnóra yu gu, jecute chisiapome yabi uñai tome yu rĩ."

34Enga jé u uje jequepo rĩ enga ica basapo rĩ enga diyoquíapo rĩ. Enga daté pésu i enga i tu Leví. Enga uaté chojninga: "Ise ga yabai, yijínangopo ñane gatuaque jne rĩ ujetiga chimo uje yabode e gadioc."

35Enga Léa e jequepo rĩ, enga ica basapo rĩ enga diyoquíapo rĩ. Enga daté pésu i te rĩ enga i tu Judá. Enga uaté chojninga: "A yicotápise Yangarádejnai jne ome yabi udé." Léa abode uñane cusapo nanique rĩ mu idája ore ujai ome ñane uje abode cusapo jne rĩ.

Currently Selected:

Génesis 29: Ayore

Highlight

Copy