San Marcos 1

Juan biꞌini rugadi indaha rixxiꞌabi chi daa Jesús

(Mt. 3:1-12; Lc. 3:1-9,15-17; Jn. 1:19-28)

1Ni ridulo ca tisa tsee rixxiꞌa gue Jesucristu benni anque xiꞌini Tata Do Iyyabaaha. 2Lo ca sitsi gue profeta Isaías, rixxiꞌa nu rá Tata Do Iyyabaaha atti unnee rulise Jesús re Ben-na:

Neti idhelha ttu benni nneruna lolu.

Biꞌiniha idhalbi neda guelu.#1:2 Malaquías 3:1

3Biꞌiniha nua ribesiꞌabi lo ttu yu bisi atta nuttu benni seꞌe, nianna rábi:

“Gualeon tsee neda gue Benni bananie ri-na.

Gualdhali ttu neda lhixxa suu guee lhe.”#1:3 Isaías 40:3

4Anía uca nna Juanba biꞌiniha bisínbi lo yu bisiha. Labi nna rulisabi ca benni qui odú xiyyancana, eyadicana inda lhe qui dhi Tata Do Iyyabaaha elha xen lhasi gue ca tulha guecani.

5Iyába ca benni seꞌe lo yu nu te láni Judea, ca nu seꞌe lheꞌe yiesi Jerusalén lhe riacana atta requi Juan. Atti ruxxúa lopicana ca tulha guecani lo Tata Do Iyyabaaha nna rugaditteba Juan cana inda lheꞌe yoo nu te láni Jordán.

6Xo Juan ancana leni itsa xo nimala te láni camello. Nu ridhí lheꞌebi nna ancana ttu yieti. Elha go robi nna ancana nu xixxi iꞌiya lhe nu anca attiba uxxaru lána langosta lhe. 7Labi nna riguixxiꞌenbi ca benni rábi cana:

―Dequide neti nna chi daa attu benni ra xxenru lee atti neti. Benniha nua niba läbi elha ralha iyachua idhasia lo guaracha guee. 8Neti nna sunruba rugadia le inda, ttiaca benni chi dabaha nna ugadie le inda leni Espíritu gue Tata Do Iyyabaaha.

Jesús radie inda

(Mt. 3:13-17; Lc. 3:21-22)

9La laniaguaba nua biría Jesús lheꞌe yiesi nu te láni Nazaret nu re lo yu nu te láni Galilea, die atta du Juan. Nianna Juan nna begadibi Benniha inda lheꞌe yoo Jordán. 10Lagüiba atti dia Jesús reríe lheꞌe indaha nna biláttebanie beali iyyabaaha biría Espíritu gue Tata Do Iyyabaaha dee guadie, anque attiba ttu becha, udoe iqui Jesús. 11Nianna bientteba tsiꞌi Tata Do Iyyabaaha re Jesús:

―Lu ancalu xiꞌinia Benni racatia gueni, neti doa redaca lasia len luu.

Nu xxegüiha runna dhi yiena Jesús

(Mt. 4:1-11; Lc. 4:1-13)

12Nianna uchetteba Espíritu gue Tata Do Iyyabaaha Jesús lo ttu yu bisi. 13Níaba udoe chua (40) sá atta beni nu xxegüiha dhi yiene. Leni ca nimala lisía requi níaba udoe. Ca ingeli gue Tata Do Iyyabaahaba biyúcabi Benniha.

Jesús riduloe ruleꞌenie ca benni

(Mt. 4:12-17; Lc. 4:14-15)

14Dequide chi utixxacana Juan lisiyya, diatteba Jesús lo yu nu te láni Galilea güettixxiꞌen ca benni seꞌe nía ca tisa tsee gue gaxasná rinnabia Tata Do Iyyabaaha. 15Lee nna re ca benni seꞌe nía:

―Chi guadona gue sá gaꞌanani Tata Do Iyyabaaha. Chi daa ribiga aque Benni rinnabia guele. Larcala nna gualodú xiyyanle, gualtsia lele ca tisa tsee rixxiꞌa gue Ben-na lhe.

Jesús raxie ttapa ca benni yuꞌu güedaxxu belha

(Mt. 4:18-22; Lc. 5:1-11)

16Atti dia Jesús yuꞌe neda roꞌo indattoo gue Galilea, nía bilánie Simón lenbi betsibi Andrés yuꞌucabi güedelha yexxa lheꞌe indattooha cumu irupabacabi ancacabi benni rudaxxu belha. 17Jesús ráttebe cana:

—¡Gualtá gualetteno neti! Neti nna unia acale nu gaxi benni qui udaxxucana neda gue Tata Do Iyyabaaha.

18Snaba lania nna bocaꞌan bixxicabi ca yexxa guecabiha nía. Nianna diattebacabi len Jesús.

19A saroꞌogarba ude nna bedeláttebanie Jacobo lenbi betsibi Juan, ca xiꞌini biꞌini lá Zebedeo siacabi lo barco guecabiha reoncabi atta chi bisú gue ca yexxa ca nu rixuincabi rudaxxucabi belha. 20Lee nna bedeaxittebe ca biꞌiniha. Ca biꞌiniha nna níaba bocaꞌancabi tata guecabi Zebedeo lo barcoha lenbi adí ca benni riben sina guecabiha, atti diattebacabi len Jesús.

Jesús rebequie be xxegüi yuꞌu lheꞌe cuerpu gue ttu unbiyuu

(Lc. 4:31-37)

21Atti chi bisína Jesús lenie ca benni rudheti ca tisa ruleꞌe lheꞌe yiesi Capernaum, la sá redí le ca benni Israel, utaꞌattebe lheꞌe yoꞌo atta rudheti ca benni Israel ca tisa gue Tata Do Iyyabaaha. Nianna udulottebe beleꞌenie ca benni seꞌe nía. 22Ca unnuha nna rebanbaquinna gue atti ruleꞌe Benniha, cumu rinnee atti rinne ttu benni ra xxeni leni, läga atti rinne ca nu ruleꞌe nu rá lo ca ley bocaꞌana Moisés. 23Lheꞌe yoꞌo atta rudheti ca benni Israel ca tisa gue Tata Do Iyyabaaha do lheꞌe yiesiha, nía du ttu unbiyuu yuꞌu be xxegüi lheꞌe cuerpu gueni. 24Unnuha nna uresiꞌattebana rána:

—¿Biaca dalu rugaꞌa guelu len riꞌitu, Jesús gue Nazaret? ¿Si dalu güelhuxa riꞌitu, aca? Neti nna anca biabatia lu, larca yuba lu ancalu Benni do riesi anca gue Tata Do Iyyabaaha.

25Jesús bedhaca disattebe be xxegüiha re na:

—¡Bedhea roꞌolu nna beríatte lheꞌe unbiyuu-na!

26Be xxegüiha nna attulade becuibina unbiyuuha. Nianna ribesiꞌa layani-na beríana lheꞌe nua. 27Ca nu seꞌe nía nna iyábacana usquinna atti unnaba tisatteba loescani rácana:

—¿Biunni raca-ni? ¡Attu nu cubi bunni ruleꞌeni benni du-ni ri! ¡Gualgüiarga, análi de elha rinnabia xeni rapana, lana nna rinnabiana ca be xxegüi-na, ca unná nna rudobacana tisa gueni!

28Sattitte bina iyába ca benni seꞌe itúba lo yu nu te láni Galilea gue nu runi Jesús.

Jesús reonie ixeru ca benni rani

(Mt. 8:14-15; Lc. 4:38-39)

29Dequide bería Jesús lheꞌe yoꞌo atta rudheti ca benni Israel ca tisa gue Tata Do Iyyabaaha, diattebe leni Jacobo lhe Juan lhe lheꞌe yoꞌo gue Simón lenbi Andrés. 30Nan gue nuila gue Simón nna teba biꞌiniha cumu yuꞌubi xilhá. Ca benni seꞌe nía nna utixxiꞌattebaquinna Jesús, nuilaha nna ránbabi. 31Lee nna ubigattebe bedaxxue ná biꞌiniha qui ulhidhe bi. La laniatteba nna bería xilháha lati biꞌiniha. Labi nna benttebabi nu uto ca benniha.

32Atti chi dia raca ela, dequide chi goadi tatubisa-na, uchetteba ca benni ca nu rani lhe ca nu yuꞌu be xxegüi lheꞌe cuerpu guecani lhe lo Jesús. 33Iyába ca benni seꞌe lheꞌe yiesiha güiacana bitupacana roꞌo yoꞌo atta do Benniha. 34Jesús nna beonttebe ixeru ca benni rani ca nu ixe loba isagüe rdacacana, bebee ixeru ca be xxegüi yuꞌu lheꞌe cuerpu guecani lhe. Lee nna tsa läga begüeelhe ca be xxegüiha innecana cumu guayúba ca nua nuxa anca Benniha.

Jesús rixxiꞌe ca tisa gue Tata Do Iyyabaaha lo yu nu te láni Galilea

(Lc. 4:42-44)

35Betteyú dila nna sna ancarla chulha, guadhatteba Jesús biríe lheꞌe yiesiha qui isíne ttu re atta nuttu nu benni requi. Nía unne lenie Tata Do Iyyabaaha. 36Simón lenbi ca benni seꞌe lenbi nía, güiattebacabi guatilacabi Jesús. 37Atti guattiꞌacabi Benniha nna ráttebacabi Benniha:

—Iyába ca benni requicana reguilacan lu.

38Ttiaca lee nna ráttebe ca biꞌiniha:

—Gualtsá tsiari lheꞌe adí ca yiesi seꞌe gaxxaba na qui sattixxiꞌatia ca benni seꞌe na ca tisa gue Tata Do Iyyabaaha, cumu de unnuha xa nna nuarca bisíaya yies lo yu-ni.

39Larcala nna iyába lheꞌe ca yiesi seꞌe lo yu nu te láni Galilea güia Jesús güettixxiꞌa ca tisa gue Tata Do Iyyabaaha lheꞌe ca yoꞌo atta rudheti ca benni Israel ca tisa gue Benniha lhe bebequie ca be xxegüi yuꞌu lheꞌe cuerpu gue ca benni lhe.

Jesús reonie ttu unbiyuu rácana lepra

(Mt. 8:1-4; Lc. 5:12-16)

40Ttu unbiyuu raca cuerpu gueni nu anca attiba yiesusu te láni lepra, ubigattebana atta du Jesús. Nianna bedútteba xibini unnabana lo Benniha ráne:

—Gansi cuinalu aca lelu nna guaguabalu isagüe quia-ni.

41Jesús besiꞌittebanie nua. Nianna becatteba nee utane cuerpu gue nua, atti ráttebe na:

—Guaracaba lasia. ¡Beacatte nnanna!

42Snaba lania bitúa nu anca attiba yiesusu lána lepra raca unbiyuuha. Unnuha nna beacattebana.

43Laniala bechú tisa Jesús unbiyuuha, tsitsiba belise na re na:

44—Biyúrga. Tsa nuttu nu quixxiꞌenlu, nu unlalu nna güia guatsá du lo bixxudiha qui ugüiana lu nna chiba beacalu. Bijatte úna nu daa lolu utelu gue Tata Do Iyyabaaha, beni attiba rába lo ca ley bocaꞌana Moisés, qui ugüia ca benni lu nna chiba bitúa isagüe gueluha.

45Ttiaca atti deyya unbiyuuha nna udulottebana utixxiꞌenna iyába benni gue nu ben Jesús len lana. Lo niꞌa gue unnuha nna guayya lo neda gue Benniha, lärga uca gueꞌe lheꞌe ca yiesi seꞌe nía. Níaba udoe lheꞌe ca yu atta nuttu benni seꞌe, ttiaca riaba ca benni daa lheꞌe iyába ca yiesiha atta do Benniha.

Currently Selected:

San Marcos 1: zaq

Highlight

Copy