San Mateo 25

Jesús rixxiꞌe ejemplu gue tsii ca nurbani

1’Elha rinnabia gue Tata Do Iyyabaaha raxxína anque ttuba leni nu guate tsii (10) ca nuila rbani, ca unnuha nna bedaxxucana ca quinque guecaniha biríacana gualedacana unbiyuu utsá nániha. 2Gayu ca nua nna ancacana nuila yan lee, a gayu ca nua nna ancacana nuila xulha lee. 3Ca nurbani ancacana nu xulha leniha nna nujabacana ca quinque guecaniha, ttiaca läga nojacana seti qui egaꞌacana lheꞌe ca nua. 4Ca nurbani anca nu yan leniha nna nojaba ca nua ca bega taꞌa seti lheꞌecani, nojaguaba ca nua ca quinque guecaniha lhe. 5De bisába unbiyuu utsá nániha nna iyába ca nuilaha bita bisiela locani, nianna utaꞌadhibacana. 6Atti chi deoba ugüena riloela nna bieni tsiꞌi ttu benni uresiꞌana rána: “¡Ni unbiyuu utsá nániha chi daa ni! ¡Gualiría, gualsatsá na!” 7Nianna iyába ca nuila rbaniha guadhacana, atti boseꞌe tseettebacana ca quinque guecaniha. 8Ca nurbani seꞌe xulha leniha nna rácana ca nurbani seꞌe yan leeha: “Gualunnachi saroꞌo seti guele-na guetu qui chi reola ca quinque guetu-ni.” 9Ttiaca ca nurbani seꞌe yan leeha nna becabicana rácana: “Bittu, cumu gansi utetu nu reasinle nna lärga acani seti guetu-na, lania nna eyasaguaba guetu lhe eyasaguaba guele lhe. Adíla tsee nna gualtsia atta ritoꞌo seti-na gualsayoꞌo nu reasinle.” 10Ttiaca ttu diaru ca nua güeyoꞌo seti nna bisína unbiyuu utsá nániha. Ca nurbani yan lee seꞌe tseeha nna utaꞌaba ca nua len unbiyuu nu utsá nániha atta raca laníha, nianna beayatteba yoꞌoha. 11Dequilaha nna besina adí ca nuila rbaniha, nianna rácana: “¡Benni bananie riꞌitu, udhalchi qui gaꞌatu!” 12Ttiaca biꞌiniha nna becabibi gue ca nua, rábi: “Bittu, cumu läga ancabiatia le.”

13Laniala nna rá Jesús:

—Larcala, lebiꞌi nna satía gualtseꞌe ubeda, cumu läga yule bittiga sá lhe bittiga ura lhe esíaya neti Benni unbiyuu daa iyyabaaha.

Ejemplu gue nu beni tsunna ca unbiyuu uxí belhi

(Lc. 19:11-27)

14’Gue gaxasná rinnabia Tata Do Iyyabaaha ca benni, raxxína ancana ttuba leni nu guate ttu unbiyuu. Unnuha nna atti chi ridána tsiana attu yiesi re idittu nna uxttebana ca benni riben sina gueniha, qui bodhaꞌanna len ca nua belhi gueniha.

15’Ttu nua begüeena gayu mil, attu nua nna begüeena chupa mil, nu beyonnaha nna begüeena nua ttu mil. Cua ttu ttuba ca nua begüeena nu rudhaca leni dha ca nua un lencana sina. Laniala nna biríana diana. 16Nu uxí gayu miliha nna güiattebana benna sina len belhiha, nianna benba xiꞌini belhiha a gayu mil. 17Aníaguaba beni nu uxí chupa miliha. Bedíbana a chupa mil ben xiꞌini belhiha. 18Ttiaca nu ixí ttu miliha nna güialana guacheꞌenna lhiꞌu yu, qui becatsina belhi gue benni baninna naha.

19’Dequi de chi usá nna lania liba besina benni baninna canaha. Nianna uxna ca nua qui quixxiꞌacana bixa ben lencana ca belhiha. 20Nu uxí gayu miliha nna bisín lenna a gayu mil iqui de nu uxínaha, nianna rána: “Benni bananie neti, lu nna bodhaꞌanlu gayu mil belhi len neti, nnanna nna biyúrga, ni a gayu mil xiꞌin nua te-ni.” 21Benni baninna nua nna becabina rána nua: “Tseeba benlu. Lu ancalu ttu benni riben tsee sina, ancalu ttu benni gua dica uxxen leri lhe. Cumu de tsitsiba biyúlu saroꞌo nu betea len luha nna. Nnanna nna unia uyúlu ttu nu xxenrula. Larcala nna utá utaꞌa atta edaca lelu len neti.” 22Bisínguaba nu uxí chupa miliha, nianna rána: “Benni banani neti, lu nna bodhaꞌanlu chupa mil len neti. Nnanna nna biyúrga, ni a chupa mil nu ben xiꞌin nua te-ni.” 23Benni baninna nua nna becabina rána: “Tseeba benlu. Lu ancalu ttu benni riben tsee sina, ancalu ttu benni gua dica uxxen leri lhe. Cumu de tsitsiba biyúlu saroꞌo nu betea len luha nna. Nnanna nna xxenrula ocaꞌana las nálu qui un lenlu sina. Larcala nna utá utaꞌa atta edaca lelu len neti.”

24’Ttiaca atti bisína nu uxí ttu miliha nna ráttebana: “Benni banani neti, neti nna gua yuba dequi ancalu ttu benni bittu ratúa leni, nu rolapa atta bittu udana lhe redíguabalu lena atta bittu bedelhalu xua lhe. 25Denua nna ustia lu. Neti nna güiala guacatsia belhi guelu-ni lhiꞌu yu. Nnanna nna ni nu anca gueluha te-ni.” 26Benni baninna nua nna becabina rána: “Lu ancalu ttu nu riben sina runi nu lä anca tsee, ancaguabalu ttu nu lea lhe. Yuxalu dequi rolapaba atta bittu rada lhe redíguaba lena atta bittu neti bedelha xua lhe 27¿biacala bittu guacaꞌanlu belhi quia-ni atta uncana xiꞌinni, qui nnanna besíaya nna edía na ittupa len xiꞌinni?” 28Laniala rána adí ca nu seꞌe nía: “Gualcua ttu mili-na lo náni, gualute na len nu ulha tsii mili-na. 29Cumu nu te gueniha nna dhirla nua adí qui gatta chatti gueni, ttiaca nu bittu te gueniha nna axtala nu saroꞌo te gueniha itúa. 30Unbiyuu nu bittu guacana un sina-ni nna gualudaxxu na gualudelhana atta anca chulha-na, na nua atta cuesna lhe go lo layani lhe.”

Jesús unie elha uxtisi gue ca benni seꞌe yies lo yu-ni

31’Gansi chi besíaya neti Benni unbiyuu daa iyyabaaha, dedaaya deyuꞌa lheꞌe xieni gaꞌana tsee quia, lenia iyáxea ca ingeli quia-na, qui dhoa lo xxila gaꞌana tsee quia innabiaya. 32Lania nna iyárechaba ca benni seꞌe itúba yies lo yu-ni isíacana atta doa. Neti nna cuequiesia lheꞌe loescani, attiba runi benni ruyú carneꞌe ribequiesna ca chivaha lheꞌe ca carneꞌeha. 33Ca benni beni nu anca tsee nna useꞌa cana daca ná derechu quia, ca benni beni nu lä anca tsee nna useꞌacana daca ná rabesa quia. 34Lania nna neti benni rinnabia xeni, upea ca nu seꞌe deca ná derechu quia: “Gualtá, lebiꞌi, ca nu raca len Tata quiaha, qui dhíle nu tsee chi gaꞌananie dhi ca benni rinnabie. Unní nua nu chi gaꞌananie dhíle desdeba atti chi cuela yies lo yu-ni. 35Cumu atti utunia nna lebiꞌi nna bennabale nu utoa, atti bebisia nna bennaguabale inda uꞌuya, atti requia anca attiba benni dittu nna bennabale atta beꞌana, 36atti beasa xoa nna bennabale nu ucua, atti unia nna biyúbale neti, atti utta lisiyya nna bettenalhibale neti.” 37Ca benni runi nu anca tseeha nna ecabicana quia, innácana: “Tata, ¿nuca bilentu lu ritunlu, nianna bennatu nu utolu? ¿Nuca bilentu lu rebislu nna bennatu inda uyaꞌalu? 38¿Nuca bilentu lu requilu ancalu attiba benni dittu, nianna bennatu atta eyaꞌanlu? ¿Nuca bilentu lu requilu reasa xolu nna bennatu nu uculu? 39¿Nuca bilentu lu telu ranlu o telu lisiyya nianna bettenalhitu lu?” 40Neti benni rinnabia xeni nna ecabia innía: “Gualíbatia rpea le, atti benle yuda ttu ca benni raca betsi loesri-ni, masquiba ancacana nu bittu ra xxeni leni nna netiba nua benle yuda.”

41’Nianna upea ca nu sia deca ná rabesa quia: “¡Lebiꞌi, ca nu ralha tsiale atta quixa guele! ¡Gualbietta atta dua-ni! Gualtsia lo gui nu ttu dia liiba ritena, atta chi anca tsia nu xxegüiha lenna ca ingeli gueniha. 42Cumu atti bitunia nna läga bennale nu goa, atti bebisia nna bittuguaba bennale inda iꞌiya, 43atti güequia uca attiba benni dittu nna lebiꞌi nna läga bennale atta eyaꞌana, atti güequia beasa xoa nna bittuguaba bennale nu ucua, atti unia lhe utta lisiyya lhe lebiꞌi nna läga bettenalhile neti.” 44Lania nna ecabicana quia, innácana: “Tata xisi, ¿núca nua bilentu lu ritunlu lhe rebislu lhe requilu attiba benni dittu lhe requilu reasa xolu lhe o ranlu lhe o telu lisiyya lhe nianna bittu bentu lu yuda?” 45Lania nna ecabia gue ca nua, innía: “Gualíbatia rpea le, atti bittu benle ttu ca benni bittu ra xxeni leni seꞌe-ni yuda nna netiba nua bittu benle yuda.”

46Nianna rá Jesús:

—Ca nu runi nu lä anca tsee-na nna tsiabacana atta ttu dia liiba uyúcana elha disa, ca nu runi nu anca tsee-na nna eyyabacana atta gatta elha nabani guecani ttu dia lii.

Currently Selected:

San Mateo 25: zaq

Highlight

Copy