San Mateo 24

Jesús rixxiꞌe nu aca atti chi deoba lhuxa yies lo yu-ni

(Mr. 13:1-2; Lc. 21:5-6)

1Atti chi bería Jesús lheꞌeliꞌa gue yotuha nna. Laca deyuꞌe neda deyye, ubigatteba ca benni rudheti ca tisa ruleꞌe qui beleꞌequinbi Benniha adí ca yoꞌo anca gue yotuha. 2Jesús re cabi:

—¿Gua rilenle iyába ca unní? Neti nna gualíbatia rpea le, niba ttu ca iyya coa-na bitturu eyaꞌana iqui loesni, cumu itúbana ittapa.

Jesús riguixxiꞌe gasná aca atti lhuxa yiesi lo yu-ni

(Mr. 13:3-37; Lc. 21:7-36)

3Atti chi bisína Jesús lo lhilhi te láni Atta Daa Ca Ya Olivuha nna udottebe nía. Ca benni rudheti ca tisa ruleꞌe nna suntteba lacabi ubigacabi qui unnaba tisacabi Benniha, rácabi:

—Utixxiꞌen riꞌitu, ¿núca aca nu ralha, bi aca qui uleꞌe lo dequi chi deoba esíalu lhe chi deoba isía sá lhuxa yies lo yu-ni lhe?

4Jesús becabie re:

—Gualudo cuidadu qui nuttu nu dhana dhi yienle. 5Cumu ixe ca nu isía uncana dequi ancacana neti, nianna innácana: “Neti nua Cristu.” Ixeru benni dha ca nua dhi yiecana. 6Lebiꞌi nna atti unale chi ritilha len loesi ca yiesi, chi daa tisa itilha len loesi ca yiesi lhe bittu gasinle, cumu labíaba aca aná. Ttiaca läga chi bisía sá lhuxa yies lo yu-ni. 7Cumu ttu yiesi xeni len attu yiesi xeni itilha len loescani, ttu nu rinnabia leni attu nu rinnabia itilha len loescani. Gatti laduba gue yies lo yu-ni ixúxxatta, aca ubina lhe isíaguaba ixe lo isagüe gue ca benni lhe. 8Ttiaca iyába unní ancana sunruba nu daneru gue elha disa nu chi daba uyú ca benni seꞌe yies lo yu-ni.

9’Lania nna utecana le las ná ca nu udhaca güecan le, uttican le lhe. Iyába ca benni bitturu aca uyúcan le lo niꞌa gue de ria lele neti. 10Laniaguaba nua nna ixeru ca benni ria lecani neti bitturu tsia lecani neti, lacana nna bitturu aca uyú loescani, la labacana salhuꞌu loescani lo ca uxtisi-na lhe. 11Ixe ca güenlasi isía innácana dequi ancacana profeta gue Tata Do Iyyabaaha, ixeru benni dhacana dhi yiecana. 12De yatterba de tsani nu lä anca tsee yies lo yu-ni nna ixeru benni bitturu aquin gue loescani. 13Ttiaca benni dhana dhu tsitsina lo neda gue Tata Do Iyyabaaha axta atti isía sá gattina, unnuha liba lhána bittu tsia nittina. 14Labíaba quixxiꞌa ca benni itúba yies lo yu-ni ca tisa tsee gue gaxasná rinnabia Tata Do Iyyabaaha, lania liba isía sá lhuxa yies lo yu-ni.

15’Larcala nna ca nu ulabacana ca tisa dia lo sitsi-ni, uncana duelha qui sadú lecani bixa dia le atti re: “Atti ilenle aca ttu nu satsa lhiꞌu lheꞌe yotu-na atta anca leꞌa-na, gue nu satsaha nua utixxiꞌa profeta Daniel.” 16Lania nna ca nu seꞌe lo yu nu te láni Judea-na, uxunnicana tsiacana ca iꞌiyattoo-na. 17Nu do iqui yoꞌo gueniha nna bittu aquinna eyadina qui saleana bixa reasinna. 18Nu requi ranchu nna bittu eyyana lheꞌe lisniha qui saxína gabana gueniha. 19¡Carusiꞌiru ca nuila nuja xiꞌincani lania, ca nu deni unto rasi xisi lhe! 20Gualnnaba lo Tata Do Iyyabaaha qui bittu saxxína isía sá atti uxunnileha tiempu ribe beyya, niguaba sá redí leri lhe 21cumu ttu elha disa xeni nua uyú benni lania, desdeba atti ure yies lo yu-ni axta nnanna lägabi loesi elha disaha chi biyú benni, bitturguaba uyú benni attu elha disa loesi unnuha lhe. 22Gansi Tata Do Iyyabaaha bittuba odatsie ca sá atti uyúxxatta benni elha disaha, ni ttu benni bittu dhana lhána lo elhuttiha. Ttiaca lo niꞌa gue de runrube lha ca benni chi becuee anca guee, nuarca odatsie ca sáha.

23’Laniaha nna gansi nuxa iríana gán le: “Gualgüiarga, ni Cristuha du-ni”, o innána: “Gualgüiarga, ni Cristuha du-na”, lebiꞌi nna bittu tsia lele gue nu inná anía. 24Cumu ixe ca benni iría innácana dequi labacana nua anca Cristu, iría ca nu inná dequi ancacana profeta gue Tata Do Iyyabaaha lhe. Lacana nna uncana ixeru ca milagru, unguabacana ilen benni ca nu uni ebanin ca benni lhe. Leni ca unnuha nna dhi yiecana ca benni. Axtaba ca benni chi becuee Tata Do Iyyabaaha, un ca nua dhi yiecana. 25Nnannali chi rixxiꞌatia le gue nu aca. 26Larcala nna gansi gácan le: “Gualugüiarga, ni Benniha requi lo yu bisiha”, bittu tsiale. O si gácan le: “Gualugüiarga, ni Benniha do gatsie lheꞌe ttu yoꞌo”, bittuguaba tsia lele gue ca nu inná anía. 27Cumu attiba ganchi ropi edha-na rilá saba xieni gueni desdeba atta riria ubisa-na axtaba atta radi ubisa-na, aníaguaba ilá sába gansi chi besíaya neti, Benni unbiyuu daa iyyabaaha. 28Iyábale yule, atta te ttu nu yatti nía ritupa ca chettu.

29’Cuantusiba tte ca sá atti uyú ca benni seꞌe yies lo yu-ni elha disaha nna echulhatteba lo tatubisa-na, lo nanto beo-na lhe bitturu cuꞌuna xieni. Ca beli-na iyinnabacana lo yu, iyába ca nu ra xxeni leni seꞌe lo bea-na ixidicana. 30Nianna aca ttu nu aca lo bea-na, nu uleꞌe lona neti Benni unbiyuu daa iyyabaaha chi dedaaya. Lania nna iyárechaba ca benni seꞌe yies lo yu-ni elenquinna lhe cuescana lhe atti iláquinna neti dedaaya lheꞌe ca bea-na anca benni ra xxeni leni, ruꞌu xieni gaꞌana tsee quia lhe. 31Atti ucues trompetaha idisa nna neti nna idhelhatteba ca ingeli quia-na tsiacabi saxícabi ca benni chi becuee Tata Do Iyyabaaha anca guee seꞌe ittapa laduba gue yies lo yu-ni, desdeba atta ridulo iyyabaaha axtaba atta riluxana.

32’Gualudheti ejemplu gue ya igu-na: Atti rilenle chi re reꞌeni ca lo xiquini, chi reꞌeyu lhaga gaꞌa gueni lhe lebiꞌi nna ritedaattebinle chi dedaa tiempu iyya. 33Anáguaba lebiꞌi, gansi chi bilenle aca iyába ca nu chi ria-ni, lania nna chi yule chi daa ribiga esíaya, neti Benni unbiyuu daa iyyabaaha. 34Neti nna gualíbatia rpea le, iyába nu ria-ni aca, antisla lhuxa ca benni seꞌe-ni. 35Lo bea-na lhe yies lo yu-ni lhe lhuxabacana, ttiaca labíaba saxxína aca nu rá ca tisa quia-ni.

36’Ttiaca gue bixa sá lhe gue bixa ura aca unnuha lhe tsa läganu yu, ni ca ingeli seꞌe iyyabaaha lhe niguaba neti benni anca Xiꞌini Tata Do Iyyabaaha lhe bittu yua, sunruba Tata quia do iyyabaaha yue.

37’Attiba ucaba tiempu atti udo Noé, aníaguaba aca atti isía sá esíaya neti Benni unbiyuu daa iyyabaaha. 38Cumu ca benni useꞌe atti bittu chi bodisá Tata Do Iyyabaaha yies lo yu-ni inda nna uyuꞌuba ca nua go lhe güeꞌeya lhe güetsaa ná lhe güequeti ca xiꞌincaniha lhe. Axta liba atti bisía sá utaꞌa Noé lheꞌe barcoha. 39Lacana nna läga guadú lecani gue bixa nua aca, larcala nna iyyaba lecani bisía sá atti bisá inda yies lo yu-ni, nianna iyábacana uchee inda. Aníaguaba aca la sá atti esíaya, neti Benni unbiyuu daa iyyabaaha. 40Lania nna atta seꞌe chupa ca unbiyuu lheꞌe ca ranchu-na, tturba nua echea, attu nua nna eyaꞌanbana. 41Delo chupa ca nuila rencana güettu, ttuna echea, attuna eyaꞌana.

42’Lebiꞌi nna bittu tseꞌe xulhale, cumu läga yule bixa sá esíaya, neti benni bantia le. 43Ttiaca Gualúnarga nu upea le-ni, ttirca benni beaca gueni ttu yoꞌo chi yuna bi ura lo relaha isína ubanaha, lana nna läga gaꞌadhina, qui bittu ugüelhana gaꞌa ubanaha lhanana nu te lheꞌe yoꞌo gueniha. 44Anáguaba lebiꞌi, gualtseꞌe ubeda, cumu neti Benni unbiyuu daa iyyabaaha esíaya atti bittu leda lele.

45’¿Nú nua ancana benni rudo tisa te elha rieni gueni bodú benni bananie-na qui gapana ca benni riben sina lheꞌe yoꞌo guebiha, utena nu go ca nua ura guecani lhe? 46Carbáru nu ren sina sattiꞌa benni bananie na dana runna nu daa loni unna gansi chi besíabi. 47Neti nna gualíbatia rpea le, biꞌini baninbi nua nna odúbi na qui acana nu gapa iyába nu te guebi. 48Ttiaca gansi nu ren sinaha ancana ttu benni lä du ta leni, lana nna aquinna dequi biꞌini baninbi na isábabi atti esíabi, 49Nianna dhulottebana ugüena adí ca benni riben sinaha, atti dhottebana gona lhe iꞌiyana lhe len ca nu dusi. 50Ttiaca biꞌini baninbi-na, esíabi la sá atti bittu ribedana, la ura atti bittu leda leni esín biꞌiniha lhe. 51Biꞌiniha nna ugüebi na ttu elha disa tsitsi. Atti udelhabi na atta tsia ca nu ni lo ni tisaba runcana dequi ancacana nu runi nu anca tsee. Nía nua atta cuescana lhe go lo layacani lhe.

Currently Selected:

San Mateo 24: zaq

Highlight

Copy