San Lucas 2

Uli Jesús

(Mt. 1:18-25)

1Lania nua anca Augusto César nu rinnabia gue itúba lo yu nu baba Roma. Lana nna benna mandadu uncana ttu censu gue iyába ca benni seꞌe lo yu atta rinnabiana. 2Unníba primerba censu bencana atti anca Cirenio nu rinnabia lo yu gue Siria. 3Iyába benni raca duelha tsiacana atta beaca lascani qui dho lacani lo sitsi. 4Denuala nna bedaa José lheꞌesi Nazaret re lo yu nu te láni Galilea deyyabi lheꞌesi lá Belén re lo yu nu te láni Judea atta uli David biꞌini unnabiaha, cumu ancabi benni datía David. 5Labi nna beyyabi nía qui udocana lábi lo sitsi lenbi nuila dubi rinnababi lá María. Biꞌiniha nna chi dubi nuja xiꞌinbi. 6Ttiaca guaxxína laca seꞌecabi lheꞌe yiesi Belén nna, bisía sá gali xiꞌinbi. 7Nía uluꞌu xiꞌin primer gue María. Labi nna bottesttebabi untoha lari atti utixxattebabi Benniha lheꞌe atta ro ca uꞌuna bia cumu bitturu bisela atta eyaꞌancabi lheꞌe ca yoꞌo atta reꞌan adí benni.

Ca ingeli rixxiꞌacabi chi uli Jesús

8Gaxxaba roꞌo yiesi Belén seꞌe ca benni ruyú ca carneꞌe. Níaba reꞌancabi lo rela atta yuꞌu ca carneꞌeha qui rapacabi ca unnuha. 9Attirba ttu lhaba ucaxxe ttu ingeli gue Tata Do Iyyabaaha atta seꞌecabiha. Sabiꞌabacabi uyuꞌu xieni racalaa gue Tata Do Iyyabaaha, lacabi nna usilhabaquinbi 10Ttiaca ingeliha nna rábi:

—Bittu gasinle, cumu neti delha qui quixxiꞌatia le gue ttu nu tsee uni eyoꞌo le iyába benni. 11Nasá uli lheꞌe yiesi gue David, Benni odile ca benni. Benniha nua anque Cristu, Benni bananie ri. 12Nu innía-ni uleꞌe lona nu ria-ni ancana nu gualí: Lebiꞌi nna satiꞌale untoha tubie lari, tee lheꞌe atta ro ca uꞌuna bia.

13Attirba ttu lhaba ucaxxe ixeru ca ingeli daa iyyabaaha atta du ingeliha, rulhacabi gue Tata Do Iyyabaaha rácabi:

14¡Xxeni ra le Tata Dios Benni do iyyabaaha!

Yies lo yu-ni nna tseeba tseꞌe ca benni redíba elha tsee gue Ben-na.

15Atti chi beopi ca ingeliha iyyabaaha nna ca benni ruyú ca carneꞌeha nna rátteba loescani:

—Tsia sangari lheꞌesi Belén, qui sagüiari bixunní uca, gue nu chi utixxiꞌen Tata Do Iyyabaaha ri.

16Bedhiubattebalecabi diacabi. Níaba guattiꞌacabi María lenbi José. Untoha nna níaba tee lheꞌe atta ro ca uꞌuna bia. 17Atti biláquinbi untoha nna utixxiꞌattebacabi nu chi rá ingeliha cabi gue untoha. 18Iyába ca nu bienquinna gue nu rá ca benni ruyú ca carneꞌeha nna bebanquinna gue nu rixxiꞌa ca nua. 19Ttiaca María nna uyuꞌu tsitsibabi tisa gue iyába nu raca, tsitsiba rulaba lebi gue nua. 20Ca benni ruyú ca carneꞌeha nna atti bequicabi deyyacabiha nna bilhattebacabi gue Tata Do Iyyabaaha rácabi: “¡Xxeni ra le Tata Do Iyyabaaha!” Rugüecabi Benniha xquixarue gue iyába nu chi bienquinbi lhe biláquinbi lhe, cumu iyába nu rá ingeliha guaxxína.

Guatsadúcabi Jesús lheꞌe yotu

21Atti chi uca xxunu ubisa uli untoha nna berenttebacabi Benniha senni, nu runcana leni ca unbiyuu Israel. Nianna begüeecabi lá Benniha Jesús, attiba begüee ingeliha lee atti chi ujala María Benniha.

22Atti chi beꞌeyu ca sá atti anca eyacacabi nu nari lo Tata Do Iyyabaaha attiba gaꞌana lo ley bocaꞌana Moisés, nianna güiatteba len José lhe María lhe, untoha atta do yotu do Jerusalén qui utsá ducabi Benniha lo Tata Do Iyyabaaha. 23Aníaba bencabi cumu aníaba gaꞌana lo ca ley gue Tata Do Iyyabaaha. Lo ben-na rá: “Iyába unbiyuu gali primertteba nna acana nu iriesi aca gue Tata Do Iyyabaaha.”#2:23 Éxodo 13:2, 12 24Ráguaba lo ca ley-na: Ca tata nanaha labía utecabi úna len Tata Do Iyyabaaha, si chupa bexu o chupa becha.#2:22-24 Levítico 12:8

25Laniaguaba nua udo ttu unbiyuu lheꞌe yiesi Jerusalén lábi Simeón. Labi nna ancabi ttu benni runi nu anca tsee lo Tata Do Iyyabaaha, rudobi tisa gue Ben-na lhe. Labi nna doguabi ribedabi isía Benni odile ca benni Israel. Espíritu gue Tata Do Iyyabaaha nna len lababi doe. 26Benniha nna chi utixxiꞌanie bi, labi nna bittu gattibi axta qui ugüiabi Cristu Benni idhelha Tata Do Iyyabaaha. 27Espírituha nna uchee biꞌiniha atta do yotuha la sá atti uche ca tata nan gue Jesús Benniha qui uncabi len Benniha attiba gaꞌana lo ca ley bocaꞌana Tata Do Iyyabaaha leni Moisés. 28Simeón nna bedaxxubi untoha bexxúa lo nábi, atti betettebabi ixquixaru len Tata Do Iyyabaaha, rábi:

29Nnannarguaba xa Tata Do Iyyabaa,

chiba guaxxína tisa begüeelu len netiha,

guacaba ugüelhalu gattia leni ttu elha xen lasi,

neti benni rixuu lo sina guelu.

30Cumu leni irpa ca iyya loa-ni chi begüiaya Benni odile riꞌitu.

31Bennionni anque Benni becueelu bedúlu lo iyáxea ca benni seꞌe yies lo yu-ni.

32Lee anque xieni udani gue ca benni bittu anca benni Israel qui unbiacana cuinalu.

Benni anque xieni-ni unie cue xentu, riꞌitu ca benni Israel.

33José lhe María lhe rebanbaquinbi gue iyá nu rienquinbi rá Simeón rixxiꞌabi gue Jesús. 34Laniala nna unnaba Simeón aca len Tata Do Iyyabaaha ca biꞌiniha, atti rábi María nan gue Jesús:

—Biyúrga, unto-ni nna anque Benni chi gaꞌana odile ixe tsitsia ca benni gueri anca benni Israel, unie qui tsia nitti ixeru cana lhe. Ben-na anque Benni ruleꞌe loe Tata Do Iyyabaaha, ttiaca ixe nu cuꞌu niꞌani Ben-na. 35Qui anía nna tsanni lo nu rulaba le ixeru benni. Ttiaca unní nna acana nu uni uyúlu elha disa, [attiba ttu espada gaꞌana lheꞌe lastoolu.]

36Roꞌo yotuha guaba du ttu nuila lábi Ana ancabi profetisa, biꞌiniha nna ancabi xiꞌini biꞌini lá Fanuel baba len ca benni datía biꞌini lá Aser. Labi nna chi ancabi benniola, cuitittebi betsá nábi, sunruba gasi ida udo lenbi unbiyuu guebiha nianna ucattebabi bidabi. 37Lania chi anquinbi tta yuꞌu ttapa (84) ida. Labi nna satíaba ridobi lheꞌeliꞌa gue yotuha. Rela resába rixuubi lo sina gue Tata Do Iyyabaaha, rinnebi len Benniha lhe riguꞌu bina lheꞌebi lhe. 38La uraguaba bisín Ana atta seꞌe ca biꞌiniha. Labi nna udulottebabi betebi xquixaru len Tata Do Iyyabaaha, atti udulottebabi utixxiꞌabi gue untoha lo ca benni seꞌe ribeda odilá Tata Do Iyyabaaha yiesi Jerusalén.

39Dequide chi beni José leni María iyába nu rá lo ca ley gue Tata Do Iyyabaaha, bequittebacabi deyyacabi lheꞌesi Nazaret atta beaca lascabi, nu re lo yu nu te láni Galilea. 40Jesús diabe rixenie, die ribe tsitsi lee lhe. Diaguabe raque nu texxatta elha rien gueni lhe redí baaguabe elha tsee rute Tata Do Iyyabaaha lhe.

Jesús doe lheliꞌa gue yotuha

41Ca tata gue Jesús ttu ttu idaba riacabi lheꞌe yiesi Jerusalén laní Pascua. 42Atti ucani Jesús tsiꞌinu (12) ida nna güiacabi len Benniha laní lheꞌe yiesi Jerusalén attiba labicabi runcabi ttu ttu idaba. 43Dequide chi uluxa laníha nna, José lhe María lhe güequittebacabi deyyacabi, Jesús nna níaba beꞌane Jerusalén. Ca tata gue Benniha nna läga utedaaquinbi. 44Lacabi nna ttu sá chi bedácabi, ucaquinbi ga níaba de nutsa Jesús lagüi ca benni deyyaha. Laniala beguilacabi Benniha lagüi ca betsi loescabi lhe len ca benni ancabiaquinbi lhe, 45ttiaca läganu Benniha guattiꞌacabi, denua nna nuarca bequicabi deyyacabi Jerusalén reguilacabi Jesús.

46Uca liba tsunna ubisa atti guattiꞌacabi Benniha doe lheꞌeliꞌa gue yotuha lagüi gue ca nu ruleꞌe nu rá lo ca ley bocaꞌana Tata Do Iyyabaaha leni Moisés. Rudo nague guecani lhe rinnaba tise cana lhe. 47Iyába ca nu rienquinna gue Benniha nna rebanbaquinna gue elha rieni te guee, gue nu recabie lhe. 48Atti biláni ca tata nan gueha Benniha nna bebanbaquinbi. Nan gueeha nna rábi:

—Xiꞌinto, ¿biaca benlu aná len riꞌitu? Tata guelha lhe neti lhe yade chi raca guatentu requitu reguilatu lu.

49Laniala nna unne Jesús re cabi:

—¿Biaca neti requile reguilale? ¿Si bittuba yule, lo sina gue Tata quiaha raca duelha dhua?

50Ttiaca lacabi nna bittu guadú lecabi gue ca tisa unne Benniha.

51Laniala nna deyye len ca tata nan gueha lheꞌesi Nazaret. Lee nna níaba udoe, bedobe tisa gue ca tata nan guee. Iyába unní nna rigúa tsee lhiꞌu lheꞌe lastoo María nan gue Jesús. 52Jesús diabe rixenie, diaguaba ratta adí elha rien guee lhe. Tseeba reꞌo le Tata Do Iyyabaaha gue iyába nu runie, radiguaba le ca benni gue nu runie lhe.

Currently Selected:

San Lucas 2: zaq

Highlight

Copy