Mateo 10

Jesús iteda öba̧ja̧di̧ waisachadönö weina wene

1Jesúsma iteda öba̧ja̧di̧ waisachadö a̧li̧nösamutjö du̧ju̧tajabedönö jwöinobe tjichobö, ja̧danö ko̧ko̧kwajadönö ujulu iyinobe, tjo̧'wo̧ luwo̧nö sulabedönö a'dewö lotjobö, ja̧danö okobe jwiinö jojodö tjö'wöchi̧ ja̧danö usula tjemawi̧ otidö lotjobö. 2Jobadö a̧li̧nösamutjö du̧ju̧tajabedö Jesús öba̧ja̧di̧ waisachadöma, tjimibiya baikwö laebobe: Abönö Simón, ju'wi imi Pedrobi, Pedro öjawo̧ Andrésbi. Ja̧danö Zebedeo i̧tji̧mu Jacobobi, ja̧danö Jacobo öjawo̧ Juanbi. 3Ja̧danö Felipebi, Bartolomébi, Tomásbi, Mateo, la'aka luwo̧ itea balada emö otido̧bi. Ja̧danö Alfeo itji̧ Jacobobi, Tadeobi. 4Ja̧danö Simón Cananeo jojo ötjabökwebi, Judas Iscariote, Jesúsnö iyö lobinabi.

5Jobadö a̧li̧nösamutjö du̧ju̧tajabedönö Jesúsma weinobe, Israel niji bakwameachibanö wainökwena kwetjachobö, ja̧danö jobadönö baikwö weinobe:

—Israel jojodöböködönö pjabatöma 'yö̧könaduwi, ja̧danö Samaritano jojodö comunidadbema 'yö̧könaduwi. 6Sule Israel jojodötjö o̧bȩja̧dö le'dewadödanö ichejekwadönöda pjabatö 'ya̧duwi. 7Kwekachaduwonö, baikwö yöbawö kwekachaduwo: Mölejȩbe jo̧ Dios la'aka luwo̧ ö̧jakwa̧ mölema yöneawachibobe, jö̧ba̧lö. 8Ja̧danö, ö'wöchadönö otidö lobaduwi, ja̧danö ö'wö babibajadönö tjetjachajinö ja̧baduwi, ja̧danö tji̧sȩdo̧ sulabedönö otidö lobaduwi, ja̧danö tjo̧'wo̧ luwo̧nö sulabedönö a'dewö lobaduwi. Ja̧ jawa ja̧köbaduwo jö̧ba̧lö mikwa jwiinö chiyajabe ökwödönö, jo̧kwajabetjö̧ ökwödöbi mikwa jwiinö jojodönö pjabataduwi—

jö̧ba̧lö weinobe Jesúsma, iteda öba̧ja̧di̧ waisachadönö.

9Tupakwö weinobe Jesúsma, iteda öba̧ja̧di̧ waisachadönö:

—Kwekachaduwenama, balada kwebatökönaduwi, orobi, platabi, cobrebi. 10Ja̧danö inapjo e'ewökönaduwi, jeledo̧ kamijido̧bi, jeletu sapatubi, isö̧'a̧ kwotokwa'oduwi e'ewökönaduwi. Ökwödöma yöbawö kwotidaduwobetjö̧, jojodö ökwödönö tjiyi̧ kwakwawa tabakwökönö kwukwaduwo, otidadö tjotidaja̧ mikwa baibanö kwakwawa tjukwobö jo̧betjö̧—

jö̧ba̧lö weinobe Jesúsma.

11Tupakwö weinobe Jesúsma:

—Comunidadbe kwichibaduwenama, jobetjö otiwanö ja̧bö jo̧nö kwisakwaduwo, jo̧ba ejunö kwö̧jaduwobö, ja̧danö jo̧ba ejunö kwö̧jaduwo, ja̧ comunidadtjö lakebaduwenanö kabatö. 12Jeju tekachaduwenama, Dios jejunö ju̧kwadönö pjaato jö̧ba̧lö tekachaduwo. 13Ja̧danö, jeju ju̧kwadö isabenö otiwadö tjö̧jitjö̧ma, Dios jejunö ju̧kwadönö pjaato jö̧ba̧lö, jobe ja̧duwi. Jo̧kwaijayonö sulabedö tjö̧jitjö̧ma, jejutjö lakebaduwo, Dios jejunö ju̧kwadönö pjaatoko jö̧ba̧lö.

14Jau chömöledö, jelejunö ju̧kwadöbi, ju'wi comunidad jojodöbi kwichaduwobö tjöpöjöditjö̧ma, ja̧danö yökawaduwi̧ tja̧ja̧kwobö tjöpöjöditjö̧ma, jobe nijiso̧pja kwömasapatjö kwupjusawaduwo, bemi jojodönö pjadatobö jö̧da̧lijayonö, sulabenö öpöjödadö, jö̧ba̧lö. 15Isabenö yötawaduwakwö chömöledö, Dios lȩebakwa̧ möle baibenama, ja̧ comunidad jojodönö isabenö lȩebakobe. Jau chömöledö jobadönö lȩebakwa̧ma, Sodoma jojodönöbi, Gomorra jojodönöbi labinö lȩebakwa̧tjö bajalekwönönö jwiinö lȩebakobe ökwödö pjakataduwobö öpöjödadönöma—

jö̧ba̧lö yöawinobe Jesúsma.

Chöba̧ja̧di̧ waisachadö kwö̧jaduwobetjö̧, usula kwemaduwakwedöja, jö̧ba̧lö Jesús yöawina wene

16Tupakwö yöawinobe Jesúsma:

—Chömöledö, isabenö labobe kwi̧'yaduwobö wetaduwakwö. Baikwö wanedö yötawa: Ökwödönöma o̧bȩja̧dönö wetobedanö ichejekwa, labidö tebo a̧wi̧li̧dö tjö'da̧de kwi̧'yaduwobö. Jo̧kwajabetjö̧, waisanö omukwatö kwö̧jaduwo, ja̧danö ju'wibi ja'yubebi jojodönö laböködö kwö̧jaduwo. 17Ja̧danö, jojodö tjö'da̧de ja̧nö ö'wiakwawönö kwö̧jaduwo. Baikwö yötawa: Ju'wedöma ökwödönö öpöjödö do̧batö ökwödönö ötjibakobe, lȩekwa luwedö tjöba a'o kwö̧jaduwobö, ja̧danö judío ba̧nö tja̧ja̧kwa̧lejubiyatjö ökwödönö kwakwatjakobe. 18Ötjö chöba̧ja̧di̧ waisachadököbaduwobetjö̧, luwedö, ja̧danö inesö la'aka luwedö tjöba a'o kwö̧jaduwakobe, ötjö jawa wene jobadönöbi, ju'wedö judío jojodöböködönöbi yökawaduwakobetjö̧. 19Jo̧kwaijayonö, ökwödönö do̧tjatenama, kwo̧'wo̧ tjo̧kekwaduwa chömöledö, ja̧danö, Ayö, ¿dakwö atjebi̧ma datadakwa̧jö?, ¿dakwö yödawakwa̧jö? jö̧ba̧löma kwo̧'wo̧ tjo̧kekwaduwa. Isabenö yökawaduwobö baibenama, yökawaduwakwa̧ kwujuna̧laduwakwedöja. 20Jau chömöledö, yökawaduwenama, ökwödödama omukwatö yökawaduwökakwedöja. Kwabe'doduwi O̧'wo̧ Luwo̧da ökwödönötjö yöawakwo̧.

21Jau chömöledö, ötjönö öpöjödadöma, yöne tjö̧ja̧wo̧döda ötjönö ösödadönöma iyö lotjakobe, kwabö lotjobö, ja̧danö ju'wedöma idöda tji̧tji̧munö iyö lotjakobe, ja̧danö ju'wedöma tjabe'dodönö öpöjödö iyö lotjakobe, tjabe'dodönö kwabö lotjobö, ötjönö tjösödobetjö̧. 22Jau chömöledö, okobe deinö jojodöma ökwödönö tjöpöjödakobe, chöba̧ja̧di̧ waisachadö kwö̧jaduwobetjö̧, jo̧kwaijayonö ja̧ jawa tjo̧'wo̧ 'dibachibö baledadöma isabenö tjö̧jibakobe. 23Jau chömöledö, bakwöta comunidadtjö ökwödönö usula kwemawaduwinö ja̧tjenama, jobetjö döbibajö ju'wi comunidadbe 'ya̧duwi. Ja̧danö, isabenö yötawaduwakwö, okobe jwiinö Israel niji comunidadtenia jojodönö yöbawö kakataduwakwa̧ abönö, ötjö jojo baibanö jeminökwema yemidanö chichocha.

24Chömöledö, ökwödöma kwöwaisaduwa, ba̧ja̧do̧ma iteda öba̧ja̧dawö̧tjö bajalekwönönö mikwawobe, ¿jö̧tö? Ja̧danö tjuluwo̧ma, iteda ömöayedötjö bajalekwönönö mikwawobe, ¿jö̧tö? 25Jau chömöledö, waisachadöma, jobadönö ba̧ja̧do̧danö ichejekwadö batjibobö ösödadö, ja̧danö bakwo̧ ömöayedöma tjuluwo̧danö ichejekwadö batjibobö ösödadö, ¿jö̧tö? Ökwödöbi ja̧danö chömöledö, ötjö chöba̧ja̧dawö̧köbaduwobetjö̧, ja̧danö ötjö chömöayedököbaduwobetjö̧, ötjödanö ichejekwadö bakibaduwobö jo̧be. Ja̧danö, ötjödanö kwichejekwaduwobetjö̧, isabenö ötjönö tjöpöjödi̧danö bakwainö ökwödönöbi tjöpöjödakwedö ötjönö öpöjödadöma chömöledö. Jo̧kwajabetjö̧ ötjönö, kwuluwo̧duwinö tjo̧'wo̧ luwo̧nö sulabedö la'aka tjuluwo̧ Awetja jö̧ba̧lö sulabenö ötjabitjö̧ma, ¿ökwödö chöba̧ja̧di̧ waisachadönö sulabenö yötja̧lökenaji̧? Isabenö sulabenö yötja̧lakwedö ökwödönö, ja̧tjö bajalekwönönö isabenö ökwödö chömöledönöbi sulabenö yötja̧lakwedö—

jö̧ba̧lö yöawinobe Jesúsma iteda öba̧ja̧di̧ waisachadönö.

Jojodönö yekabiduwa, jö̧ba̧lö Jesús yöawina wene

26Tupakwö yöawinobe Jesúsma iteda öba̧ja̧di̧ waisachadönö:

—Chömöledö, jojodö isabenö yebeabinö yötja̧lakwedö ökwödönö, jo̧kwaijayonö jobadönö yekabiduwa. Jau chömöledö, okobe jwiinö babe öwawökö ji̧ jawama, tupakwö öwawakobe, ja̧danö okobe jwiinö babe jojodö tjöwaisapji jö̧ba̧lö tojö tjujuni̧ jawama, okobe deinö tupakwö tjöwaisakobe. 27Jau chömöledö, babema yȩa'wo okwatjö ökwödönö yötawi̧ma, möle dewena yökawaduwo, ja̧danö babe ökwödönö tjo̧'omanö yötawi̧ma, mötjö labinö jwöbö yökawaduwo. 28Jojodönö yekabiduwa chömöledö, jobadöma sule tjiteba'oda kwabö lobadö, tjo̧'wo̧ luwo̧nö kwabö lotjoböma juluwöködö. Jau chömöledö, Diosnöda yekabiduwobö jo̧be, jo̧bama isabenö jojodönö lȩebobö juluwo̧obetjö̧, jo̧bada ökwöla nöolatjö jojodö tjiteba'obi, tjo̧'wo̧ luwo̧bi söbebö loakwo̧.

29Chömöledö, Diosma isabenö ökwödönö te'ada̧lo̧. Baikwö wanedö yötawa: Pji̧yu̧ma, ¿dokwa noinö mikwawadöda? Bakwapi̧ baladasapi̧nö du̧ju̧tajanö emawobe bodegatjö, ¿jö̧tö? Jo̧kwaijayonö, mikwawöködötjijayonö, Kwabe'doduwi Dios weokonö, jobadö pji̧yu̧tjö bakwo̧bi ö'wö baibökena. 30Ja̧danö, Diosma isabenö ökwödönö waiso̧ otiwanö ökwödönö ite'ada̧lakobetjö̧. Jau chömöledö, isabenö otiwanö waiso̧ Diosma ökwödönö, okobe jwiinö kwöwö'yebi waiso̧ Diosma, dokwa ba̧jekwa'yebiya jö̧ba̧lö. 31Jo̧kwajabetjö̧, yekabiduwa chömöledö. Diosma pji̧yu̧nö jejenö otiwanö ite'ada̧litjö̧ma, isabenö ökwödönöbi ite'ada̧lakwo̧. Jau chömöledö, Dios edemi, ökwödöma ba̧jekwadö pji̧yu̧nötjö bajalekwönönö nöinö mikwawadöja—

jö̧ba̧lö yöawinobe Jesúsma.

Böjȩtjö jojodö ötjönö tjösöditjö̧ma, mölejȩbetjö jobadönö chösödakobe, jö̧ba̧lö Jesús yöawina wene

32Tupakwö yöawinobe Jesúsma:

—Chömöledö, jojodö tjöba a'otjö Jesúsnö ösödadösa jö̧ba̧lö yöbawadönö, ötjöma isabenö mölejȩbe jo̧ Chabe'donö yötawocha, Idöma ötjö chömöledö, jö̧ba̧lö. 33Jo̧kwaijayonö okobe deinö böjȩtjö Jesúsnö dösödökökwe jö̧ba̧ladönö, ötjöbi mölejȩbe jo̧ Chabe'donö jobadönö yötawocha, Chömöledöböködö, jö̧ba̧lö—

yöawinobe Jesúsma.

Wene jwiinö böjȩtjö jojodö tjö̧joböma ichö̧kö̧sa, jö̧ba̧lö Jesús yöawina wene

34Tupakwö yöawinobe Jesúsma:

—Omukwatökönaduwi chömöledö, böjȩtjö wene jwiinö jojodö tjö̧jobö Jesús ichinobe jö̧ba̧löma. Böjȩtjö jojodö wene jwiinö tjö̧joböma ichö̧kö̧sa chömöledö. Wene ichejebinasa. Jau chömöledö, ötjönö ösödadökwö, ötjönö öpöjödadökwö wene baibobö ja̧bo̧sa. Baikwö yötawa: 35Tji̧tji̧mu ömadökwö, tjabe'dodökwö wene baibobö ichinasa, ja̧danö tji̧tji̧mu ya̧dökwö tjojo'dodökwö wene baibobö ichinasa, ja̧danö tjo̧jo̧li̧mu ya̧dökwö, tjöja'ukwö wene baibobö ichinasa. 36Jau chömöledö, ökwödö ötjönö ösödadö inesö kwöpöjojodö tjö̧jakwedöma, ökwödö yöne kwömöledöduwitjö ötjönö öpöjödadöda.

37Chömöledö, ötjö chöba̧ja̧di̧ waisachadö inesö tjösödo jö̧tja̧lökwema ötjödasa, jo̧kwajabetjö̧ ötjönö tjösödi̧tjö bajalekwönönö tjabe'donöbi, tjojo'donöbi ösödadöma, ötjö chöba̧ja̧di̧ waisachadö tjö̧joböma mikwawöködö, ötjödasa inesö tjösödo jö̧tja̧lökwechobetjö̧. Ja̧danö, ötjönö tjösödi̧tjö bajalekwönönö tjitji̧nöbi, tjitjijunöbi ösödadöma, ötjö chöba̧ja̧di̧ waisachadö tjö̧joböma mikwawöködö, ötjödasa inesö tjösödo jö̧tja̧lökwechobetjö̧.

38Ja̧danö chömöledö, bakwo̧ towisa'o, iteda woakwa'o kabeibö, ötjö chökömanö ichobö öpöjöditjö̧ma, chöba̧ja̧di̧ waisacho̧ ö̧joböma mikwawö̧kö̧, isabenö chöba̧ja̧di̧ waisachadö woawa yetjabobö jwiobetjö̧. 39Jau chömöledö, okobe deinö idöda otiwanö tjö̧jakwa̧ isakwadöma, ja̧ ja̧kwawa jwitjakwedö, jo̧kwaijayonö okobe deinö ötjönö tjösödobetjö̧ ö'wö babibadöma, isabenö ja̧kwawa tjöbadekwajakwedö.

40Ja̧danö chömöledö, okobe deinö ökwödö kwichaduwobö ösödadöma, ötjö chichobö ösödadö, ja̧danö okobe deinö ötjö chichobö ösödadöma, Chabe'do ötjönö webinanö tjösödobe. 41Ja̧danö, Dios yöawi̧ yöbawo̧nö, bitema isabenö Dios yöawi̧ yöbawo̧ jö̧ba̧lö ösödadöma, Dios jo̧ba yöbawo̧nö iyi̧danö bakwainö tjemakwedö, ja̧danö bidöma otiwanö ja̧badö jö̧ba̧lö tjichobö ösödadöma, jobadö otiwanö ja̧badö Dios iyi̧ tjemi̧danö bakwainö Dios iyi̧ tjemakwedö.

42Ja̧danö, isabenö ökwödönö pjabatadönö pjaatakwo̧ Chabe'doma chömöledö. Baikwö yötawa: Jelo̧ ötjö chöba̧ja̧di̧ waisacho̧nö pjabatö ojwiyo tiyuwobu iyitjö̧ma, chöba̧ja̧di̧ waisachadötjö nijakwönönö mikwawö̧kö̧nöda pjabatö iyitjö̧böbi, otiwanö iyaja̧ mikwa baibanö Diosma isabenö balekwa mikwa iyakwo̧—

jö̧ba̧lö yöawinobe Jesúsma.

Currently Selected:

Mateo 10: WPC

Highlight

Copy