San Marcos 15

Jesús rutsá due lo Pilato

(Mt. 27:1-2, 11-14; Lc. 23:1-5; Jn. 18:28-38)

1Atti chi goaniha nna bitupatteba ca nu runi elha uxtisi gue ca benni Israel, ca bixxudi anca nu loha lhe ca nu teru elha rieni gueniha lhe ca nu ruleꞌe nu rá lo ca ley bocaꞌana Moisés lhe qui unnecana gue bixa anca nu uncana leni Jesús. Nianna bexxicattebacana Benniha, atti uchettebacane guadúcane lo nu rinnabia lá Pilato. 2Pilato nna unnaba tisattebana Jesús ráne:

—¿Si lu ancalu nu rinnabia gue ca benni Israel-ni?

Jesús becabie re:

—Luba chi rálu.

3Cumu de güea güeaba anca nu runi ca bixxudi anca nu loha xiyya gue Benniha nna, 4nuarca bedennaba tisa dacaba Pilatoha Benniha redeane:

—¿Si bittuba ecabilu gue ca unná? Begüiarga, análirba de reru xiyya run ca unná guelu.

5Ttiaca Jesús tsaba bittu unnee ecabie gueni. Larcala, tsitsiba bebanin Pilato.

Rinnabiacana gatti Jesús

(Mt. 27:15-31; Lc. 23:13-25; Jn. 18:38–19:16)

6Atti risía laní nu te láni Pascua, Pilato nna rodilána ttu ca benni te lisiyya, rebeabana nu rucueba yiesiha. 7Lheꞌe lisiyyaha te ttu unbiyuu lána Barrabás lenna adí ca nu betti lenna ca benni atti beon nácani lo ca nu rinnabia gue lo yiesiha. 8Ixeru benni bisíncana unnabacana len Pilato odilána ttu ca nu te lheꞌe lisiyyaha, cumu aníaba labina runna ttu ttu ida. 9Pilato nna becabittebana rána:

—¿Si guarca lele odiláya nu anca nu rinnabia guele-na, lebiꞌi benni Israel?

10Cumu chiba yu Pilato, de lä racaba uyú ca bixxudi anca nu loha Jesús, nuarca guatecana Benniha las náni. 11Ttiaca ca bixxudi anca nu loha nna betsatsattebacana ca benni seꞌe nía, qui innábacana leni Pilato ulhána Barrabás. 12Pilato nna unnaba tisattebana ca unnuha attu libe rán cana:

—Nianna, ¿bila raca lele unia leni nu rále ancana nu rinnabia guele-na, lebiꞌi benni Israel?

13Ca unnuha nna uresiꞌattebacana rácana:

—¡Betá na lo ya crusi!

14Pilato nna rán ca nua:

—¿Biaca nuarca? ¿Bi nu bittu anca tsee beni unní?

Ttiaca ca unnuha nna adílaba uresiꞌacana rácana:

—¡Betá unná lo ya crusi!

15Pilato nna cumu rdacana eyaꞌan tseena len ca benni, nuarca bodilána Barrabás. Dequide chi benna mandadu utín ca soldadoha Jesús, botettebana Benniha las ná ca nu utácana Benniha lo ya crusi.

16Ca soldadoha nna uchettebacana Jesús lheꞌeliꞌa gue yoꞌo lagüiha atta rido nu rinnabia runna elha uxtisi, atti beaxittebacana iyába adí ca soldadoha. 17Lacana nna begucuttebacana Benniha ttu lari xinaa chulha, nianna uluꞌuttebacana ttu corona iqui Benni ancana leni xiqui ya yitsi. 18Atti udulottebacana uresiꞌacana ocadiba rácana Benniha:

—¡Xxeni ra lelu, xa nu rinnabia gue ca benni Israel!

19Atti rinttebacana ttu iyyaxtila iqui Benniha, ruttuttu xxencani loe lhe rudútteba xibicani loe ocadiba runcana dequi rapa cana Benniha respeto. 20Dequide chi bencana Benniha burla nna utúattebacana lari xinaa chulha nucuquinna Benniha, nianna bogucuttebacane ca xun gueeha. Atti uchettebacane dia lencane qui utácane lo ya crusi.

Rutácana Jesús lo ya crusi

(Mt. 27:32-44; Lc. 23:26-43; Jn. 19:17-27)

21Ttu unbiyuu lábi Simón biꞌini beaca lasbi lheꞌesi nu te láni Cirene, dedaabi güiabi ranchu. Labi nua ancabi tata gue Alejandro lhe Rufo lhe. Attiba diabi etebi lo neda atta dia lencana Jesús, bentteba ca soldado duelha guebi ujabi crusi nuja Benniha.

22Uchettebacana Jesús ttu re atta te láni Gólgota, (nu dienna innána: Bega Iqui Nu Yatti). 23Lacana nna begüeettebacana Benniha vinu nu sela nu riria gue tu bibu te láni mirra, ttiaca Jesús läga uꞌuye nua. 24Dequide unnuha nna betáttebacana Benniha lo ya crusi, nianna uyuꞌutteba ca soldadoha bencana ttu nu beleꞌe lo nuxa ca xo Benniha eyoja ttuttucana.

25Ganna merba retin jaa dila nua atti betácana Jesús lo ya crusi. 26Betáguabacana ttu breta iqui crusi atta ta Benniha, nu diaquinna loni bixa lo niꞌa gue betácana Benniha lo ya crusi. Lo bretaha nna rá: “Unní ancana nu rinnabia gue ca benni Israel.” 27Betáguabacana a chupa ubana lo ca ya crusi len Benniha, ttuna betácana lo ya crusi du daca ladu derechu guee, attu nua nna betácana lo ya crusi du daca ladu rabesa guee. 28[Anía liba nna guaxxína nu rá lo ca sitsi gue Tata Do Iyyabaaha atta rinne gue Benni anque Cristu atta rá: “Ca benni nna uncana aca Benniha attiba ttu nu runi nu lä anca tsee.”#15:28 Isaías 53:12]

29Ca nu ritee atta du ya crusi atta ta Jesús nna rudhaca disacane, atti ruttátteba iquicani rácana Benniha:

—¡Anla lu nua rálu dequi uttapalu yotu-na, nianna lheꞌe tsunna ubisaba nna elhidhalue attu libe! 30¡Lä luba ben sanga gaxasná qui lhálu, beadi tte lo ya crusi-na lhe!

31Aníaguaba runi ca nu lo gue ca bixxudiha, ca nu ruleꞌe nu rá lo ca ley bocaꞌana Moisés lhe, lacana nna runcana Benniha burla rácana:

—Güenba bodilána adí benni, ttiaca bittu raca gueni gaxasná uni la labana qui lhána. 32¡Eyadi sanga benni anca Cristu-na, nu rána ancana nu rinnabia gueri riꞌi ca benni Israel, lo ya crusi-na aní lori qui tsia leri-na!

Aníaguaba rudhaca disa ca nu ta lanie lo ca ya crusiha Benniha.

Jesús ridíe elhutti

(Mt. 27:45-56; Lc. 23:44-49; Jn. 19:28-30)

33Desdeba retin tsiꞌinu (12) resá bechulha itúba yies lo yu, axtaba retin tsunna ulha. 34Bisíaba retin tsunna nna uresiꞌatteba Jesús itú iqui itú lee re:

—Eloi, Eloi, ¿lama sabactani? —Ca tisa-ni nna diacanie innáque: Tata quia do iyyabaaha, Tata quia do iyyabaaha, ¿biaca neti rudhequilu?#15:34 Salmo 22:1

35Atti bienin ttulhe ca nu seꞌe nía nu rá Benniha nna ráttebacana:

—Gualudorga nagale, profeta Elíasba biꞌin-na raxi unná.

36Laniala nna bigaatteba ttu ca nu seꞌe nía güiana guadona vinu idí iqui ttu tiꞌa xila, atti bexxicattebana nua punta ttu iyyaxtila, nianna besigattebana nua roꞌo Jesús qui iꞌiye nua. Lana nna rána:

—Gualgüelha sanga na qui ugüiari gansi güisía Elías ettedilabi-na lo ya crusi-na.

37Ttiaca Jesús uresiꞌattebe idisa, atti uttittebe. 38Lari nu daa lheꞌe yotuha nna biredatteba rulha xeaba lheꞌeni, desdeba xequini axtaba xaniꞌani. 39Soldado gue Roma nu banani ca soldadoha nu du atta du ya crusi atta ta Jesús, atti bieninna uresiꞌa Benniha lhe bilenna gaxasná utti Benniha lhe, laniala nna rána:

—¡Gualíba, unbiyuu-naba Benniha anque Xiꞌini Tata Do Iyyabaaha!

40Ttulhe ca nuila nna idittu liba useꞌecabi begüiacabi nu guate Jesús. Lacabi nua lá María Magdalena, Salomé lhe María nan gue José betsi Jacobo nu anca xiꞌin güexxaru guebiha lhe. 41Ca nuila-ni nua guanocabi Jesús atti güequie lo yu nu te láni Galilea, betecabi nu beasanie lhe. Níaguaba seꞌe adí ca nuila dia deno Benniha atti die lheꞌe yiesi Jerusalén.

Rigatsi Jesús

(Mt. 27:57-61; Lc. 23:50-56; Jn. 19:38-42)

42Atti chi ulha sá bispri gue sá redí le ca benni Israel, atti roseꞌe tseecana nu ixuuquinna gue sá redí lecaniha, 43lania nna bebequi reatteba le José biꞌini beaca lasbi lheꞌesi nu te láni Arimatea güiabi guayúbi Pilato qui utena Benni yattiha len labi. José ancabi ttu nu ra xxeni leni gue ca nu runi elha uxtisi gue ca benni Israel. Biꞌiniha nua doguabi ribedabi isía sá innabia Tata Do Iyyabaaha. 44Pilato nna bebanlhabinna atti binana chiba utti Jesús. Laniala nna beaxina soldado gue Roma nu banani ca soldadoha qui innába tisana nua gansi gualí chi utti Benniha. 45Dequide chi utixxiꞌani nua na gualíba chi utti Benniha nna, botettebana Benniha len José. 46Laniala nna guayoꞌo José ttu lari tsee. Dequide belhidabi Benniha lo ya crusiha nna bottubittebabi Benniha lariha. Nianna, güiattebabi guacatsibi Benniha lheꞌe ttu baa nu utenbi do lheꞌe ttu iyyattoo. Atti bettulhuttebabi ttu iyya xeni qui bedheabi roꞌo beleaha. 47María Magdalena lenbi María nan gue José, bilábaquinbi gaxa bigatsi Benniha.

Currently Selected:

San Marcos 15: zaq

Highlight

Copy