Lucas 3

Juan Ojwenö Bu̧dato̧ ötjabökwe yöawina wene

1Baikwö laebobe Zacarías itji̧, Ojwenö Bu̧dato̧ ötjabökwe Juan mikwo̧ yöbawö otidina wene: Juan jamatö yöawenama, romano jojodötjö inesö la'aka luwo̧ emperador Tiberio mikwo̧ma ida̧ökö a̧li̧nösamutjö bakwamu o̧biya baledibanö yöbawö weinobe. Ja̧danö ju'wedö jo̧ba ömöayedö la'aka luwedöma bidö: Poncio Pilatoma Judea nijitjö gobernador ö̧jinobe, ja̧danö Herodesma Galilea nijitjö la'aka luwo̧ ö̧jinobe, ja̧danö Herodes öjawo̧ Filipema Iturea nijitjöbi, Traconítide nijitjöbi la'aka luwo̧ ö̧jinobe, ja̧danö Lisaniasma Abilinia nijitjö la'aka luwo̧ ö̧jinobe. 2Ja̧danö judío jojodötjö Anás mikwo̧bi, Caifás mikwo̧bi Diostjö jojodötjö ö'weje pjabatadötjö inesö la'aka luwedö tjö̧jinobe. Jobadö luwedö tjö̧jayi, Diosma iteda yöawi̧ yöawinobe Juan mikwo̧nö, jojodö deobe jo̧nö. 3Jejenö Dios yöawajökwe, Juanma okobe jwiinö Jordán mikwödö ojwe ö'öbö niji kwebachö yöawinobe:

—Sulabenö kwomukwataduwi̧ kabatibö balewachaduwi, Dios sulabenö ja̧köbaduwi̧ söbebö loakobetjö̧. Ja̧danö sulabenö kwomukwataduwi̧ kabatibö balewachajadö, ja̧ kwöbalewachaduwaja̧ wene i̧sebö ojwe okwa bu̧datakwawa abebaduwi—

jö̧ba̧lö kwebachö yöawinobe Juanma.

4Ja̧ Juan yöawi̧ma, Dios yöawi̧ yöbawo̧ Isaias iwȩyudina badekwachinö yöawinobe. Baikwö iwȩyudinobe Isaíasma, Juan yöawakwa̧ wenema:

Jojodö deobetjö bakwo̧ jwöeba̧lakobe, Duluwo̧ma juluwanö ichakwo̧, jo̧ba ichakwa̧ma mana dotidaduwo, jweinö ichakobetjö̧.

5Okobe jwiinö waabekoemi o̧tjö ba̧ba̧ladö dotidaduwo, ja̧danö okobe jwiinö mö'ösa'ijuma sobö ba̧ba̧ladö dotidaduwo, ba̧ba̧lawama baibanö. Wi̧su̧amama jweama baibanö dotidaduwo, ja̧danö okobe jwiinö waabe'diyuemi sobö iwebö ba̧ba̧ladö dotidaduwo.

6Jejenö dotidaduwo, Diostjö icho̧ dö̧jibinö pjabato̧nö okobe deinö otiwanö tjedakobetjö̧,

jö̧ba̧lö laebobe Isaias iwȩyudinama Juannö badekwachinö.

7Ba̧jekwadö jojodöma Juan yöawi̧ a̧ja̧kwö jo̧ba ö̧jobekwö tjichinobe, ja̧danö ojwenö bu̧datakwawa atjebinobe. Jejenö ojwenö bu̧datakwawa abebö tjichiökwe, Juanma jobadönö yöawinobe:

—Ökwödöma sulabedöja. Baikwö wanedö yötawa: Ökwödöma a̧ko̧'dö̧ nibadödanöbedöja, isabenö sulabedököbaduwobetjö̧. Ökwödöma Dios lȩebakwa̧ wene a̧ja̧kwö Dios lȩebi̧tjö dökibajaduwobö yebabinö omukwatadöja, ¿jö̧tö? Jo̧kwaijayonö sulabenö kwomukwataduwi̧ balewachökönö Dios lȩebakwa̧tjö kwö̧jibaduwobö omukwatadöja, ja̧danö sulabenö kwomukwataduwi̧ balewachökönö ojwenö bu̧datakwawa abebadöja. 8Isabenö sulabenö kwomukwataduwi̧ kabatibö kwöbalewachaduwitjö̧ma, otiwanö ja̧bö ja̧nö kwöbalewachaduwaja̧ wene kwi̧sebaduwo.

Yöka̧lakwawaduwa, Aaa, Abraham i̧tji̧mu tupadanö jojodödobetjö̧, Dios lȩebököwö̧sa, jö̧ba̧lö. Abraham i̧tji̧mu tupadanö jojodö kwö̧jaduwi̧ma mikwawokobe, Dios lȩebi̧tjö kwö̧jibaduwoböma. Diosma isabenö Abraham i̧tji̧mu tupadanö jojodönö pjaatakobe, jo̧kwaijayonö yöawi̧ kwöpöjödaduwitjö̧ma, la'akatjöda pjaatökakobe ökwödönö. Jau, isabenö Abraham i̧tji̧mu tupadanö jojodönö pjaatakobe Diosma. Ja̧danö, baikwö yötawaduwakwö: Jojodötjö Dios yöawi̧ a̧ja̧kwo̧ deitjö̧ma, isabenö juluwo̧ Diosma, ökwödönö pjabatökönö biwa nijinö ba̧wa inawiyatjö Abraham i̧tji̧mu tupadanö jojodö 'yabayedönö otidobö juluwo̧, jobadö 'yabayedönöda pjaatobö.

9Dios lȩebakwa̧ma isabenö yöneawachibobe. Baikwö wanedö yötawa: sulabenö tjomukwati̧ kabatibö balewachöködöma, towi wa̧jokowi ji̧danöbedö, ja̧danö Dios lȩebakwa̧'a o̧to̧mö'ama, juluwanö wa̧jokowi la'aka jubö loakwa̧'ama jo̧be. Ja̧danö, okobe jwiinö wa̧jokowibiyama, Diosma jubö ko̧ko̧dibö ökwölanö ujuwakobe—

jö̧ba̧lö wanedö yöawinobe Juanma.

10Jejenö yöawiawö̧, jobe ko̧ko̧kwadöma abebö tja̧ja̧kwinobe:

—Kwatjö̧ma, ¿dakwö ja̧bö di̧sebakwa̧da sulabenö domukwatina kabatibö döbalewachaja̧ma?—

jö̧ba̧lö. 11Abebö tja̧ja̧kwökwe Juanma atadinobe:

—Baikwö ja̧bö kwi̧sebaduwo: Kamijido̧ dödo̧lataja juna̧lo̧ma, jwibo̧nö bakwado̧ iyobö jo̧be, ja̧danö kwakwawa juna̧lo̧ma, ujuna̧litjö jwibo̧nö iyobö jo̧be —

jö̧ba̧lö atadinobe Juanma. 12Ja̧danö, jojodö sulabedö jö̧ba̧lö ötjabawö̧ la'aka luwo̧ itea balada impuesto emadötjö ju'wedöma ichö bu̧datakwawa atjebinobe, ja̧danö Juannö abebö tja̧ja̧kwinobe:

—Ba̧ja̧dakwawa luwo̧, ¿ökwödöja? ¿Dakwö ja̧bö di̧sebobö ökwödöma, Isabenö sulabenö domukwati̧ kabatibö balewachadösa?—

jö̧ba̧lö. 13Abebö tja̧ja̧kwökwe atadinobe:

—Jojodötjö la'aka luwo̧ itea balada kwemaduwenama, jweinö kwemaduwo, sule la'aka luwo̧ tjimidobö wei̧da kwemaduwo, jojodötjö naukwökönö— jö̧ba̧lö.

14Ja̧danö guardia jojodötjöbi ju'wedö abebö tja̧ja̧kwinobe:

—¿Ökwödöja? ¿Dakwö ja̧bö di̧sebobö ökwödöma isabenö sulabenö domukwati̧ kabatibö balewachadösa jö̧ba̧löma?—

Atjebökwe Juanma atadinobe:

—Kwuluwedö tjimidi̧da emö kwö̧jaduwo. Ja̧danö ju'wibi, jojodönö 'döbebö naukwöma yebeabinöma kwemaduwoko. Ja̧danö ju'wibi, balada kwemaduwotö jö̧ba̧lö jojodönö omöna yöka̧laduwa, Bidöma sulabenö ja̧badö, jö̧ba̧löma. Kwuluwedö tjimidi̧da emö kwösödaduwo, Otiwa, jö̧ba̧lö—

atadinobe Juanma.

—Dios weakwo̧ jö̧a̧linökwema, Ötjömaökö, chökömanö icho̧da— jö̧ba̧lö Juan yöawina wene

15Jojodöma Dios weakwo̧ jö̧a̧linökwe ichakwa̧ te'ada̧lö tjö̧jinobe, Juluwanö ichena, jö̧ba̧lö. Ja̧danö, okobe deinö tjomajadenö tjomukwatinobe Juannö, Aaa, bite Juandaena Dios weakwo̧ jö̧a̧linökwema, jö̧ba̧lö. 16Jejenö tjomukwatiökwe, Juanma jweinö jobadönö yöawinobe:

—Chömöledö, ötjömaökö. Ötjöma sule ojwenöda chubu̧datobe ökwödönöma, sule ojwiyonöda. Jo̧kwaijayonö, chökömanö ichakwo̧ma, Dios O̧'wo̧ Luwo̧nö ökwödönö ubu̧datakwo̧, ja̧danö ökwölanö ökwödönö ubu̧datakwo̧. Jo̧ba ötjö chökömanö ichakwo̧ma, ötjötjö yelösöda bajalekwönönö mikwawo̧. Baikwö wanedö yötawa: Luwedö 'dutjawatu sapatu 'yo̧bebadöma, sule tjömöayedötjö mikwawöködöda, ¿jö̧tö? Jo̧kwaijayonö, ötjöma jejenö otido̧tjö nijakwönönö mikwawö̧kö̧sa, ötjöma chökömanö ichakwo̧ 'duawatu sapatubi 'yo̧teboböbi mikwawö̧kö̧sa.

17Jo̧bama sulabedönö otiwadötjö böjö 'da̧batö ujunakobe, batjo otidadö kwakwawa sula'wotjö böjö 'da̧batö kwakwawa lödawejunö tjödi̧danö. Ja̧danö, böjö 'da̧batö junajo̧, okobe deinö sula'wodanö ichejekwadö sulabedönö, sula'wo ko̧ko̧dö juwö lotji̧danö ökwöla tiibokolanö juwö loakobe—

jö̧ba̧lö yöawinobe Juanma.

18Ja̧bi yöbawö, ju'wi jaye nöinö yöbawö, Juanma otiwa jawa wene yöawinobe jojodönö, Dios weakwo̧ jö̧a̧linökwenö jweinö tjomukwato jö̧ba̧lö.

19Ju'wibi, Juanma la'aka luwo̧ Herodes mikwo̧nö yöawinobe, Sulabenö ja̧köba, jö̧ba̧lö. Jo̧ba Herodesma nöinö sulabenö ja̧bö ö̧jinobe. Öjawo̧ ilekwo Herodías mikwujunö sulabenö eminobebi, ja̧danö ju'wi jayebi sulabenö ja̧inobe, ja̧danö jejenö sulabenö ja̧iökwe, Juanma jo̧banö jweinö yöawinobe, Ja̧köbi̧ma isabenö sula, jö̧ba̧lö. 20Yöawiökwe, ödameakwinobe Herodesma, ja̧danö ajayinö sulabenö ja̧ajemitjö bajalekwönönö ju'wibi sulabenö ja̧inobe: Juan yöawi̧ öpöjödö Herodesma Juannö ka̧lena ö̧bobö ödinobe.

Jesúsnö ojwenö ubu̧datina wene

21Ka̧lena ö̧bakwa̧ abönö, Juanma jojodönö ojwenö ubu̧datinobe, ja̧danö ju'wi möle jejenö ubu̧datenama, Jesúsnöbi o̧jwenö ubu̧datinobe Juanma. Ja̧danö, ojwenö ubu̧dataja̧ ikena, Jesúsma Diosnö aebinobe, ja̧danö Diosnö aebemi ja'ötjö, mölejȩma po̧ekwachinobe. 22Ja̧danö Dios O̧'wo̧ Luwo̧ma atji̧onö yunukodanö ichejekwo̧ jwibachibö Jesúsnö öwamatinobe, ja̧danö ju'wibi mölejȩbetjö iwene ökwöinobe, Ökwöma chösödökwe chitji̧ja, cho̧'wo̧ ösöwanö chösödobe ökwönö, jö̧ba̧lö.

Jesús a'dödönö Lucas iwȩyudina wene

23Jesúsma treinta o̧biya jenanö ujuna̧lenama, jamatö yöawinobe jojodönö. Ja̧ yöbawö ö̧jina wene chiwȩyudakwa̧ abönö, baikwö Jesús a'dödö tjimibiya chiwȩyudobe, jo̧banö kwöwaisobö, Isabenö Jesúsda Dios weakwo̧ jö̧a̧linökwe, jö̧ba̧lö. Jau, damötjö Diosma yöbawö ujuninobe, wetakwo̧ jö̧ta̧lökwema, bite ö̧'dö̧dötjö tupadanö jojoakobe, ja̧danö bitebi ö̧'dö̧dötjö tupadanö jojoakobe jö̧ba̧lö. Jo̧kwajabetjö̧ Jesús a'dödö tjimibiya chiwȩyuda, ja̧ Dios yöbawö ujuninama, Isabenö Jesúsnöda badekwachobe, jö̧ba̧lö öwaetjöda öwawobö.

Jesúsma okobe deinö tjo̧mukwatinökwe, José itji̧, jö̧ba̧lö, ja̧danö Joséma Elí itji̧inobe. 24Ja̧danö Elíma Matat itji̧inobe, ja̧danö Matatma Leví itji̧inobe, ja̧danö Levíma Melqui itji̧inobe, ja̧danö Melquima Jana itji̧inobe, ja̧danö Janama José itji̧inobe, 25ja̧danö Joséma Matatías itji̧inobe, ja̧danö Matatíasma Amós itji̧inobe, ja̧danö Amósma Nahúm itji̧inobe, ja̧danö Nahúmma Esli itji̧inobe, ja̧danö Eslima Nagai itji̧inobe, 26ja̧danö Nagaima Maat itji̧inobe, ja̧danö Maatma Matatías itji̧inobe, ja̧danö Matatíasma Semei itji̧inobe, ja̧danö Semeima José itji̧inobe, ja̧danö Joséma Judá itji̧inobe, 27ja̧danö Judáma Joana itji̧inobe, ja̧danö Joana Resa itji̧inobe, ja̧danö Resama Zorobabel itji̧inobe, ja̧danö Zorobabelma Salatiel itji̧inobe, ja̧danö Salatielma Neri itji̧inobe, 28ja̧danö Nerima Melqui itji̧inobe, ja̧danö Melquima Adi itji̧inobe, ja̧danö Adima Cosán itji̧inobe, ja̧danö Cosánma Elmodam itji̧inobe, ja̧danö Elmodamma Er itji̧inobe, 29ja̧danö Erma Josué itji̧inobe, ja̧danö Josuéma Eliezer itji̧inobe, ja̧danö Eliezerma Jorim itji̧inobe, ja̧danö Jorimma Matat itji̧inobe, ja̧danö Matatma Leví itji̧inobe, 30ja̧danö Levíma Simeón itji̧inobe, ja̧danö Simeónma Judá itji̧inobe, ja̧danö Judáma José itji̧inobe, ja̧danö Joséma Jonán itji̧inobe, ja̧danö Jonánma Eliaquim itji̧inobe, 31ja̧danö Eliaquimma Melea itji̧inobe, ja̧danö Meleáma Mainán itji̧inobe, ja̧danö Mainánma Matata itji̧inobe, ja̧danö Matatáma Natán itji̧inobe, ja̧danö Natánma David itji̧inobe, 32ja̧danö Davidma Isaí itji̧inobe, ja̧danö Isaíma Obed itji̧inobe, ja̧danö Obedma Booz itji̧inobe, ja̧danö Boozma Salmón itji̧inobe, ja̧danö Salmónma Naasón itji̧inobe, 33ja̧danö Naasónma Aminadab itji̧inobe, ja̧danö Aminadabma Aram itji̧inobe, ja̧danö Aramma Esrom itji̧inobe, ja̧danö Esromma Fares itji̧inobe, ja̧danö Faresma Judá itji̧inobe, 34ja̧danö Judáma Jacob itji̧inobe, ja̧danö Jacobma Isaac itji̧inobe, ja̧danö Isaacma Abraham itji̧inobe, ja̧danö Abrahamma Taré itji̧inobe, ja̧danö Taréma Nacor itji̧inobe, 35ja̧danö Nacorma Serug itji̧inobe, ja̧danö Serugma Ragau itji̧inobe, ja̧danö Ragauma Peleg itji̧inobe, ja̧danö Pelegma Heber itji̧inobe, ja̧danö Heberma Sala itji̧inobe, 36ja̧danö Salahma Cainán itji̧inobe, ja̧danö Cainánma Arfaxad itji̧inobe, ja̧danö Arfaxadma Sem itji̧inobe, ja̧danö Semma Noé itji̧inobe, ja̧danö Noéma Lamec itji̧inobe, 37ja̧danö Lamecma Matusalén itji̧inobe, ja̧danö Matusalénma Enoc itji̧inobe, ja̧danö Enocma Jared itji̧inobe, ja̧danö Jaredma Mahalaleel itji̧inobe, ja̧danö Mahalaleelma Cainán itji̧inobe, 38ja̧danö Cainánma Enós itji̧inobe, ja̧danö Enósma Set itji̧inobe, ja̧danö Setma Adán itji̧inobe, ja̧danö Adánma Dios itji̧inobe.

Currently Selected:

Lucas 3: WPC

Highlight

Copy