Lucas 1

Lucas Teofilonö iwȩyudina'yetjö ajayi jawa

1Ötjö Lucasma böja kwialusöja wȩyudö weta jojodö otiwanö tjo̧mukwatökwe Teófilo mikwo̧nö. Chömöledöso̧ Teófilo, kwöwaisa, ba̧jekwadö wȩyudö tjotidinobe, dö'da̧detjö baledina jawa, Jesús ö̧jina jawa tjiwȩyudobö. 2Ja̧ tjiwȩyudi̧ma, ökwödö Jesúsnö ösödadötjö ajayinö ji̧nadö Jesús webawedöma tjedina jawa yötjawinobe, ja̧danö ja̧ yötjawi̧ a̧ja̧kwadö tjiwȩyudinobe, 3ja̧danö ötjöbi jejenö chiwȩyudobe ökwönö.

Okobe jwiinö ja̧ Jesús ö̧jina wene jawa chöwaisachajabe, ajayitjö baikwö bajalenö, ja̧danö jweinö ajayitjö baikwö bajalenö ja̧ baledina wene chiwȩyudobö chomukwatobe ökwö Teófilo mikwo̧nö. 4Jau Teófilo, belö otiwanö ökwönö yötjawinobe biya̧ ökwönö chiwȩyudi̧ma, ja̧danö babema böja wȩyudö wetakwö, böja waisachö otiwanö yötjawina kwöwaisobö.

Juan Ojwenö Bu̧dato̧ ötjabökwenö jemakwa̧ ángel yöawina wene

5Bakwo̧ Zacarías mikwo̧ ö̧jinobe, la'aka luwo̧ Herodes mikwo̧ Judea nijitjö weena ji̧nama. Jo̧ba Zacaríasma inesö Diostjö jojodötjö ö'weje pjabato̧ Aarónmine itji̧ tupadanö jojoinobe, ja̧danö Aarón i̧tji̧mu tupadanö jojodötjö, Aarón ö'dö̧ Abías mikwo̧ itji̧ tupadanö jojoinobe. Ja̧danö, Aarón itji̧ tupadanö jojoobetjö̧, ju'wedö Aarón i̧tji̧mu tupadanö jojodö ömadö otidiatjinadanö, Zacaríasbi Diostjö jojodötjö ö'weje pjabatö otidinobe. Jo̧ba Zacarías ilekwoma Elisabet mikwinuju, ja̧danö Elisabetbi Aarón itjiju tupadanö jojosujujinobe.

6Jobadö Zacaríasbi, ilekwo Elisabetbi Dios öba a'otjö otiwanö ja̧bö tjö̧jinobe, ja̧danö omukwatönö ja̧bö tjö̧jinobe, okobe jwiinö Duluwo̧ wei̧danö ja̧bö tjö̧jobö. 7Jobadöma ida̧ökö damö tjö̧jijayonö tjemu debadö tjö̧jinobe, Elisabetma metu'wo jö̧kuju jö̧jobetjö̧.

8Ja̧danö, ju'wi möle baikwö baledinobe: Abías i̧tji̧mu tupadanö jojodö Dios ejutjö tjotidobö baibinobe, ja̧danö Zacaríasma ömöledökwö Diostjö jojodötjö ö'weje pjabatö otidinobe. 9Ja̧ möle, ba̧kwȩlö̧jatebö ja̧biatji̧danö, inawiya tjikwawinobe, Dite Dios eju tebachö Diosnö ösödö omewi̧ jawa ujuwojobö, jö̧ba̧lö. Ja̧danö ja̧ möle Zacaríasnö baibinobe. 10Ja̧danö, ba̧kwȩlö̧jatebö ja̧biatji̧danö, jo̧ba Dios ejutjö omewi̧ jawa ujuwonö, jojodöma a̧petutjö Diosnö ösödö atjebinobe.

11Ja̧danö, baikwö baledinobe ja̧ mölema: Jejunö Zacarías omewi̧ jawa ujuwemi ja'ötjö, Duluwo̧ weökwe ángelma jo̧banö öwawachinobe, omewi̧ jawa uböte mesasöte öwaisobekwöchobe ja̧nö. 12Jejenö öwawachiökwe, Zacaríasma yelösöda tjö̧awinobe yebabinö.

13Jejenö yeabiökwe, ángelma jo̧banö yöawinobe:

—Yebabökönuwi Zacarías, akebiökwe Diosma isabenö akebi̧ a̧ja̧kwinobetjö̧. Ja̧danö, akebi̧danö kwilekwo Elisabetma kwitji̧nö jemakobe, ja̧danö kwitji̧nö Juan jö̧ba̧lö kwimidakobe. 14Jejenö baibobetjö̧ jwiinö kwo̧'wo̧ ösöwachibanö kwö̧jakwo̧ja, ja̧danö kwilekwo jitji̧nö jemiawö̧, ba̧jekwadö jojodöma tjo̧'wo̧ ösöwanö tjösödakobe, 15kwitji̧ma isabenö Dios öba a'otjö juluwo̧ ö̧jakobetjö̧. Ja̧danö, kwitji̧ma Dios wei̧da ja̧bö ö̧jakobetjö̧, la'akatjöda ubasobu o̧'dobubi, ju'wi nio ojwiyobi owöbi owökakwo̧. Ja̧danö ojo'do jukwa'wo okwa ina a̧jayi, Dios O̧'wo̧ Luwo̧ma jo̧bakwö ö̧jakobe. 16Jo̧ba kwitji̧ma ba̧jekwadö ömöledö Israel jojodönö pjaatakobe, Tjuluwo̧ Dioskwö yemidanö tjetjachajobö. 17Jo̧bama damötjö ji̧na Dios yöawi̧ yöbawo̧ Elías mikwo̧ juluwinö yöbawö ö̧jinadanö, Duluwo̧ abönö i̧'yakwo̧. Abönö 'ya̧nö, jo̧bama tjabe'dodö tji̧tji̧mukwö wene tjujuna̧li̧ pjaatakobe, tji̧tji̧munö yemidanö otiwanö omukwatö tjösödobö. Ja̧danö ju'wibi Dios wei̧ a̧ja̧kwöködönö pjaatakobe, Dios öba a'otjö otiwanö ja̧bö ju̧kwadö tjomukwati̧danö tjomukwatobö. Jejenö pjaatakobe kwitji̧ma, jojodö Duluwo̧ ichakwa̧ otiwanö te'ada̧ladö batjibakobetjö̧—

jö̧ba̧lö yöawinobe ángelma, Zacaríasnöma.

18Jejenö yöawiökwe Zacaríasma atadinobe:

—¿Dakwö chöwaisobö, isabenö yöka̧li̧danö baledakwa̧ma? Ötjöma ida̧ökö pöesa, ja̧danö chilekwoma ida̧ökö pöo, jo̧kwajabetjö̧ ¿dakwö chöwaisakwa̧da yöka̧li̧danö isabenö chilekwo jitji̧nö jemakwa̧ma? Chedemi jemökena— jö̧ba̧lö.

19Jejenö atadiökwe, ángelma jwebebö baikwö yöawinobe:

—Ötjöma Gabriel mikwo̧sa, Dios öba a'o jojosa, ja̧danö Diosda ötjönö weinobe, yötawaja̧ otiwa jawa wene ökwönö yötawobö. 20Ja̧danö baikwö yötawakwö: Ökwönö yötawaja̧ jawa baledakwa̧ möle badekwachenama, isabenö yötawaja̧danö baledakobe. Jo̧kwaijayonö omöna jö̧ba̧lö yötawaja̧ kwösödokobetjö̧, isabenö yöba̧lökönö kwiwene jwibö kwö̧jakwo̧ja yötawaja̧danö badekwachenanö kabatö—

jö̧ba̧lö yöawinobe ángelma.

21Dios weökwe ángel Zacaríaskwö yöawonö, jojodöma a̧petukwöbe ja̧nö Zacarías laebakwa̧ tjite'ada̧linobe, ja̧danö lekwe deiawö̧, ¿Tajawedö lekwe laebököjö? jö̧ba̧lö tjomukwatinobe. 22Ja̧danö, bajalianö laebajenama, jobadönö yöa̧lobö jwiinobe iwene jwiobetjö̧, ja̧danö yöba̧lökönö ömamunöda ba̧ja̧dö yöa̧liawö̧, tjöwaisachibinobe, o̧do okwatjö i̧'wi̧di̧danö edajena jö̧ba̧lö.

23Jemi ikenama, Zacarías ina otidö ö̧jinobe, ajayinö otidobö tjujuninadanö. Ja̧danö, otidö kaatakwa̧ möle badekwachenama, ejube ȩwa̧jinobe.

24Ja̧danö, ja'yubeda lekwajabetjö, ilekwo Elisabetma metu'wo jö̧jinobe, ja̧danö metu'wo ja̧nö, ja̧wo̧dö bakwamuluwa jejutjö labebökönö jö̧jinobe, jojodö metu'wo jö̧ji̧ tjedapji jö̧ba̧lö. 25Ja̧danö, metu'wo jö̧jobetjö̧, Elisabetma jo̧'wo̧ ösöwanö yöja̧linobe:

—Ajayinöma chi̧tji̧mu debuju chö̧jobetjö̧, jojodö tjöba a'otjö tabakwö chö̧jijatö. Jo̧kwaijayonö Diosma isabenö otiwanö pjaatajabe ötjönö. Babema taba jwiinö chö̧jakwujusa, Diosma chitji̧nö chemobö otiwanö iyajabetjö̧—

jö̧ba̧lö yöja̧linobe Elisabetma.

María Jesúsnö jemakwa̧ ángel yöawina wene

26Elisabet ida̧ökö jelemutjö bakwo̧ ja̧wo̧dö metu'wo jö̧jenama, Diosma iteda ömöayo̧ ángel Gabriel mikwo̧nö weinobe, Galilea niji comunidadbe i̧'yobö, Nazaretbe. 27Jobe Nazaretnö bakwujuma María mikwujuma jö̧jinobe. Jobuju Maríama ina iso̧kwö ji̧nökuju, ja̧danö ju'wibi yöbawö juninuju, la'aka luwo̧bina David itji̧ tupadanö jojo José mikwo̧nö tupakwö jemobö. Jobujunö yöbawö i̧'yinobe ángelma, Gabriel mikwo̧ma. 28Gabrielma jobujunö öwawachinobe, ja̧danö öwawachö yöawinobe:

—Dios otiwanö pjaatokoja María, dokwa. Diosma isabenö ökwökwö jo̧— jö̧ba̧lö.

29Jejenö yöa̧lioko, ¿Tajijö? ¿Dakwö jö̧ba̧lö jejenö ötjönö yöa̧lobejö? jö̧ba̧lö jo̧'wo̧ tjo̧bekwö jomukwatinobe Maríama.

30Jemi ikenama tupakwö yöawinobe ángelma jobujunö baledakwa̧:

—Yebabökönuwi, María. ¡Diosma isabenö lȩlö̧jinö edakwö ökwönöma! 31Ökwöma isabenö metu'wo kwö̧jakwujuja, ja̧danö kwitji̧nö kwemakwujuja, ja̧danö emaju jo̧banö Jesús jö̧ba̧lö kwimidakobe. 32Jo̧ba kwitji̧ma isabenö ujuluwakwo̧, ja̧danö okobe jwiinö juluwo̧ Dios Itji̧ jö̧ba̧lö ötjabikwo̧ kwitji̧nöma. Duluwo̧ Diosma jo̧banö iyakobe, a'dömine David ö̧binemi ö̧bobö, Israel jojodö la'aka tjuluwo̧ baibanö. 33Ja̧danö, ba̧kwȩlö̧jatebö Israel jojodö tjuluwo̧ ö̧jakwo̧, ja̧danö tjuluwo̧ ö̧jakwa̧ma la'akatjöda 'dö̧ibajökönö ö̧jakobe—

jö̧ba̧lö yöawinobe Dios weökwe ángelma.

34Yöawioko Maríama abebö ja̧ja̧kwinobe ángelnö:

—Ja̧ yökawaja̧ma ¿dakwö baledakwa̧da? Ötjöma i̧so̧kwö jö̧kujusa. ¿Dakwö metu'wo batibakwa̧da?—

jö̧ba̧lö. 35Ajebiökwe ángelma atadinobe:

—Dios O̧'wo̧ Luwo̧ma ökwönö ichakobe, ja̧danö okobe jwiinö juluwo̧ Dios ujuluma ökwönö ja̧kobe. Jo̧kwajabetjö̧ kwitji̧ma isabenö suli̧ jwibö ö̧jakobe, ja̧danö jo̧banö Dios Itji̧ jö̧ba̧lö ötjabikobe. 36Ja̧danö ju'wibi yötawakwö María, kwömöledösuju Elisabetbi metu'wo ju̧ju. Jau María, Elisabetnö ji̧tji̧munö emökuju jö̧ba̧lö ötjabinajayonö, ja̧danö yelösöda pöo jö̧jijayonö, ida̧ökö ja̧wo̧dö jelemutjö bakwo̧ metu'wo jö̧jajabe kwömöledösuju Elisabetma. 37Jau María, ¿dakwö chitji̧nö chemoböjö? jö̧ba̧lö wajwiköbijayonö, omukwatökönuwi, jejenö baibobö jwiena jö̧ba̧löma. Dios otidobö jwii̧ma, ¿ju'wi jayebi jȩnaji̧? Isabenö ju'wi jayebi jwiobe Dios otidobö jwii̧ma. Isabenö okobe jwiinö otidobö juluwo̧ Diosma. Jo̧kwajabetjö̧ metu'wo bakibobö jwiena jö̧ba̧lö ichejekwijayonö, isabenö Dios ujulunö metu'wo kwö̧jakwujuja—

jö̧ba̧lö yöawinobe ángelma.

38Yöawioko Maríama jatadinobe:

—Otiwa, ötjöma Dios ömöayujusa. Okobe jwiinö yökawaja̧danö ötjönö baledobö jo̧be—

jö̧ba̧lö. Jemi ikenama ángelma ȩwa̧jinobe.

María Elisabetnö edö ji̧'yina wene

39-40Jemi ikenama Maríama juluwanö jömöledösuju Elisabet jitebobe ji̧'yinobe, Judea nijitjö mö'ösa'iju 'da̧de jȩna comunidadbe. Jobe ichibö, Zacarías eju okwa tebachibö Maríama, ¿dokwa? jö̧ba̧lö ajebinobe Elisabetnö.

41Elisabet María ¿dokwa? jö̧ba̧lö ajebi̧ ja̧ja̧kwenama, Elisabet jukwa'wo okwatjö tjemu o̧'wo̧ ösöwachibanö yu̧ku̧ibinobe. Jemi ikenama Dios O̧'wo̧ Luwo̧ma Elisabetnö ichibinobe, 42ja̧danö Dios O̧'wo̧ Luwo̧ jo̧'wo̧ luwo̧nö yöawioko, Elisabetma labinö yöja̧linobe Maríanö:

—Isabenö ju'wedö ya̧dötjö bajalekwönönö Dios otiwanö pjaatokoja, María, ja̧danö isabenö Dios pjaatökwenö kwemakwo̧ kwitji̧nöma. 43Jau María, inesö la'aka duluwo̧akwo̧ ojo'doja, ja̧danö isabenö ötjöma mikwawökujusa, Chuluwo̧ ojo'do ötjönö edö kwichoböma. Jejenö ötjönö mikwawökujunö edö kwichobetjö̧ chösöda, otiwa, jö̧ba̧lö.

44Jau María, ichibö ¿dokwa? jö̧ba̧lö akebobe cha̧ja̧kwenama, chukwa'wo okwatjö chitji̧ma o̧'wo̧ ösöwachibanö yu̧ku̧ibatö. 45Ja̧danö baikwö yötawakwö María: Duluwo̧ ökwönö yöawina ösödö, isabenö yöawi̧danö badekwachakobe jö̧ba̧lö kwösödiökwe, isabenö Dios otiwanö pjaatokoja—

jö̧ba̧lö yöjawinobe Elisabetma Maríanöma.

María Diosnö ösödö yöja̧lina wene

46Jejenö yöjawioko, Maríama yöja̧linobe:

—Cho̧'wo̧ ösöwanö chösödobe Chuluwo̧nö, 47ja̧danö cho̧'wo̧ luwo̧ma chö̧jibinö pjabato̧ Diosnö omukwatö o̧'wo̧ ösöwachibanö ö̧jobe, 48Diosma ötjö jo̧ba ömöayuju mikwawökujunö lȩlö̧jinö edobetjö̧. Ja̧danö jejenö lȩlö̧jinö ötjönö edobetjö̧, tupakwö bajalenö okobe deinö tji̧tji̧mu tupadanö jojodöma ötjönö ötjabikobe, Dios otiwanö pjaatinoko jö̧ba̧lö. 49Jau, okobe jwiinö juluwo̧ Diosma sulabe jwibo̧, ja̧danö inesö otiwa jawa pjaatajabe ötjönö. 50Jo̧bama isabenö jo̧banö yebabinö ösödadönö pjabato̧, ja̧danö tji̧tji̧mu tupadanö jojodönöbi, jobadö tji̧tji̧mu tupadanö jojodönöbi lȩlö̧jinö edo̧. 51Iteda ujulu i̧sebö Diosma jojodö edajitjökö jawa öwawinö i̧sebajabe.

Diosma tjomajadenö, Otiwadösa, jö̧ba̧lö omukwatadönö jelobetenia a'dewö loajabe, 52ja̧danö la'aka luwedönö luwedö ba̧kwawakatjö meatö loajabe, jo̧kwaijayonö, Mikwawöködösa jö̧ba̧lö omukwatadönö kabebö ujunajabe Diosma, Bidöma otiwadö, jö̧ba̧lö. 53A̧wi̧chi̧ tjö̧badönöma tjomeawinö tjukwobö otiwa jawa iyajabe, jo̧kwaijayonö nöinö juna̧ladönö jwibadö batjibanö a'dewö loajabe.

54-55Diosma da'dödönö yöbawö ujuninobe, ökwödönö otiwanö pjaatakwa̧ma. Jau, Diosma damötjö Abrahamnö yöbawö ujuninobe, Ökwönöbi kwi̧tji̧mu tupadanö jojodönöbi ba̧kwȩlö̧jatebö lȩlö̧jinö edö pjatatocha, jö̧ba̧lö. Ja̧danö, ja̧ yöbawö ujunina wene o̧'wo̧ jwiibinokobe Diosma. O̧'wo̧ jwibibökönö otiwanö lȩlö̧jinö edö pjaatajabe Diosma ökwödö iteda ömöayedö Israel jojodönö—

jö̧ba̧lö yöjawinobe Maríama.

56Ja̧danö, Maríama Elisabetkwö jö̧jinobe ja̧wo̧dö wa̧medukwa jenanö baledibanö, ja̧danö jemi ikenama jitebobe jȩwa̧jinobe.

Juan Ojwenö Bu̧dato̧ ötjabökwenö jemina wene

57Elisabet jitji̧nö jemakwa̧ möle badekwachenama, iso̧nö jeminobe. 58Ja̧danö, jipjeanö ju̧kwadöbi, jömöledöbi tja̧ja̧kwinobe, Duluwo̧ lȩlö̧jinö edö jitji̧nö jemobö pjaatina wene, ja̧danö jejenö a̧ja̧kwö, Elisabetkwö tjo̧'wo̧ ösöwachibanö tjösödinobe.

59Jitji̧nö jemaja̧ ikena jelemutjö wa̧pötakwa möle baibenama, tjemu ötade bajalesado̧ 'wibebö lotjinobe, ja̧danö jojodöma ichö tjemunö abe'do imi Zacarías jö̧ba̧lö tjimidobö tjomukwatinobe.

60Jo̧kwaijayonö, ojo'doma atadö yöja̧linobe:

—Chitji̧ma Zacarías jöba̧löma mikwö̧kö̧. Juan jö̧ba̧lö mikwo̧—

jö̧ba̧lö. 61Jejenö yöja̧liawö̧:

—Kwömöledötjö bakwo̧bi Juan mikwo̧ma deobe. Juan jö̧ba̧lö kwimidoko—

jö̧ba̧lö tjatadinobe. 62Ja̧danö tjemu abe'donö tjömamunö i̧sebö abebö tja̧ja̧kwinobe, ¿Diya̧ imi kwimidobö kwösödobeda? jö̧ba̧lö.

63Abebö tja̧ja̧kwenama, abe'do Zacaríasma ömamunö i̧sebö aebinobe, wȩyukwöte ösöte tjichejebobö. Ikenama Zacaríasma tjichejebajötenö iwȩyudinobe, Chitji̧ imima Juan mikwo̧, jö̧ba̧lö. Jejenö iwȩyudiawö̧, ¿Tajijö? ¿Tajawedö Juan jö̧ba̧lö tjimidobejö? jö̧ba̧lö tjomukwatinobe.

64Ikenama, Juan imi iwȩyudaja̧ ikena, Zacarías iwene jwiaja̧ma omönanö yöa̧libinobe, yemidanö iwene tjeachajinobe, Zacarías iwenema. Ja̧danö, juluwanö Diosnö ösödö yöa̧linobe Zacaríasma. 65Jejenö yöba̧lö̧kö̧ yöa̧li̧ tjeachajiawö̧, okobe deinö tjipjeanö ju̧kwadöma yetjaibinobe, ¿Tajijö? jö̧ba̧lö, ja̧danö ja̧ baledina wene okobe jwiinö Judea niji mö'ösa'ijutjö yötjawinobe. 66Okobe deinö ja̧ wene a̧ja̧kwadöma ja̧ baledina omukwatö yötja̧lakwawinobe, Jo̧banö tjimidena jejenö baledatjö̧ma, tjemuma ¿dakwö bo̧ ö̧jakwajö? Isabenö mikwawo̧ ö̧jakwo̧ena bite tjemuma, jö̧ba̧lö. Jejenö tjomukwatinobe, Duluwo̧ma isabenö jo̧banötjö iteda ujulu öwaetjöda i̧sebinobetjö̧.

Zacarías Juan otidö ö̧jakwa̧ yöawina wene

67Jemi ikenama, Dios O̧'wo̧ Luwo̧ jo̧ba o̧'wo̧ luwo̧nö yöawonö, Zacaríasma yöawinobe, tupakwö baledakwa̧ma:

68Isabenö Israel jojodö Duluwo̧ Diosnö dösödobö jo̧be, iteda ömöledönö otiwanö lȩlö̧jinö edinobetjö̧, ja̧danö tjö̧jibinö pjaatobetjö̧. 69Jo̧bama dö̧jibinö pjabato̧nö weajabe, la'aka luwo̧ Davidmine itji̧ tupadanö jojonö, 70damötjö iteda yöawi̧ yöbawadönötjö yöawinadanö.

71-75Jau, damötjö Diosma iteda isabenö pjaatakwa̧ wene yöbawö ujuninobe da'dömine Abrahamnöma, ja̧danö ju'wedö da'dödönöbi yöbawö ujuninobe, isabenö lȩlö̧jinö edö pjaatakwa̧ wenema. Ja̧danö, Dios yöawi̧ yöbawadöma damötjö yötjawinobe, baikwö: Diosma isabenö ja̧ yöbawö ujunina wenema o̧'wo̧ jwiibökakobe, isabenö jö̧a̧li̧danö pjaatakobe. Iteda yöbawö ujunina wene omukwatö, döpöjojodötjö, okobe deinö ökwödönö öpöjödadötjö, dö̧jibinö pjaatakwo̧ Diosma. Jejenö dö̧jibinö pjaatakobe Diosma, Dios öba a'otjö sulabe jwibadö dö̧jakobetjö̧, ja̧danö otiwanö ja̧bö ju̧kwadö ja̧nö, ba̧kwȩlö̧jatebö Dios öba a'otjö yebabökönö jo̧ba wei̧ ja̧bö dö̧jakobetjö̧, jö̧ba̧lö yötjawinobe.

Jobekwö yötjawinobe Dios yöawi̧ yöbawinadöma, ja̧danö yötjawinadanö Diosma isabenö dö̧jibinö pjabato̧nö weajabe, iteda yöbawö ujunina wene omukwatö.

76Ja̧danö chitji̧ Juan, ökwönö okobe jwiinö juluwo̧ Dios yöawi̧ yöbawo̧ jö̧ba̧lö ötjabikwo̧ja, Duluwo̧ jweinö i̧'yakwa̧ otidö jo̧ba i̧'yakwa̧ abönö kwi̧'yakobetjö̧. 77Jau chitji̧, jojodönö yökawakwo̧ja, Dios tjusula söbebö loobetjö̧ tjö̧jibakwa̧ tjöwaisachibobö. 78Jau chitji̧, Diosma dösölö̧jinö lȩlö̧jinö edo̧obetjö̧, mölejȩbetjö yȩayi dewachena dejato̧ma omönanö dejatö ichakobe, 79yȩa'wo okwa ju̧kwadö woawa juluwawö̧nöma dewinö idejatobö, ja̧danö wene jwiama mana i̧sebobö, wene jwibö ja̧ mananöda otiwanö kwedachakobetjö̧,

jö̧ba̧lö yöawinobe Zacaríasma itji̧ Juannö, tupakwö baledakwa̧ yöbawö.

80Juanma otiwanö öda̧peachinobe, ja̧danö o̧'wo̧ luwo̧nö ujuluwachibanö ö̧jinobe, ja̧danö jojodö deobe ö̧jinobe, Israel jojodö tjöba a'otjö yöawakwa̧ möle badekwachenanö kabatö.

Currently Selected:

Lucas 1: WPC

Highlight

Copy