San Mateo 26

Reguila le ca benni gaxasná uncana utticana Jesús

(Mr. 14:1-2; Lc. 22:1-2; Jn. 11:45-53)

1Atti uluxa unne Jesús iyába ca tisa-ni nna ráttebe ca benni rudheti ca tisa ruleꞌe:

2—Lebiꞌi nna chiba yule, a chupa ubisarba reasa isía laní nu te láni Pascua. Lania nua utecana neti Benni unbiyuu daa iyyabaaha las ná ca nu utticana neti lo ya crusi.

3Ca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés, ca nu teru elha rieni gueni gue ca benni Israel lhe bitupacana lheꞌeliꞌa gue yoꞌo lagüi atta do bixxudi xeni rinnabia lá Caifás. 4Nía uyuꞌucana beguila lecani gaxasná uncana qui udaxxucana Jesús. Lacana nna cuentaba uncana xiyya guee dequi benie ttu nu bittu dica unie qui aca utticane. 5Ttiaca lacana nna rácana:

—Bittu unri aná lheꞌe laní-ni qui bittu utsatsari benni.

Ttu nuila rudona seti rure xixxi iqui Jesús

(Mr. 14:3-9; Jn. 12:1-8)

6Atti do Jesús lheꞌe yiesi nu te láni Betania lisi Simón biꞌini teequinna lábi nu uca lepra. 7Nía bisína ttu nuila nujana ttu cantito ancana leni ttu iyya tsee nu te láni alabastro, taꞌa seti rure xixxi daca yaxi lheꞌeni. Laca do Jesús roꞌo mexaha nna nuilaha nna bedottebana setiha iqui Benniha. 8Atti biláni ca benni rudheti ca tisa ruleꞌe Jesús nu ben nuilaha nna bisaꞌattebaquinbi, nianna rácabi:

—¿Biaca cuentaba bedelha lattina seti rure xixxi-na? 9Tseerla ttirca bettoꞌona seti-na yaxi, belhi nu utixacana seti-na nna utena nua qui dhi ca benni bittu te guequinna.

10Atti utedaani Jesús nu rá ca biꞌiniha nna ráttebe:

—¿Biaca rinnele gue nuila-ni? Nu beni unní, len neti nna ancana ttu nu tsee. 11Cumu ca benni bittu te guequinna satíaba tseꞌe ca unná len lebiꞌi, ttiaca neti nna läga aní dhoa len lebiꞌi ttu dia lii. 12Larcala nu beni nuila-ni bedona seti-na iquia nna bodútseeba unná neti qui chi do tseea igatsia gansi chi uttia. 13Neti nna gualíbatia rpea le, gaxaba lheꞌe ca yiesi seꞌe itúba yies lo yu-ni atta quixxiꞌa ca benni ca tisa quia-ni, quixxiꞌaguaba ca benni nu beni nuila-ni qui exxale benni nu benna.

Judas bodhaꞌanna tisa utena Jesús las ná ca nu utticane

(Mr. 14:10-11; Lc. 22:3-6)

14Judas Iscariote, ttu ca benni tsiꞌinu rudheti ca tisa ruleꞌe Jesús, güiattebana atta seꞌe ca nu lo gue ca bixxudiha. 15Nianna rán ca nua:

—¿Tti quixale neti gansi utea Jesús-na las nále?

Ca unnuha nna begüeecan na rerúa (30) belhi plata. 16Desdeba lania nna udulo Judas reguila leni gaxasná unna utena Benniha las ná ca bixxudiha.

Jesús uto rse lenie ca benni rudheti nu rulheꞌe laní Pascua

(Mr. 14:12-25; Lc. 22:7-23; Jn. 13:21-30; 1 Co. 11:23-26)

17Primerba sá gue laní nu te láni Pascua atti ro ca benni Israel ttaxtila nu bittu levadura dia lennaha, ubigatteba ca benni rudheti ca tisa ruleꞌe Jesús loe, qui unnaba tisacabi Benniha rácabi:

—¿Gonni raca lelu tsiatu sasía tseetu nu go rseri laní Pascua-ni?

18Lee nna becabie re:

—Gualtsia lheꞌe yies-na, gualgási unbiyuu do naa: “Aní rá Maestruha: Chiba dabiga ura quia. Larcala nna raca lasia ita lheꞌe yoꞌo guelha qui uttea laní Pascua-ni len ca benni rudheti ca tisa ruleꞌa.”

19Ca biꞌiniha nna benbacabi attiba rába Jesús, güiabacabi güencabi rse gue laní Pascua nía.

20Atti chi ulha sá nna bedotteba Jesús roꞌo mexaha lenie ca biꞌini tsiꞌinu rudheti ca tisa ruleꞌe. 21Laca siaque go rse nna unnetteba Jesús re ca biꞌiniha:

—Neti nna gualíbatia rpea le, nuxa ttule nna utele neti las ná ca nu utticana neti.

22Ca biꞌiniha nna tsitsiba useꞌe siꞌicabi, nianna udulottebacabi ttuttu ttuttubacabi unnaba tisacabi rácabi Benniha:

—Benni bananie neti, ¿si läba netiba nua?

23Jesús becabie re:

—Nu ugutuna len neti lheꞌe la ttuba platu-ni, unnuha nua utena neti las ná ca nua. 24Neti Benni unbiyuu daa iyyabaaha nna labíaba satea iyába nu chi gaꞌana lo ca sitsi gue Tata Do Iyyabaaha. Ttiaca, ¡carusiꞌiru nu utena neti las ná ca nu utticana neti! Tseerla salíana nua ttirca bittuba ulina.

25Laniala nna rá Judas nu utena Benniha las ná ca nu utticane:

—Maestro, ¿si läba netiba nua?

Lee nna becabie re:

—Luba chi biría roꞌolu nua.

26Laca siacabi go nna bedaxxutteba Jesús ttu ttaxtila, dequide begüee xquixaru Tata Do Iyyabaaha nna ulhaꞌattebe lheꞌe benniha begüee ca biꞌini rudheti ca tisa ruleꞌe. Nianna re ca biꞌiniha:

—Gualudaxxu benni, atti gualgotte. Ben-ni anque cuerpu quia.

27Lenla nna bedaxxuttebe ttu copa taꞌa vinu lheꞌeni. Dequide begüee xquixaru Tata Do Iyyabaaha nna betettebe copaha len ca biꞌini rudheti ca tisa ruleꞌe, nianna re:

—Iyáxeale gualiꞌiya ben-ni, 28cumu ben-ni anque reni quia. Len ben-ni eyaꞌan tsitsi ca tisa cubi chi begüee Tata Do Iyyabaaha len ca benni. Reni quia-ni nua ilali lo niꞌa gue ixe ca benni qui dhi Tata Do Iyyabaaha elha xen lasi gue ca tulha guecani. 29Neti nna rpea le, bedá nnanna bitturu iꞌiya inda xixxi gue besuli-na attu libe, axta liba gansi chi bisía sá atti iꞌiya vinu cubi len lebiꞌi atta rinnabia Tata quiaha.

30Dequide bilhaque ttu salmo nna diattebaque lo lhilhi Atta Daa Ca Ya Olivuha.

Jesús rixxiꞌe bittu dhi roꞌo Pedro dequi ancabienbi benniha

(Mr. 14:26-31; Lc. 22:31-34; Jn. 13:36-38)

31Atti bisíncabi lo lhilhiha nna rátteba Jesús ca benni rudheti ca tisa ruleꞌe:

—Iyábale udhá iquile neti nnela, cumu anába chi dia lo ca sitsi gue Tata Do Iyyabaaha atta rinne Benniha re: “Neti nna uttia benni ruyú ca carneꞌeha, lania nna iyába ca carneꞌeha gatti laduba udaxxucana.”#26:31 Zacarías 13:7 32Ttiaca dequide eyacatia nna lola neti nnerua lole tsiaya daca lo yu te láni Galilea.

33Pedro nna rábi Benniha:

—Masquiba udhequi iyá ca benni seꞌe-ni lu, neti nna läga udhequia lu.

34Jesús becabie re Pedro:

—Neti nna gualíbatia rpea lu, nnela antisla cues berudi-na, lu nna chila beyonna libe bittu ridí roꞌolu gualí anca bienlu neti.

35Pedro nna rábi:

—Masquiba gattia len cuinalu, ttiaca locachirba lä dhiba roꞌa gualíba ancabiatia lu.

Aníaguaba rá iyába ca biꞌini rudheti ca tisa ruleꞌe.

Jesús rinne lenie Tata Do Iyyabaaha

(Mr. 14:32-42; Lc. 22:39-46)

36Laniala nna dia Jesús lenie ca biꞌini rudheti ca tisa ruleꞌe ttu re atta te láni Getsemaní. Nianna re ca biꞌiniha:

—Ni tte gualcuia, laca neti nna tsiaya sannea len Tata Do Iyyabaaha.

37Atti diatteba lenie Pedro, a chupa ca xiꞌini Zebedeo lhe. Lee nna udulottebe bedú siꞌina lee, bedú guatexxattana lee lhe. 38Nianna re ca biꞌiniha:

—Lastooa-ni nna chi rudú siꞌixxattan nna guannalu chitteba daa elhuttia loa. Ni tte gualtseꞌe, bittu gaꞌadhile, gualtseꞌe tenná len neti.

39Nianna biriestteba Jesús ttu roꞌo, atti bedútteba xibie axta liba binna loe lo yu. Lee nna unnetteba lenie Tata Do Iyyabaaha re Benniha:

—Tata quia, si bittuba dica betsiattachi neti lo elha disa daa uyúa-ni. Ttiaca läga ria aca nu raca lasia, sinuqui nu innába cuinalu, unnuhaba aca.

40Atti bequittebe deyye atta seꞌe a tsunna ca benni rudheti ca tisa ruleꞌe. Lee nna níaba guattiꞌe ca biꞌiniha tecabi tiꞌedhicabi. Nianna ráttebe Pedro:

—¿Si niba ttu ura lä udále uchíale tseꞌele tennále len neti? 41Gualebani, bittu gaꞌadhile, gualnne len Tata Do Iyyabaaha qui bittu dha nu xxegüiha dhi yien le. Lebiꞌi nna gua seꞌebale uchíale, ttiaca cuerpu guele-na bittu rdana uchíana.

42Lee nna dedheyyattebe attu libe güenne len Tata Do Iyyabaaha, nianna redea dacabe Benniha:

—Tata quia, gansi bittuba aca utsiettalu neti lo elha disa daa uyúa-ni, acaba nu innába cuinalu aca.

43Atti bequie besine attu libe atta seꞌe ca biꞌiniha, níaba guadittiꞌe ca biꞌiniha dedetiꞌedhicabi, cumu de taꞌaxxatta bisiela locabi. 44Níaba beseꞌe ca biꞌiniha nna dedhia dacabe güenne len Tata Do Iyyabaaha. Ni beyonna libe rie güenne len Benniha, la ca tisa chi re Bennihaba bedenne dacabe attu libe. 45Laniala nna bequie besine atta seꞌe ca biꞌini rudheti ca tisa ruleꞌe, nianna ráttebe ca biꞌiniha:

—¿Si sna tebale tiꞌedhile, redí lele lhe? Chi bisía ura atti utecana neti Benni unbiyuu daa iyyabaaha las ná ca nu runi nu lä anca tsee-na. 46¡Chinca gualchadha, gualtsá! ¡Gualgüia, ni nu utena neti las ná ca nu utticana netiha chi daa na!

Bedaxxucana Jesús

(Mr. 14:43-50; Lc. 22:47-53; Jn. 18:2-11)

47Sna duba Jesús rinnee, atti chi bisína Judas ttu nu babaguaba len ca biꞌini tsiꞌinu (12) rudheti ca tisa ruleꞌe Benniha. Len lana dia ixeru benni dencana espada lhe yaga lhe. Ca unnuha nua ca nu udhelha ca nu anca nu lo gue ca bixxudiha lencana ca nu teru elha rieni gueni gue ca benni Israel. 48Judas nu utena Benniha las ná ca nua nna chila utixxiꞌenna ca nua gaxasná unna qui eyonbia ca nua Benniha. Lana nna rán ca nua:

—Benni utsá loa xxaganiha, unnuha nua, udaxxuttele na.

49Nianna ubigatteba Judas lo Jesús rána Benniha:

—¡Padiuxi, Maestro!

Atti betsátteba loni xxaga Benniha. 50Laniala rá Jesús Judas:

—Betsito, ¡tsattela beni nu dalu unlu!

Atti ubigatteba ca nu daa leni Judas, bedaxxucana Benniha. 51Ttiaca ttu ca biꞌini du len Jesús nía, ulequittebabi espada guebiha uchúbi naga nu riben sina gue bixxudi xeni rinnabiaha. 52Laniala rá Jesús biꞌiniha:

—Beguꞌu espada guelha atta yuꞌuna. Cumu iyába ca nu rutti leni espada, leni espadaguaba gatti ca nua. 53¿Si bittuba yulu, neti nna guacaba quia innába lo Tata quiaha qui idhelhe nnannatte la balhala mili ingeli qui odilácabi neti? 54Ttiaca gansi neti unia anía, ¿galasná saxxína aca nu chi gaꞌana lo ca sitsi gue Tata Do Iyyabaaha atta rixxiꞌa rá, neti nna labíaba satea aní?

55La laniatteba nna rá Jesús ca benni seꞌe nía:

—¿Biaca dale leni espada lhe leni yaga lhe güedaxxu neti attiba ttu ubana? Inqui ttu ttu sába udúa lheꞌeliꞌa gue yotu-na güeleꞌen le nna lebiꞌi nna bittu bedaxxule neti. 56Ttiaca iyába unní raca qui saxxína aca nu chi utixxiꞌa ca benni uca profetaha dia lo ca sitsi gue Tata Do Iyyabaaha.

Lania nna iyába ca biꞌini rudheti ca tisa ruleꞌe Jesús bexunnicabi, a tturba Benniha bodhaꞌancabi nía.

Guatsá ducana Jesús lo ca uxtisi gue ca benni Israel

(Mr. 14:53-65; Lc. 22:54-55,63-71; Jn. 18:12-14,19-24)

57Ca nu bedaxxucana Jesús uchettebacana Benniha lo bixxudi xeni rinnabia lá Caifás, atta seꞌe ca nu ruleꞌe nu rá lo ca ley bocaꞌana Moisés lhe ca nu teru elha rieni gueni gue ca benni Israel lhe. 58Tiaca Pedro nna idittu liba denobi Benniha, ni utaꞌababi lheꞌeliꞌa gue yoꞌo lagüi atta do bixxudi xeni rinnabiaha. Utaꞌababi nna udottebabi len ca nu riseꞌe rapa yoꞌo lagüiha qui ugüiabi bixa un lencana Jesús.

59Ca nu lo gue ca bixxudiha lencana ca nu teru elha rieni gueni gue ca benni Israel, iyába ca nu runi elha uxtisi gue ca benni Israel lhe reguilacana ca benni un lecani qui uncana xiyya gue Jesús, anía liba nna dhacana udelha iyyacane qui te roꞌocani utticana Benniha. 60Ttiaca läga udácana iríali nu rácana, masquiba ticaxa re benni run leni useꞌe qui bedelha iyyacana Benniha. Lenla nna ucaxxe a chupa ca güen lasi, 61ca nua nna rácana:

—Unbiyuu du-ni nna rána: “Neti nna guacaba quia uttapa yotu gue Tata Do Iyyabaaha, lheꞌe tsunna ubisaba nna elhidhe attu libe.”

62Laniala nna udulí nu anca bixxudi xeni rinnabiaha unnaba tisana Jesús rána Benniha:

—¿Si bittuba ecabilu bixa innálu? ¿Bila rátticabalu gue nu run ca benni seꞌe-ni xiyya guelu dequi runlu?

63Ttiaca Jesús tsa läga becabie gueni. Lania la nna bedennaba tisa bixxudi xeni rinnabiha Benniha attu libe ráne:

—Tata Do Iyyabaaha Benni doe anque Benni bani rudettia, rinnaba lolu quixxiꞌalu gansi lu nua Cristu, Xiꞌini Tata Do Iyyabaaha.

64Jesús becabie re na:

—Luba chi rálu. Anáguaba neti, upeguaba le, lebiꞌi nna desde nnannali ilenle neti Benni unbiyuu daa iyyabaaha dhoa daca ladu derechu gue Tata Do Iyyabaaha benni ra xxeni lee, iláguabinle neti dedaaya lheꞌe ca bea daa iyyabaaha lhe.

65Lania nna uchedatteba xo bixxudi xeni rinnabiaha de bisaꞌaxxattinna. Atti ráttebana:

—¡Rigúabunna balaꞌana gue Tata Do Iyyabaaha! Lärga nurua reasinri quixxiꞌenna ri gue bixa runi unní, cuinaba lebiꞌi chi bieninle rinne güena gue Tata Do Iyyabaaha. 66Lebiꞌi nna ¿bila rále?

Ca unnuha nna becabicana rácana:

—Ralhaba unná gattina.

67Nianna udulottebacana bettuttu xxencani lo Benniha, begüeecane lhe ulhicana gui loe lhe. 68Atti rácane:

—Cristu, unne yaꞌa sanga, ¿núnna begüeen lu?

Pedro bittu ridí roꞌobi anca bienbi Jesús

(Mr. 14:66-72; Lc. 22:56-62; Jn. 18:15-18, 25-27)

69Pedro nna níaba dobi lheꞌeliꞌa gue yoꞌoha, nianna ubiga ttu nuila ren sina nía, rán bi:

—Lu lhe guanoguabalu Jesús nu beaca lasni lheꞌesi nu te láni Galilea-na.

70Ttiaca Pedro nna läga uxí roꞌobi ancabienbi Benniha lo iyába ca nu seꞌe nía, tseꞌe lolabi rábi:

—Läga yu neti gue bixunná rálu.

71Atti beríattebabi guadhúbi roꞌo yoꞌoha, nía bilen attu nuila riben sina lheꞌe yoꞌoha bi. Nuilaha nna rána adí ca nu seꞌe nía:

—Anáguaba unbiyuu du-ni lhe denoguabunna Jesús gue Nazaret.

72Ttiaca labi nna läga bededí roꞌobi ancabienbi Jesús, axtaba bedú tsitsibi tisa, rábi:

—¡Tsa läga ancabiatia unbiyuu-na!

73Sattigaba uca nna atti chi bedebiga ca nu seꞌe nía atta du Pedro, ca unnuha nna rácan bi:

—Gaxa gualíba, lu nna ttu ca nu sela len Jesús-nabalu, cumu attiba rinne ca unná rinnelu.

74Labi nna utettebabi, bododú tsitsittebabi tisa lhe nianna rábi:

—Tsa läga ancabiatia unbiyuu-na.

Snaba lania nna uresi berudiha. 75Nianna bexxatteba le Pedro gue ca tisa unne Jesús atti re: “Nnela antisla cuesi berudi-na, lu nna chila beyonna libe bittu ridí roꞌolu anca bienlu neti.” Atti beríattebabi nía, attula de uresi yielabi de relenxxattinbi.

Currently Selected:

San Mateo 26: zaq

Highlight

Copy