Marcos 13

Jesús 'dö̧ibaji̧ möle baledakwa̧ abönö yöawina wene

1Jesúsma Dios ejutjö laebena öba̧ja̧di̧ waisachadötjö bakwo̧ jö̧ba̧lijetö:

—Ba̧ja̧dakwawa luwo̧ edi. Beju, Dios ejuma otiwanö tjotidinobe. Jeju ö'öbö ju̧kwi̧ ejubiyabi yelösöda otiwejubiya. Edi, inawiya otiwi̧ öwiyatjö junö tjotidinobe— jö̧ba̧lijetö. 2Jejenö jö̧a̧lökwe Jesúsma jö̧ba̧lijetö:

—Jau, bena ju̧kwi̧ o̧dijuma otiwi̧. Jo̧kwaijayonö ju'winöma jejubiya otiwi̧ öwiyatjö otikwama, okobe jwiinö pjolebö loawakwa̧ nijibe. Inawiya ju'wi öwiya wa̧nö otiwabi 'diökakwa̧— jö̧ba̧lijetö Jesúsma.

3Jemi tupakwö Jesúsma, iteda öba̧ja̧di̧ waisachadökwö 'yi̧jetö Olivo mikwa'o mö'ösa'obe, Dios eju badeibö jemima. Jesúsma jobe ö̧bonö Pedro, Jacobo, Juan, Andrés, jobadöda babibö, abebö a̧ja̧kwijadötö Jesúsnöma:

4—Ökwönö abebö da̧ja̧kwa. Jo̧da jö̧ka̧laja̧ma, Dios ejubi eju ö'öbö ju̧kwi̧ ejubiyabi pjolebö loawa jö̧ka̧laja̧ma ¿dianö baledakwa̧da? Ja̧ baledakwa̧ abönö ¿dakwö baledakwa̧da? Döwaisobö jö̧da̧la ja̧ pjolebö loawa baledakwa̧ma ida̧ökö lekwökena— abebö a̧ja̧kwijadötö. 5Jejenö abebö tja̧ja̧kwökwe Jesúsma jö̧ba̧lijetö:

—Yöta̧laduwakwö. Tjöbeba̧lakwawö kwuju̧kwaduwo jelo̧ ömönö yöba̧lö ichajo̧ yöa̧li̧ kwösödaduwapji jö̧ba̧lö. 6Tjöbeba̧lakwawö kwuju̧kwaduwo ba̧jekwadö tjichakobetjö̧, omöna yöba̧ladöma. Ba̧jekwadö tjichakobe, Ötjödasa Dios weinökwe, jö̧ba̧lö, jojodö tjö̧jibinö pjabato̧sa, jö̧ba̧lö. Jojodö ba̧jekwadö omöna yöbawo̧ yöawi̧ a̧ja̧kwö tjösödakobe, Biteda Dios weinökwe, jö̧ba̧lö. Jejenö Dios iwene kabatibö, jo̧ba, omöna yöba̧lo̧ yöawi̧da a̧ja̧kwö tjuju̧kwakwedö—jö̧ba̧lö yöbawijetö Jesúsma—.

7Ja̧danö, ju'wibi baledakobe. Jojodöma ölakwabikwawö 'bötjabikwawönö yönebi jelobetjöbi baledobe yötja̧lakwawi̧ kwa̧ja̧kwaduwakobe. Jejenö baledonö yebabökönö kwuju̧kwaduwo, ja̧ 'böawakwabikwawama isabenö baledobö jo̧betjö̧. Jo̧kwaijayonö ja̧ baledenama böjȩma ina 'dö̧ibajökakobe. 8Ina 'dö̧ibajökakobe böjȩma ju'wi jawabi baledakobetjö̧. Jelobe ju̧kwadöma ju'wedö jelobe ju̧kwadökwö ölakwabikwawö tjujuluwotö jö̧ba̧lö tji̧'yakobe. Ja̧danö, bakwo̧ la'aka luwo̧ma, ipjea jojodökwö jelo̧ la'aka luwo̧nö ipjea jojodönö ölakwabikwawö tjujuluwotö jö̧ba̧lö tji̧'yakobe. Ja̧ baledenama ju'wi jawabi baledakobe. Jelobetjöbi jelobetjöbi nijima okobe jwiinö tjö̧bekwö lileakobe. Ja̧danö, ju'wi jawabi baledakobe. Jojodöma jwiinö a̧wi̧chi̧ tjötjakobe. Jejenö baledenama ina böjȩma 'dö̧ibajököjȩ. Ina suli̧ma tupakwö baledakobe. Wanedö yötawa: Jejenö baledenama bakwuju jitji̧nö jemi̧ ajayinö nii̧danö baledakobe, tupakwöma o̧penönö inia tjöawa baledinö— jö̧ba̧lö yöbawijetö Jesúsma—.

9Jo̧kwaobetjö̧ yötawaduwakwö. Tjöbeba̧lakwawö ju̧kwaduwi ökwödönö sulabenö ja̧tjakobetjö̧. Ja̧danö, ju'wedöma ökwödönö do̧batibö tje'ewakobe lȩekwa jojodö tjö̧bajobekwö, ökwödönöma jwötjeba̧lobö. Ja̧danö, judío jojodö ba̧nö tja̧ja̧kwa̧leju okwa tebachö kwakwatjakobe ökwödönöma. Ötjökwö kwekachaduwobetjö̧ ju'wedöma ökwödönö jwötjeba̧lotö jö̧ba̧lö ökwödönö do̧batibö tjujunakobe la'aka luwedö tjöba a'otjöbi, luwedö tjipjea jojodö tjöba a'otjöbi. Jejenö ja̧nö ökwödöma otiwa jawa wene, Dios iwenema, yökawaduwobö ja̧kobe. 10Böjȩ 'dö̧ibajenanö kabatö Dios jawa otiwa jawa wene yöawakwawama laebakobe, okobe jwiinö böjȩnö ju̧kwadö tja̧ja̧kwobö— jö̧ba̧lö yöbawijetö Jesúsma—.

11Ja̧danö, ökwödönö do̧batibö e'ewö luwedö tjöba a'otjö tjujunena yekabiduwa kwatadakwawaduwakwa̧ma, ¿Dakwö chatadakwa̧jö? jö̧ba̧lö. Kwatadakwawaduwakwa̧ma Dios O̧'wo̧ Luwo̧ öba̧ja̧dakobe, iteda atadi̧ma. Ja̧danö, ökwödö kwo̧'wo̧duwi luwo̧nö Dios O̧'wo̧ Luwo̧ öba̧ja̧da̧lonö kwatadakwawaduwakobe, Dios O̧'wo̧ Luwo̧ öba̧ja̧dinö— jö̧ba̧lö—.

12Jejenö, ökwödönö baledonö böjȩ jojodöma, ötjönö öpöjödadöma, tjo̧'wo̧ sulinö edö idöda tjömöledönö kwabö lotjobö wetjachakwedö. Jobadöma, idöda tjömöledönö, ötjönö ösödadönö, la'aka luwedönö kwabö lotjobö wetjachakobe. Ja̧danö, tjabe'dobi, tjojo'dobi ötjönö öpöjödadöma idöda tji̧tji̧munö ötjönö ösödadönö wetjachakwedö, kwabö lotjobö. Ja̧danö, tji̧tji̧mubi ötjönö öpöjödadöma, idöda tjabe'donöbi, tjojo'donöbi ötjönö ösödadönö wetjachakwedö kwabö lotjobö. 13Ötjönö kwösödaduwobetjö̧ okobe deinö jojodöma yelösöda tjöpöjödakobe ökwödönöma, inia tjököbaduwinö ja̧bö. Jejenö sulabenö baledijayonö bakwo̧, sulabenö baledi̧ma baledenanö kabatö o̧'wo̧ luwo̧nö juluwachibanö jo̧ma, ötjönö kabatibökönö o̧'wo̧ wana̧lo̧ma ö̧jibinö chotidakwo̧— jö̧ba̧lö yöbawijetö Jesúsma. 14Ja̧danö, ina yöbawijetö:

—Jejenö baledonö jelo̧, jwiinö sulabenö ja̧bo̧ma Dios eju okwa tebachajo̧ tupakwö jojodö teachakwawökȩko̧nö tebachö ö̧bakobe, jojodö tetjachoböma jwiȩko̧nö. Ja̧ baledi̧ kwedaduwenama, kwöwaisaduwakobe, Tjo̧wi̧, sulabenö baledakobe, jö̧ba̧lö. Ja̧ mölema mö'ösa'okwö dökibajaduwo. Ja̧danö, biya̧ chiwȩyudi̧danö baledi̧ma kwedaduwena waisinö eda̧lö kwomukwataduwo— jö̧ba̧lö yöbawijetö—.

15Ja̧ baledena bakwo̧ eju wame jo̧ma o̧do okwa tebachibö u̧kwa tea emo jö̧ba̧lö meiboböma jwiakobe. Tebachökönö juluwanö ö'öbakwawakwo̧, Mö'ösa'okwö dötibajo, jö̧ba̧lö. 16Ja̧danö, bakwo̧ batjobe jo̧bi ökamijido̧ emobö tjeachibo jö̧ba̧löbi jwiakobe. Jo̧babi ökamijido̧ emökönö juluwanö ö'öbakwawakobe mö'ösa'okwö dötibajo, jö̧ba̧lö. 17Ja̧danö, metu'wo ja̧dönöbi, tjemu o̧dode owadönö juna̧ladönöbi yelösöda inia tjötjinö baledakwawö̧, dötjibaji̧ma waiyakobetjö̧. Metu'wo tjö̧jobetjö̧, mö'ösa'o jobekwö juluwanö dötjibaji̧ma waiyakobe. Ja̧danö, tjemunö a̧pjö̧a̧ladöbi juluwanö dötjibaji̧ma waiyakobe. 18Jo̧kwaobetjö̧ ja̧ baledakwa̧ma abebaduwi Diosnö o̧ba baibokobö, tiyuwapji jö̧ba̧lö— jö̧ba̧lö yöbawijetö—.

19Jau, jejenö baledena jojodöma jwiinö usula tjemawakobe. Isabenö jejenö usula tjemawakwa̧ma la'akatjöda edajiböködö jojodöma, Dios böjȩ otidinemikwö baikwö bajalenö. Ja̧danö, ja̧ jaye usula emawakwawama la'akatjöda yemidanö baledökena. 20Ja̧ baledenama lekwe, kabatökönö jejenö inia tjötjinö baleditjö̧ma okobe deinö debö tji̧'yena, bakwo̧bi ö̧jibökönö. Jo̧kwaijayonö Diosma pjabatö kaatakwawakobe inia tjötjinö baledi̧ma. Iteda i̧tji̧mu batjibanö 'da̧batö ujuninawö̧nöma ile nibebö inia tjötji̧ baledi̧ma kaatakwawakobe— jö̧ba̧lö yöbawijetö Jesúsma öba̧ja̧di̧ waisachadönö. 21Ina yöbawijetö:

—Ja̧ baledenama ju'wedöma yötja̧lakobe, Edaduwi, biteda, Dios weajökwema, jojodö tjö̧jibinö pjaatobö weajökwema, jö̧ba̧lö. Ja̧danö, jelo̧nöbi, Edaduwi, iteda Dios weajökwema, jojodö tjö̧jibinö pjaatobö weajökwema, jö̧ba̧lö. Jejenö jö̧tja̧litjö̧ma kwa̧ja̧kwaduwoko, omöna yötja̧lobetjö̧. 22Ba̧jekwadö, Ötjödasa jojodö tjö̧jibinö pjabatö Dios weajökwesa, jö̧ba̧lö, yöba̧ladöbi, ja̧danö, Ötjödasa Dios yöawi̧ yöbawo̧sa, jö̧ba̧lö, yöba̧ladöbi tjichakobe. Jobadö omöna yöbawö tjichonöbi kwa̧ja̧kwaduwoko. Jobadöma tjo̧'wo̧ sulinö omukwatö jojodö edajitjökö jawa i̧seböbi, juluwi̧ jawa i̧seböbi tji̧sebakobe jojodö tjösödo jö̧ba̧lö. Ja̧danö, jejenö tji̧sebakobe Dios i̧tji̧mu baibanö 'da̧batö ujuninawö̧bi tjösödo jö̧ba̧lö. Jejenö tji̧sebijayonö waekwakobe, Dios i̧tji̧muma tjösödökakobe omöna yöba̧ladönöma. 23Otiwanö tjöbeba̧lakwawö kwuju̧kwaduwo, chömöledö. Biya̧ma okobe jwiinö baledakwa̧ abönö ökwödönö yötawa kwöwaisaduwobö, ja̧danö, tjöbeba̧lakwawö kwuju̧kwaduwobö— jö̧ba̧lö yöbawijetö Jesúsma.

Jesús iteda yemidanö ichakwa̧ yöawina wene

24Jemi tupakwö yöbawijetö Jesúsma:

—Ja̧ baledenama, inia tjötji̧ baledaja̧ okobema möle ja̧wo̧bi yȩakobe. Ja̧danö, yö̧te ja̧wo̧bi idejatökakobe. 25Ja̧danö, si̧li̧'i̧döma mölejȩbetjö tjodutjakobe. Ja̧danö, mölejȩ jawa okobe jwiinö tjö̧ekwakobe. 26Jejenö baibena ötjö, jojo baibanö jeminökwema chujulunö dewinö dejatinö ojwiyo'wonö chichakobe. Ja̧danö, jojodöma ötjö chichobe tjedakwedö. 27Ja̧danö, chömöayedö ángelesdönö wetocha böjȩ okobe jwiinö kwetjachobö, Dios i̧tji̧mu batjibanö 'da̧batö ujuninawö̧nö bakobe tjoko̧ko̧dobö. Ja̧danö, Dios i̧tji̧mu batjibanö 'da̧batö ujuninawö̧nö a̧li̧tjöbi, u'datjöbi, ja̧wo̧ ichobekwötjöbi, ja̧wo̧ meajobekwötjöbi tjoko̧ko̧dobö wetocha chömöayedö ángelesdönö— jö̧ba̧lö yöbawijetö Jesúsma öba̧ja̧di̧ waisachadönö.

Higo towinö Jesús wanedö yöawina wene

28Ina yöbawijetö Jesúsma öba̧ja̧di̧ waisachadönö:

—Wanedö yötawa, higo towi wanedö yöawakwawama: Otiwanö omukwatö waisachibaduwi. Jowima, higo towi öjiya pjoawenama edinö kwöwaisaduwobe, Ida̧ökö imiame icha, jö̧ba̧lö. 29Jejenö kwöwaisaduwi̧danö, biya̧ okobe jwiinö yötawaja̧ baledenama edinö kwöwaisaduwakobe, Ida̧ökö Jesús yemidanö ichakwa̧ yöneawacha, jö̧ba̧lö. 30Isabenö jö̧ta̧la ökwödönö. Babe ju̧kwadötjö ju'wedöma ina 'yatja̧layi ja̧ yötawaja̧ baledakobe. 31Isabenö, mölejȩbi böjȩbi 'dö̧ibajijayonö ötjö chiwenema la'akatjöda 'dö̧ibajökakwa̧— jö̧ba̧lö yöbawijetö Jesúsma öba̧ja̧di̧ waisachadönö.

Jesús yöawina wene: —Jojo baibanö jeminökwe yemidanö ichakwa̧ möle wajwitja— jö̧ba̧lö

32Jesúsma ina yöbawijetö:

—Jau, yemidanö chichakobe jö̧ta̧lijayonö ötjö chichakwa̧ mölema jojodöma yelösöda wajwibadö. Ángelesdö, mölejȩbe ju̧kwadöbi wajwibadö. Ötjö, Dios Itji̧bi wajwibo̧sa, yemidanö chichakwa̧ma. Bakwo̧da, Chabe'do Diosda chichakwa̧ möle waiso̧ma. 33Jo̧kwaobetjö̧ ökwödöma tjöbeba̧lakwawö kwite'ada̧laduwo, chichakwa̧ma wajwiköbaduwobetjö̧— jö̧ba̧lö—.

34Wanedö yötawa: Bakwo̧ la'aka luwo̧, jelobe i̧'yajabe okobema ejunö ömöayedöma tjuluwo̧ weaja̧ otidö tjuju̧kwobe. Jobadöma bakwo̧nökwena tjotidawa otidö tjuju̧kwobe tjuluwo̧ weaja̧ma. Apjude a'o te'ada̧lo̧nöbi, Eda̧lö kwite'ada̧lo, jö̧ba̧lö, webijetö tjuluwo̧ma i̧'yakwa̧ abönö, yemidanö ichakwa̧ma ite'ada̧lobö. Ja̧danö, ömöayedöma wajwibadö tjuluwo̧ yemidanö ichakwa̧ma. 35Jejenö ökwödöbi eda̧lö kwite'ada̧laduwo. O̧do la'aka luwo̧ ömöayedö tjuluwo̧ ichakwa̧ wajwitji̧danö ökwödöma wajwiköbaduwobe ötjö yemidanö chichakwa̧ma, ökwödö kwuluwo̧duwi ichakwa̧ma. Yemidanö chichakwa̧ma ju'wi yi̧benaena, yö̧te ja'ö akala jwöena, dewachena. Wajwiköbaduwobe. 36Otiwanö kwite'ada̧laduwo, wajwiköbaduwonö ichibö chedemi aba̧lö kwö̧lajaduwapji. 37Ökwödönö yötawi̧ma okobe deinö jojodönöbi tjöwaisobö chösöda. Otiwanö tjöbeba̧lakwawö kwuju̧kwaduwo—jö̧ba̧lö wanedö yöbawijetö Jesúsma öba̧ja̧di̧ waisachadönöma.

Currently Selected:

Marcos 13: WPC

Highlight

Copy