San Marcos 16

Beacani Jesús

(Mt. 28:1-10; Lc. 24:1-12; Jn. 20:1-10)

1Dequide chi ute sá atti redí le ca benni Israel, güiatteba María Magdalena lenbi Salomé lhe María nan gue Jacobo lhe guayoꞌocabi ca seti rure ixixxi qui tsiacabi salhuꞌucabi Jesús. 2Dilatte la sá atti redú lo xumanu, chi darba riría tatubisa-na, güiatteba ca nuilaha güennalhi lo baaha. 3Lacabi nna rinnecabi rá loescabi:

—Güelha, ¿núla nua utsilana iyya yaya roꞌo baa-na ganna?

4Ttiaca attirba begüiacabi nna chila bisila iyya re roꞌo baaha, unnuha nna ancana ttu iyya xeni. 5Atti utaꞌacabi lheꞌe belea atta uyuꞌu Jesús, biláttebaquinbi ttu uncuiti dobi daca ladu derechu nucu xo sitsi ttuni guebi. Ca nuilaha nna usttebaquinbi. 6Uncuitiha nna ráttebabi ca biꞌiniha:

—Bittu gasinle. ¿Axxa, Jesús Benni udo lheꞌe yiesi Nazaret Benni betácana lo ya crusiha reguilale? Chiba beacani Benniha. Lärga nurua Benniha te-ni. Gualgüiarga atta utixxacana Benniha. 7Gualeyya gualsatixxiꞌani Pedro, adí ca biꞌini bedheti ca tisa beleꞌe Ben-na lhe, Benniha nna lola lee chi nerue lole die lo yu nu te láni Galilea. Nía liba nna etiꞌalee, attiba chi re lebiꞌi.

8Nianna beríatteba ca nuilaha lheꞌe atta te baaha, deyyacabi ruxunnicabi, rixidinicabi de usquinbi. Ni ttu benni bittu utixxiꞌaquinbi, cumu de rasquinbi.

Jesús beleꞌen loe María biꞌini beaca lasbi yiesi lá Magdala

(Jn. 20:11-18)

9[Dequide chi beacani Jesús, chi daba rani la sá atti redú niꞌa attu xumanu, beleꞌe tte ba ni loe primertteba María Magdalena biꞌini bebee gasi be xxegüi lheꞌe cuerpu guebiha. 10Biꞌiniha nna beyyattebabi guattixxiꞌenbi ca benni güequi guano Jesús. Ca biꞌiniha nna seꞌe siꞌibacabi lhe ribescabi lhe gue Benniha. 11Dequide chi utixiꞌani nuilaha ca biꞌiniha, anca banba Benniha lhe chi bilenbi Benniha lhe, ca biꞌiniha nna tsaba bittu güia lecabi.

Jesús beleꞌen loe chupa ca biꞌini bedheti ca tisa beleꞌe

(Lc. 24:13-35)

12Lenla nna bodileꞌe lo Jesús attu yalee leni a chupa ca biꞌini sela ca biꞌini bedheti ca tisa beleꞌe Benniha, atti diacabi yuꞌucabi neda diacabi ranchu. 13Lacabi nna beyyattebacabi guattixxiꞌaquinbi adí ca biꞌiniha, ttiaca niguaba ca biꞌiniha lä güia lecabi guecabi.

Jesús rocaꞌane sina un ca biꞌini bedheti ca tisa beleꞌe

(Mt. 28:16-20; Lc. 24:36-49; Jn. 20:19-23)

14Dequide lania liba nna beleꞌen lo Jesús iyába sinía (11) ca biꞌini bedheti ca tisa beleꞌe, laca siacabi go yetta. Lee nna utisattebe ca biꞌiniha de bittu ria lecabi lhe de ancacabi benni lastoo tsitsi lhe cumu bittu güia lecabi gue ca benni chi biláquinbi beacabanie. 15Nianna ráttebe cabi:

—Gualtsia lheꞌe iyába ca yiesi seꞌe itúba yies lo yu-ni, gualsattixxiꞌani iyárecha ca benni ca tisa gue Tata Do Iyyabaaha. 16Ca benni tsia lecani neti nna gadicana inda nna godilába Tata Do Iyyabaaha cana, ttiaca ca benni bittu tsia lecani neti nna tsia nittiba ca nua. 17Ca milagru-ni uni ca benni tsia lecani neti: lacana udetticana láya atti ebeacana ca be xxegüi yuꞌu lheꞌe cuerpu gue ca benni, inne guabacana ca tisa cubi utee Tata Do Iyyabaaha len lacana lhe, 18masquiba udaxxucana belha lhe gansi iꞌiyacana venenu lhe lägabi dhacacana, eyacaguaba ca benni rani-na atti uxxúa nácani iquicani lhe.

Jesús reopie iyyabaaha

(Lc. 24:50-53)

19Dequide chi unnee Jesús Benni bananie ri leni ca biꞌini bedheti ca tisa beleꞌe, beopittebe deyye iyyabaaha. Nianna bedottebe daca lhuitta derechu gue Tata Do Iyyabaaha. 20Ca biꞌini bedheti ca tisa beleꞌe Benniha nna, biríattebacabi diacabi riguixxiꞌacabi ca tisa gue Jesús itúba ca nía. Benni bananie ri-naba uca lenie cabi. Leni ca milagru run ca biꞌiniha nna ruleꞌe lo, nu rá cabiha nna ancana nu gualí. Amén.]

Currently Selected:

San Marcos 16: zaq

Highlight

Copy