Marcos 16

Dios Jesúsnö tjeachajinö ja̧ina wene

1Ju'wi möle yi̧bena, otikwökö möle baledaja̧ ikena, María Magdalenabi, Jacobo ojo'do Maríabi, Salomébi omeasobu emijadötö, Jesúsnö dubebö tji̧'yakwedö. 2Ju'wi dewachö, domingo möle, ajayi möle mikwi̧ möle, yȩayi, 'yi̧jadötö Jesúsnö ödinobekwö. 'Ya̧jadöma ja̧wo̧ laebena ichibijadötö i̧lȩdo̧bema. 3Ina ja'ö 'ya̧nö yöba̧lakwawijadötö:

—I̧lȩdo̧ a'o inawa nöawa, ömökawa tumawobe. ¿Tida pjolatö ujunakwo̧ma? Dea—yöba̧lakwawijadötö. 4Jo̧kwaijayonö, ichibö tjedemi inawa pjolatakwajobeda edijadötö. 5Jo̧kwaobetjö̧ i̧lȩdo̧ okwa tebachijadötö. Tebachibö tjöwaisobekwöchobe tjedemi möayo̧ma, kamijido̧ dewado̧ 'dubawo̧ bi̧jetö. Jo̧banö edö jwiinö yebaibijadötö. 6Yetjaibiökwe Dios weajökwe ángelma jö̧ba̧lijetö:

—Yekabiduwa— jö̧ba̧lijetö—. Chöwaisa kwichaja̧duwama. Ökwödöma Jesús Nazaretso̧nö, towisa'onö bȩbö tjujuninökwenö edö kwichajaduwobe. Yötawaduwakwö: Jo̧bama benama deobe. Yemidanö tjeachajabe. Yemi edaduwi, jo̧banö ödinemi. Deobe. Yemidanö tjeachajabe— jö̧ba̧lijetö—. 7Babema Pedronöbi ju'wedö Jesús öba̧ja̧di̧ waisachadönöbi yökawaduwo da̧ja̧duwi. Jobadönö yökawaduwo, Tjo̧wi̧ Jesús i̧'yajabe Galileabe ökwödö kwi̧'yaduwakwa̧ abönö, jö̧ba̧lö. Jobetjö kwedaduwakwedöja Jesúsnöma, iteda jö̧a̧linadanö— jö̧ba̧lijetö ángelma jobadö ya̧dönöma. 8Jejenö jö̧a̧lawö̧, jobadö ya̧döma, ¡Ayö!, jö̧ba̧lö tjö̧tjawibanö yetjaibobetjö̧ omönanö labekwajijadötö i̧lȩdo̧ okwatjö. Ikenama, ángel wei̧danö, Ju'wedönö yökawaduwo, jö̧ba̧lö, jobadö ya̧döma yetjabobetjö̧ yöbawijöködötö ju'wedönöma.

Jesús María Magdalenanö öwawachina wene

9Ikenama Jesúsma, ajayinö möle, domingo möle yȩayi, jo̧ba tjeachaja̧ ikena, María Magdalenanöda öwawachijetö. Jobujuma ajayima jelemutjö du̧ju̧tajanö jo̧'wo̧ luwo̧nö sulabedö tjö̧jinoko. Jesúsma, ajayima, jobadö jo̧'wo̧ luwo̧nö sulabedönö a'dewö lobijetö, jobujunö pjabatö. Ja̧danö, jobujunöda öwawachijetö Jesúsma, tjeachaja̧ ikena, ju'wedönö ina öwawachökönö. 10Jobujuma, Jesúsnö edajaju, omönanö Jesús öba̧ja̧di̧ waisachadö tjo̧'wo̧ tjo̧bekwö tjubudekwabobekwö 'yi̧jotö, yöbawö. Ichibö yöbawijotö:

—Jesúsnöma chedatö—jö̧ba̧lö. 11Ja̧danö, jejenö, Jesúsma ina 'yaba̧lo̧nö chedatö, jö̧ba̧lö, yöjawijayonö Jesús öba̧ja̧di̧ waisachadöma öpöjödijadötö, Omöna yöba̧luju, jö̧ba̧lö.

Jesús öba̧ja̧di̧ waisachadötjö du̧ju̧tajanö öwawachina wene

12Jemi ikenama Jesús öba̧ja̧di̧ waisachadö du̧ju̧taja mana tji̧'yena jelo̧danö ichejekwo̧ öwawachijetö, Jesúsma. 13Jobadöma Jerusalénbe ȩwa̧jö, ju'wedö öba̧ja̧di̧ waisachadönö yötjawijayonö jobadö yötjawi̧bi öpöjödijadötö, Omöna yöba̧ladö, jö̧ba̧lö.

Jesús iteda öba̧ja̧di̧ waisachadönö böjȩ okobe jwiinö yöbawö tji̧'yobö weina wene

14Jemi ikenama Jesúsma, iteda öba̧ja̧di̧ waisachadö a̧li̧nösamutjö bakwo̧nö kwanö tjöba̧jena öwawachijetö. Labinö jö̧ba̧lijetö jobadönöma:

—Ökwödöma ina kwa̧ja̧kwaduwokobe. Kwomajadeduwi 'dibadöja— jö̧ba̧lijetö jobadönö, ju'wedö itenöda tjeachajo̧nö edajadö yötjawi̧ tjöpöjödajobetjö̧. 15Ikenama Jesúsma jö̧ba̧lijetö jobadönö:

—Wetaduwakwö. Böjȩ okobe jwiinö 'ya̧duwi Dios otiwa jawa wene okobe deinö Dios otidinawö̧nö yökawaduwo. 16Bakwo̧, ja̧ otiwa jawa wene ösödö, Jau Jesúsma dö̧jibinö otido̧, jö̧ba̧lö, ösödo̧nö, ojwenö ubu̧datajökwenöma jo̧ba ö̧jibinö otidökwe Diosma. Jo̧kwaijayonö, Jesúsnö öpöjödo̧ma Dios lȩebi̧ baibenama baledakwo̧. 17Ja̧danö, ötjönö tjo̧'wo̧ wana̧ladöma, Diosma iteda ujulu tji̧sebobö pjaatakobe. Ja̧ ujulu tji̧sebi̧ma biya̧: Ötjö chiminö jojodö tjo̧'wo̧ luwo̧nö sulabedönö a'dewö lotjakwedö, ja̧danö, ju'wedö tjiwene wajwitjijayonö yötja̧lakwedö, 18ja̧danö, a̧ko'danö matjitjö̧ma suli̧ waekwökakwawö̧, ja̧danö, niatakwawobu tjowitjö̧bi tjö'wöchökakwedö, ja̧danö, jobadöma ö'wöchadönö matjemi tjö'wöchi̧ jwiinö otiwanö batjibanö tjotidakwedö. Jejenö ötjönö tjo̧'wo̧ wa̧na̧ladöma Dios ujulu tji̧sebakobe— jö̧ba̧lijetö Jesúsma öba̧ja̧di̧ waisachadönöma.

19Ikenama yöba̧lö kaatena Diosma mölejȩbe kaekwajinö ja̧bijetö Jesúsnöma. Jobe mölejȩbema Jesúsma Dios öwaisobekwöchobe bamatijetö. 20Ja̧danö, Jesúsnö kaekwajinö ja̧ajabe okobetjö Jesús öba̧ja̧di̧ waisachadöma Dios otiwa jawa wene yöbawö 'yi̧jadötö böjȩ bakwameachibanö, Jesús wei̧ a̧ja̧kwö. Yötjawonö tjuluwo̧ Jesúsma iteda ujulu tji̧sebobö pjabatijetö. Ja̧danö, Jesús ujulu tji̧sebiawö̧ jojodöma, Jau, jobadöma Dios iwene jweinö yöbawadö, jö̧ba̧lö, ösödijadötö. Isabenö, Jesús öba̧ja̧di̧ waisachadöma otiwa jawa wene yöbawöbi Jesús ujulu i̧seböbi kwebachiabijadötö.

Tjo̧wi̧, biya̧data.

Currently Selected:

Marcos 16: WPC

Highlight

Copy