San Mateo 27

Guadúcana Jesús lo Pilato

(Mr. 15:1; Lc. 23:1-2; Jn. 18:28-32)

1Atti chi goaniha nna bitupatteba iyába ca nu lo gue ca bixxudiha lhe ca nu teru elha rieni gueni gue ca benni Israel lhe qui boquinna iquicani utticana Jesús. 2Nianna bexxicattebacana Benniha, atti chettebacane guadúcane lo nu rinnabia lá Poncio Pilato.

Judas uluꞌu tuu yienni

3Nianna Judas nu betena Jesús las ná ca nu utticana Benniha nna atti binana chi boquinna iqui ca nua utticana Benniha nna bexiyyattebinna nianna güiattebana guaruꞌunna rerúa (30) belhi plataha len ca bixxudi rinnabiaha lhe len ca nu teru elha rieni gueni gue ca benni Israel lhe, 4nianna rán ca nua:

—Neti nna chi benia ttu tulha xeni, cumu betea las nále ttu benni bittu chi beni ni ttu nu lä anca tsee.

Ttiaca ca unnuha nna becabicana rácana:

—¡Riꞌitu nna tsa bittu yutu! ¡Nadi biyú!

5Laniala nna guachuꞌuna na ca belhiha lheꞌe yotuha, atti biríattebana güiana gualhuꞌu tuu yienni.

6Ca nu lo gue ca bixudiha nna bedigattebacana ca belhiha, nianna rácana:

—Läga anca tsee cuꞌuri ca belhi-ni lheꞌe atta ruꞌu úna gue yotu-ni, cumu belhi-ni ancana nu utixari qui gatti ttu benni.

7Nioca nna boquinna iquicani ixuuquinna belhiha qui goꞌocana ttu lo yu nu te láni Xulali Gue Benni Runi Ca Yedhu Yu, qui lo nua nna igatsi ca benni dittu. 8Denuha nna axtaba nnanna lá xulaliha, Xulali Biyoꞌo len Reni. 9Aníaba uca qui guaxxína leni ca tisa unne profeta Jeremías, atti rábi: “Bedaxxubacana rerua (30) belhi plata nu boquinna iqui ca benni Israel aca lidhaca benni gattiha. 10Len belhiha nna uyoꞌocana lo yu nu te láni: Xulali Gue Benni Runi Ca Yedhu Yu. Benbacana attiba rába Benni bananie ri-na neti.”#27:9-10 Zacarías 11:12-13

Pilato rinnaba tisana Jesús bixa benie

(Mr. 15:2-5; Lc. 23:3-5; Jn. 18:33-38)

11Atti chi duquinna Jesús lo Pilato nu anca nu rinnabiaha nna unnaba tisattebana Benniha ráne:

—¿Si lu ancalu nu rinnabia gue ca benni Israel-ni?

Jesús becabie re:

—Luba chi rálu.

12Ca bixxudi anca nu loha lencana ca nu teru elha rieni gueni gue ca benni Israel rudelhiyyacana Jesús, ttiaca Benniha nna tsa läga becabie guecani. 13De nua nna rá Pilato Benniha:

—¿Si biba rieninlu análi de runcana xiyya guelu?

14Ttiaca Jesús, niba ttu tisa lä becabie gueni. Larcala tsitsiba bebanin nu rinnabiaha.

Utticana Jesús

(Mr. 15:6-20; Lc. 23:13-25; Jn. 18:38–19:16)

15Atti risía laní nu te láni Pascua, nu rinnabiaha nna chi anca bienna rodilána ttu ca benni te lisiyya, rebeabana nu rucueba yiesiha. 16Lania nua te ttu unbiyuu lisiyya nu lána Barrabás. Unnuha nna iyába benni yuna gue nu runna. 17Atti chi seꞌe ttu reba iyá ca benni nna unnaba tisatteba Pilato rána:

—¿Nú raca lele odiláya? ¿Si Barrabás, aca? ¿Jesús benni rále anca Cristu, aca?

18Cumu chiba yu Pilato, de lä racaba uyú ca unnuha Jesús nuarca guatecana Benniha las náni.

19Laca do Pilato lo xxila atta rinnabianaha nna udhelhatteba nuila gueniha ttu rasona len lana, rán na: “Bittu bi udhaquinlu unbiyuu-na, cumu lägabi tulha gue unná te. Lo niꞌa gue unná nna attulade elha disa biyúa bisiela de bitsiatia ttu yiela.”

20Ttiaca ca bixxudi anca nu loha lencana ca nu teru elha rieni gueni gue ca benni Israel, uluꞌu tisattebacana ca benni seꞌe nía qui innába ca nua ería Barrabás, Jesús nna utticane. 21Nu rinnabiaha nna unnaba tisana attu libe rána:

—De lo irpa ca unná, ¿nú cana raca lele odiláya?

Ca unnuha nna rácana:

—¡Barrabás-na bodilá!

22Pilato nna rána:

—¿Bila un lania Jesús, benni rále anca Cristu-na?

Iyábacana becabicana rácana:

—¡Betá na lo ya crusi!

23Pilato nna rán ca nua:

—¿Biaca nuarca? ¿Bi nu bittu anca tsee beni unní?

Ttiaca ca unnuha nna adílaba uresiꞌacana rácana:

—¡Betá unná lo ya crusi!

24Atti utedeen Pilato tsa läga rdana lo ca nua, cumu adílaba de risatsa ca nua, unnabattebana inda qui utí náni aníba lo iyába ca benni seꞌe nía. Nianna rána:

—Neti nna läga uxxúa cueꞌa elhutti gue unbiyuu-ni. Nadi gualyú.

25Iyába ca nu seꞌe nía becabicana rácana:

—Cuꞌebatu lhe cuꞌe ca xiꞌintu-niba lhe tsia elhutti gue unní.

26Laniala nna bodilána Barrabás. Dequide chi benna mandadu utín ca soldadoha Jesús, botettebana Benniha las ná ca nu utácana Benniha lo ya crusi.

27Ca soldado gue nu rinnabiha nna uchettebacana Jesús lheꞌeliꞌa gue yoꞌo lagüiha atta rido nu rinnabiha runna elha uxtisi, atti beaxittebacana iyába adí ca soldadoha qui eseꞌecana sabiꞌaba Benniha. 28Lacana nna uleattebacana ca xo Benniha, atti begucuttebacana Benniha ttu lari xinaa chulha, 29Nianna uluꞌuttebacana iquie ttu corona ancana leni xiqui ya yitsi, las ná derechu guee nna uluꞌucana ttu iyyaxtila. Atti bedútteba xibicani loe, runcane burla rácane:

—¡Xxeni ra lelu, xa nu rinnabia gue ca benni Israel!

30Atti bettuttutteba xxencani loe, iyyaxtila den Benniha tteba nna utíncana iquie. 31Dequide chi bencana Benniha burla nna utúattebacana lari xinaa chulha nucuquinna Benniha. Nianna bogucuttebacane ca xun gueeha, atti uchettebacane dia lencane qui utácane lo ya crusi.

Rutácana Jesús lo ya crusi

(Mr. 15:21-32; Lc. 23:26-43; Jn. 19:17-27)

32Atti biría ca soldadoha dia lencana Jesús, nía besácana ttu unbiyuu lábi Simón, biꞌini beaca lasbi lheꞌesi nu te láni Cirene. Biꞌiniha nua bencana duelha guebi bijabi ya crusi gue Jesús. 33Atti bisíncabi ttu re atta te láni Gólgota, nu dienna innána: Bega Iqui Nu Yatti, 34nía nua atta begüeecana Benniha vinu nu selana ttu coana ilhá. Ttiaca dequide benixxie nua nna läga uca lee iꞌiye nua.

35Atti chi betácana Benniha lo ya crusiha nna uyuꞌutteba ca soldadoha bencana ttu nu uleꞌe lo nuxa ca xo Benniha eyoja ttuttucana. Aníaba uca qui guaxxína ca tisa unnee benni uca profeta gue Tata Do Iyyabaaha atti rábi: “Belhaꞌaba guecani ca xun quiaha, bencana ttu nu beleꞌe lo nuxa ca nua eyoja ttuttucana.” 36Lacana nna usiattebacana nía upacana Benniha. 37Betáguabacana ttu breta iqui crusi atta ta Benniha, nu diaquinna loni bixa lo niꞌa gue betácana Benniha lo ya crusi. Lo bretaha nna rá: “Unní ancana Jesús, nu rinnabia gue ca benni Israel.”

38Betáguabacana a chupa ca ubana lo ca ya crusi len Benniha, ttuna betácana lo ya crusi du ladu derechu guee, attu nua nna betácana lo ya crusi du ladu rabesa guee. 39Ca nu ritee atta du ya crusi atta ta Jesús nna rudhaca disacane, atti ruttátteba iquicani 40rácana Benniha:

—¡Läba lu nua rálu dequi uttapalu yotu-na, nianna lheꞌe tsunna ubisaba nna elhidhalue attu libe! ¡Gansi gualínlu, lu nua xiꞌini Tata Do Iyyabaaha, la luba ben sanga gaxasná qui lhálu, beadi tte lo ya crusi-na lhe!

41Aníaguaba runi ca nu lo gue ca bixxudiha, ca nu ruleꞌe nu rá lo ca ley bocaꞌana Moisés lhe ca nu fariseo lhe ca nu teru elha rieni gueni gue ca benni Israel lhe lacana nna runcana Benniha burla, rácana:

42—Güenba bodilána adí benni, ttiaca bittu raca gueni gaxasná uni la labana qui lhána. Gansi gualínna ancana nu rinnabia gueri riꞌi ca benni Israel, ¡eyadi sanga-na lo ya crusi-na aní lori qui tsia leri-na! 43Lana nna Tata do Iyyabaahaba bexxen leni. Nnanna nna odilá sanga benna na gansi gualíga racanie gueni. Läba ráxa unná: “Neti anca xiꞌini Tata Do Iyyabaaha.”

44Axtaba ca ubana ta lo ca ya crusi seꞌe daca lhuitta Benniha rudhaca disa cane.

Utti Jesús lo ya crusiha

(Mr. 15:33-41; Lc. 23:44-49; Jn. 19:28-30)

45Desdeba retin tsiꞌinu (12) resá bechulha itúba yies lo yu, axtaba retin tsunna ulha. 46Atti chi deoba ugüena retin tsunnaha nna uresiꞌa Jesús re:

—Elí, Elí, ¿lama sabactani? —Ca tisa-ni nna diacanie innáque: Tata quia do iyyabaaha, Tata quia do iyyabaaha, ¿biaca neti rudhequilu?

47Atti bienin ttulhe ca nu seꞌe nía nu rá Benniha nna ráttebacana:

—Profeta Elíasba biꞌin-na raxi unná.

48Loora lania tteba nna bigaatteba ttu ca nu seꞌe nía guadáxxuna ttu tiꞌa xila bedona vinu idí iqui nua. Atti bexxicattebana nua lo ttu iyyaxtila, nianna besigattebana nua roꞌo Jesús qui iꞌiye nua. 49Ttiaca adí ca nu seꞌe nía nna rácana:

—Begüelha sanga-na, gansi güisía Elías ettedilabi na.

50Jesús uresiꞌattebe attu libe idisa, atti uttittebe. 51Snaba lania nna biredatteba rulha xeaba lheꞌe lari daa lheꞌe yotuha, desdeba xequini axtaba xaniꞌani. Atti bixútteba yies lo yu-ni, ca iyyatoo-na nna bixátteba lheꞌecani. 52Bealtteba roꞌo ca baa-na, ixeru ca benni chi utti ca benni chi ulequiesi Tata Do Iyyabaaha aca guee beaquincabi. 53Lacabi nna beríattebacabi lheꞌe ca baa atta yuꞌucabiaha, dequide chi beacani Jesús, ca biꞌiniha nna betaꞌattebacabi lheꞌe yiesi anca lheꞌaha, unnuha nua yiesi Jerusalén, ixeru ca benni seꞌe nía biláquinbi ca biꞌiniha.

54Atti biláni soldado gue Roma nu banani ca soldadoha lenna ca nu seꞌe rapa Jesús, rixú lhe iyába nu ucaha lhe attulade usquinna nianna rácana:

—¡Gualíba unbiyuu-naba Benniha anque Xiꞌini Tata Do Iyyabaaha!

55Idittu liba seꞌe ixeru ca nuila rugüiacabi nu rate Jesús. Ca biꞌiniha nua guanocabi Benniha, betecabi nu beasanie lhe desdeba Galilea. 56Len ca nuilaha sela María Magdalena, María nan gue Jacobo lhe José lhe nan gue ca xiꞌini Zebedeo lhe.

Rucatsicana Jesús

(Mr. 15:42-47; Lc. 23:50-56; Jn. 19:38-42)

57Atti chi ulha sá nna bisína José, ttu unbiyuu te belhi guebi, biꞌiniha nna beaca lasbi lheꞌesi nu te láni Arimatea. Labi nna ucaguabi benni bedheti ca tisa beleꞌe Jesús. 58José nna güiabi guayúbi Pilato, bennababi cuerpu gue Jesús qui ucatsibi Benniha. Pilato nna benttebana mandadu otecana Benniha len biꞌiniha. 59José nna bodaxxuttebabi Benniha, nianna bottesttebabi Benniha ttu lari tsee narixuu. 60Atti güiattebabi guacatsibi Benniha lheꞌe ttu baa cubi beaca guebi nu utenbi lheꞌe ttu iyyattoo. Dequide bettulhubi ttu iyya xeni qui bedheabi roꞌo belea nna güequittebabi deyyabi. 61María Magdalena lenbi attu biꞌini láguaba María, níaba usiacabi ttu ladu gue atta te baaha.

Ca soldado seꞌe rapa roꞌo baa

62Betteyú dila, la sá atti redí le ca benni Israel, güiatteba ca nu lo gue ca bixxudiha lencana ca nu fariseo atta do Pilato. 63Nianna rácana nua:

—Xa Tata, riꞌitu nna bexxa letu gue nu unnee nu güenlasi Jesús, atti sna requi banbana, lana nna rána: “Dequide tsunna ubisa nna eyacatia.” 64Larcala nna rinnabatu lolu idhelhalu ca soldado guelha qui gapacana baaha axta liba eyonna ubisa, qui lä tsia ca benni bedheti ca tisa beleꞌe unná salhanacana benni yatti-na. Atti tsequittebacana gácana benni dequi beacabani Jesús, beríaba Benniha lheꞌe baa atta yuꞌu ca nu yatti-na. Lania nna unnuha la aca elha güen lasi xenru attichula nu unne nu yatti-na atti do banina.

65Pilato nna ráttebana ca nua:

—Naba seꞌe ca soldado quia-na. Gualchecana gualsaseꞌecana atta te baaha qui gapa tsitsicana roꞌo nua attiba rudhaca lele anca tsee.

66Lania nna güiattebacana gualhequi tsitsicana iyya nu yaya roꞌo baaha, beseꞌeguabacana ca soldado qui uyú tsitsicana roꞌo nua lhe.

Currently Selected:

San Mateo 27: zaq

Highlight

Copy