San Marcos 14

Reguila le ca nu lo gue ca nu Israel gaxasná uncana utticana Jesús

(Mt. 26:1-5; Lc. 22:1-2; Jn. 11:45-53)

1A chupa ubisaba reasa isía laní nu te láni Pascua, atti ro ca benni Israel ttaxtila nu bittu dia lenna levadura. Ca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés reguila lecani gaxasná uncana qui udaxxucana Jesús. Lacana nna cuentaba uncana xiyya guee dequi benie ttu nu bittu dica unie qui aca utticane. 2Ttiaca lacana nna rácana:

—Bittu unri aná lheꞌe laní-ni qui bittu utsatsari benni.

Ttu nuila rudona seti rure xixxi iqui Jesús

(Mt. 26:6-13; Jn. 12:1-8)

3Atti do Jesús lheꞌe yiesi nu te láni Betania, lisi Simón biꞌini teequinna lábi nu uca lepra. Laca doe go etta nna bisíntteba ttu nuila nojana ttu cantito ancana leni ttu iyya tsee nu te láni alabastro, taꞌa seti rure xixxi daca yaxi lheꞌeni. Seti rure ixixxiha nna ancana gue ttu yaga nu te láni nardo. Nuilaha nna udhalttebana roꞌo canti atta taꞌa setiha, atti bedottebana nua iqui Jesús. 4Ttulhe ca nu sia nía nna bisaꞌattebaquinna. Nianna rátteba loescani:

—¿Biaca güia latti seti nu rure ixixxi-ni? 5Tseerla ttirca bitoꞌo seti-na. Bennarlacana belhi gue tsunna gayua (300) ubisa sina gueonna, qui uteri leni ca benni bittu te guequinna.

Lacana nna riguisalacana nuilaha.

6Ttiaca Jesús ráttebe:

—Nan do gueonna. ¿Biaca unná risále? Nu beni nuila-ni len neti, ancana ttu nu tsee. 7Cumu ca benni bittu te guequinna satíaba tseꞌe ca unná len lebiꞌi. Larcala nna guacaba ugüele ca unná nu reasaquinna nucaxaba raca lele. Ttiaca neti nna läga aní dhoa len lebiꞌi ttu dia lii. 8Nuila do-ni nna benba unná len neti bedaa nu udábana benna. Cumu chi beguꞌu gana neti seti rure ixixxi-na qui chi do tseea igatsia gansi chi uttia. 9Neti nna gualíbatia rpea le, gaxaba lheꞌe ca yiesi seꞌe itúba yies lo yu-ni atta quixxiꞌa ca benni ca tisa quia-ni, quixxiꞌaguaba ca benni nu beni nuila-ni qui exxale benni nu benna.

Judas reguila leni gaxasná unna utena Jesús las ná ca nu utticana Benniha

(Mt. 26:14-16; Lc. 22:3-6)

10Judas Iscariote, ttu ca benni tsiꞌinu rudheti ca tisa ruleꞌe Jesús, güiattebana atta seꞌe ca nu lo gue ca bixxudiha guanne lenna ca nua gue gaxasná unna utena Jesús las ná ca nua. 11Atti bina ca bixxudiha nu rá nua nna beꞌo tsitsia lecani. Laniala nna begüeecana tisa utecana belhi leni Judas. Lana nna udulottebana beguila leni gaxasná unna utena Benniha las ná ca nua.

Jesús lenie ca benni rudheti ca tisa ruleꞌe roque rse gue laní Pascua

(Mt. 26:17-29; Lc. 22:7-23; Jn. 13:21-30; 1 Co. 11:23-26)

12Primerba sá gue laní Pascua atti ro ca benni Israel ttaxtila nu bittu levadura dia lennaha, lania nua rutticana carneꞌe nu gaꞌana gattiha qui rocana laní Pascua. Ca benni rudheti ca tisa ruleꞌe Jesús unnaba tisattebacabi rácabi Benniha:

—¿Gonni raca lelu tsiatu sasía tseetu nu go rseri laní Pascua-ni?

13Laniala nna udhelhe chupa ca benni rudheti ca tisa ruleꞌe re ca biꞌiniha:

—Gualtsia lheꞌe yies-na. Na etiꞌale ttu unbiyuu denojana ttu reꞌe detaꞌa inda lheꞌeni. Lebiꞌi nna sanottele na. 14Atta etaꞌa nua nna gualgásitte nu beaca gueni yoꞌoha: “Aní rá maestruha: ¿Gonni do yoꞌo atta go rsea gue laní Pascua-ni, lania ca benni rudheti ca tisa ruleꞌa?” 15Unnuha nna guleꞌebinna le ttu yoꞌo chupa coa xeni, lheꞌe yoꞌo nu do berupa coa chi do tsee-na lhe chi yapa lheꞌeni lhe. Nía gualusía tsee iyába nu eyasinri gue rseri gori laní Pascua-ni.

16Ca benni rudheti ca tisa ruleꞌe nna biríattebacabi diacabi lheꞌe yiesiha. Lacabi nna guattiꞌabacabi iyába attiba rába Jesús. Nianna benttebacabi rse gue laní Pascua nía.

17Ucaba ela nna bisíntteba Jesús nía lenie ca biꞌini tsiꞌinu rudheti ca tisa ruleꞌe. 18Atti chi siacabi roꞌo mexaha go rse nna unnetteba Jesús re ca biꞌiniha:

—Neti nna gualíbatia rpea le, nuxa ttule lebiꞌi ca nu ro rse lania-ni utele neti las ná ca nu utticana neti.

19Ca biꞌiniha nna useꞌe siꞌittebacabi. Nianna, udulottebacabi ttuttu ttuttubacabi unnaba tisacabi rácabi Benniha:

—¿Si läba netiba nua?

20Jesús becabittebe re:

—Ttu nu sela lheꞌe delo tsiꞌinule niba nua. Unnuha nua rugutuna ttaxtila gueni lheꞌe platu quia. 21Gualíba, neti Benni unbiyuu daa iyyabaaha nna labíaba satea iyába nu chi gaꞌana lo ca sitsi gue Tata Do Iyyabaaha. Ttiaca, ¡carusiꞌiru nu utena neti las ná ca nu utticana neti! Tseerla salíana nua ttirca bittuba ulina.

22Laca siacabi go nna bedaxxutteba Jesús ttu ttaxtila. Dequide begüee xquixaru Tata Do Iyyabaaha, ulhaꞌattebe Benniha begüee ca biꞌini rudheti ca tisa ruleꞌe. Nianna re ca biꞌiniha:

—Gualgo ben-ni. Cumu ben-ni anque cuerpu quia.

23Lenla nna bedaxxuttebe ttu copa taꞌa vinu lheꞌeni. Dequide begüee xquixaru Tata Do Iyyabaaha nna betettebe copaha leni ca biꞌini rudheti ca tisa ruleꞌe. Iyába ca biꞌiniha uꞌuyacabi vinuha. 24Nianna re ca biꞌiniha:

—Benni anque reni quia. Len benni eyaꞌan tsitsi ca tisa cubi chi begüee Tata Do Iyyabaaha len ca benni. Benni nua ilali qui lhá ca benni bittu tsia nitticana. 25Neti nna gualíbatia rpea le, bedá nnanna bitturu iꞌiya inda xixxi gue besuli-na attu libe, axta liba gansi chi bisía sá atti iꞌiya vinu cubi atta rinnabia Tata Do Iyyabaaha.

Rixxiꞌa Jesús Pedro bittu dhi roꞌobi gualí anca bienbi benniha

(Mt. 26:30-35; Lc. 22:31-34; Jn. 13:36-38)

26Dequide bilhaque ttu salmo nna diattebaque lo lhilhi Atta Daa Ca Ya Olivuha. 27Jesús ráttebe ca biꞌiniha:

—Iyábale udhá iquile neti nnela, cumu anába chi dia lo ca sitsi gue Tata Do Iyyabaaha atta rinne benniha re: “Neti nna uttia benni ruyú ca carneꞌeha, lania nna iyába ca carneꞌeha gatti laduba udaxxucana.”#14:27 Zacarías 13:7

28Ráguaba Jesús:

—Ttiaca dequide eyacatia nna lola neti nnerua lole tsiaya daca lo yu te láni Galilea.

29Laniala nna rá Pedro Benniha:

—Masquiba udhequi iyá ca benni seꞌe-ni lu, neti nna läga udhequia lu.

30Jesús becabie re Pedro:

—Neti nna gualíbatia rpea lu, nnela antisla erupa libe ixxá roꞌo berudi-na, lu nna chila beyonna libe bittu ridí roꞌolu gualí anca bienlu neti.

31Ttiaca Pedro nna udú ditibabi rábi:

—Masquiba gattia len cuinalu, neti nna dhiba roꞌa gualíba ancabiatia lu.

Aníaguaba rá iyábacabi lhe.

Jesús rinnee leni Tata Do Iyyabaaha atta te láni Getsemaní

(Mt. 26:36-46; Lc. 22:39-46)

32Bisínba Jesús lenie ca benni rudheti ca tisa ruleꞌe ttu re atta te láni Getsemaní. Nianna re ca biꞌiniha:

—Ni tte gualcuia, laca neti nna tsiaya sannea len Tata Do Iyyabaaha.

33Atti diatteba lenie Pedro lhe Jacobo lhe Juan lhe. Lee nna udulottebe bedú siꞌina lee, bedú guatexxattana lee lhe. 34Nianna re ca biꞌiniha:

—Lastooa-ni nna chi rudú siꞌixxattan nna guannalu chitteba daa elhuttia loa. Ni tte gualtseꞌe. Bittu gaꞌadhile.

35Nianna biriestteba Jesús ttu roꞌo, atti bedútteba xibie axta liba binna loe lo yu. Lee nna unnetteba lenie Tata Do Iyyabaaha unnabe lo Benniha gansi bittuba dica utsiatte elha disa chi daa uyúe. 36Lee nna re:

—Tata xisto quia, lu nna iyába raca guelu runlu. Betsiattachi neti lo elha disa daa uyúa-ni. Ttiaca läga ria aca nu raca lasia, sinuqui nu innába cuinalu unnuhaba aca.

37Atti bequittebe deyye atta seꞌe a tsunna ca benni rudheti ca tisa ruleꞌe. Lee nna níaba guattiꞌe ca biꞌiniha tecabi tiꞌedhicabi. Nianna, ráttebe Pedro:

—Simóni, ¿si tebalu tiꞌedhilu? ¿Si niba ttu ura bittu událu uchíalu bittu gaꞌadhilu? 38Gualebani, bittu gaꞌadhile. Gualnne len Tata Do Iyyabaaha qui bittu dha nu xxegüiha dhi yien le. Lebiꞌi nna gua seꞌebale uchíale, ttiaca cuerpu guele-na bittu rdana uchíana.

39Lee nna dedheyyattebe attu libe güenne len Tata Do Iyyabaaha, nianna redea dacabe Benniha attu libe nu chi re Benniha. 40Atti bequie besine attu libe atta seꞌe ca biꞌiniha, níaba guadittiꞌe ca biꞌiniha dedetiꞌedhicabi cumu de taꞌaxxatta bisiela locabi. Lacabi nna tsaba bittu bería niꞌelhaquinbi bixa innácabi. 41Atti beyonna libe bequie besine atta seꞌe ca biꞌini rudheti ca tisa ruleꞌe, nianna ráttebe ca biꞌiniha:

—¿Si sna tebale tiꞌedhile, redí lele lhe? Chi banca ttonába cumu chi bisía ura atti utecana neti Benni unbiyuu daa iyyabaaha las ná ca nu runi nu lä anca tsee-na. 42¡Chinca gualchadha, gualtsá! ¡Ni nu utena neti las ná ca nu utticana netiha chi dana!

Rudaxxucana Jesús

(Mt. 26:47-56; Lc. 22:47-53; Jn. 18:2-11)

43Sna duba Jesús rinnee, atti chi bisína Judas ttu nu babaguaba leni ca biꞌini tsiꞌinu (12) rudheti ca tisa ruleꞌe Benniha leni ixeru benni, dencana espada lhe yaga lhe. Ca unnuha nua udhelha ca nu anca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés, ca nu teru elha rieni gueni gue ca benni Israel lhe. 44Judas nu utena Benniha las ná ca nua nna chila utixxiꞌenna ca nua gaxasná unna qui eyonbia ca nua Benniha. Lana nna rán ca nua:

—Benni utsá loa xxaganiha, unnuha nua. Lebiꞌi nna udaxxuttele na echele na, tsitsi uxxicale na.

45Cuantusiba bisína Judas atta du Jesús, ráttebana Benniha:

—¡Maestro!

Atti betsátteba loni xxaga Benniha. 46Laniala nna bedaxxutteba ca nua Benniha qui echecane.

47Ttiaca ttu ca biꞌini du len Jesús nía, ulequittebabi espada guebiha uchúbi naga nu riben sina gue bixxudi xeni rinnabiaha. 48Jesús unnaba tisattebe ca benni seꞌe nía re cana:

—¿Biaca dale leni espada lhe leni yaga lhe güedaxxu neti attiba ttu ubana? 49Inqui ttu ttu sába udúa len lebiꞌi lheꞌeliꞌa gue yotu-na güeleꞌen le nna lebiꞌi nna bittu bedaxxule neti. Ttiaca iyába unní raca qui saxxína aca nu chi rá lo ca sitsi gue Tata Do Iyyabaaha.

50Lania nna iyába ca biꞌini rudheti ca tisa ruleꞌe Jesús bexunnicabi, a tturba Benniha bodhaꞌancabi nía. 51Atturu ttu uncuiti guadenorna Benniha, nucuna sunruba ttu lari. Ca nu seꞌe nía nna bedaxxuttebacana uncuitiha, 52ttiaca unnuha nna bedhá bixxi iquini lariha, aníaba ttunttuna bexunnina.

Rutsá du Jesús lo ca nu runi elha uxtisi gue ca benni Israel

(Mt. 26:57-68; Lc. 22:54-55, 63-71; Jn. 18:12-14, 19-24)

53Uchettebacana Jesús guadúcane lo bixxudi xeni rinnabiaha. Nianna, bitupatteba iyárecha ca bixxudi anca nu loha nía, lencana iyába ca nu teru elha rieni gueni gue ca benni Israel lhe ca nu ruleꞌe nu rá lo ca ley bocaꞌana Moisés lhe. 54Pedro nna idittu liba denobi Benniha, ni utaꞌababi lhiꞌu gue lheꞌeliꞌa gue yoꞌo lagüi atta do nu anca bixxudi xeni rinnabiaha. Labi nna níaba udobi rutsaꞌabi roꞌo teha lenbi ca nu riseꞌe rapa yoꞌo lagüiha.

55Ca nu lo gue ca bixxudiha lencana iyába ca nu runi elha uxtisi gue ca benni Israel, tsitsiba reguila lecani bipaxa xiyya uncana gue Jesús qui te roꞌocani utticana Benniha. Ttiaca bittu reselquinna bixa lo niꞌa guee. 56Cumu ixeru ca benni run lecani runcana xiyya gue Benniha, ttiaca läga riría li nu rácanaha, cumu de bitti bittiba anca nu rácana. 57Ttu lhecana nna udulíttebacana ben lecani bencana xiyya gue Benniha rácana:

58—¿Riꞌitu nna chi bienintu rinneonni rána?: “Neti nna uttapa yotu ben ca benni seꞌe yies lo yu-ni, nianna lheꞌe tsunna ubisaba nna elhidha attu yotu subi nu bittu ancana nu beni ca benni seꞌe yies lo yu-ni.”

59Ttiaca niguaba leni unnuha bittu guaxxína nu rácana.

60Laniala nna udulí nu anca bixxudi xeni rinnabiaha lagüi gue ca nu seꞌe nía unnaba tisana Jesús rána Benniha:

—¿Si bittuba ecabilu bixa innálu? ¿Bila rátticabalu gue nu run ca benni seꞌe-ni xiyya guelu dequi runlu?

61Ttiaca Jesús siba uque, tsa läga becabie bixa innee. Laniala nna bedennaba tisa bixxudi xeni rinnabiha Benniha attu libe ráne:

—¿Si lu nua Cristu, Xiꞌini Tata Do Iyyabaaha benni anca leꞌa?

62Jesús becabie re na:

—Agu, netiba nua. Lebiꞌi nna güilabinle neti Benni unbiyuu daa iyyabaaha dhoa daca ladu derechu gue Tata Do Iyyabaaha Benni ra xxeni lee, iláguabinle neti dedaaya lheꞌe ca bea daa iyyabaaha lhe.

63Lania nna, uchedatteba xo bixxudi xeni rinnabiaha de bisaꞌaxxattabinna. Atti ráttebana:

—¿Tsa lärga nurua reasinri quixxiꞌenna ri gue bixa runi unní? 64Cuinaba lebiꞌi chi bieninle rinne güena gue Tata Do Iyyabaaha leni ca tisa rinnena. Lebiꞌi nna, ¿bila rále?

Iyába ca nu seꞌe nía nna bedelha iyyacana Jesús, denua nna ralhaba Benniha gattie.

65Ttulhe ca nu seꞌe nía nna udulottebacana bettu ttu xxencani lo Benniha, lacana nna bedheattebacana loe, atti begüeettebacane, nianna rácane:

—Unne yaꞌa sanga, ¿núnna begüeen lu?

Ca nu riseꞌe rapa yoꞌo lagüiha nna ralhicana gui loe.

Pedro bittu ridí roꞌobi, anca bienbi Jesús

(Mt. 26:69-75; Lc. 22:56-62; Jn. 18:15-18, 25-29)

66Pedro nna níaba dubi liree lheꞌeliꞌa gue yoꞌoha, attirba chi bisína ttu ca nuila riben sina lheꞌe yoꞌo gue nu anca bixxudi xeni rinnabiha. 67Atti bilen nua Pedro dubi rutsaꞌabi roꞌo teha nna bedútteba nuilaha ttulíba begüiana lobi. Nianna rátteba nua bi:

—Anáguaba luu denoguabalu Jesús gue Nazaret.

68Ttiaca Pedro, läga uxí roꞌobi, tseꞌe lolabi rábi:

—¡Läga anca biatia unná! ¡Bittuguaba yua gue bixunna rálha lhe!

Laniala nna biríabi guadhúbi atta do ritaꞌacana roꞌo yoꞌo lagüiha, attirba chi uxxá roꞌo ttu berudi. 69Nuilaha nna bedeláttebinna Pedro attu libe, nianna udulotteba nua rána adí ca nu seꞌe nía:

—Unbiyuu du-ni lhe unnáguaba selunna.

70Ttiaca bedequi dacaba Pedro redenábi bittu anca bienbi Jesús. Sattigarba uca nna redeatteba ca nu seꞌe nía Pedro attu libe:

—Gualíba, ca unnába selalu. Cumu Galilea guaba beaca laslu, nuarca attiba rinne ca unná rinnelu.

71Ttiaca Pedro nna udulottebabi rábi:

—¡Tata Do Iyyabaaha rudettia, läganu unbiyuu rudettile na ancabiatia! Cuina Ben-na unie bixa satea gansi run lasia.

72Unnuhaba rábi dubi, attirba chi berupa libe uresi berudiha. Nianna bexxatteba le Pedro gue ca tisa unne Jesús atti re: “Lu nna chi erupala libe cuesi berudi-na, lu nna chila beyonna libe bittu ridí roꞌolu anca bienlu neti.” Atti bexxale Pedro nu rá Benniha nna uresttebabi.

Currently Selected:

San Marcos 14: zaq

Highlight

Copy