Génesis 21

Sara jitji̧nö jemina jawa

1Ja̧danö, Isabenö Jo̧ Diosma Saranö ösödö pjabatijetö. Jo̧ba ajayinö yöbawö ujuninadanö, Sarama jitji̧nö jemakobe, jö̧ba̧lö̧ badekwachinö pjabatijetö. 2Jo̧kwaobetjö̧ Sarama metu'wo ji̧jotö. Ja̧danö, Abraham pöe ö̧jena itji̧nö emijotö Sarama, Dios jö̧a̧lina möle. 3Abrahamma midijetö itji̧nö, Sara jemajökwenöma Isaac, jö̧ba̧lö. 4Ja̧danö, itji̧nö jemaja̧ tupakwö jelemutjö wa̧pötakwa möle baledibajena Abrahamma itji̧ ötade bajale sa̧do̧ 'wibebö lobijetö, Dios weinadanö. 5Ja̧danö, Abrahamma cien a̧yo bo̧ ö̧jena itji̧nö emijotö Sarama.

6Ja̧danö, Sarama jö̧ba̧lijotö:

—Diosma pjaatajabe ötjönöma cho̧'wo̧ ösöwanö otobö. Ja̧danö, okobe deinö ya̧döma chitji̧nö chemaja̧ yötjawi̧ a̧ja̧kwö tjo̧'wo̧ ösöwanö otjakobe, otiwanö jemajabe, jö̧ba̧lö. 7¿Ti yöa̧linajö Abrahamnöma, Kwilekwo Sarama jitji̧nö o̧do'bi̧ ojwö jö̧jakwuju, jö̧ba̧lö? Jejenö yötja̧li̧ma la'akatjöda yötja̧linökena. Jo̧kwaijayonö babema Abraham itji̧nö chemajabe. Jao, chilekwe jwiinö pöe ö̧jijayonö itji̧nö chemajabe— jö̧ba̧lijotö Sarama.

8Ja̧danö, Isaacma idaö̧kö pöe baibenama ojo'doma o̧do̧'bi̧ 'döbebijotö. Ja̧ mölema Abrahamma fiesta nöinö junijetö.

Agarnö Ismaelnö a'dewö loina jawa

9Ju'wi möle, Sarama edijotö Egipto jojosuju Agar jitji̧nö, Abrahamtjö jitji̧nöma sulabenö jö̧ba̧libö obobe isuda jitji̧nö, Isaacnöma. 10Jo̧kwaioko Sarama Abrahamnö webijotö:

—Chilekwe, a'dewö lobi chömöayujunöma, jitji̧kwöda. Chöpöjöda jitji̧ma ö'wö bakibaja̧ okobe ökwö kwitea kwujunibi̧tjö emoböma. Chitji̧ Isaacda ökwö kwiteaja̧ma emakwo̧— jö̧ba̧lijotö.

11Jejenö jö̧ja̧lökwe jwiinö o̧'wo̧ tjo̧achibijetö Abrahamma, Ismaelbi ötjö chitji̧, jö̧ba̧lö. 12Jo̧kwaijayonö Diosma jö̧ba̧lijetö Abrahamnöma:

—Abraham, kwo̧'wo̧ tjo̧kekwa kwitji̧ Isamaelnöbi, kwömöayuju Agarnöbi. Ötjö yöbawö chujunina chiwenema, ökwötjö tupadanö jojodöma tjö̧bajekwachakobe, jö̧ba̧lö, kwitji̧ Isaacda omudawö chujuninökwe, jo̧batjöda latjebobö. Jo̧kwaobetjö̧ Sara weji̧danö a̧ja̧kwi, kwömöayuju Agarnö, jitji̧ Ismaelnö a'dewö loköbo. 13Jo̧kwaijayonö Ismaelma, jo̧babi ökwö kwitji̧obetjö̧ jo̧batjö tupadanö jojodönö tjitebonö tjöba̧jekwachinö pjatatakwo̧sa— jö̧ba̧lijetö Diosma Abrahamnöma.

14Ja̧danö, ju'wi dewachö Abrahamma yȩayi wilubö a̧laibö panbi, ojwiyo, i̧sȩdo̧tjö̧ otikwa'wonö e'ewö 'yi̧jetö Agar jö̧jobekwö. Ichibö pan, ojwiyo okwa'wo iyijetö Agarnöma, jöböbe'onö wa̧nö. Ikenama, bite kwitji̧nöma öbibö 'ya̧wi̧, jö̧ba̧lö, jelobe ji̧'yobö webijetö.

Labebajajuma Beerseba mejenöda wajwibö kwebachijotö. 15Jemi tupakwö, ojwiyo i̧sȩdo̧tjö̧ otikwa'wonö okwobu okobe jwiinö tjowajena Agarma jitji̧nö junibijotö towi ja'yuwowi la'aka. 16Junibö jemi tupakwö cien metros jenanö 'ya̧jaju ba̧nö jwöbeba̧lijotö ¡chitji̧we! ö'wöchi̧ma chedökö, jö̧ba̧lö, isudada. Ja̧danö, jobe ba̧nö nöinö budekwabijotö.

17Ja̧danö, Diosma Agar jitji̧ ubudekwi̧ a̧ja̧kwö mölejebetjö webijetö ángelnöma. Jo̧ba Dios weajökwe ángelma jwöbijetö Agarnö:

—Agar ¿taji waekwaja̧da? Yebabökönuwi. Diosma kwitji̧ ubudekwi̧ a̧ja̧kwajabe. 18A̧la̧ibi kwitji̧nö kabebö pjabataji, ömamunö do̧batö. Agar, Diosma baikwö yöawobe: Bitetjö tupadanö jojodönö tjitebonö tjöba̧jekwachinö pjatatakwo̧sa, jö̧ba̧lö. Jo̧kwaobetjö̧ kabebajinö— webijetö Dios weajökwe ángelma Agarnöma. Jejenö weajokoma jitji̧ ö̧jobekwö 'ya̧nö kabebijotö. 19Ikenama Diosma pjabatijetö Agarnöma ojwese'do jedobö. Ja̧danö, jobekwö 'ya̧nö ojwiyo owawa'wonö wabö ȩwa̧jö iyijotö jitji̧nö owobö.

20-21Ja̧danö, jemi tupakwöma Diosma te'ada̧lijetö Ismaelnöma, öda̧peachonö pöe baibenanö. Jo̧bama Parán mejenö ja̧nö da̧peachijetö. Jobe ja̧nö na̧yu̧nu̧bi̧ya 'böbawö waisachijetö. Ja̧danö, ojo'doma jo̧ba ilekwonö ichejebijotö Egipto nijitjö.

Abimeleckwö Abrahamkwö pjabatakwawö yöbawö tjujunina jawa

22Ja̧danö, ju'wi möle la'aka luwo̧ Abimelecma, guardia tjuluwo̧ Ficol mikwo̧kwö 'yi̧jetö Abraham ö̧jobekwö. 'Ya̧jo̧ ichibö jö̧ba̧lijetö Abrahamnöma:

—Abraham, chedemi Diosma ökwökwö pjabatö ö̧jobe, okobe jwiinö kwö̧ji̧ma. 23Jo̧kwaobetjö̧ Dios öba a'otjö kwiwene yöbawö juni baikwö: Ötjönöbi, chitji̧nöbi, ötjötjö tupadanö jojodönöbi jweinöda yöba̧lö ja̧köbakwo̧ja. Abraham, ötjöma dösölö̧jinö chö̧jobe ökwökwö. Jo̧kwaobetjö̧ jejenö dösölö̧jinö kwö̧jo ötjökwöbi, chömöledökwöbi— jö̧ba̧lijetö.

24Jejenö jö̧a̧liökwe Abrahamma atadijetö:

—Jao otiwa. Yöka̧li̧danö, Dios öba a'otjö, chiwene yöbawö chujuna, ötjöma jweinö yöba̧lö ja̧takwo̧sa ökwönöbi, kwitji̧nöbi, ökwötjö tupadanö jojodönöbi, jö̧ba̧lö. Ja̧danö, Dios öba a'otjö yöta̧la: Yöta̧la̧ja̧tjö wainö ja̧titjö̧ma Dios lȩebakwo̧sa— jö̧ba̧lijetö.

25Ikenama Abrahamma ju'wi jawa, belö baledina jwöbeba̧lö yöba̧lijetö Abimelecnöma:

—Chuluwo̧, kwömöayedöma belö 'dötjebinobe ökwödö dojwese'do sodine'do, idöda tjojwese'dodanö tja̧'delobö— jwöbeba̧lö yöba̧lijetö.

26Jejenö yöa̧lökwe:

—Wajwita tidöda jejenö sulabenö 'döbebinadöma. Ötjöma ja̧ baledinama babeda cha̧ja̧kwa. Ja̧ baledenama yökawinokobe— atadijetö Abimelecma.

27Ikenama, Abrahamma o̧bȩja̧dönö, pa̧ka̧yö̧nö Abimelecnöma iyijetö. Jejenö Abrahamkwö Abimeleckwö tjiwene yöbawö junijadötö. 28Jemi ikenama ju'wedö jelemutjö du̧ju̧tajanö o̧bȩja̧dö ya̧dönö 'da̧batö ichejebö wainö junijetö. 29Jejenö o̧bȩja̧dö ya̧dönö wainö ujuniökwe Abimelecma abebö a̧ja̧kwijetö Abrahamnöma:

—Idöma ¿tajawedö wainö kwujunajawö̧da?— abebö a̧ja̧kwökwe:

30—Bidö jelemutjö du̧ju̧tajanö o̧bȩja̧dö ya̧dönö ökwönö chiya. Ja̧danö, bidö chiyawö̧ma jojodö tjöwaisinö tjöwanekwachobe, be'do ojwese'doma Abraham soine'do, jö̧ba̧lö— atadijetö Abrahamma Abimelecnö. Abimelecma Abraham iyi̧ ösödö emijetö.

31Jejenö baledobetjö̧ jobe tjö̧jemima, Beerseba, jö̧ba̧lö midijadötö, jobema Abimeleckwö Abrahamkwö Dios öba a'otjö tjiwene yöbawö tjujuninobetjö̧, jweinö yöba̧lö tjö̧jakwa̧ tjiwenema. 32Jejenö jobetjö Abrahamkwö, Abimeleckwö Dios öba a'otjö tjiwene yöbawö junijadötö. Ikenama Abimelecma, Ficolkwö ȩwa̧jijetö filististinas tjitebobe. 33Tjȩwa̧jabe okobetjö Abrahamma towi, tamarisco mikwowi junijetö Abimeleckwö yöa̧lakwawajena. Jobetjö Abrahamma abebö ösödijetö Isabenö Jo̧ Diosnöma, Ba̧kwelöjatebö Jo̧ Diosnöma. 34Ja̧ möle tupakwö ji̧jetö Abrahamma filisteos tjitebonö, lekwe.

Currently Selected:

Génesis 21: WPC

Highlight

Copy