San Mateo 28

Jesús beacanie

(Mr. 16:1-8; Lc. 24:1-12; Jn. 20:1-10)

1Dequide chi ute sá redí le ca benni Israel, dilatte la sá atti redú lo xumanu, güiatteba María Magdalena lenbi attu biꞌini lá María guagüiacabi lo baaha. 2Attirba ttu nnelaba idíru bixú, cumu ttu ingeli gue Benni bananie ri-naba biꞌiniha guadibi dabi iyyabaaha, ingeliha nna ubigattebabi roꞌo baaha, atti utúattebabi iyya yaya roꞌo nua, nianna udottebabi iqui iyyaha. 3Riguꞌurubi xieni attiba xieni gue ttu edha, xobi nna ancana sitsi chabea ttonísiha attiba beya. 4Atti biláni ca soldadoha ingeliha nna attulade bixidicana de usixxattaquinna tsaba bechulhaquinna attiba ttu nu yatti ucacana. 5Ingeliha nna rábi ca nuilaha:

—Bittu gasinle. Neti nna guayúba, lebiꞌi nna reguilale Jesús Benni betácana lo ya crusiha. 6Lärga nurua Benniha te-ni, chiba beacani Benniha attiba chi re. Gualtárga gualugüia atta utixxacana Benniha. 7Nnanna nna gualeyya dhuti gualsatixxiꞌani ca biꞌini bedheti ca tisa beleꞌe Ben-na, Benniha nna chiba beacanie, lola lee chi nerue lole die lo yu nu te láni Galilea. Nía liba nna etiꞌa lee. Neti nna unníba daya güetixxiꞌen le.

8Nianna beríatteba ca nuilaha lheꞌe atta te baaha, rasbaquinbi lhe reꞌoba lecabi lhe atti bexunnittebacabi deyyacabi güetixxiꞌen ca benni bedheti ca tisa beleꞌe Jesús iyába nu uca. 9Laca de yuꞌucabi neda nna ucaxxetteba Jesús guatsee ca biꞌiniha, nianna re cabi:

—¡Padiuxi!

Lacabi nna ubigattebacabi guattescabi ca niꞌe, atti ulequi xxenttebacabi Benniha. 10Nianna rá Jesús cabi:

—Bittu gasinle. Gualtsia gualsatixxiꞌen ca betsi loesiha, ca benni bedheti ca tisa beleꞌa, qui tsiacabi daca Galilea. Nía etiꞌacabi neti.

Nu rixiꞌa ca soldadoha

11Laca deyuꞌu ca nuilaha neda deyyacabi, ttulhe ca soldadoha nna beyyattebacana lheꞌe yiesiha, guatixxiꞌaquinna ca bixxudi anca nu loha iyába nu ucaha. 12Ca bixxudi anca nu loha nna betupattebacana ttu reba len ca benni teru elha rieni gueni gue ca benni Israel, lacana nna ttuba beseꞌecana boquinna iquicani ugüecana ca soldadoha xenru belhi. 13Nianna rácana ca nua:

—Lebiꞌi nna innále: “Lo rela laca tetu tiꞌedhitu nna bisía ca benni bedheti ca tisa beleꞌe Jesús bettelhánacana benni yattiha.” 14Gansi eyona nu rinnabiha iyába unní nna riꞌitu nna guanneba lentu nua qui bittu bi udhaquinna le.

15Ca soldadoha nna bedaxxubacana belhiha, lacana nna benbacana attiba rába ca bixxudiha uncana. Larcala nna ca tisa unne ca soldadohaba sna rinneba ca benni Israel axtaba nnanna.

Jesús ridhelhe ca benni ria lecanie tsiacabi quixxiꞌacabi ca tisa guee

(Mr. 16:14-18; Lc. 24:36-49; Jn. 20:19-23)

16Iyába sinía (11) ca biꞌini bedheti nu beleꞌe Jesús diacabi lheꞌe yiesi te láni Galilea lo lhilhi atta benie ca biꞌiniha mandadu tsiacabi. 17Atti biláquinbi Benniha nna bedútteba xibicabi loe, ttiaca seꞌeguaba ttulhecabi rulaba lecabi si gualíga Benniha nua. 18Jesús ubigattebe atta seꞌe ca biꞌiniha, nianna re cabi:

—Tata Do Iyyabaaha chi betee derechu len neti, qui innabiaya yies lo yu-ni lhe iyyabaaha lhe. 19Larcala nna gualtsia lheꞌe iyába ca yiesi seꞌe itúba yies lo yu-ni, gualuseꞌe ca benni udheti ca tisa quia-ni, gualugadicana inda lhe. Atti ugadile cana inda nna udettile lá Tata Do Iyyabaaha, lá Xiꞌini Benniha lhe lá Espíritu gue Benniha lhe. 20Gualulheꞌequinna udocana tisa gue iyá nu chi benia le mandadu unle. Neti nna ttuttu sába guadúba len lebiꞌi axta liba atti isía sá lhuxa yies lo yu-ni. [Amén].

Currently Selected:

San Mateo 28: zaq

Highlight

Copy