San Lucas 1

Ca tisa-ni udhelha Lucas len Teófilo

1Ixe ca benni chi bencabi ucuacabi lo sitsi gue nu gualí chi uca aní lo ca benni. 2Ucaba attiba chi utixxiꞌani ca benni begüiaga locabi gue nu uca desde primerohali, lacabi nna ucacabi benni utixxiꞌa ca tisa gue Tata Do Iyyabaaha. 3Anáguaba neti, xa Teófilo, chi unnaba tisaxxa tseeba iyába desde gue gaxasná udulo primerohali, nianna ucatia tseeba anca ucuaxxatseeba ca tisa-ni lo sitsi qui idhelha len cuinalu, atta quixxiꞌatia lu gue iyába nu chi bientia, 4qui anáchu nna una tseelu gue nu anca gualí chi beleꞌequin ca benni lu.

Ttu ingeli gue Tata Do Iyyabaaha rixxiꞌe gali Juan

5Atti uca Herodes nu rinnabia gue lo yu nu te láni Judea, lania nua udo ttu bixxudi lábi Zacarías, bababi leni adí ca bixxudi gue bixxudi lá Abías. Nuila guebiha nna lábi Elisabet, ancabi benni datía Aarón. 6Irupabacabi ancacabi benni runi nu anca tsee lo Tata Do Iyyabaaha, seꞌeguabacabi rudocabi tisa gue iyá nu runi Benniha mandadu uncabi lhe. Larcala läganu te inne güeena guecabi. 7Ttiaca lacabi nna nuttu xiꞌincabi seꞌe, cumu Elisabet ancabi nu bittu aca uja xiꞌinbi, irupabacabi chi ancacabi benni chi diani lhe.

8Ttu sá atti ulha ca bixxudi baba len Zacarías uncabi sina gue Tata Do Iyyabaaha lheꞌe yotu. 9Attiba chi lábi ca bixxudiha runcabi, Zacaríasba guaxxína ulha gaꞌa lheꞌe yotu atta do becoa gue Tata Do Iyyabaaha qui uttebi yala lo becoaha. 10Laca rite yalaha nna ixeru ca benni seꞌe lheꞌeliꞌa gue yotuha rinnecabi len Tata Do Iyyabaaha. 11Unnuhaba raca nna attirba chi ucaxxe ttu ingeli gue Tata Do Iyyabaaha atta du Zacarías. Udúe daca derechu gue becoa atta rite yalaha. 12Atti biláni Zacarías ingeliha nna uca guatettebinbi lhe usixxattinbi lhe. 13Ttiaca ingeliha nna rábi biꞌiniha:

—¡Bittu gasinlu, Zacarías, cumu chiba bienini Tata Do Iyyabaaha gue nu rinnabalu loe! Nuila guelu Elisabet-na chi uja xiꞌinni. Untoha nna ugüelu láni Juan. 14Lu nna eyoꞌoxxatta lelu, ixetsitsiaguaba benni eyoꞌoxxatta lecani de gali untoha lhe 15cumu biꞌiniha nna acabi ttu benni ra xxeni leni lo Tata Do Iyyabaaha. Labi nna tsa bittu iꞌiyabi vinu, niguaba attu nu unna dhusinbi lhe. Atti sna nujali nan guebiha bi chi tsuꞌu Espíritu gue Tata Do Iyyabaaha itúba lheꞌe cuerpu guebi. 16Unguabi qui eyequi ixetsitsiale ca nu Israel odaxxule neda gue Tata Do Iyyabaaha Benni bananie le-na. 17Laguabi tsiabi nnerubi lo Benni bananie ri-na. Dhibi loesi Espíritu gue Tata Do Iyyabaaha uxí profeta Elías lhe gatta elha ra xxen lee utta gue biꞌiniha guebi lhe. Unbi eyaca tsee ca tata nanaha len ca xiꞌincaniha. Unguabi qui ca nu bittu rudo tisa-na udocana tisa attiba ca benni tsee-na. Aná nna oseꞌe tseebi ca benni qui chi seꞌe tseecana satsácana Benni bananie ri-na gansi chi bisíe.

18Zacarías unnaba tisabi ingeliha rábi biꞌiniha:

—¿Gasná aca xen lasia dequi gualí aca nu rá cuinalu? Cumu neti nna chiba anca benni chi diani, anáguaba nuila quia-na lhe.

19Ingeliha nna becabibi rabi:

—Neti láya Gabriel. Anca benni run sina gue Tata Do Iyyabaaha. Lee udhelhe neti qui quixxiꞌatia lu ca tisa tsee-ni. 20Nnanna nna biríaba acalu, cumu bittu güia lelu gue ca tisa quia-ni. Lu nna bittu aca innelu axta liba isía sá atti aca nu chi ria-ni, lania liba ennelu.

21Laca ca benni nna guaseꞌecana ribedacana lheꞌeliꞌa gue yotuha ería Zacarías, lacana nna chi raca guatequinna de biaca risá biꞌiniha atta do becoha.

22Atti chi bería biꞌiniha nna lärga raca innebi ulisabi ca benni seꞌe nía. Laniala utedaaquin ca benni dequi bixaba beleꞌen biꞌiniha lo becoha. Labi nna senniba ruleꞌenbi ca benni, cumu biríaba beꞌanbi.

23Atti chi beꞌeyu ca sá ben Zacarías sina lheꞌe yotuha nna deyyattebabi lheꞌe yoꞌo guebiha. 24Dequide lania nna lägabi bisá nna nuila guebi Elisabet nna bija xiꞌinbi. Labi nna gayu beo bittu biríabi yoꞌo. Nianna rábi: 25“Unní ancana ttu nu chi ben Tata Iyyabaaha len neti. Lee nna guatúa lee neti qui bitturu edacani ca benni quia de nuttu xiꞌinia ruja.”

Ingeli gue Tata Do Iyyabaaha rixxiꞌabi gali Jesús

26Ucaba xxupa beo nna bededhelhatteba Tata Do Iyyabaaha ingeli Gabriel lheꞌesi Nazaret re lo yu nu te láni Galilea, 27atta do ttu nuila rbani cuiti lábi María chi rinnaba unbiyuu bi. Unbiyuuha nna lábi José. Labi nna datíabi David biꞌini uca nu rinnabia gue ca benni Israel. 28Atti utaꞌa ingeliha atta do María nna, unnettebabi rábi María:

—¡Padiuxi! Benni bananie ri-na chi raca lanie lu. Lee due lenlu, [delo iyá ca nuila, luba nu chi ucaru lanie].

29Ttiaca María nna uca guatelinbi de bieninbi ca tisa-na, nianna uquinbi: “¿Bi diale ca tisa unne biꞌin-ni?” 30Laniala unne ingeliha re:

—Bittu gasinlu, María, cumu Tata Do Iyyabaaha chi raca lanie lu. 31Nnanna nna lu uja xiꞌinlu. Atti cuꞌulu unto-ni nna ugüelu lee Jesús. 32Unto-ni nna aque nu ra xxeni lee. Gáguacan Ben-na: “Xiꞌini Benni ra xxeni lee do iyyabaaha.” Tata Do Iyyabaaha Benni bananie ri-na unie aca Ben-na nu rinnabia attiba David biꞌini datía Ben-na ucabi benni unnabia. 33Ben-na nna ttu dia liiba innabie ca benni Israel.#1:33 Israel lenbi Jacob nna ancacabi la ttuba benni. Ttu tsaba innabie.

34Laniala nna rá María ingeliha:

—¿Tti modu aca nu rálha? Cumu neti läganu unbiyuu chi do lania.

35Ingeliha nna becabibi rábi biꞌiniha:

—Espíritu gue Tata Do Iyyabaaha isíe tsuꞌe lheꞌe cuerpu guelu. Benni Do iyyabaaha ugucue lu elha ra xxeni lee guee attiba xula gue ttu bea. Larcala benni galiha nna anque benni do riesi anca gue Tata Do Iyyabaaha. Xiꞌin Tata Do Iyyabaahaba gatta lá Ben-na. 36Anáguaba Elisabet benni datíalu-na, masquiba chi ancabi benni chi diani, cuꞌuguaba xiꞌinbi. Ca benni nna rácana bittu aca uja xiꞌinbi, ttiaca chila uca xxupa beo nuja xiꞌinbi. 37Cumu tsa lägabi te ttu nu lä aca gue Tata Do Iyyabaaha unie.

38Laniala nna rá María:

—Neti anca benni rixuu lo sina gue Tata Do Iyyabaaha. Unbe len neti attiba rá cuinalu.

Bedá lania nna güequi ingeliha.

María güiabi guannalhibi Elisabet

39Lägabittega isá uca nna ucatteba María puradu uluꞌubi neda diabi lheꞌe ttu lheꞌesi re atta sia ca iꞌiya. Lheꞌesiha nna babana lo yu nu te láni Judea. 40Bisínbabi nía nna utaꞌattebabi lheꞌe yoꞌo gue Zacarías, nianna ráttebabi Elisabet padiuxi. 41Cuantusiba bienini Elisabet tsiꞌi María rábi padiuxi, untoha nna udhí bedona lhiꞌu lheꞌe Elisabet. Espíritu gue Tata Do Iyyabaaha nna utaꞌattebe lheꞌe cuerpu gue Elisabet. 42Biꞌiniha nna unnettebabi idisa rábi:

—¡Tata Do Iyyabaaha chi ucaru lenie lu attichula adí ca nuila-na, racaguaba lanie benni nujalha lhe! 43Neti nna ¿nú anca nna daa nan gue Benni bananie neti ettenalhie neti? 44Cumu cuantusiba bientia tsiꞌilu rálu padiuxi, unto quia-ni nna guadhi bedona lheꞌa de beꞌoba leni. 45¡Carbárulu de güia lelu saxxína aca ca tisa chi rá Tata Do Iyyabaaha lu!

46Laniala rá María:

Itú iqui itú lasia rpea Tata Do Iyyabaaha:

“¡Benni ra xxeni leni ancalu!

47Espíritu quia-ni nna tsitsiba reꞌo leni gue Tata Do Iyyabaaha Benni bodile neti,

48cumu chi besía loe neti, nuila nu bittu ra xxeni lee-ni,

nu rixuu lo sina guee.

Bedá nnanna iyába ca benni innecana innácana:

¡Carbáru nuila-na!

49Cumu xxeni anca nu chi beni Tata Do Iyyabaaha benni ra xxeni lee-na len neti.

Benni do riesi lheꞌe iyá nu lä anca tsee anque.

50Ben-na satíaba ratúa lee ca benni rapacana ben-na respeto,

ca xiꞌincani lhe ca xidhoacani lhe.

51Benie ca nu reban leri len elha ra xxen lee guee lhe

belhuxaguabe nu rulaba le ca nu ttaba rácana dequi ancacana nu ra xxeni leni lhe.

52Utúaguabe ca nu rinnabia lo atta siacana lhe

ulequi xenie ca benni bittu anca nu ra xxeni leni lhe.

53Ca benni rituniha nna tsapaba begüee cana guecani,

ca nu te guecaniha nna tsa bitturu betee guecani.

54Chi uca lanie riꞌi ca benni Israel biꞌini bixuu lo sina guee,

bittuguaba bixulhanie uyú siꞌe riꞌi lhe.

55Aníaba chi begüee tisa unie ttu dia lii len ca benniola gueriha,

Benniha nna chi re, satíaba satúa lee Abraham lhe ca benni datía biꞌiniha chi isíala lhe.”

56María nna níaba beꞌanibi leni Elisabet attiba tsunna beo. Lenla nna bequibi besinbi lheꞌe yoꞌo guebiha.

Uli Juan biꞌini ugadi inda

57Atti chi bisía sá cuꞌu xiꞌini Elisabet, labi nna uluꞌubi ttu unbiyuuto. 58Atti bina ca benni seꞌe gaxxa atta dobiha lhe ca benni datíabiha lhe gue ya de xxeni anca elha tsee bete Tata Do Iyyabaaha len biꞌiniha nna bedaca lecani lenbi. 59Ucaba xxunu ubisa uli untoha nna uchettebacabi untoha qui cuebi senni nu raca leni ca unbiyuu Israel. Ca benni seꞌe nía nna runcana quixxacana lá untoha Zacarías attiba lá tata guebiha. 60Ttiaca nan guebiha nna rábi:

—¡Bittu! Juanba gatta lá unto-ni.

61Lacana nna rácana:

—Läganu betsi loeslu seꞌe lá aná.

62Laniala nna belisacana Zacarías tata gue untoha leni senni qui quixxiꞌabi gaxasná raca lebi gatta lá untoha. 63Biꞌiniha nna unnababi ttu breta güexxa, nianna benbi letra loni: “Unto-ni gatta láni Juan.” Lania nna iyába ca nu seꞌe nía bebanquinna. 64Snaba lania nna uca benne Zacarías, nianna udulottebabi ulequi xenbi Tata Do Iyyabaaha. 65Iyába ca benni seꞌe gaxxa atta do Zacarías uca teequinna. Anáguaba lheꞌe iyába ca lheꞌesi seꞌe atta sia ca iꞌiya sia lo yu nu te láni Judea rinne ca benni gue nu uca. 66Iyába ca benni runa gue nu ucaha nna rulaba lecani rácana:

—¿Nú eꞌeyu unto-na acana?

Cumu de ritedaaquinna du Tata Do Iyyabaaha leni untoha.

Zacarías ribequi xenbi Tata Do Iyyabaaha

67Zacarías, tata gue Juan, atti utaꞌa Espíritu gue Tata Do Iyyabaaha lheꞌe cuerpu guebi nna unnettebabi ca tisa bete Espírituha lenbi, nianna rábi:

68¡Ribequi xenia Tata Do Iyyabaaha, Benni bananie riꞌi

ca benni Israel-ni, cumu chi bisíe odile riꞌi ca benni guee!

69Chi udhelhe Benni ra xxeni lee-na qui odile ri.

Ben-na anque ttu benni datía David biꞌini bixuu lo sina guee.

70Benba Tata Do Iyyabaaha nu chi re unie.

Atti nía nna bixunie ca profeta guee qui utixxiꞌacabi gue nu unie len ca benni guee.

71Lee nna re, godilábe ri lo ná ca nu bittu raca uyúcan ri-na,

lo ca nu rutía di lecan ri-na lhe.

72Chi re guasatúaba lee ca benniola gueriha lhe

bittu ixulhanie ca tisa chi begüee len ca biꞌiniha lhe.

73Ca tisa-ni nua bocaꞌan tsitsie leni Abraham benni uca benniola gueriha atti re:

74Lee nna odile ri las ná ca nu bittu raca uyúcan ri-na,

qui lania nna tsa nutturu nu gasinri loni atti ixuuri lo sina guee.

75Riꞌi nna tseꞌeri acari benni chi seꞌe riesi anca gue Tata Do Iyyabaaha, nu runi nu anca tsee lo Ben-na lhe.

Anába tseꞌeri unri iyába ca sá aca banri.

76Lu nna xa xiꞌinto, quixxacana lálu profeta gue Tata Dios Benni do iyyabaaha,

cumu lu nna nnerulu lo Benni bananie ri-na qui unlu eseꞌe tsee ca benni gansi chi bisíe.

77Lu nna quixxiꞌenlu ca benni lo yies gue Ben-na, lee nna guadíbe elha xen lasi gue ca tulha guecani,

anía liba nna odile cana.

78Cumu Tata Do Iyyabaa gueriha ratúaxxatta lee ri len siꞌi le.

Denua nna iyyabaahali idhelhe Benni anque xieniha dee ettennalhie ri,

79qui udanie gue ca nu seꞌe atta anca chulha, ca nu ruxunnina guecani gatticana.

Aná nna unie tsiari lo neda guee atta te elha xen lasi.

80Unto biꞌini lá Juan diababi rixenbi, tsitsiba diabi ridúbi lo neda gue Tata Do Iyyabaaha. Níaba udobi lo yu bisiha, axta atti bisía sá gaꞌana uleꞌe lobi leni ca benni Israel.

Currently Selected:

San Lucas 1: zaq

Highlight

Copy